སྙན་ངག་པ།ནག་པོ་བཀྲ་ཤིས།

ལང་ཚོའི་མཛེས་སྡུག་སྤོབས་པས་ཁུར་ཏེ་རྟ་ལམ་བཅད་ནས་བྱང་ལ་སོང་།།

སེམས་པས་མ་ངོམས་རི་བོའི་ཚོགས་ཀྱང་ལག་ཏུ་ལེན་པའི་ངར་རྒྱལ་དེས།།

ཅི་ཡང་མི་འཇིགས་དཔའ་བོའི་གཏམ་རྒྱུད་སེམས་སུ་སྦྲུམ་པའི་སྙིང་ཁམས་བསྐྱེད།།

རྒྱལ་ཁམས་རྒོད་པོས་ཤུགས་ཀྱིས་གཤགས་ཏེ་གླིང་བཞིར་རྡོག་རྗེས་གྲངས་སུ་ཕབ།།

ལེ་དབར་སྟོང་གི་སྒར་ས་རེ་ནས་འཇིག་རྟེན་ལས་ཀྱི་ཆོས་ཉིད་མྱངས།།

བརྒྱ་གྲོང་མི་ཡུལ་དལ་གྱིས་མྱུར་ཏེ་ཡུལ་གྱལ་སྐྱེ་བ་པང་དུ་བླངས།།

སྐྱིད་སྡུག་བར་ནས་བློ་སྒོ་ཕྱེ་མཁན་ཡབ་ཆེན་གང་དེ་ཡིད་ངོས་སུ།།

དྲན་པ་རེ་རེས་འདང་ཞིག་བརྒྱབ་ན་རླབས་ཆེན་སྐྱེ་བོའི་གཤིས་ཤིག་སྣང་།།

ལམ་བཟང་པོ།

ལོ་ཟླ་ལྷོད་མེད་གཙང་པོའི་རྒྱུན་བཞིན་འགྲོ།།

ཕ་ཡུལ་དྲན་གདུང་དབྱར་གྱི་མཚོ་ལྟར་རྒྱས།།

མི་ཚེ་ཐུང་ཐུང་ས་མཐར་འཛེད་དགོས་པ།།

ཚེ་སྔོན་ལས་ཀྱིས་བྲིས་པའི་ཐོད་ཡིག་འདྲ།།

དྲིན་ཅན་ཨ་མ་འཇིག་རྟེན་བརྗེས་སོང་སྐད།།

ཨ་ཕའི་བདེ་འཚམ་འབྲུ་གཅིག་གོ་སྐལ་མེད།།

སྤུན་ཉེ་དགའ་འདྲིས་རྣམས་ཀྱང་དེ་བཞིན་ཉིད།།

བསོད་ནམས་དབེན་པའི་བུ་རུལ་ལས་དབང་ལགས།།

སེ་གངས་ཆུས།

མི་ལོ་སྟོང་ཕྲག་རིང་མོ་ཡི།།

ལོ་རྒྱུས་ལྡན་པའི་རྒྱལ་ཁབ་དེ།།

དབང་ཡོད་དབང་མེད་འཕྲད་པའི་དུས།།

བདེན་ལྕེ་ཡོད་ཀྱང་སྨྲ་དབང་མེད།།

ཇག་ཚོགས་འདྲ་བའི་གུང་བྲན་གྱིས།།

བོད་རྒྱལ་བཙན་པོའི་སྐད་ཡིག་སོགས།།

རང་དབང་མེད་པར་སྣུབ་པའི་དུས།།

སྐྱོ་སེམས་མིག་ཆུ་འགོག་ཐབས་བྲལ།།