ནགས་ཀྱི་ཤིང་ལོ་ནས།
ཡུལ་ལྷོ་ཕྱོགས་རྒྱ་མཚོ་ཆེན་མོའི་ཉེ་འགྲམ་ན།།
བྱེས་སེ་རའི་འཁོར་ཡུག་བཀོད་པ་ཕྱི་ནས་མཛེས།།
གྲོགས་ཕུ་ནུའི་མཛའ་བརྩེའི་དམ་ཚིག་ནང་དུ་རུམ།།
དུས་བར་མེད་བརྩོན་པའི་སྒྲ་དབྱངས་རྣ་བར་ལྷུང་།།
སྤྲིན་ལང་ལོང་མཁའ་རུ་འཁྲིགས་པའི་དབྱར་དུས་ཞིག །
ཆར་འཇམ་པོས་ས་གཞི་བརླན་པའི་ཞོགས་པ་དེར།།
རླུང་གཙང་མ་ཁ་གང་བརྔུབས་ནས་རྒྱང་ལ་བལྟས།།
ཕྱི་འཁོར་ཡུག་ལྟ་ན་སྡུག་པ་མིག་གི་ཡུལ།།
ནགས་ཀྱི་ཤིང་ལོ་ནས།
མཐོ་རི་བོའི་རྩེ་མོ་སྤྲིན་གྱིས་རུམ།།
བར་སྤང་ལྗོངས་རྟ་ནོར་ལུག་གིས་རྒྱན།།
མདའ་རྒྱལ་མོ་དངུལ་ཆུ་དལ་གྱིས་འབབ།།
ཡུལ་འབྲི་རུའི་རྒྱབ་རི་ནགས་ལྷ་རེད།།
ཕྱག་གཡས་གཡོན་ལག་སྐོར་ཕྲེང་བས་རྒྱན།།
ཞལ་མུལ་མུལ་མ་ཎི་སྐྱབས་འགྲོ་ཟློ།།
ཡིད་དད་པ་དཀོན་མཆོག་གསུམ་ལ་ཆེ།།
སྡེ་འབྲི་རུའི་རྒན་རབས་ཆོས་ལ་དགའ།།
ནགས་ཀྱི་ཤིང་ལོ་ནས།
གཅིག་པོར་སྡོད་དུས་ཀ་ཕྲེང་འབྲི་ལ་དགའ།།
ཚ་བས་གཙེས་དུས་ཁ་བའི་ལུང་པ་དྲན།།
གཞན་ཡུལ་འདི་ན་ག་ཚོད་ལྷག་ཡོང་དྲན།།
གྱེས་བྲལ་ལོ་ཟླས་ང་ཡི་སེམས་པ་གྲང་།།
སྨྲ་བའི་སྒོ་ནས་ཅ་ཅོའི་སྨྲེ་སྔགས་ཤོར།།
ལྟ་བའི་མིག་གི་ཆ་ག་མཆི་མས་སྦངས།།
དགོང་མོའི་ཚོར་བ་ཇ་ཁུའི་མདོག་ལས་སྨུག །
མཚན་མོའི་མིག་ཟུང་ཉ་གང་ཟླ་བར་འཁྱུད།།