ནགས་ཤོད་སྐལ་རྒྱན།
སྐལ༵་ལྡན་སྐྱེ་བོ་ཀུན་གྱི་ཕན་བདེའི་གཞི། །
བཟང༵་པོའི་མདོ་སྔགས་རིག་པའི་གནས་འདི་ཞེས། །
རྒྱལ༵་བའི་ལུང་གིས་ཡང་ཡང་བསྔགས་པ་བཞིན། །
མཚ༵ན་ལྡན་བཤེས་ཀྱིས་ཤེས་རིག་སྐྱོང་ཚུལ་གླེང་། །
སྔོན་ཚེ་སློབ་དཔོན་ཐོན་མི་བོད་ལ་འཁྲུངས། །
བོད་ཀྱི་སྐད་ཡིག་རིག་པའི་ལམ་སྲོལ་གཏོད། །
ཤེས་རིག་ཁ་བའི་རི་བོའི་དབུ་རྩེ་འཕུར། །
སློབ་དཔོན་ཐོན་མི་བཀའ་དྲིན་ཆེ་བའི་དཔེ། །
གྱི་ན་བ་ལམ་བཟང་པོ།
སྣ་ལྔའི་འདབ་མ་བཞད་པའི་པདྨ་ཡི་གདན་ལ།།
བཞིན་མཛེས་ངག་གི་ལྷ་མོ་བཅུ་དྲུག་གི་ལང་ཚོ།།
འཇའ་ཚོན་དར་གོས་བཀླུབས་ཏེ་པི་ཝང་ཡང་འཁྲོལ་བ།།
བདག་གི་མགྲིན་པའི་རྩ་མདུད་འགྲོལ་ཙམ་ཞིག་གནང་རོགས།།
ལ་ལུང་ཁྲི་སྟོང་བརྒལ་ཏེ་རང་ཡུལ་ནས་བྱོལ་ཡང་།།
ས་མཐའ་གནམ་མཐར་འགྲིམ་དུས་དྲན་པ་ཡིས་མ་བཟོད།།
ཕུན་ཚོགས་རི་ཆུའི་བཀོད་པ་ལམ་ལམ་དུ་འཆར་ཚེ།།
འགོག་མེད་རང་བཞིན་བརྗོད་པའི་གླུ་དབྱངས་འདི་ཤོར་འགྲོ།།
ནགས་ཤོད་ཅོང་བརྡ།
གྲགས་པའི་གདུགས་དཀར་རིང་དུ་ཁྱབ་པ་ཡི།།
བཙན་པོ་སྲོང་བཙན་ཁྲི་གདུགས་ཉི་མ་ལ།།
ཆབ་འབངས་སྐར་ཚོགས་གྲངས་ལྟར་བཀྲ་བའི་དབུས།།
བློན་ཆེན་ཡུལ་བཟུང་དུང་གི་ཟླ་བ་ཚེས།།
མཛངས་བློན་དེ་ཡིས་ཁོད་ཀྱི་གཞི་རྟེན་བགྱིས།།
རྗེ་ལ་ཞོ་ཤ་འབུལ་དང་ཁབ་མཐའ་བསྐྱེད།།
དེ་ཀུན་ལྷག་མེད་འབྲི་བར་མི་སྤོབས་ཀྱང་།།
ཡབ་མེས་བློན་ཆེན་དྲན་པས་ཅུང་ཟད་འབྲི།།