བསྟན་འཛིན་བསོད་ནམས།
རྒྱལ་ཀུན་སྙིང་རྗེ་གཟུགས་སུ་ཤར་བ་ཡི།།
ཐུགས་རྗེ་ཆེན་པོ་བདག་སྙིང་པདྨོར་བཞུགས།།
༸རྗེ་བཙུན་བླ་མ་རི་དབང་བསྟན་འཛིན་གྱི།།
རྗེས་དྲན་ཅུང་ཟད་བརྗོད་ལ་དཔང་པོར་མཛོད།།
སངས་རྒྱས་གྲངས་མེད་ཅི་ཙམ་བྱོན་ན་ཡང་།།
སེམས་ཅན་གྲངས་མེད་ད་དུང་ལྷག་པ་འདི།།
རང་རང་ལས་དང་སྐལ་བ་མ་འཛོམས་བར།།
ཅིས་ཀྱང་བསྒྱུར་དུ་མེད་པའི་བདེན་རྟགས་ཤིག།།
དེ་ཕྱིར་རང་རང་ལས་སྐལ་འཛོམས་པ་ཡི།།
རང་གི་བཤེས་གཉེན་མོས་གུས་རྗེས་དྲན་དེ།།
རང་གི་ལེགས་ཚོགས་འགྲུབ་པའི་གཞི་མ་རུ།།
རང་རེའི་དམ་པ་གོང་མའི་ཞལ་རྒྱུན་ཡིན།།
ཁྱེད་ཀྱི་སྐུ་གསུང་ཐུགས་ཀྱི་མཛད་པ་ཀུན།།
བྱིས་བློ་བདག་གི་སྤྱོད་ཡུལ་མ་ཡིན་མོད།།
ཆུ་བུར་མིག་དང་རྣ་བས་ཐོས་པ་སོགས།།
ཅུང་ཟད་ངེས་འདི་ཉུང་ངུའི་ཚིག་གིས་བརྗོད།།
གདུལ་བྱ་བདག་སོགས་ལས་སྨོན་བཙན་པ་དང་།།
ཁྱེད་ཐུགས་དམ་བཅའ་གཡེལ་མེད་གཉིས་འཛོམས་ལས།།
ནགས་ཤོད་འབྲི་ལྗོངས་དཔྱིད་ཀྱི་པད་ཚལ་དུ།།
ཁྱེད་སྐུ་པདྨོ་བཞད་པ་ངོ་མཚར་རྨད།།
ཡང་སྤུལ་ཉི་མ་གཞོན་ནུའི་དཀྱིལ་འཁོར་དེ།།
ནགས་ཕྱོགས་སྒྲ་གཅན་གཡུལ་ལས་རྒྱལ་བ་དང་།།
གསན་བསམ་སྒོམ་པའི་འོད་མདངས་འཚེར་བ་ཞིག།།
ནགས་ཤོད་འབྲི་ལྗོངས་ཡུལ་དུ་འཆར་འདི་མཚར།།
གངས་ཅན་སྣོད་བཅུད་གུད་ཅིང་ཉག་ཕྲའི་སྐབས།།
ནག་ཕྱོགས་དཔུང་གིས་བརྩེ་མེད་འཇིགས་རུང་དེས།།
ཁྱེད་ཀྱི་སྐུ་ཚེའི་མཛད་དཀའ་བསྐྲུན་པའི་ཚུལ།།
ཆ་ཙམ་བརྗོད་ནུས་སྤོབས་པ་བདག་ལ་མེད།།
ཁྲི་མུན་བཅུག་དང་སྐུ་ལ་བསྡོ་བ་སོགས།།
ཁྱེད་དང་ཁྱེད་འདྲའི་དངོས་སུ་མྱོང་ཚུལ་དེ།།
འཇིགས་རྟེན་ཁམས་འདིར་ནམ་ཡང་མི་ནུབ་པར།།
རིགས་ཀྱི་རྡོ་རིང་ཞིག་ཏུ་འགྱུར་བར་འོས།།
ཕྱི་ནང་རྐྱེན་ངན་ངན་དགུ་འཛོམས་པ་ཡི།།
གངས་ཅན་ཆོས་སྲིད་སྒྱེལ་བའི་རླུང་དམར་དེས།།
ཁྱེད་ཐུགས་དམ་བཅའ་རྡོ་རྗེ་བྲག་རི་དེ།།
བསྒྱེལ་བར་མ་ནུས་བརྟན་པར་གནས་འདི་མཚར།།
རིགས་མི་མཐུན་པའི་རལ་གྲི་རྣོན་པོ་ཡིས།།
རིགས་ཀྱི་ལྗོན་པའི་རྩ་བ་སྒུལ་བའི་སྐབས།།
རང་རིགས་དུང་ཞིང་དཔའ་རྩལ་ལྡན་པའི་ངང་།།
རང་གི་ནུས་པས་སྲི་ཞུ་བསྒྲུབས་འདི་སྨོན།།
ཆོས་མིན་ཉེས་པས་ས་སྟེང་ཁྱབ་པའི་སྐབས།།
ཆོས་ཀྱི་རྩ་བ་དམ་པའི་སྤྱོད་པ་དེ།།
དམ་མིན་ཉེས་སྤྱོད་དྲི་མས་མ་གོས་པར།།
དམ་པའི་ངང་ཚུལ་བརྟན་འདི་རྨད་བྱུང་ངོ་།།
བསྟན་པ་རིན་ཆེན་ཉམ་ཉེས་ཉག་ཕྲའི་སྐབས།།
དེ་འཛིན་སྐྱོང་ལ་ངལ་བ་མ་འཛེམས་པར།།
ཇི་བཞིན་འཚམ་པའི་མཛད་པ་བསྐྱངས་པ་འདིས།།
བསྟན་འཛིན་དམ་པའི་བདེན་རྟགས་གསལ་པོར་བསྟན།།
རིག་གསར་རླུང་འཚུབ་རྡོལ་བའི་ཐལ་རླུང་དེས།།
ཆོས་རིག་ཉམ་ཉེས་མཐའ་ལ་དེེད་པའི་སྐབས།།
ཉམ་པ་སོར་ཆུད་ཐབས་མཁས་ལམ་བཟང་དེས།།
ཁྱེད་ཐུགས་མཁའ་ལྟར་ཡངས་པ་མཚོན་ནོ་སྙམ།།
རང་རིགས་ནུས་པ་གཞན་ལས་དམན་པ་དེ།།
རང་རིགས་གདོད་མའི་རང་གཤིས་མ་ཡིན་ཀྱང་།།
རང་དགོས་ཤེས་ཡོན་གཙིགས་ཆེར་མ་བཟུང་བས།།
རང་རིགས་འདི་ལྟར་གྱུར་པ་ཁྱེད་ཀྱིས་གསུངས།།
བྱུང་བ་ཐམས་ཅད་རྒྱུ་མེད་མ་ཡིན་ཞིང་།།
འགྲུབ་པ་ཐམས་ཅད་འབད་མེད་མ་ཡིན་ན།།
མི་མཐུན་རྒྱུ་སྤོང་མཐུན་པའི་རྒྱུ་སྒྲུབ་ཅིང་།།
རང་དགོས་འབད་པས་བསྒྲུབ་དགོས་རྟེན་འབྲེལ་གནད།།
འདོད་སྡང་གཉིས་ཀྱི་གཡུལ་ས་འཇིགས་རུང་འདིར།།
དཔྱོད་ཤེས་གོ་མཚོན་དབུལ་བའི་ཉམ་ཆུང་ཚོ།།
གསོན་པའི་རེ་ལས་འཆི་བའི་ཉེན་ཆེ་བས།།
ཀྱེ་མ་སྐྱབས་མཆོག་གང་དུ་བཙལ་དགོས་སམ།།
རང་གིས་རང་ཉིད་སྐྱོབ་པར་མ་ནུས་ན།།
གཞན་གྱིས་སྐྱོབ་པར་འདོད་པ་གད་མོའི་གནས།།
རང་གི་ལོ་རྒྱུས་རང་གི་རིག་གཞུང་སོགས།།
རང་གིས་འཛིན་དགོས་ཁྱེད་ཀྱི་གདམས་པའི་གནད།།
ས་མཐར་གནས་པའི་ཡུལ་གྱར་ང་འདྲ་བ།།
ཁྱེད་ཀྱི་སློབ་བུའི་གྲལ་མཐར་འཁོད་ཙམ་ལས།།
ཁྱེད་ཀྱི་སྐུ་གསུང་ཐུགས་ཀྱི་ཡོན་ཏན་ཀུན།།
ཇི་བཞིན་མཐོང་བའི་སྐལ་བས་དམན་ནས་སོང་།།
ཁྱེད་ཀྱི་རྗེས་དྲན་མོས་པས་སྐུལ་ཙམ་ལས།།
དོན་ཟབ་བརྗོད་ལའང་སྤོབས་པ་ཧ་ཅང་ཕྲ།།
དེ་ཕྱིར་འདི་ན་ཅུང་ཙམ་སྨྲས་པ་འདི།།
རྒྱ་མཚོ་ཆེ་ལས་ཆུ་ཐིག་ཙམ་ཞིག་གོ།
མདོར་ན་ཁྱེད་ནི་དམ་པའི་སྐྱེས་ཆེན་སྟེ།།
སྐྱེས་སྟོབས་ཡོན་ཏན་གཞན་དྲིང་མི་འཇོག་ཅིང་།།
སྦྱང་སྟོབས་ཐོས་བསམ་བསྒོམས་པའི་ཡང་རྩེར་སོན།།
སྤངས་རྟོགས་ཡོན་ཏན་ལྷུན་རྫོགས་བླ་མ་ལགས།།
ང་མཁས་ཟེར་ནས་ཁེངས་པའི་དྲེགས་པ་མེད།།
ཁྱོད་བླུན་ཟེར་ནས་གཞན་ལ་མཐོང་ཆུང་མེད།།
རང་གི་ཤེས་རབ་རྩལ་གྱིས་མཐོང་བའི་དོན།།
བརྩེ་བའི་ལམ་ནས་ཇི་བཞིན་འདོམས་མཁན་ཁྱེད།།
གནའ་དེང་ཤེས་རིག་དཔལ་གྱི་གཟི་བྱིན་ལ།།
མི་འཇིགས་གདེང་ཐོབ་གོམ་པ་མདུན་སྐྱོད་ལ།།
རང་གི་ཕེབས་ལམ་བདེ་ལམ་མྱུར་ལམ་སོགས།།
མོས་བློ་འཚམ་པའི་ལམ་སྟོན་གསལ་བར་མཛད།།
དུཿཁས་མནར་བའི་རང་གཞན་སྐྱེ་འགྲོ་ཀུན།།
ཡང་དག་ལམ་དང་ཆོས་ཀྱི་ཐར་ལམ་སོགས།།
ཀུན་གྱིས་བླང་བར་འོས་པའི་བསླབ་བྱ་ཀུན།།
ཀུན་ལ་འདོམས་མཁས་ཁྱེད་ལས་གཞན་ལ་སུ།།
སེར་སྣའི་རྒྱུ་ཡིས་ཕངས་པའི་གནས་དག་ཏུ།།
འཕེན་པའི་ལས་འབྲས་ཇི་བཞིན་རབ་མཁྱེན་ནས།།
ཆོས་དང་ཟང་ཟིང་མི་འཇིགས་སྐྱབས་སོགས་ཀྱིས།།
སྦྱིན་པའི་གནས་ལ་རང་གནས་གཞན་ཡང་བཀོད།།
ཚུལ་འཆལ་ཉེས་སྤྱོད་ཕྲ་མོས་མ་གོས་ཤིང་།།
བསྲུང་བྱ་སྲུང་བྱེད་འཁོར་གསུམ་མི་དམིགས་པའི།།
མི་མཐུན་ཚུལ་འཆལ་ངན་པས་མི་རྫི་བའི།།
ཚུལ་ཁྲིམས་ཕར་ཕྱིན་སྤྱོད་ལ་ཡང་དག་གནས།།
སྡུག་བསྔལ་དང་དུ་ལེན་ལ་མི་ཞུམ་ཞིང་།།
དཀའ་ཐུབ་མི་བཟོད་མི་མཐུན་རབ་ཞི་ནས།།
ཞེ་སྡང་མེ་ལ་གཉེན་པོ་ཆབ་རྒྱུན་གྱིས།།
བརླན་གཤེར་བཟོད་པའི་ཕར་ཕྱིན་ཁྱེད་ཀྱི་རྒྱན།།
བག་མེད་སྒྱིད་ལུག་བརྙས་པའི་ལེ་ལོ་ཡི།།
གཉེན་པོ་དགེ་ལ་སྤྲོ་བའི་འདུན་པ་ཡིས།།
ལུང་རྟོགས་ཡོན་ཏན་ཡར་ཟླའི་དཔལ་འགྲན་པའི།།
དགེ་སྤྲོ་བརྩོན་འགྲུས་ཕ་རོལ་ཕྱིན་ལ་གནས།།
བྱིང་རྒོད་དྲི་མའི་སྐྱོན་གྱིས་མ་གོས་ཤིང་།།
རྣམ་རྟོག་གཡོ་བའི་གཞན་དབང་མ་གྱུར་པར།།
ཞི་གནས་ངང་ནས་དཔྱད་འཇོག་ཤིན་སྦྱངས་ཀྱིས།།
ཟིན་པའི་བསམ་གཏན་ཕར་ཕྱིན་ཁྱེད་ལ་མངའ།།
སྤྲོལ་བྲལ་བདེན་སྟོང་གནས་ལུགས་རྟོགས་པའི་བློ།།
རིག་པ་ཡེ་ཤེས་སྙིང་རྗེའི་གྲོགས་ཅན་དེས།།
མི་མཐུན་སྤང་བྱ་མ་ལུས་འཇོམས་ནུས་པའི།།
རྣམ་འབྱེད་ཤེས་རབ་ཕར་ཕྱིན་ཁྱེད་ཀྱི་རྒྱན།།
བརྡ་སྤྲོད་སྙན་ངག་ལོ་རྒྱུས་རིག་པ་དང་།།
ནང་བསྟན་རིག་སོགས་མཁས་བྱའི་གནས་རྣམས་ལ།།
སུས་ཀྱང་མ་ཁེགས་ཁྱེད་ཐུགས་དེར་ཤོར་བས།།
སྐུ་ཚེ་རིལ་པོ་དེ་རུ་ཐིམ་མམ་སྙམ།།
གདུལ་བྱའི་བསོད་ནམས་ལྷ་ལམ་ཡངས་པ་རུ།།
ཁྱེད་སྐུ་ཉིན་བྱེད་དབང་པོ་མ་བཞུགས་པར།།
བློ་བུར་ནུབ་རིར་བཞུད་པའི་གུད་པ་དེ།།
རྣ་བས་ཐོས་ཚེ་སེམས་ནི་ཟུག་རྔུས་མནར།།
ད་དུང་ཁྱེད་ཀྱི་གདུལ་བྱ་མ་རྫོགས་ཤིང་།།
ཁྱེད་ཀྱི་ཐུགས་བརྩེས་འདོར་བའང་མི་སྲིད་པས།།
ཡང་སྤྲུལ་ཉི་མ་གཞོན་ནུའི་མཛད་པ་དེ།།
མགྱོགས་མྱུར་གནས་འདིར་བསྐྱང་བར་བསྒུགས་ནས་ཡོད།།
ཨེ་མ་བཤེས་གཉེན་རི་དབང་རིན་པོ་ཆེའི།།
ཡོན་ཏན་ཅུང་ཟད་བརྗོད་ཅིང་དྲན་པ་ཡི།།
དགེ་བ་ཅུང་ཟད་བདག་གིས་བསགས་པ་འདི།།
ཁྱེད་ཀྱི་ཐུགས་དགོངས་འགྲུབ་པའི་རྒྱུར་འགྱུར་ཤོག།།
ཁྱེད་ཀྱི་ཡོན་ཏན་གང་གའི་རྡུལ་སྙེད་ལས།།
སོར་རྩེའི་རྡུལ་ཙམ་ཡི་གིར་བཀོད་པ་དང་།།
དང་བའི་དད་པའི་ཤུགས་ཀྱིས་སྒུལ་བས་ཀྱང་།།
དུས་ཀུན་མགོན་ཁྱེད་མཉེས་པའི་རྒྱུར་གྱུར་ཅིག།
ཅེས་བདག་གི་དྲིན་ཆེན་རྩ་བའི་བླ་མ་༸སྐྱབས་རྗེ་རི་དབང་བསྟན་འཛིན་རིན་པོ་ཆེའི་རྗེས་དྲན་རྩོམ་ཐུང་འདི་ཁོང་གི་སློབ་བུའི་གྲལ་མཐར་འཁོད་པ་བསྟན་འཛིན་བསོད་ནམས་ནས།།
ཕྱི་ལོ་༢༠༢༤ལོ་ཟླ་བ༡༢ཚེས་༢༤ལ།