འབྲི་རུ་སྐལ་ལྡན།
དེང་སྐབས་སྤྱི་ཚོགས་ཁྲོད་དུ་བརྩི་མཐོང་བྱེད་སའི་མི་ཆེན་དང་དཔོན་ཆེན། བླ་མ་དང་དགེ་བཤེས།ཆབ་སྲིད་པ་དང་དགེ་རྒན་སོགས་མི་ཆེན་ཡོད་ཚད་ནས་ཡོད་ཚད་ཀྱི་མགྲིན་སྒོ་ནས་དྲག་འཆར་ལྟར་འབབ་པ་དང་།རླུང་ནག་ལྟར་འཚུབ་བཞིན་པ་ནི་ཕོད་པ་ཞེས་པའི་ཚིག་འདི་རེད།དེ་ལ་ཡང་དབྱེ་བ་གསུམ་དུ་ཕྱེ་སྟེ་བཤད་པ་མ་ཟད།ཕོད་པ་གསུམ་གྱི་ཚིག་དོན་ནི་ཉན་མཁན་ཡོད་ཚད་ཀྱིས་གོ་ཤག་ཤག་གི་བཤད་པ་ལས་དེ་ལ་ཚིག་གི་འགྲེལ་བཤད་མེད་ལ།ཡག་སྡུག་གི་གོ་དོན་གསལ་ཁ་མེད་པར་ཡང་ཡང་ཤོད་བཞིན་འདུགདབང་རྟུལ་པ་བདག་གིས་ཚིག་འདི་ཉན་ན་གོ་མི་བདེ་བ་དང་།བསམ་ན་དོན་མི་གོ་པར་ཡག་པོ་ཞིག་ཡིན་ཤག་བྱས།བཤད་པ་པོ་དག་གིས་གཅིག་རྗེས་གཉིས་མཐུད་དུ་བཤད་དེ་མི་ལོ་ཉི་ཤུ་འདས་སོང་ཡང་གཏིང་ཚུགས་པའི་གོ་དོན་ཞིག་རྙེད་པ་ཕར་བཞག། རག་རིམ་ཙམ་གྱི་འགྲེལ་བཤད་ཅིག་ད་དུང་རྙེད་མ་ཐུབ།སྤྱིར་ང་ཚོ་མི་བུ་དཀྱུས་མ་དང་སློབ་མ་རྣམས་ཀྱི་སྒྲ་འཛིན་རྣ་བའི་བུ་ཁ་རུ་ལོ་རེ་ནས་ལོ་རེ་དང་།ཟླ་རེ་ནས་ཟླ་རེར་ཇེ་མང་དང་ཇེ་མང་དུ་རྒྱུ་བཞིན་ན་ཡང་ཕལ་ཆེར་གྱིས་བསམ་རྒྱུ་གཅིག་དང་།དྲན་རྒྱུ་གཅིག་བྱས་ཏེ་ཚིག་དོན་ཡག་པོ་ཞིག་ཡིན་ཤག་ལས་དཔྱད་པ་བྱས་མེད་པར་སྣང་།
ཡང་བསམ་ཕོད་པ་དང་། བཤད་ཕོད་པ།སྒྲུབ་ཕོད་པ་བཅས་ཀྱི་དག་ཆ་དང་ཚིག་དོན་ཅི་ཡིན་ཚིག་མཛོད་ཁག་ཏུ་མི་གསལ་ཡང་བོད་ནང་དྲ་ཚིག་འགའ་ལས་དག་ཆ་འདི་ལྟར་བྲིས་པ་དེ་ལྟར་ཡིན་ནམ་སྙམ།མིང་ཚིག་འདི་དག་ཚིག་མཛོད་ཁག་ཏུ་གསལ་བ་མ་མཐོང་ཡང་ཕོད་པ་ཞེས་པའི་མིང་ཚིག་གི་གོ་དོན་ཐད་ཚིག་མཛོད་ཁག་ཏུ་བལྟས་ན་ཐུབ་པ་དང་། ནུས་པ།སྙིང་སྟོབས་ཆེན་པོ་སོགས་ཀྱི་དོན་ལ་འཇུག་པར་བཤད་པས།གོ་དོན་འདི་འདྲ་ཞིག་ལ་གཞིགས་ན་ཚིག་འདིས་དམིགས་བསལ་གྱི་ཁྱད་ཆོས་ལྡན་པའི་དོན་གནད་ཅིག་ཡོད་དགོས་པ་ལས་གང་དྲན་དྲན་སྦྱར་དུ་མི་རུང་བ་དང་། བཤད་དུ་མི་རུང་བ་མངོན་གསལ་རེད།དེའི་ཕྱིར་ཕོད་པ་བཤད་མཁན་ཚོས་ཀྱང་གོ་དོན་གསལ་ཁ་ཅན་ཞིག་མེད་པར་སྙིང་སྟོབས་ཆེན་པོའི་དོན་ལ་འཇུག་པར་རག་རིམ་ཙམ་བློ་ཡུལ་དུ་བཟུང་ནས་བཤད་པ་དང་ཤོད་བཞིན་པ་ཁོ་ན་ཡིན་པ་ལས།ཕོད་པ་གསུམ་དུ་འབྱེད་བ་པོ་ཕལ་ཆེར་ནས་བསམ་ཕོད་པ་དང་།བཤད་ཕོད་པ། སྒྲུབ་ཕོད་པ་ཞེས་ཤོད་བཞིན་འདུག་ལ།མིང་ཚིག་འདི་དག་ནི་བསམ་དང་། བཤད།སྒྲུབ་ཅེས་པའི་ལས་ཚིག་གསུམ་གྱི་ཚིག་གྲོགས་སུ་ཕོད་པ་སྦྱར་བས་སྙིང་སྟོབས་གོང་སྤེལ་གཏོང་ཆེད་དུ་བོད་དུ་དུས་འགྱུར་བྱུང་རྗེས་སུ་གསར་བཟོ་བྱས་པའི་མིང་ཚིག་གསར་པ་ཞིག་ཡིན་པ་གསལ་ཡོད་པར་སྙམ།དེང་སྐབས་མི་ཆེན་མང་པོས་བསླབ་བྱ་རང་གིས་བྱས་ཏེ་ལག་ལེན་བསྟར་མཁན་དག་ལ་དགག་པ་དང་སྐྱོན་བརྗོད་སྣ་ཚོགས་བྱས་དང་བྱེད་མུས་ཡིན་པར་མཐོང་བྱུང་ལ།གང་ལྟར་མིང་ཚིག་གསར་པ་ལ་གོ་དོན་གསར་པ་ཞིག་ཡོད་དགོས་པ་ལས་གོ་དོན་རྙིང་པ་ལ་རྗོད་བྱེད་ཀྱི་ཚིག་གསར་པ་བཟོས་ན་དགོས་དོན་ཆུང་བ་ལས་དམིགས་བསལ་ཞིག་གཏན་ནས་མིན།རྒྱུ་མཚན་དེ་ལ་བརྟེན་ནས་མིང་ཚིག་འདི་དག་གི་དོན་ལ་བསམ་ཞིབ་བྱ་རྒྱུ་ནི་དགོས་གལ་ཆེ་བ་དང་།སོ་སོས་བསམ་ན་མིང་ཚིག་འདི་དག་ནི་བོད་དུ་རིག་གནས་གསར་བརྗེ་བྱུང་རྗེས་སུ་གསར་བཟོ་བྱས་པའི་ཐ་སྙད་ཅིག་ཡིན་པས་གོ་དོན་ཡང་མི་འདྲ་བ་ཞིག་ཡོད་ངེས་འདུག་པས་ཅུང་ཙམ་བརྗོད་ན།
༡༽མི་སོ་སོའི་བསམ་བློ་གཏོང་བའམ་བློ་ཡུལ་དུ་ཤར་བ་ཡོད་ཚད་ལ་བསམ་ཕོད་པ་ཞེས་སྦྱར་དུ་མི་རུང་བ་ཀུན་གྱིས་ཤེས་པར་ངེས་ལ།དངངས་སྐྲག་ཅན་ནམ་འཇིགས་སྣང་ཅན་གྱི་བསམ་བློ་ཡོད་ཚད་ལ་ཡང་སྦྱར་དུ་མི་རུང་བ་མ་ཟད།རྒྱ་ཆེ་བས་མ་འོངས་པའི་སོ་སོའི་དམིགས་ཡུལ་ཆེན་པོ་འཛིན་པ་ལ་ཡང་སྦྱར་དུ་མི་རུང་པར་སྙམ།འོ་ན་འདིའི་འཇུག་ཡུལ་མེད་དམ་སྙམ་ན་དེ་ཡང་མིན།དེ་ནི་དབང་འཛིན་པ་དང་། དཔོན་ཆེན། མི་ཆེན། བླ་ཆེན།དགེ་རྒན་དང་དགེ་བཤེས།ཕྱུག་བདག་སོགས་སྒེར་སྤྱོད་ལྟ་བ་ཅན་གྱི་ལས་ཕྱོགས་རྣམས་མི་དམངས་གི་ཁེ་ཕན་དང་མཐུན་མིན་བརྟག་དཔྱད་ཐུབ་པའི་བློ་དང་དེ་དག་ལ་ཁ་གཏད་བྱེད་ནུས་པའི་བསམ་བློར་འཇུག་པ་དང་།ཡང་སྔོན་གྱི་གོམས་སྲོལ་མ་རུང་པ་དང་།ཆོས་ལུགས་ཀྱི་བསམ་བློ་རྙིང་པ།དམངས་ཕན་མེད་པའི་ཆབ་སྲིད་ཀྱི་ལྟ་བ།ཡར་རྒྱས་མེད་པས་སྤྱི་ཚོགས་མཆོག་འཛིན་གྱི་བསམ་བློ་སོགས་ལ་འགོག་རྒོལ་བྱེད་ནུས་པའི་བསམ་བློ་དང་དེ་ལ་དཔྱད་ཞིབ་བྱེད་པའི་རྣམ་དཔྱོད་སོགས་ལ་འཇུག་པ་ཡིན། ཡིན་ན་ཡང་།ཐ་སྙད་འདིའི་གོ་དོན་མ་ཤེས་པའི་གཏམ་བཤད་པ་མང་པོས་སྐད་ངག་སྙན་པོ་དང་རྫིག་པོས་མི་སོ་སོ་ལ་བསམ་ཕོད་པ་དང་།བཤད་ཕོད་པ། སྒྲུབ་ཕོད་པ་བཅས་ཚང་དགོས་རབས་ཡང་ཡང་བཤད།གཏམ་མཇུག་རྫོགས་རྗེས་སུ་དམངས་ཁྲོད་ནས་བསམ་ཕོད་པ་དང་།བཤད་ཕོད་པའི་ཐོག་ནས་སྐྱོན་ལ་ཕོག་པའི་དྲི་བ་རེ་བསྐུལ་ཚེ།སྦྲུལ་ལ་ཚེར་ལྕག་བརྒྱབ་པ་ལྟར་སྣང་བའི་མཁའ་དབྱིངས་ནས་ཁོང་ཁྲོའི་སྤྲིན་ནག་ལང་ལོང་དུ་འཕྱུར་ཏེ་ཚིག་རྩུབ་ཀྱི་འབྲུག་སྒྲ་སྒྲོག་ཅིང།ངན་སྨྲས་ཀྱི་སེར་བ་དྲག་ཏུ་འབེབས་པ་ནི་དེང་སྐབས་ཉུང་ཉུང་ཞིག་གཏན་ནས་མིན།བྱ་སྤྱོད་འདི་ནི་དགོད་བྲོ་བའི་གནས་ཤིག་ལས་ཚིག་དོན་ལ་བསམ་ཞིབ་བྱས་པའི་དོན་དམ་གྱི་སྐད་ཆ་ཞིག་བཤད་མེད་པ་བྱ་སྤྱོད་འདི་ནས་གསལ་ཤེས་ཐུབ་ཡོད།གནའ་མི་བོད་ཀྱི་གཏམ་དཔེ་ལ་“ར་རྩིད་འུར་རྡོ་རང་གཉར་འཁྲི་”ཞེས་པ་ལྟར་བསམ་ཕོད་པའི་ཐོག་ནས་མི་གཞན་གྱི་སྐྱོན་རྣམས་ཐེར་འདོན་དགོས་པའི་བསླབ་བྱ་ཁྱོད་ཀྱིས་གནང་།དམངས་ཁྲོད་ནས་ཁྱོད་ཀྱི་སྐྱོན་རྣམས་དྲི་བའི་ལམ་ནས་ཕྱིར་སྟོན་བྱས་པ་འདིས་ཁྱོད་ཀྱི་བསླབ་བྱ་ལ་གྲུབ་འབྲས་ཐོན་པར་ངོས་འཛིན་བྱ་མི་ཐུབ་པར།ཁྱོད་ཀྱིས་སྐྱོན་བརྗོད་དང་ཁོང་ཁྲོ་ཅི་ཕྱིར་བྱེད།ཡང་ན་ཁྱོད་ཀྱིས་བསླབ་བྱ་དེ་ཁྱོད་ལས་གཞན་པའི་མི་ཚོའི་སྐྱོན་ཁོ་ན་ཕྱིར་སྟོན་བྱ་དགོས་པ་ལས་ཁྱོད་ཀྱི་སྐྱོན་བརྗོད་མི་ཆོག་པ་གོ་བ་ཡིན་ནམ་ཅི།
༢༽གོང་དུ་བྲིས་ཟིན་པའི་བསམ་ཕོད་པའི་གནས་རྣམས་སྦ་གསང་མེད་པར་དམངས་ཁྲོད་དུ་སྐད་གསང་མཐོ་པོས་བརྗོད་ཐུབ་པ་ལ་བཤད་ཕོད་པ་ཞེས་སྦྱར་ཆོགསྤྱིར་བཤད་ཕོད་ཚད་ཡག་པོ་ཡིན་པའི་ངེས་པ་མེད་ལ།འདི་ལ་ཁྱད་ཆོས་མང་པོ་ཚང་ན་གཞི་ནས་ཕན་འབྲས་ལྡན་པའི་གཏམ་ཚིག་ཅིག་ཏུ་གྱུར་གྱི་ཡོད། དཔེར་ན།ངག་ནས་བཤད་པ་དེ་ཉིད་དུས་ལ་བབས་པའི་ཁྱད་ཆོས་དང་།གནད་ལ་ཁེལ་བའི་ཁྱད་ཆོས།རྒྱུ་མཚན་དང་དཔང་རྟགས་ལྡན་པའི་ཁྱད་ཆོས།གཞན་སེམས་འགུག་པའི་ཁྱད་ཆོས་སོགས་ལྡན་པའི་ཐོག་ནས་བཤད་ན་ཡང་དག་གི་བཤད་ཕོད་པ་ཞེས་ཟེར་ཆོགབཤད་པ་འདིས་དབང་འཛིན་པ་དང་། དཔོན་ཆེན། མི་ཆེན། བླ་ཆེན།དགེ་རྒན་དང་དགེ་བཤེས།ཕྱུག་བདག་བཅས་ཀྱི་སྒེར་སྤྱོད་ལྟ་བ་སོགས་ནོར་སྐྱོན་དག་གསལ་པོར་བཤད་ཐུབ་པའམ་བརྗོད་ནུས་པ་ལ་འཇུག་པ་ཡིན།འདི་ནི་མང་གཙོའི་སྤྱི་ཚོགས་སྤྱི་ལ་ཕན་འབྲས་ཧ་ཅང་ཆེན་ཞིག་ཡང་དག་པའི་བཤད་ཕོད་པ་ཞེས་བརྗོད་དུ་རུང་ལ།འདི་ནི་མང་གཙོའི་སྤྱི་ཚོགས་ཤིག་གི་ཡར་རྒྱས་ཡོང་བའི་འབྱུང་རྩ་ངོ་མ་ཞིག་དང་།སྤྱི་ཚོགས་འདྲ་མཉམ་དང་དྲང་བདེན་ཡོང་གཞི་གལ་ཆེ་ཤོས་དེ་ཆགས་པར་ངོས་འཛིན་དགོས།དེ་མིན་སོ་སོའི་འདོད་པའི་དོན་རྣམས་ངག་ལམ་ནས་བརྗོད་ཐུབ་པ་ཙམ་ལ་བཤད་ཕོད་པ་ཞེས་སྦྱར་དུ་མི་རུང་བ་ཡིན།རྒྱུ་མཚན་ནི།ཡང་དག་པའི་བཤད་པ་དག་ནི་དཔྱད་བློའི་རྗེས་སུ་འཇུག་དགོས་པ་ལས་དཔྱད་བློ་སྔོན་དུ་མ་སོང་བའི་འཐབ་རྩོད་དང་སྐྱོན་བརྗོད་ཀྱི་གཏམ་བཤད་ནི་ཤིན་ཏུ་ནོར་ཚབས་ཆེ་བས་རང་མགོ་རང་གིས་རྡུང་བ་དང་ཁྱད་མེད་པས་ནོར་སྐྱོན་ཆེ་ཤོས་ཤིག་ཡིན་པ་ཀུན་གྱིས་ཤེས་དགོས།
༣༽བསམ་ཕོད་པའི་གནས་རྣམས་རེ་རེ་བཞིན་རྩོམ་ཐོག་ཏུ་འགོད་པ་དང་། དུས་དང་མཚམས་པའི་ཆ་སྤེལ་བྱེད་པ།སྒེར་སྤྱོད་ལྟ་བ་འགོག་ཆེད་དུ་ལས་འགུལ་སྤེལ་བ།ཡང་ནས་ཡང་དུ་སོ་སོའི་བསམ་བློ་དང་ཐབས་བྱུས་ལ་དཔྱད་ཞིབ་བྱས་ཏེ་མ་འདང་བ་ལ་ཁ་སྣོན་བྱེད་པ། རྒྱལ་ཁབ་དང་།མི་རིགས།ཡུལ་ལུང་ཡར་རྒྱས་སོགས་ལ་དམིགས་ཏེ་རང་གི་དམིགས་ཡུལ་དང་ལས་ཕྱོགས་ཁ་མ་བྲལ་པར་བྱ་གླག་ཟས་ལ་བཞུར་བ་ལྟར་སྐྱོད་དགོས་པ་མ་ཟད།བསམ་ཞིབ་ལྡན་པའི་མི་རྣམས་གནད་ལུགས་དེའི་ཕྱོགས་སུ་འཁྲིད་ཐབས་བྱེད་པ་སོགས་ལ་སྒྲུབ་ཕོད་པ་ཞེས་འཇུག་པ་ཡིན།ཡང་གཞན་ཞིག་བཤད་ན།སང་ཉིན་ནི་རབ་རིབ་ཀྱི་འཆར་སྣང་ཞིག་གམ་རེ་བའི་རྒྱབ་ཏུ་ཡོད་པས་སྒྲུབ་ཕོད་པའི་སྒྲ་མི་འཇུག་ལ།ཁ་སང་ནི་དགའ་སྤོབས་དང་ཡང་ན་སྐྱོ་གདུང་ཁྲོད་ནས་འདས་ཟིན་པས་སྒྲུབ་ཕོད་པའི་སྒྲ་དེ་བས་འཇུག་མི་སྲིད།དེ་རིང་ནམ་སྐྱ་རེངས་ཀྱི་ཅོང་བརྡ་རྡུང་བཞིན་ནུས་ལྡན་མི་ཚེའི་མགོ་བོ་བཏེགས་པ་ནས་བཟུང་ལེ་ལོ་དང་རྣམ་གཡེང་སྤངས་ཏེ་སྤྱི་ཚོགས་ཀྱི་མུན་པ་དང་།སྒེར་སྤྱོད་ཀྱི་འཁྱག་རུམ།མནར་གཅོད་ཀྱི་གྲིབ་སོ་སོགས་ཡོད་ཚད་བསལ་ཏེ།ཡར་རྒྱས་ཀྱི་འོད་སྣང་དང་།དྲང་བདེན་གྱི་ཚ་དྲོད།རང་དབང་གི་ཉི་འོད་འདྲེན་པར་བརྩོན་པ་ན་སྒྲུབ་ཕོད་པའི་སྒྲ་འཇུག་པ་ཡིན།སྒྲུབ་ཕོད་པ་ནི་ཚིག་དོན་སྔ་མ་གཉིས་དང་མ་འབྲེལ་བར་སྒེར་ལས་སྒྲུབ་པ་ཐམས་ཅད་ལ་གོ་བ་ཞིག་མིན་ངེས་པས་བློ་ལྡན་རྣམས་ཀྱིས་དཔྱད་ན་དོན་འབྲས་ལྡན་པར་སྙམ།
བོད་ཡིག་ནང་བསམ་ཕོད་པ་དང་། བཤད་ཕོད་པ།སྒྲུབ་ཕོད་པ་ཞེས་པའི་མིང་ཚིག་འདི་དག་གི་བྱུང་རིམ་ཡག་པོ་ཞིག་ཡིན་མིན་བཤད་དཀའ་སྟེ།ཐོག་མར་རིག་གནས་གསར་བརྗེ་སྐབས་ཧུར་བརྩོན་པ་རྣམས་ཀྱིས་ཉིན་ལྟར་བཤད་རྒྱུའི་མིང་ཚིག་ཅིག་དང།དུས་སྐབས་དེར་སོ་སོའི་བླ་མ་དང་། ཕ་མ། དགེ་རྒན།མི་ཆེན་སོགས་ལ་འཐབ་རྩོད་བྱེད་པའི་དམིགས་ཡུལ་སྒྲུབ་ཆེད་དུ་གསར་བཟོ་བྱས་པའི་མིང་ཚིག་ཅིག་ཡིན་སྲིད་ཀྱང་།ད་ལྟར་མིང་ཚིག་འདི་ཉིད་བོད་ཕྱི་ནང་གཉིས་སུ་ན་གཞོན་ཚོགས་ལ་བསླབ་བྱ་གནང་བའི་བསླབ་ཚིག་ཅིག་ཏུ་གྱུར་འདུག་པས་མིང་དོན་བཟང་ཕྱོགས་སུ་བསྒྱུར་བའམ་མིང་དོན་བཟང་ཕྱོགས་སུ་བེད་སྤྱད་པ་ཞིག་ཡིན་ངེས།འདི་ནི་མི་རབས་རྒན་པ་ཚོས་སྤྱི་ཚོགས་བཟང་སྤྱོད་ལམ་དུ་འཁྲིད་པའི་བྱེད་ཐབས་དམིགས་བསལ་བ་ཞིག་དང་།ན་གཞོན་ཚོའི་སེམས་ཁོངས་ནས་དྲག་ཏུ་འཕྱོ་བཞིན་པའི་རྙིང་དོར་གསར་སྐྱོད་ཀྱི་བསམ་བློ་ལ་རྒན་རབས་ཚོས་རྒྱབ་སྐྱོར་དང་འབྲེལ་ཏེ་མིང་ཚིག་རྣམས་དོན་བཟང་ཕྱོགས་སུ་བེད་སྤྱད་ནས་ད་ལྟར་བསླབ་ཚིག་ཉིད་དུ་གྱུར་པར་མངོན།འདི་ནི་རྣམ་དཔྱོད་ལྡན་པའི་རྒན་རབས་པའི་བྱེད་ནུས་ཤིག་དང་། རང་རིག་གཙུག་ཏུ་འཛིན་པའི་མི་བུ་ཚོས་ལྷག་བསམ་གྱི་གྲུབ་འབྲས་ཤིག་ཡིན་ངེས་སོ།།
ཕྱི་ལོ་ ༢༠༢༤ ཟླ་ ༠༩ ཚེས་ ༢༩ཉིན་གྱི་ཉིན་ཐོ་ལས་བཤུས་ཏེ་ལེགས་བཅོས་ཅུང་བྱས་ཡོད།