འབྲི་རུ་སྐལ་བཟང་རྒྱལ་མཚན།
ང༵ག་གི་འདབ་མ་བསྐྱོད་པའི་དྲི་གཞོན་གྱིས།།
དབ༵ང་བསྒྱུར་གསུང་རབ་མཁའ་ཡི་ཆུ་འཛིན་ཀློང་།།
ཐོག༵ས་མེ༵ད་རིགས་འཕྲུལ་གློག་གི་རོལ་རྩེད་རྒྱས།།
ལེགས་བཤད་སྤྲིན་བཅུད་འབེབ་པའི་ཀླུ་དབང་རྒྱལ།།
ཚང་ཚིང་གཡུ་ལོ་འཐིབས་པ་ན༵གས་ཀྱི་ཤོ༵ད།།
ལང་ཚོའི་མྱུ་གུ་འབྲི༵་ལྗོངས་འཛིན་མ་རུ༵།།
འབུས་ཀྱང་ཐོས་པའི་ཁོ་ལག་ལྷོ་མཐར་རྒྱས།།
སྙན་གྲགས་དྲི་བསུང་འཐུལ་བའི་ལྗོན་པ་ཡིན།།
སྲིད་པའི་ཕུན་ཚོགས་སྒྱུ་མ་སྨིག་རྒྱུ་བཞིན།།
གཟིགས་ནས་ངེས་པར་འབྱུང་བའི་ཚུལ་ཁྲིམས་ནི།།
ཡོངས་སུ་བླངས་ཏེ་བསླབ་ཁྲིམས་མིག་འབྲས་བཞིན།།
ཚུལ་བཞིན་བསྲུངས་པའི་ཤཱཀྱའི་དགེ་སྦྱོང་ཡིན།།
མཁས་གྲུབ་བྱེ་བའི་འབྱུང་གནས་གདན་ས་ཆེ།།
ཟླ་མེད་བཤེས་གཉེན་དུ་མའི་ཞབས་གཏུགས་ཏེ།།
རབ་འབྱམས་གཞུང་ལ་ལྟོ་སྐྱ་གོས་ཧྲུལ་གྱིས།།
དཀའ་བ་བརྒྱ་ཕྲག་སྤྱད་པའི་གྲྭ་རྐྱང་ཡིན།།
མ་བལྟས་མིག་ལ་ཤར་བའི་མངོན་ཤེས་དང་།།
ཐོས་ཚད་མི་བརྗེད་འཛིན་པའི་གཟུངས་མེད་ཀྱང་།།
བརྩོན་པའི་ཐེམ་སྐས་ཐེག་པ་རིམ་བགྲོད་ཀྱིས།།
ཁས་པའི་གོ་སར་བསྙེགས་པའི་མཁས་མཆོག་ཡིན།།
མེ་དཔུང་མཚོ་རུ་བསྒྱུར་བའི་ཆོ་འཕྲུལ་དང་།།
བསད་པ་གསོ་བར་ནུས་པའི་མཐུ་མེད་ཀྱང་།།
དཀའ་གནད་ཚང་ཚིང་འཁྲིགས་པ་ནགས་ཀྱི་ཚལ།།
སྐད་གཅིག་ཉིད་ལ་སྲེག་པའི་མེ་ཆེན་ཡིན།།
གཞུང་དོན་མ་རྟོགས་ཤེས་རློམ་འུད་སྒྲོག་གིས།།
ཧམ་པས་རི་བོ་འདེགས་པའི་མཐུ་མེད་ཀྱང་།།
རྒྱ་བོད་མཁས་པའི་གཞུང་ལུགས་རབ་འབྱམས་ལ།།
ངེས་ཤེས་རྙེད་པའི་ངེས་དོན་བཤེས་གཉེན་ཡིན།།
གདན་སའི་མཁས་མང་ཚོགས་ཀྱི་འདུན་ས་རུ།།
གཞུང་དོན་ལུང་རིགས་དགག་སྒྲུབ་སྤེལ་བ་ལ།།
མི་འཇིགས་སྤོབས་པ་རྒྱས་པའི་རྣམ་དཔྱོད་ཅན།།
དཔལ་ལྡན་ཆོས་ཀྱི་གྲགས་པའི་དཔེ་ཟླ་ཡིན།།
རྒྱ་བོད་མཁས་པའི་བཞེད་གཞུང་མཐའ་དག་གི།
དཀའ་གནད་འདོད་རྒུར་སྤྱད་པས་བློ་གསལ་ཚོགས།།
བློ་གྲོས་སྤོབས་པའི་སྣང་བ་མཆོག་བསྩོལ་བའི།།
ངེས་དོན་བཤེས་གཉེན་ཉིན་བྱེད་དབང་པོ་ཡིན།།
གསང་ཆེན་རྒྱུད་སྡེ་ཁ་འབབ་རྣམ་བཞི་ལས།།
འོངས་པའི་སྨིན་བྱེད་དབང་དང་གྲོལ་བྱེད་ཁྲིད།།
མཚན་ལྡན་དམ་པའི་མན་ངག་གང་གཱའི་ཆུས།།
ཡོངས་སུ་གང་བའི་རིན་ཆེན་བུམ་བཟང་ཡིན།།
འཆ༵ད་ལ་གཞུང་ལུགས་སྨྲ་བའི་མཆེ་སྡེར་རྒྱས།།
རྩོ༵ད་ངག་ཐལ་ཕྲེང་གད་རྒྱངས་ཕྱོགས་ཀུན་སྒྲོག །
རྩོ༵མ་པ་ལེགས་བཤད་སྤུ་རིས་རྣམ་པར་བཀྲ།།
གསུང་རབས་ནགས་ཀླུང་འཛིན་པའི་རྒྱ་སྟག༵་ཡིན།།
ཐོས༵་པས་གཏི་མུག་གཉིས་འཐུང་ཀླད་པ་འགེམས།།
བས༵མ་པས་གཉིས་འཛིན་འཕྲོག་བྱེད་ཟིལ་གྱིས་གནོན།།
སྒོམ༵་པས་ཉམས་རྟོགས་གཡུ་ཡི་རལ་པ་གསིག །
ཐུབ་བསྟན་གངས་རི་འཛིན་པའི་སེ༵ང་གེ་ཡིན།།
མཁ༵ས་པའི་ནམ་འཕང་གསུང་རབས་མཁའ་ལ་བཅད།།
བཙུན༵་པའི་གཤོག་ཡངས་སྒོ་གསུམ་བག་ཡོད་སྤྱོད།།
བཟ༵ང་པོའི་ཕྲིན་ལས་གདུལ་བྱའི་ཚོགས་རྣམས་སྐྱོང་།།
རྨོངས་པ་ཀླུ་གཉན་ཟ་བའི་ཁྱུང༵་ཆེན་ཡིན།།
མཁྱེ༵ན་པས་ཟབ་ཡངས་རྒྱ་མཚོའི་འཇིངས་ལས་བརྒལ།།
བརྩེ༵་བས་གདམས་ངག་བདུད་རྩིའི་གྲུ་ཆར་འཇོ།།
ནུས༵་པས་ལུང་རིགས་རྡོ་རྗེའི་མེ་ཆར་འབེབས།།
ལེགས་བཤད་སྤྲིན་སྒྲ་ལྡིར་བའི་གཡུ་འབྲུག༵་ཡིན།།
འདུལ་མངོན་གཞུང་ལ་མཁྱེན་པའི་ན་ཚོད་སྨིན།།
ཡུམ་དོན་ལུས་ལ་དབུ་ཚད་གོ་ཆ་བགོས།།
ཐུན་མོང་རིག་གནས་རླུང་གི་ཤིང་རྟར་བཅིབས།།
དགེ་ལུགས་རྒྱུགས་སྤྲོད་ཆེན་མོའི་རུ་འདྲེན་ཡིན།།
འཐབ་མོའི་འདུན་སར་ཕྱོགས་སྔའི་དམ་བཅའི་བྲག།
རྒྱབ་རྟེན་ལུང་གི་གནམ་རུ་ལས་དྲངས་པའི།།
རིགས་པ་འབིགས་བྱེད་རྣོན་པོས་ཐལ་བའི་རྡུལ།།
ཕྱེ་མར་བརླག་པའི་དཔུང་གི་ཁྱུ་མཆོག་ཡིན།།
འཕགས་བོད་གཞུང་མང་ཐོས་པའི་ལུས་རྩལ་རྫོགས།།
བློ་གསལ་ཡན་ལག་བཞི་པའི་དཔུང་ཚོགས་ཀྱིས།།
ལུང་རིགས་མཚོན་ཁ་འགྲན་པའི་གཡུལ་ས་ནས།།
འཇིགས་མེད་གད་རྒྱངས་སྒྲོག་པའི་དཔའ་བོ་ཡིན།།
འཛམ་གླིང་ས་ཆེན་ཡངས་པའི་གོ་ལའི་ཁྱོན།།
མཁས་མང་བརྒྱ་ཕྲག་འདུས་སྡེའི་མཚན་སྙན་གྱི།།
རྒྱལ་མཚན་རྩ་གསུམ་ལྷ་ཡི་ཁང་བཟང་རྩེར། །
རྣམ་དཔྱོད་དཔུང་པས་བསྒྲེངས་པ་སྤོབས་པ་ཡིན།།
ཡོད་ལ་མེད་པར་བཅོས་པའི་སྐུར་འདེབས་དང་།།
མེད་ལ་ཡོད་པར་བཟོས་པའི་སྒྲོ་འདོགས་ཀྱིས།།
ཆུང་ཆུང་ཆེན་པོར་བཤད་པའི་འུད་སྒྲོག་མིན།།
རང་བཞིན་དྲང་པོར་བརྗོད་པའི་མངོན་བསྟོད་ཡིན།།
དགེ་ལུགས་རྒྱུགས་སྤྲོད་ཆེན་མོའི་གྲུབ་འབྲས་ལེགས་སོན་གྱི་མངོན་བསྟོད་ལྷ་ཡི་རྔ་གསང་ཞེས་པ་འདི་བཞིན་མཁས་རློམས་དྲེགས་པས་མྱོས་པའི་གཉིས་འཐུང་སྟོང་གི་སྤྱི་བོར་ལུང་རིགས་སྡེར་མོའི་གཙུག་རྒྱན་འགོད་མཁས་སེར་ལྷོ་ལྷ་རམས་པ་འབྲི་རུ་ངག་དབང་ཐོགས་མེད་མཆོག་གིས་ཕྱི་ལོ་ ༢༠༡༣ དང་༢༠༡༤ ལོའི་དགེ་ལྡན་ལུགས་བཟང་ཆེས་མཐོའི་གཙུག་ལག་སློབ་གཉེར་ཁང་གི་དགེ་ལུགས་རྒྱུགས་སྤྲོད་ཆེན་མོའི་རྒྱུགས་འབྲས་མཐར་སོན་གྱིས་ལྷ་རམས་ཨང་དང་པོ་དང་གཉིས་པའི་མཚན་གྱི་ཅོད་པཎ་སྤྱི་བོར་བཅིངས་པའི་གཏམ་སྙན་བདུད་རྩིའི་ཐིགས་པ་སྒྲ་འཛིན་རྣ་བའི་བུག་པར་ལྷུང་བས་ཡིད་སྤྲོའི་སྣང་བ་ཆེས་ཆེར་རྒྱས་ཏེ། སེམས་ཁམས་ནས་བཞུར་བའི་རང་བཞིན་དྲང་པོ་བརྗོད་པའི་མངོན་བསྟོད་འདི་བཞིན་ཕྱི་ལོ་༢༠༡༤ ཟླ་ ༡༠ ཚེས་ ༡༧ ཉིན་བྲིས་པའོ། །