བསྟན་པ་དར་ཕྱུག
མཐོ་རིམ་གྱི་སློབ་མ་རྣམས་ནི་སྤྱི་ཚོགས་ཀྱི་སྣེ་ཁྲིད་པ་ཡིན་པ་ལས་མ་འོོངས་ཀྱི་སོན་རྩ་མིན་པས།སྤྱི་ཚོགས་འདིའི་ངོ་གདོང་གཙང་མ་བཟོ་རྒྱུ་ནི་ཕྲག་ཐོག་ཏུ་བབས་པའི་གཡོལ་མེད་ཀྱི་འོས་འགན་ཞིག་རེད།
སྤྱིར་ང་ཚོའི་སྤྱི་ཚོགས་འདི་ཇ་ཚགས་ཤིག་ལྟར་སྐྱོན་གྱི་བུ་ག་མང་པོ་དོད་ནས་གང་ས་གང་ནས་སྙིགས་རོ་ལུད་འོང་བས། སྙིགས་རོ་ལུད་སའི་བུ་ག་དེ་དག་དུས་གཅིག་ཏུ་མེད་པ་བཟོ་དགོས་ན་སླ་མོ་ཞིག་ག་ལ་ཡིན། འོན་ཀྱང་། ང་ཚོས་སེམས་ནུས་གཅིག་ཏུ་སྦྲེལ་ནས་བུ་ག་རེ་རེ་རིག་པའི་ངར་ལྕགས་ཀྱིས་ལྷན་པ་གླན་རྒྱུར་འབད་བརྩོན་བྱས་ཚེ། ནམ་ཞིག་ང་ཚོའི་སྤྱི་ཚོགས་ཀྱི་ངོ་གདོང་ནི་ཆུ་ཤེལ་ལྟར་དྭངས་གཙང་ལྷད་མེད་ཅིག་ཆགས་སྲིད།
དེ་ལྟར་དེ་རིང་ངས་མཐོ་རིམ་སློབ་མ་རྣམས་ཀྱིས་ཁུར་དགོས་པའི་འགན་འཁྲི་ཚིག་གཅིག་ཁོ་ན་གླེང་བར་འདོད། དེ་ནི་བདག་གིས་རྒྱུན་དུ་སེམས་ཁྲལ་བྱེད་ས་གཙོ་བོ་ཞིག་རེད་ལ། མཐོ་རིམ་སློབ་མ་རྣམས་ཀྱིས་རྒྱུན་དུ་ལོང་མཆོང་བྱེད་སའི་གཞི་ཞིག་རེད། ང་ཚོས་རྟག་པར་དཔྱད་པ་གཏན་ནས་མི་བྱེད་པར་མཐོ་དམའ་ཀུན་ལ་དམའ་འབེབས་དང་ཁྱད་གསོད་ཀྱི་རྩོམ་ཉོག་སྤེལ་བ་དེ་རེད། དེས་ང་ཚོའི་སྤྱི་ཚོགས་ཀྱི་ངོ་གདོང་ནག་ནོག་བཟོ་ཞིང་། མི་བུ་སེམས་ཤུགས་ཅན་དང་བྱས་རྗེས་ཅན་རྣམས་ཀྱི་སེམས་ལ་རྨ་ཁ་གཏད་ཀྱི་ཡོད།
སྤྱིར་སློབ་སྦྱོང་གི་རྒྱུན་རིམ་མི་ལྡན་ཞིང་རྟག་ཏུ་གནག་རྗེས་འགྲིམ་མཁན་གྱི་འབྲོག་མི་དང་།ཞིང་ས་སློག་མཁན་གྱི་ཞིང་པ་གང་རུང་ཞིག་ཡིན་ཚེ། བརྟག་དཔྱད་མི་བྱེད་པར་ཧོར་རྒྱུགས་ཀྱི་བསམ་བློ་དེ་ཡོང་སྲིད་མོད། མཐོ་རིམ་སློབ་མའི་མིང་བྱང་ཁུར་མཁན་ཞིག་ལ་མཚོན་ན། བྱ་བ་ཡག་བཙོག་དང་མཇུག་འབྲས་བཟང་ངན་སོགས་ཀྱི་དབྱེེ་བ་གསལ་པོ་དགར་ཤེས་དགོས། དེ་མིན་ཁྱོད་ཀྱིས་མི་ལོ་མང་དག་ཅིག་སྦྱངས་པའི་གྲུབ་འབྲས་ནི་མི་གཤིས་ལ་དམའ་འབེབས་བྱེད་ཆེད་དང་སྤྱི་ཚོགས་ལ་གཏོར་བཤིག་གཏོང་བྱེད་ཀྱི་ལག་ཆ་ཙམ་དུ་སོང་ཚེ། ཁྱིམ་མི་རྣམས་ཀྱིས་འགྲོ་སོང་ཕོན་ཆེན་བཏང་བ་དང་།ཁྱོད་ཀྱི་ལོ་མང་དཀའ་ལས་བརྒྱབ་པ་དེ་དགོས་མེད་དུ་སོང་བ་མ་ཡིན་ནམ།
དེར་བརྟེན། ང་ཚོ་ཀུན་གྱིས་བརྟག་དཔྱད་གང་ཡང་མི་བྱེད་པར་སྤྱི་ཚོགས་འདི་དཀྲུག་བྱེད་ཀྱི་རྩོམ་ཉོག་སྤེལ་མཚམས་བཞག་སྟེ། སྣེ་ཁྲིད་ཀྱི་ནུས་པ་ལྡན་ཞིང་མཐོ་རིམ་སློབ་མའི་རང་མདངས་མངོན་པའི་རྩོམ་ཡིག་གང་མང་ཞིག་དྲྭ་ལམ་དག་དང་།དུས་དེབ་སོགས་ནང་སྤེལ་ནས་མ་འོངས་སོན་རྩའི་མདུན་སྐྱོད་ལམ་བུ་ལ་འོད་མདངས་ལྡན་པ་ཞིག་བསྐྲུན་སེམས་དང་། སྤྱི་ཚོགས་ཀྱི་ངོ་གདོང་བཀྲག་མདངས་ལྡན་པ་ཞིག་བཟོ་སེམས་དགོས།
ངས་འདི་ལྟར་རྩོམ་ཡིག་སྤེལ་སྟངས་ཐོག་ལ་གཟབ་དགོས་བསྐུལ་བ་ནི། ད་ལྟའི་དུས་རབས་འདིའི་མི་རྣམས་ཀྱི་འཚོ་བའི་ནང་དྲྭ་ལམ་འཛུལ་ཟིན་པས། རྫུན་དང་ཧམ་བཤད་ཀྱིས་ཕྱུག་པའི་རྩོམ་ཡིག་ཅིག་ཡིན་ཚེ། སྤྱི་ཚོགས་ནང་དུ་ཁྱབ་པ་ཧ་ཅང་མགྱོགས་ལ། ཡིད་རྟོན་བྱེད་མཁན་དེ་བས་མང་། རྒྱུ་མཚན་དེས་ང་ཚོའི་སྤྱི་ཚོགས་ནང་འགལ་རྐྱེན་མང་པོ་བཟོས་ནས་ཞི་བདེ་བག་ཕེབས་ཀྱི་འཚོ་བ་ཞིག་དང་། འཆམ་མཐུན་ལྡན་པའི་སྤྱི་ཚོགས་ཤིག་ཡོང་མི་ཐུབ།
དེར་བརྟེན། ཀུན་གྱིས་རྣམ་དཔྱོད་གསེར་འདྲ་བ་དེ་བེད་སྤྱད་དེ་ང་ཚོའི་སྤྱི་ཚོགས་འདིའི་འཆམ་མཐུན་དང་། མ་འོངས་ཀྱི་ཕུགས་འདུན་ཆེད་དུ་སྨྱུག་རྩེ་བརྡར་ཏེ། མཐོ་རིམ་སློབ་མའི་གཟི་བརྗིད་མངོན་པར་བྱ་རྒྱུ་ནི་ཤིན་ཏུ་གལ་ཆེའོ།།