ཉི་ཟེར་སྒྲོལ་མ།
བོད་གངས་ཅན་པའི་ལྷ་སྐལ་འཕགས་པ་སྤྱན་རས་གཟིགས་ཀྱི་རྣམ་སྤྲུལ་༸གོང་ས་༸སྐྱབས་མགོན་ཆེན་པོ་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དྲིན་རྗེས་དྲན་ཞུ་དགོས་དོན་ནི། དུས་རབས་ཉི་ཤུ་པའི་སྐབས་འདིར་བོད་དུ་རྒྱ་དམར་གྱིས་བཙན་འཛུལ་བྱེད་སྐབས་བོད་ཀྱི་ཆབ་སྲིད་གནས་སྟངས་ཧ་ཅང་ཉག་ཕྲ་བའི་དུས་དེར་༸གོང་ས་མཆོག་དགུང་གྲངས་བཅུ་དྲུག་ལས་སོན་མེད་ཀྱང་བོད་ཀྱི་ཆབ་སྲིད་ཀྱི་ཐུགས་འགན་བཞེས་ཏེ་རྒྱ་ནག་དང་ལྷན་དུ་ཞི་བའི་ཐོག་ནས་བོད་ཀྱི་དཀའ་རྙོག་སེལ་ཐབས་ཇི་ཙམ་གནང་ཡང་མཐར་དྲག་པོའི་དཔུང་གིས་ཕྱི་ལོ་ ༡༩༥༩ ཟླ་ ༣ ཚེས་ ༡༠ ལ་རྒྱལ་ས་ལྷ་ས་བཙན་བཟུང་གིས་རེ་ཞིག་རྒྱ་གར་དུ་ཕེབས་དགོས་བྱུང།
རྒྱ་གར་སྲིད་བློན་མཆོག་ལ་རེ་འདུན་ཞུས་འབྲས་སུ་༸གོང་ས་མཆོག་ནས་ཐོག་མར་ཤེས་ཡོན་གལ་འགངས་ཅན་ཞིག་ཏུ་གཟིགས་ནས་བོད་ཕྲུག་ལ་སློབ་གྲྭ་ཟུར་དུ་གསར་འཛུགས་བཀའ་དྲིན་བསྐྱངས་གནང་བའི་དབང་གིས་བོད་ཕྲུག་ན་གཞོན་སྟོང་ཕྲག་མང་པོར་གནའ་དེང་གཉིས་ལྡན་གྱི་ཤེས་ཡོན་ཅན་ཆགས་ནས་དབུས་བོད་མིའི་སྒྲིག་འཛུགས་ཀྱིས་གཙོས་སྤྱི་སྒེར་ནང་དུ་ཕྱག་ལས་གནང་མཁན་ཇི་སྙེད་ཅིག་ཡོད་པས་ཞུ་ཅི་ལ་དགོས།
འུ་ཅག་རྣམས་རྒྱ་གར་དུ་བཙན་བྱོལ་འབྱོར་སྐབས་ངོ་ཤེས་པ་ས་དང་གནམ་ལས་མེད་ཀྱང་༸གོང་ས་མཆོག་གི་བཀའ་དྲིན་ལས། རྒྱ་གར་ནང་དུ་བོད་མིའི་འཚོ་བའི་དཀའ་ངལ་རིམ་བཞིན་སེལ་ཐབས་སུ་ལམ་བཟོ་དང། དེ་ནས་གཞིས་ཆགས་གསར་འཛུགས། ལག་ཤེས་བཟོ་ལས་ཁང་སོགས་གཅིག་རྗེས་གཉིས་མཐུད་གནང་སྟེ་ད་ཆ་བཙན་བྱོལ་བོད་མིའི་འཚོ་རྟེན་ལེགས་གྲུབ་འདི་ལྟ་བུ་བྱུང་བ་ནི་༸གོང་ས་མཆོག་དང་རྒྱ་གར་གཞུང་མང། རོགས་ཚོགས་ཁག་གི་བཀའ་དྲིན་ཡིན་པ་གོར་མ་ཆག
རྒྱ་གར་ནང་དུ་བོད་མིའི་བཙན་བྱོལ་གཞུང་གསར་འཛུགས་དང། མང་གཙོ་གསོལ་སྩལ། བོད་རྒྱ་དཀའ་རྙོག་སེལ་ཐབས་སུ་གཉིས་ཕན་དབུ་མའི་ལམ་གྱི་སྲིད་བྱུས་ཐབས་ལམ། མང་གཙོ་ཡང་དག་པ་ཡོང་ཐབས་སུ་མང་གཙོའི་ཀ་བ་གསུམ་ལྡན། བོད་ཀྱི་རྩ་དོན་འཕྲལ་ཕུགས་གཉིས་ལ་དགོངས་བཞེས་ཀྱིས་ཆབ་སྲིད་ཀྱི་སྐུ་དབང་ཆ་ཚང་མང་ཚོགས་ནས་ཐད་བསྐོས་སྲིད་སྐྱོང་ལ་གནང་བ་སོགས་ཀྱི་འགྱུར་བ་རླབས་ཆེན་གནང་བ་ནི་མང་གཙོའི་ལམ་ལུགས་ལ་དགའ་བའི་རྒྱལ་སྤྱིའི་གྲགས་ཅན་དཔོན་རིགས་ནས་དགའ་བསུ་དང་ཆེ་བསྟོད་ཕུལ་དང་འབུལ་བཞིན་ཡོད་པ་ཡིན། རྒྱ་གར་གཙོ་བོར་གྱུར་པའི་འཛམ་གླིང་ཡུལ་གྲུ་གང་སར་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་གྱིས་ཆོས་སྒར་དང་བཤད་སྒྲུབ་ཀྱི་ལྟེ་གནས་དགོན་སྡེ་བརྒྱ་ཕྲག་མང་པོ་གསར་བཞེངས་དང་བསྟན་པ་གོང་འཕེལ་དུ་འགྲོ་བ་ནི་ལོ་རྒྱུས་ནང་དུ་བྱུང་མྱོང་མེད་པ་ཞིག་ཡིན།
བོད་རྒྱའི་དཀའ་རྙོག་སེལ་ཐབས་སུ་འཚེ་མེད་ཞི་བ་དང། འཛམ་གླིང་ཞི་བདེའི་དོན་དུ་སྐུ་ངལ་མཛད་པའི་དབང་གིས་འཛམ་གླིང་གི་ཆེས་མཚན་སྙན་མཐོ་བའི་ཞི་བའི་གཟེངས་རྟགས་གཙོ་བོར་གྱུར་པའི་མཚན་སྙན་གྲགས་ཅན་གྱི་གཟེངས་རྟགས་བརྒྱ་ཕྲག་མང་པོ་འབུལ་བཞེས་དང། གསུང་ཆོས། ཕྱག་དེབ་བརྒྱ་ཕྲག་བཀའ་རྩོམ་མཛད་པ་སོགས་མདོར་ན་འགྲོ་བ་མིའི་བཟང་སྤྱོད་དང། ཆོས་ལུགས་མཐུན་འབྲེལ། བོད་དོན་དང་ཆོས་རིག་བཅས་པར་བཀའ་དྲིན་བསྐྱངས་དང་སྐྱོང་བཞིན་པས་ན། མགོན་པོ་གང་ཉིད་ནི་བོད་གཞིས་བྱེས་གཉིས་ཀྱི་ལྟ་བའི་མིག་དང་ཁོག་པའི་སྙིང་ལྟ་བུ་ཡིན་པ་དང། བཙན་བྱོལ་དུ་ཡོད་པའི་བོོད་མི་ཚོར་ཕུན་སུམ་ཚོགས་པོ་གང་དང་གང་བྱུང་བ་ནི་༸རྒྱལ་བ་རིན་པོ་ཆེའི་ཐུགས་རྗེ་ཁོ་ན་ལས་བྱུང་བ་ཡིན་སྟབས། དུས་དང་རྣམ་པ་ཀུན་ཏུ་བོད་མི་ཡོངས་ནས་༸གོང་ས་མཆོག་གི་བཀའ་དྲིན་ལ་རྗེས་དྲན་ཞུས་དང་ཞུ་མུས་སུ་ཡིན། ཁོང་གི་བཀའ་བཞིན་བསྒྲུབ་དགོས་པ་ནི་མཆོད་པ་བཟང་ཤོས་དེ་ཡིན། མདོར་ན་༸གོང་ས་མཆོག་སྐུ་ཁམས་བཟང་བ་དང་སྐུ་ཚེ་བསྐལ་བརྒྱར་བརྟན་ཅིང་ཐུགས་དགོངས་ལྷུན་གྱིས་གྲུབ་པའི་སྨོན་འདུན་ཞུ་རྒྱུ་ཡིན།