བསམ་གཏན་དཔལ་འཛོམས།
ནག་ནོག་དྲི་མས་མ་གོས་པའི། །
རྒྱ་ཤོག་དཀར་པོ་ཇི་བཞིན་དུ། །
ཆགས་སྡང་རྨོངས་པས་མ་གོས་པའི། །
ལོ་ཆུང་བྱིས་པའི་སེམས་ཁམས་གཙང་། །
ང་དགའ་ཁྱོད་སྡུག་རྣམ་རྟོག་དང་། །
འཁྱག་ལྟོགས་བཀྲེས་སྐོམ་སེམས་འཁྲལ་དག །
རྣམ་པར་དབེན་ཞིང་རྩེད་མོ་ལ། །
གཡེང་བའི་བྱིས་པ་འདི་དག་མོས། །
གུས་མོ་སློབ་གྲྭ་འདིར་སླེབས་ནས། །
ལོ་འཁོར་གསུམ་ལྷག་ཕྱིན་ན་ཡང་། །
ཟླ་ཤས་ལྟ་བུའི་ཚོར་སྣང་འདི། །
བྱིས་པ་འདི་ཚོའི་བཀའ་དྲིན་ཡིན། །
གང་གིས་ཤེ་ན་སློབ་ཕྲུག་རྣམས། །
ཕལ་ཆེར་གྲོང་གསེབ་དབུལ་པོ་དང་། །
ཕ་མ་མེད་པའི་དྭ་ཕྲུག་དག །
གསོ་སྐྱོང་བྱས་པ་ཤ་སྟག་ཡིན། །
དེ་ལྟའི་ཉམ་ཐག་སློབ་ཕྲུག་ཚོའི། །
གནས་སྟངས་དངོས་སུ་མཐོང་བའི་ཚེ། །
ལྷག་བསམ་རྣམ་པར་དག་པ་ཡིས། །
ངལ་བ་དང་ལེན་སློབ་ཁྲིད་བྱས། །
དེ་ཡང་སློབ་དུས་ཡོལ་མེད་ངང་། །
སོ་སོའི་སློབ་ཚན་ཆད་མེད་ཀྱིས། །
ཁ་གསལ་གོ་བདེ་གཙོར་བཟུང་བའི། །
སློབ་ཁྲིད་དགའ་བའི་འཛུམ་གྱིས་བསུས། །
སྐབས་རེ་དགོས་པ་རྒྱུ་མཚན་གྱིས། །
ལེ་ལོའི་དབང་གྱུར་སློབ་ཕྲུག་འགར། །
སེམས་པ་གངས་རི་ལས་དཀར་ཡང་། །
ངོ་གདོང་རྫ་རི་ལས་གནག་ཅིང་། །
ཕྲ་རིང་དབྱུག་པ་འཕྱར་ཙམ་དང་། །
སྡིགས་མོའི་སྐད་གསང་བསྒྲགས་པ་ཡིས། །
རྣམ་གཡེང་ལེ་ལོའི་ངན་སྤྱོད་ལས། །
བཅུན་པའི་ཐབས་ལམ་འབད་བརྩོན་བྱས། །
སྐབས་འགར་ན་ཆུང་སློབ་ཕྲུག་ཚོ། །
མཉམ་དུ་རྩེད་མོ་རྩེ་བ་དང་། །
སྙན་པའི་སྒྲུང་དང་མཚར་བའི་གཏམ། །
སྣང་བ་སྐྱིད་པའི་འཚོ་བར་རོལ། །
སྐབས་རེ་ཤེས་ཡོན་ཀུན་སྤྱོད་ཐད། །
སློབ་ཕྲུག་སེམས་ཁམས་དང་མཐུན་པའི། །
སློབ་ཞོར་ཁ་ཏ་བསླབ་བྱ་དག །
གང་ཤེས་དུས་དང་འཚམ་པར་བྱས། །
ཉམས་ཆུང་བྱིས་པ་སློབ་ཕྲུག་ཚོའི། །
མཉམ་དུ་འགྲོ་འདུག་ཚོར་སྣང་ནི། །
མི་ཚེའི་ནང་གི་སྐྱིད་ཤོས་ཤིག །
ཡིན་སྣང་ཤར་བས་སྤྲོ་བ་འཕེལ། །
དེས་ན་གཅེས་པའི་སློབ་ཕྲུག་ཚོ། །
ཤེས་ཡོན་ཀུན་སྤྱོད་ཡར་རྒྱས་ངང་། །
བདེ་སྐྱིད་ལྡན་པའི་འཚོ་བ་ལ། །
རོལ་བའི་བཀྲ་ཤིས་སྨོན་ལམ་འདེབས། །