ནག་པོ་བཀྲ་ཤིས།

ལ་ཆེན་དེ་ནི་ཐོད་དུ་བཞག་སྟེ་རི་ཀླུང་ཐང་གསུམ་གོམ་གྱིས་འཇལ་ན། །

རྡོག་རྗེས་མ་ངེས་གྲངས་མེད་མཐའ་ན་གཏམ་རྒྱུད་དེ་ཡང་ཤི་མ་གསོན་རེད། །

རེ་ཐག་མ་ཆད་རྡོ་ལ་རི་བོ་མཚར་སྡུག་སྟོང་གི་རྨི་ལམ་སྦྲུམ་པས། །

གཤོག་ཐོག་ཁོ་ན་རླབས་ཀྱིས་བསྐྱོད་པ་ནམ་མཁའ་གཅིག་པུར་སྟོང་པ་རེད། །

རི་རྒྱུད་དེ་ནི་ཧི་མ་ལ་ཡ་འགྲུལ་པ་ཁོ་རང་གངས་ཀྱི་མི་རེད། །

མཁའ་ལམ་མ་ཆོད་སེམས་པ་ཆེན་པོ་རྡོག་པའི་རྗེས་དེ་གྲངས་ལ་བགོས་ན། །

ས་ཡ་དྲུག་གི་ཚད་དུ་སླེབས་ཡོད་ལོ་དང་ཟླ་བ་སྟོང་པ་སྟོང་རྐྱང་། །

འཛུམ་པ་ཁོ་ནའི་དཀྱིལ་དུ་གཟིམས་པ་བྱིན་རླབས་རིན་ཆེན་ངང་གིས་སྩལ་ཡོང་། །

བསྟན་འཛིན་དར་རྒྱས།

སྐྱབས་རྗེ་ཞིང་གཤེགས་འཁོར་ལོའི་མགོན་པོ་གང་། །

དགོངས་པ་ཆོས་དབྱིངས་བསྡུས་པར་ཀྱེ་མ་ཧུད། །

ངེས་པ་དོན་གྱི་བླ་མ་ཁྱེད་འདྲ་དཀོན། །

མཁས་བཙུན་བཟང་གསུམ་རྣམ་ཐར་བྱིན་གྱིས་རློབས། །

ཟབ་གསལ་གསུང་གི་ཉིང་ཁུ་རེ་རེ་བཞིན། །

དྲན་པའི་མོད་ལ་གདུང་བའི་མཆི་མ་ཤོར། །

ཕ་ཡུལ་རྒྱང་ལ་གྱེས་ཏེ་མི་ཡུལ་དུ། །

སྐུ་ཚེའི་མཐའ་མར་མ་མཇལ་ཡིད་རེ་ཕངས། །

ནགས་ལྷ་སྐལ་བཟང་།

བསིལ་ལྡན་གདོང་དམར་ཚང་གི་གནས་མཆོག་འདིར། །

ཡབ་ཆེན་སྐད་ཡིག་སྲོལ་རྒྱུན་རིང་མོ་དང་། །

ཡུམ་ཆེན་གཤིས་རྒྱུད་བཟང་པོའི་བསླབ་བྱ་འདི། ། 

ཕ་ས་གངས་རིའི་ལྗོངས་ཀྱི་གཅེས་ནོར་ཞིག །

སྤངས་རྟོགས་འདབ་ཕྲེང་རྒྱས་པའི་དགེ་བའི་བཤེས། ། 

ཡོངས་ཁྱབ་དྲི་བསུང་རིགས་པའི་རྩལ་གྱིས་དྲངས། །

ལེགས་ཚོགས་འདོད་དགུ་ཡན་ལག་བརྒྱད་ཀྱི་གཏེར། །

འཇུག་ངོགས་བདེ་བའི་ནགས་ལྷའི་སྒྲོན་མེ་བསྒྲིགས། །

ཤར་ནུབ་རྒྱང་ཐག་རྫས་རྡུལ་ཤུགས་ཀྱིས་གཏོར། །