ལམ་བཟང་པོས།
ལང་ལོང་སྤྲིན་པ་འཕྱུར་བའི་ཉིན་མོ་དེར།།
ཤག་ཤག་ཆར་པ་འབབ་པའི་ཉིན་མོ་དེར།།
བསིལ་བསིལ་རླུང་བུ་ལྡང་བའི་ཉིན་མོ་དེར།།
ཁང་ཆུང་གྲུ་བཞིའི་ནང་ནས་མ་ཁྱོད་དྲན།།
ཉི་མ་སྤྲིན་གསེབ་ཡིབ་པའི་ཉིན་མོ་དེར།།
ཟླ་བ་ཁྲུས་ལ་བྱོན་པའི་ཉིན་མོ་དེར།།
སྐར་མ་ཁོག་འདར་ཞུགས་པའི་ཉིན་མོ་དེེར།།
ལྗོན་ལོ་སེར་པོའི་འོག་ནས་མ་ཁྱོད་དྲན།།
ལམ་བཟང་པོས།
གནམ་གྱི་ཆུ་མཛོད་དེང་སང་ཨེ་ཁུང་བུག་བཞག།
ཉིན་དང་མཚན་མེད་ཆར་ཆུ་ཤག་ཤག་འབབ་ཀྱིས།།
འབྲུག་སྒྲ་ཆ་མེད་ཡ་མེད་རྫ་རྡོ་ཉིལ་ཉིལ།།
གློག་འོད་ཞེད་སྣང་ཚ་བོ་སྐར་མདའ་འཕེན་འཕེན།།
ས་ཡི་གདོང་པ་བཀྲུས་བཀྲུས་རྨ་ཤུལ་དོད་འདུག།
ཀ་ཆུ་ལུང་ཆུ་དེ་ཚོའང་འུར་གྱིས་གཤར་དུས།།
སྲང་ལམ་གཞུང་ལམ་འགའ་ཡི་ཁ་ཤ་དབྲལ་གདའ།།
ས་འབུ་གྲོག་སྦུར་རྐང་ལག་ནར་ནར་ཁུར་སོང་།།
ལམ་བཟང་པོས།
ཅི་ཙམ་ཐོས་ཀྱང་ངོམ་པ་མེད་པའི་དབྱངས་ཀྱི་རྒྱ་མཚོའི་མ་མ་གཅིག།
མུན་པའི་ཁམས་སུ་ཤེས་རབ་འོད་ཀྱི་སྒྲོན་མེ་སྦར་བའི་དཔལ་འབར་ཆེ།།
ཟུར་ཕུད་ལྔ་པའི་བདག་མོར་གྲགས་པ་མཚུངས་མེད་མངའ་བའི་ལང་ཚོ་ཅན།།
ཚངས་པའི་སྲས་མོ་ངག་གི་ལྷ་མོ་འདིར་ཕེབས་རོགས་ཤིག་གནང་དང་ཀྱེ།།
གདོད་མ་སྔོན་མའི་གཏམ་རྒྱུད་དེད་ན་བདག་གིས་མཐའ་རུ་མི་མངོན་ཞིང་།།
སངས་རྒྱས་བྱང་སེམས་རྣམ་ཐར་སྔོགས་ན་ཇི་བཞིན་རྗོད་པའི་སྤོབས་པ་བྲལ།།
འགའ་ཞིག་ལྷ་སྒྲུང་འདྲེ་སྒྲུང་དགའ་ཡང་བདག་ནི་མི་ཡི་ཚུལ་ལྟར་མོས།།
གང་ཞིག་ཆུ་བུར་མིག་གིས་ཟིན་པའི་དཔྱོད་ལྡན་གཞོན་ནུ་གླེང་རྒྱུ་ཡིན།།