ཉི་སྲས་སྒྲོལ་མ།

མཛེས་སྡུག་ལྡན་པའི་ཡུལ་ལུང་བལྟས་ན་མཛེས་པའི་དཀྱིལ་འཁོར་ལ་རྟ་ནོར་ལུག་གསུམ་གྱིས་ཕྱུག་པའི་མཁར་ཁྱིམ་ཀྱི་ནང་དུ་ཁྱིམ་ཀྱི་བདག་མོ་ལས་ལ་བརྩོན་བཞིན་བསྡད་ཡོད། རང་ཉིད་ཀྱི་ཕྲུ་གུ་རྣམས་རྩེད་མོར་རོལ་ཞིང་དགའ་བའི་ངང་གནས། མཁར་ཁྱིམ་ཆུང་ཆུང་ནང་དུ་ཁྱོན་ནང་མི་བཅུ་ཡོད། དེ་ཡང་ནང་མི་རྣམས་སྤྲོ་སྐྱིད་ལྡན་པའི་འཚོ་བ་སྐྱེལ་བཞིན་ཡོད། དེ་ཡང་ཡུལ་ལུང་དེར་ཡོད་པའི་ཁྱིམ་ཀྱི་བདག་མོ་ལ་ཡོངས་གྲགས་སུ་ཨ་ཆེ་ཞེས་ལབ་སྲོལ་ཡོད། མོ་ལ་མཚོན་ན་མི་གཞན་གྱིས་བསྔགས་བརྗོད་ཀྱི་ཡུལ་དུ་གྱུར། ཁྱིམ་གྱི་པ་ལགས་མཚོན་ན་ཡང་སྒོ་ཕྱུགས་སེམས་ཅན་གསོ་ཉར་བྱེད་པར་དགའ་ལ། སེམས་ཅན་ཡོད་པའི་རྐྱེན་གྱིས་ཁྱིམ་རྒྱུད་ཀྱི་མཚན་བྱང་ནི་ལུ་གུ་ཚང་ངམ་དོན་གྲུབ་རྡེ་རྗེ་ཞེས་འབོད། པ་ལགས་ནི་ཚང་མ་མཉམ་དུ་མཐུན་སྒྲིལ་ཧ་ལས་པ་ཡོད་མཁན་ཞིག་ཡིན་པས། ཡུལ་མི་རྣམས་ཀྱི་སེམས་ནང་ལ་དད་གུས་བྱེད་སའི་ཕ་ཡག་པོ་ཞིག་ཡིན།

རང་ཐར།

"གནའ་སྔ་མོ་སྔ་མོ་ཞིག་ལ་འཇིག་རྟེན་འདིར་ཉི་མ་བདུན་དང་ཟླ་བ་བདུན་ཡོད་པ་དང་།མུན་ཟེར་བ་ཞིག་གཏན་ནས་རུབ་རྒྱུ་མེད།" དུས་རྒྱུན་ལྟར་ཨ་མ་སྒྲོལ་མས་རང་གི་བྱིས་པ་གཉིས་ལ་གཏམ་རྒྱུད་ཅིག་ཤོད་འགོ་བརྩམས།དོ་ནུབ་ཟླ་བ་མེད་པས་ཁོ་མ་སྨད་ཚོའི་ཁང་ཆུང་ནང་སྨག་རུམ་གྱིས་ཁེངས་ཡོད་པ་ལས་སྲིན་བུ་མེ་འཁྱེར་གྱི་འོད་ཙམ་ཡང་མ་མཆིས།འདི་ལྟ་བུའི་མཚན་མོར།ཁྱིམ་མཚེས་ཚོའི་མཆོད་སྒྲོམ་སྟེང་སྤར་བའི་སྒྲོན་མེའི་འོད་ཟེར་ལ་ཟླ་བ་ཤར་བའི་མཚན་མོ་ལས་ལྷག་པའི་གསལ་ཆ་ཞིག་ལྡན་ཞིང་།ནང་གི་ཐབ་ཁ་དང་དེའི་ཐོག་བསྐྱོན་པའི་སྣོད་རེ་ཟུང་།ཀ་བ།ཆ་སྒམ།དེ་བཞིན་ཉལ་ཁྲི་དང་ཉལ་ཁྲིའི་ཐོག་ཉལ་བའི་མི་རྣམས་རབ་རིབ་ཅིག་མཐོང་ཐུབ་མོད།འོན་ཀྱང་ཨ་མ་སྒྲོལ་མ་མ་སྨད་གསུམ་ལ་མཆོད་མེ་སྤོར་བའི་མར་དང་དངུལ་མེད་པས།མཚན་མོའི་མཐའ་དང་མཚམས་མེད་པའི་མུན་ནག་སྟུག་པོས་ཁོ་མ་སྨད་ཚོ་དང་ཁོ་ཚོའི་ཁང་ཆུང་ཡོངས་སུ་བཏུམས་ཡོད།མོའི་བྱིས་པ་ཆེ་བ་སྟེ་ལོ་བདུན་ལ་སོན་པའི་བུ་ཆུང་དེ་མོའི་ཉལ་ཁྲིའི་མགོ་ན་བརྒྱབས་པའི་ཉལ་ཁྲིའི་སྟེང་སྔས་ཐུག་བྱས་ནས་ཉལ་ཡོད་ལ།མོས་བུ་མི་འཁྱག་པའི་ཆེད་དུ་རང་གི་སྤུ་རྫོང་སྟུག་པའི་རྩག་པ་བཟང་ཤོས་ནང་བསྙལ་བའི་ཐོགརྙིང་ཟད་དུ་གྱུར་པའི་འཕྱར་བ་ཞིག་ཀྱང་སྟེང་དུ་བཀབ་ཡོད།བྱིས་པ་ཆུང་བ་སྟེ་ལོ་ལྔ་ལ་ཐོན་པའི་བུ་མོ་དེ་རང་གིས་རུམ་ནས་ཡོད།སྨག་དེ་ལྟར་སྟུག་རུང་མོས་རང་གི་བུས་མ་ནེ་རྩག་པའི་གོང་ང་ལ་གཏུགས་ཏེ་འགོ་བརྩམས་མ་ཐག་པའི་གཏམ་རྒྱུད་ལ་ཉན་ནས་ཡོད་པ་རྟོགས་ཐུབ། 

སེར་ལྷོ་བ་སྐལ་བཟང་བསྟན་སྐྱོང༌།

གངས་ལྗོངས་ས་ཡི་ཐིག་ལེ་མདོ་ཁམས་ཤོད་ཆེན་བཅོ་བརྒྱད་ཀྱི་ནང་ཚན་སྦས་ཡུལ་ནགས་ཤོད་ལུང་པའི་ནང་དུ།ཉེ་བའི་དུས་རབས་ཉི་ཤུ་པའི་ནང་དུ་འཚར་ལོངས་བྱུང་བའི།

གདོང་དམར་གྱི་ཕོ་རྒོད་དཔལ་བཟང་ཆོས་ལྡན་ནམ་ཡོངས་གྲགས་སུ་གྲྭ་ཞར་ཞེས་འབོད་པ།ཁོང་གི་མི་ཚེའི་དར་རྒུད་ལས་འཕྲོས་པའི།ཁྲོམ་གདོང་ཚང་དང་ཁོང་གི་བར་དུ་ཚད་ལས་བརྒལ་བའི་གཡུལ་འགྱེད་བྱས་སྐོར་བརྗོད་པ་ལ།སྟག་ཕུ་རྡོ་རྗེ་འཆང་སྐུ་ཕྲེང་རིམ་བྱོན་གྱི་གདན་ས་ཆོས་སྡེ་དགོན་རི་བོ་དཔལ་འབར་གླིང་གི་ཉེ་འདབས་སུ་ཆགས་པའི་འཕེལ་བ་གྲོང་ངམ།ཡུལ་སྐད་དུ་འཕེ་པ་གྲོང་ཞེས་འབོད་པ།གྲོང་དེའི་ནང་དུ་ཕོ་རྒོད་གྲྭ་ཞར་གྱི་ལྟེ་ཁྲག་ཐོག་མར་འཕོས་ཤིང༌།སྐྱེས་མ་ཐག་ཏུ་རྣམ་ཀུན་གྱི་སྐྱེ་བོ་གཞན་དང་མ་འདྲ་བར།མིག་གཅིག་ལས་མེད་ཅིང༌།གཅིག་པོ་དེ་ཡང་ཁྲ་ཆེལ་ལེར་གདངས་ནས་བལྟས་པས།དེར་ཡོད་ཀྱི་སྐྱེ་བོ་ཀུན་གྱིས་ལབ་གླེང་སྣ་ཚོགས་ཤིག་བྱུང་བའི་མཐར།གྲོང་མི་ཀུན་གྱི་བློ་འདྲི་ཡུལ་རྒན་པོ་བསོད་གྲགས་ཞེས་པ་ཞིག་ཡོད།ཁོང་ནི་གེ་སར་སྒྲུང་ལ་རྒྱུས་མངའ་ཤིན་ཏུ་ཆེ་ཞིང༌།ལྔ་བཅུ་ང་དགུའི་ཡར་སྔོན་དུ།གེ་སར་སྒྲུང་པོད་སུམ་བརྒྱ་བརྒལ་བ་ཡོད་པ་བཤད་སྲོལ་ཡོད་པ་བདེན་ན།རྒན་པོ་འདིས་བཀླགས་མ་མྱོང་བ་མེད་ཅེས་ཚིག་ཐག་བཅད་ཆོག།ཁོང་གིས་སྔར་གེ་སར་རྒྱལ་པོས་མི་ནུབ་དར་རྫོང་འབེབས་སྐབས།ཕོ་བདུད་རུ་ཊ་མིག་གཅིག་ཅེས་པ་ཞིག་ལ་ཡང་མིག་གཅིག་ལས་མེད་ཅིང་གཅིག་པོ་དེ་ཡང་སྐྱེ་དུས་དང་འཆི་དུས་གཉིས་ཀར་གདངས་ཏེ་བལྟས་པ་ཞིག་བྱུང་མྱོང་བ།འདི་ཡང་དེ་དང་འདྲ་བས་ཡག་རྟགས་ཤིག་ལར་ནས་མིན།དེ་བས་སྟག་ཕུ་རྡོ་རྗེ་འཆང་ལ་སྤྱན་འབུལ་ཞུ་དགོས་ཞེས་བཤད་པས།ཐམས་ཅད་ཀྱིས་མོས་མཐུན་བྱས།རྡོ་རྗེ་འཆང་མཆོག་ལ་སྤྱན་འབུལ་ཞུས་པས།