རིགས་པའི་མྱུ་གུ།
དེང་གི་ཆར་ཟླུམ་གཟུགས་གོ་ལའི་ཁྱོན་ཀུན་གོ་ལག་གི་དབང་དུ་བསྒྱུར་ཞིང༌། ཕྱིའི་དཔལ་འབྱོར་གྱི་འཕེལ་ཁ་ཆེ་ཞིང་ནང་སེམས་ཀྱི་ཞི་བདེའི་ནུས་པའི་དཔལ་ཡོན་གྱིས་ཕོངས་ཤིང་།རིག་གནས་ཀྱི་གདེང་འཇོག་ཚད་མཐོར་སླེབས་པའི་དུས་སྐབས་འདིར། འོ་ཅག་གངས་ཅན་པའི་གཞོན་སྐྱེས་ཕོ་མོ་རྣམས་ཀྱི་རང་ནུས་གང་ཡོད་ཀྱིས་རྣམ་དཔྱོད་ཀྱི་འཇུག་པས་མནའ་དེང་གི་ཤེས་བྱ་རིག་པའི་གནས་ལ་ཉིན་མཚན་ལྷོད་མེད་དུ་མངོན་པར་བརྩོན་ཞིང༌། ཤེས་ཡོན་གྱི་སྡིངས་ཆའི་ཐོག་ཏུ་ལང་ཐུབ་ཐབས་བྱེད་དགོས་པ་རྩ་དོན་དང་པོ་དེ་ཡིན། དེ་ཡང་བདག་ཉིད་ལ་བརྙས་པའི་ལེ་ལོའི་དབང་དུ་མ་བཏང་བར་སྤོབས་པ་མཐོ་པོའི་སྒོ་ནས་གོམ་པ་མདུན་དུ་བསྐྱོད་ཐུབ་པར་བྱ་དགོས། རང་རེའི་གངས་ཅན་པའི་ཕ་མེས་ཀྱི་རིག་གཞུང་གཞན་དང་མ་འདྲ་བར་ཁྱད་ནོར་མཆོག་ཏུ་གྱུར་པ་ཞིག་ཡོད་པར་བརྟེན།
དེ་དག་ཤེས་ནས་དད་པ་ཐོབ་པ་ཞིག་དགོས་རྒྱུར་གལ་ཆེ་ཞེས་འཇིག་རྟེན་ཞི་བདེའི་དེད་དཔོན་ཆེན་པོ་མཆོག་གིས་ཡང་ཡང་བཀའ་ཕེབས་ཀྱིན་ཡོད། དེང་རབས་ཀྱི་ཁ་བ་རི་པ་ཚོས་ཀྱང་ཤེས་ནས་དེ་ལ་འཇུག་པར་བྱས་པ་ཡིན་ན། མེས་པོ་གོང་མ་རྣམས་ཀྱི་ཐུགས་དགོངས་བཞིན་དོན་དངོས་དང་མཐུན་པའི་དགའ་སྤོབས་སྐྱེ་ཐུབ་པ་ཞིག་དང༌། སོ་སོའི་ཚེ་འདིར་མི་བཟང་པོ་ཞིག་དང༌། སྤྱི་ཚོགས་ལ་ཕན་ཐོགས་པའི་མི་སྣ་གལ་ཆེན་ཞིག་ཆགས་རྒྱུ་ཡིན་པར་བརྟེན།དེ་ནི་སོ་སོའི་ཁུར་དུ་བབས་པའི་འགན་འཁྲི་ཞིག་ཀྱང་ཡིན། སོ་སོའི་གོ་གནས་མཐོ་དམན་དང་རྣམ་དཔྱོད་བཟང་ངན་ཇི་འདྲ་ཞིག་ཡིན་ན་ཡང༌། དུས་རྒྱུན་དུ་བོད་མི་རྩམ་ཟན་ཞིག་ཡིན་པའི་ཆ་ནས་ང་བོད་པ་ཞིག་ཡིན། བོད་ཀྱི་ཐུན་མོང་མིན་པའི་རིག་གཞུང་སྲུང་སྐྱོབ་བྱེད་པར་ང་ལ་འགན་དབང་ཡོད། དེ་དག་བོད་མི་ཚོས་མ་བསྒྲུབས་ན་སུས་བསྒྲུབ། ཉིན་རེའི་འཚོ་བའི་ཁྲོད་དུ་སོ་སོས་ཐུབ་པའི་བོད་པའི་ཆོས་དང་རིག་གཞུང་དག་ལ་དང་འདོད་དང་དོ་སྣང་བྱེད།བོད་ཆས་གཙང་མ་ཞིག་གྱོན། བོད་སྐད་གཙང་མ་ཞིག་བཤད། བོད་ཟས་གཙང་མ་ཞིག་ཟ། རྒན་པ་ཚོར་གུས་བརྩི་དང་གཞོགས་འདེགས། གཞོན་པ་ཚོར་བཟང་སྤྱོད་ཀྱི་ཁ་བརྡ་བསླབ་བྱ་སོགས་བྱས་ནས་བོད་པའི་ཡ་རབས་བཟང་སྤྱོད་དེ་དག་མ་བརླག་པའི་ཐོག་ནས་བྱ་བ་གང་ཞིག་ལ་ཞུགས་ཀྱང་།བོད་མིའི་དོན་གོ་ཆོད་པ་ཞིག་བྱེད་སྙམ་དུ།དུས་རྒྱུན་དུ་སྐུལ་སློང་འཁྱེར་དགོས། དེ་ལྟར་མིན་པར་བྱ་སྤྱོད་བོད་མིའི་ལྡོག་ཕྱོགས་སུ་ཕྱིན་པའི་ཚེ།བོད་མིའི་དོན་གོ་མ་ཆོད་པ་ཡིན་པས་ཚང་མའི་ཐུགས་ལ་འཇོག་རྒྱུ་གལ་ཆེ། གངས་ཅན་མེས་པོའི་བུ་རྒྱུད་ཀྱི་ཟུངས་ཁྲག་དྭངས་མ་རྒྱུད་ལ་ལྡན་པའི་བུ་ཕྲུག་ཅིག་ཡིན་ཚེ།ས་སྒང་ཧྲིལ་པོའི་སྟེང་དུ་བོད་ཀྱི་ཆོས་དང་རིག་གཞུང༌། ཡ་རབས་སྤྱོད་བཟང་སོགས་གོམས་པ་ལྷུར་ལེན་ལག་བསྟར་ཇི་བཞིན་ཡོད་ཚེ། དྲང་བདེན་ལ་དགའ་བའི་འཛམ་གླིང་གི་མི་སྣ་དག་གིས་མིག་དཔེར་བལྟ་སའི་མི་རིགས་ཤིག་ཡིན་པ་སྨོས་མེད་ཁར།སླད་མར་ཡང་བུ་རབས་ཚ་རྒྱུད་རྣམས་སུ་དེ་བཞིན་རྒྱུན་གནས་ཐུབ་པར་འབད་འབུངས་ལྷོད་མེད་དུ་གནང་སྟེ།མེས་པོས་ཤུལ་དུ་བཞག་པའི་འཛམ་གླིང་གི་ཁྱད་ནོར་བོད་ཀྱི་བཟང་པོའི་རིག་གཞུང་དེ་དག་མི་ཉམས་རྒྱུན་འཛིན་བྱས་ནས། གཞིས་བྱེས་སུ་གནས་པའི་གངས་རིའི་གདུང་བརྒྱུད་གཅིག་པའི་སྤུན་མཆེད་ཚོས་དམ་ཚིག་མཐུན་ལམ་ཆིག་སྒྲིལ་འབད་འབུངས་ལས།དུས་ནམ་དུ་ཡང་མི་ལྷོད་པར་འཛའ་བརྩེའི་ལག་གདངས་གཅིག་ཏུ་སྒྲིལ་ནས།གནས་སྐབས་བདེ་སྡུག་ཙམ་དང་བཙན་གནོན་གཡོ་སྒྱུའི་བྱེད་ཐབས་སླུ་བྲིད་འོག་ཏུ་མ་ཚུད་པར་རིག་པ་སྒྲིམ་དགོས་པའི་དུས་ལ་བབས་ཡོད།
རིགས་པའི་མྱུ་གུར་འབོད་པས་ཕྱི་ལོ་༢༠༢༥ཟླ་བ་༢ཚེས་༡༦ཉིན་ལས་ཤག་ཏུ་བྲིས།