རབ་སད་ནས།
རང་ཉིད་སུ་ཞིག་ཡིན། གང་དུ་ཡོད། གང་གི་དོན་དུ་འཚོ་བཞིན་ཡོད། ང་ཚོས་དྲི་བ་དེ་དག་ལ་ལན་ཐེབས་སམ། བསམ་བློ་འགོ་མཇུག་ཚང་བ་ཞིག་ཐོངས་དང་ང་ཚོས་དྲི་བ་དེ་དག་ལ་ལན་ཐེབས་པར་དཀའ། ཅིའི་ཕྱིར་ཞེ་ན་ང་ཚོས་དེ་ལས་ལྡོག་སྟེ་འཆར་ཡན་གྱིས་བསྐྲུན་པའི་སྟོང་བསམ་གྱི་ཞིང་ཁམས་སུ་དུས་རྟག་ཏུ་བྲེལ་རྒྱུག་བྱེད་བཞིན་དུས་ཁོམ་གཏན་ནས་མེད་པས་དྲི་བ་དེ་དག་ལ་བསམ་བློ་ཙམ་ཡང་བཏང་ལོང་མེད་པས་རང་ཉིད་ཀྱང་སུ་ཞིག་ཡིན་པ་མ་ཤེས་ནས་བསྡད་ཡོད།
ང་ཚོའི་སྟོང་བསམ་གྱིས་བསྐྲུན་པའི་ཞིང་ཁམས་ནི་མཛེས་སྡུག་ཧ་ཅང་ལྡན། སྒྱུ་རྩལ་བཟོ་རྩལ་གྱིས་ཕྱུག་པའི་ལག་རྩལ་བ་ཐམས་ཅད་ང་ཚོའི་ཁོར་ར་ཡུག་ཏུ་འཁོར་ནས་ང་ཚོའི་ཅ་དངོས་ལ་ཧང་སང་ནས་འདུག་རྒྱུ་དང་། རྣམ་དཔྱོད་འགྲན་ཟླ་བྲལ་བའི་ཚན་རིག་པ་ཐམས་ཅད་ང་ཚོའི་གཟུགས་མེད་སེམས་ཀྱི་རྣམ་གཞག་ལ་ཧང་སང་ནས་འདུག་པ་སོགས་མདོར་ན་ཐམས་ཅད་སྣང་བ་དག་པའི་ངང་ཚུལ་དེས་ང་ཚོའི་ལེགས་ཉེས་འབྱེད་པའི་རྣམ་དཔྱོད་ཡོད་ཚད་ཡོངས་སུ་བཅོམ་ཟིན། མདོར་ན་ང་ཚོ་ནི་འདུག་སའི་རྐུབ་བཀྱག་མ་རག་གོང་ནས་ཁུ་ཚུར་འདེགས་སའི་ཅོག་ཙེ་འཚོལ་འདོད་པའི་འགོ་མཇུག་མི་ཤེས་པའི་བླུན་རྒན་ཞིག་ཅི་ལ་མིན། དེའི་ཕྱིར་ངས་ནམ་ཞིག་རང་ཉིད་རྙེད་ཕྱིར་དཀར་གཙང་གི་ཤོག་བུའི་ཐོག་ཏུ་བོར་བརླག་ཏུ་སོང་བའི་རང་ཉིད་ལ་རྒྱུས་མངའ་ཆེ་བའི་དངོས་པོ་གང་དག་གི་མིང་ཐོ་འགོད་བཞིན་དུས་དུས་སུ་དྲན་ལམ་དུ་འཆར་དུ་རེ། དེ་དང་མཉམ་དུ་རང་གི་ཕ་ཚང་དགྲ་ལག་དུ་ཤོར་བའི་ཤུལ་ལམ་དུ་ལུས་པའི་དྲིན་ཆེན་ཕ་མ་གཉིས་ཀྱིས་གཙོས་པའི་སྤུན་མཆེད་ཉེ་འབྲེལ་དག་གི་མིང་ཐོ་བསྐྱར་འགོད་བྱེད་བཞིན་རང་ཉིད་བརྗེད་དུ་མི་འཇུག་བའི་ཐབས་ཤེས་སྣ་ཚོགས་ལ་འབད་པ་ཡང་བྱས། སྐབས་རེ་ངས་ཅི་ཞིག་བོར་བརླག་སོང་བ་མ་ཤེས་ནས་འདས་དོན་ལ་ཞིབ་ལྟ་རེ་བྱེད་དུས་དངོས་པོ་མང་དག་ཅིག་ཆ་རྒྱུས་མེད་པ་གྱུར་ནས་མིང་ཡང་དྲན་ལམ་དུ་འཆར་དཀའ་བ་གྱུར་པས་ཅི་ཞིག་བྲི་དགོས་མིན་ཡང་མི་ཤེས་འདུག་པས་སླར་ཡང་དངོས་པོ་དེ་དག་འཚོལ་བའི་གོ་སྐབས་ཤིག་རག་ཨེ་ཡོང་སྙམ་པའི་ཕངས་སེམས་ལས་མ་འདས། དེའི་ཕྱིར་ང་ཚོ་ནི་གང་དུ་གནས་བཞིན་པ་དང་། གང་ཞིག་བྱེད་བཞིན་པ་ཡང་མི་ཤེས། འོ་ན་ང་རང་ཚོ་ནི་རང་ངོ་མི་ཤེས་པའི་བླུན་རྒན་ཞིག་ཅིས་མ་ཡིན། ང་ཚོས་ཡོད་ཚད་ཡིད་ཆེས་ས་མེད་པའི་རེ་དོགས་ཁྲོད་ཀྱི་ངོ་མི་ཤེས་པའི་མུན་ནག་ཅིག་ལ་འཐམ་འཇུ་བྱེད་བཞིན། དེའི་དོན་དུ་ང་ཚོས་ཡོད་ཚད་བློས་གཏོང་བྱེད་ལ་ཆགས་སྡང་རྨོངས་གསུམ་གྱིས་ཞེ་ནས་དཀྲུགས་ཏེ་རང་གཞན་ཡང་མི་ཤེས་ལ། དགྲ་གཉན་ཡང་མི་ཤེས། ཐ་ན་རང་གི་འཚོ་གནས་ཀྱང་ངོ་ཤེས་ཀྱི་མེད་པས་ཡོད་ཚད་ཀྱི་ཁྲོད་ནས་ཡོད་ཚད་བརླགས་ཚར་བ་དང་། འཐོབ་ཏུ་མེད་པའི་རྨོངས་གཉིད་ཀྱི་ཁྲོད་ནས་ཚེ་སྲོག་གི་རྒྱུ་བ་མ་འགག་བར་དུ་སྟོང་བསམ་གྱི་མཁའ་དབྱིངས་སུ་བང་རྒྱུག་བྱས་ནས་དུས་འདའ་ངེས།
དེའི་ཕྱིར་ངས་འདི་ལྟར་བསམས། ང་ཚོས་འཚོལ་བ་ནི་ང་ཚོ་ཡིན་མོད་དེ་ལས་ལྡོག་སྟེ་རྙེད་བཞིན་པ་ནི་ང་ཚོ་ལ་དགོས་ངེས་ཀྱི་དངོས་པོ་ཞིག་མ་ཡིན་པར་འདོད་དབང་གིས་བསྐྲུན་པའི་ཆགས་སྡང་དག་ཡིན་པས་ཅིའི་ཕྱིར་ང་ཚོས་ང་ཚོ་ལས་གཞན་པའི་དངོས་པོ་ཞིག་དམ་དུ་འཛིན་ཞིང་ང་ཚོ་དོར་དུ་བཅུག་པ་ཡིན། དེ་ནི་ང་ཚོས་ང་ཚོ་ལ་སྣང་ཆུང་གཏོང་བཞིན་ཡ་མེད་དུ་བྱས་སོང་བ་མ་ཡིན་ནམ། འོ་ན་ང་ཚོས་ཅི་ཞིག་ལ་ཞིབ་ལྟ་བྱེད་བཞིན་ང་ཚོ་འཚོལ་དགོས་པ་ཡིན་ནམ། གང་ལྟར་ང་ཚོས་ར་མི་འཕྲོད་ས་དེ་ནི་རང་ངོ་མ་ཤེས་པའི་སྐྱོན་མཚང་དེ་མིན་ནམ་སྙམ།