འབྲི་རུ་བྱ་ལག །

ཆུང་བྱིས་པའི་དུས་ནས་མཉམ་དུ་འགྲོགས་པའི་རྣམ་གཡེང་བཙན་པོ་དེས།

དུས་རྟག་ཏུ་བདག་སེམས་ཁ་ལོ་བསྒྱུར་ཞིང་།   ཕུགས་བསམ་དང་བྱ་གཞག་གང་ཡིན་ཐམས་ཅད་འཁུམ་དུ་བཅུག་སོང་ལ། ཐང་ཆེན་ཞིག་ན་ཡན་ལག་རྐྱོང་སྐུམ་བཞིན་ཉལ་བའི་མི་བུ་ཞིག་དང་གཉིས་སུ་མེད་པར་གཅིག་པུར་ལུས། གནོང་འགྱོད་ཞིག་དང་ལྷན་དུ་མིག་གཉིས་ཅེར་ཏེ་རྒྱང་བལྟ་བྱེད་བཞིན་སེམས་ཁོངས་སུ་གདུང་བ་ལྕི་མོ་ཞིག་གིས་མནར་།   རྣམ་གཡེང་གིས་འཁུམ་དུ་བཅུག་པའི་བདག་དང་འདྲ་བའི་མི་བུ་དག ང་ཚོ་ད་དུང་འདི་ལྟར་མི་ཚེ་སྐྱེལ་དགོས་སམ།   གཡེང་འདམ་གྱི་ཁྲོད་ནས་མགོ་བོར་གྱེན་དུ་བཏེག་སྟེ།    མཁའ་དབྱིངས་སུ་སྐྱོད་པའི་རྒོད་པོ་བཞིན།     གནས་གཅིག་མིན་པར་གླིང་ཕྲན་གཞན་ཞིག་གི་བར་སྣང་སུ།     འདི་ལྟར་འཕུར་སྐྱོད་བྱེད་དགོས་པ་མ་ཡིན་ནམ།།

ནགས་གཡག

དང་པོ།
སྔོན་ལས་སྡུག་པོ་སྣ་ཚོགས་ཤིག་གིས་མདུན་ནས་བཙན་གྱིས་འཐེན་ཏེ། འཕྲལ་རྐྱེན་ངན་པ་གྲངས་མེད་པ་ཞིག་གིས་རྒྱབ་ནས་རྦུད་རྒྱག་རྒྱབ་པའི། སྨད་འཚོང་མ་ཁྱོད། ངོ་མ་དོན་དམ་པའི་ངོ་ཚ་ཁྲེལ་ཡོད་ཅིག་ལོས་ཡིན། གཅིག་ཐར་བྱེད་པ་དེ་ཆེས་ཐབས་སྡུག་ཅིག་ཏུ་ལྟ་བའི་ཐེག་ཆེན་ཆོས་ཀྱི་སྙིང་པོ་ཡིད་ལ་བསྒོམས་ནས། ཨ་མ་དང་གཅུང་པོ་ལ་དུངས་བའི་མི་ཆོས་སྙིང་པོ་དེས་སྣེ་དྲངས་ཏེ། ཨ་ཕ་དང་མཉམ་དུ་སྐྱིད་ཟ་སྐྱིད་ཉལ་དེ་བློས་གཏོང་བྱས་ནས། ལས་ངན་པའི་ཨ་མ་དང་གཅུང་པོའི་སླད་དུ། རང་ཉིད་ཀྱིས་སྡུག་བསྔལ་དྲག་པོ་སྣ་ཚོགས་ཤིག་མྱང་རྒྱུ་དང་དུ་བླངས་པ་དེ་ནི། འཕགས་མ་ཞིག་གི་སྤྱོད་པ་ལས་ཅིའི་ཕྱིར་འདས།

ནགས་གཡག

བོད་ལྗོངས་ཆབ་མདོ་དང་ཁྱུང་པོའི་འབྲིང་རིམ་སློབ་མ་ཁ་ཤས་ལ་ཨི་ཙི་ན་ཚ་ཡོད་པ་དང་།

ད་དུང་སྦྲ་ཆེན་དང་འབྲི་རུ་རྫོང་སོགས་ལ་ཁྱབ་བཞིན་ཡོད་པའི་གནས་ཚུལ་ཞིག་མཐོང་ཐོས་བྱུང་བས་འཇིགས་སྐྲགས་ཤིག་གིས་དབུགས་འཚང་པ་དང་མཉམ་དུ་སེམས་སྡུག་ཅིག་གི་མིག་ཆུ་ཞིག་ཅིའི་ཕྱིར་མི་ལྷུང་། རྒྱུ་མཚན་ནི་ནད་ངན་དེའི་སྟོབས་ཤུགས་དང་གནོད་ཚབ་ཀྱིས་སྤྱི་ཚོགས་ཤིག་དང་མི་རིགས་ཤིག་རྩ་མེད་བཟོ་རྒྱུ་ནི་རྩ་ཉག་མ་ཞིག་གི་སྐེད་གཅད་རྒྱུ་ལས་གཞན་ཅི་ཞིག་ཡིན། དེར་བརྟེན་སྤྱི་ཚོགས་ཤིག་དང་མི་རིགས་ཤིག་གི་བདེ་སྡུག་ལ་བསམ་བློ་ཡོད་མཁན་ཞིག་ཡིན་ན། གཏམ་ངན་དེས་དངངས་སྐྲགས་མི་སྐྱེ་མཁན་སུ་ཞིག་ཡོད། ངོ་མ་བདེན་པ་རེད། གཏམ་ངན་པ་ནི་ནམ་མཁའ་ལྟར་ས་གཞི་ཡོངས་ལ་ཁྱབ་ཡོང་དུས་མིག་དང་རྣ་བ་གཉིས་ལ་རང་དབང་སུ་ཡིས་སྟེར།  ད་དུང་མི་མང་པོ་ཞིག་ལ། གནས་ཚུལ་དེའི་ཐོག་བསམ་བློ་གུ་དོགས་དང་ལྟ་སྟངས་ཐབས་སྡུག་ཅིག་ཡོད། དེ་ནི་སློབ་མ་དེ་ཚོ་ཆེས་སྤྱོད་ངན་ཞིག་དང་ཞབས་འདྲེན་ཞིག་ཡིན་པར་འདོད་བཞིན་པ་དེ་ཡིན། དོན་དངོས་ཐོག་སོ་སོའི་ལྟ་སྟངས་དེ་དང་བསམ་བློ་དེ་ཆེས་ཐབས་སྡུག་ཅིག་ཡིན་པ་ཚོར་གྱི་མེད། སྤྱིར་བཏང་འཛམ་གླིང་འདིར་ཕོ་མོའི་འཁྲིག་སྤྱོད་ནི་གསང་བ་ཞིག་དང་ངོ་ཚ་ཞིག་མིན་པར་རྒྱུན་ལྡན་གྱི་འཚོ་བའི་ཆ་ཤས་མེད་ཐབས་མེད་པ་ཞིག་ཡིན། དེ་ཙམ་དུ་མ་ཟད་ད་ལྟའི་ཆར་ལོ་ཆེ་ཆུང་གང་ཡིན་རུང་འཁྲིག་སྤྱོད་བྱེད་ཐུབ་མཁན་ཞིག་ཏུ་གྱུར་རྗེས། འཁྲིག་པ་སྤྱོད་པ་ནི་རང་གིས་རང་ལ་དབང་བའི་འཚོ་བའི་ཆ་ཤས་ཤིག་བླངས་པ་ལ། སྤྱི་ཚོགས་ཕལ་ཆེ་བར་ཡོངས་ཁྱབ་དང་ངོས་འཛིན་གསལ་པོ་ཡོད། དེར་བརྟེན་འབྲིང་རིམ་སློབ་མ་ཙམ་དུ་མ་ཟད་སློབ་ཆུང་སློབ་མ་ལ་ཡང་བྱ་བ་དེ་རིགས་ལ་འཇུག་མཁན་ནི་འཛམ་གླིང་འདིར་གྲངས་ཀ་སུ་ཡིས་ཐུབ།