འཇམ་དབྱངས་བསྟན་མཚོ།
དབང་ཆེན་དཔོན་པོས་བྲན་དུ་མ་བཀོལ་ཞིང།།
རིགས་རུས་མཐོན་པོས་དབྱེ་འབྱེད་མ་བྱས་ཤིང་།།
འབྱོར་ལྡན་མི་ཡིས་རྡོག་པས་མ་བརྫིས་ཤིང་།།
འདྲ་མཉམ་ལག་འཇུའི་རེག་བྱ་འཇམ་ས་ཞིག།
འགྲན་རྩོད་འཕྲུལ་གྱི་འཁོར་ལོས་མ་བསྐོར་ཏེ།།
ང་ཁྱོད་འཁོན་པའི་འཚུབ་མས་མ་ལྡང་སྡེ།།
བཤུ་གཞོག་རི་གཟར་རྦབ་རྡོས་མ་གནོན་ཏེ།།
ལྷིང་འཇགས་དབེན་པའི་རི་གྲོང་ཡོད་ས་ཉིད།།
སྡང་མིག་གློག་ཞགས་འཁྱུག་འཁྱུག་མ་ཡིན་ལ།།
ཚིག་རྩུབ་མདའ་མོ་རྣོན་པོས་མ་བསྣུན་ལ།།
མཆིལ་ཞག་མཚོ་མོའི་རླབས་སྒྲས་མ་འཕེན་ལ།།
བརྩེ་བ་འོ་མའི་གཤིས་འདི་འཁྱིལ་ས་གང་།།
བདག་ཉིད་གཅེས་འཛིན་དུག་ཆུས་མ་བརླན་ནས།།
ཕ་རོལ་སྡང་བའི་མེ་ལྕེ་མ་མཆེད་ནས།།
ཕྲག་དོག་དུ་སྤྲིན་ནག་པོས་མ་འཁྲིགས་ནས་།།
གཤིས་རྒྱུད་བལ་གྱི་རང་མདངས་མངོན་ས་ཞིག།
གུ་ཡངས་རྟ་ཕོའི་སུག་ལག་མ་བསྒྲོགས་པ།།
བག་ཕེབས་གནག་ཕྱུགས་སྣ་ཐག་མ་འཐེན་པ།།
ལྷིང་འཇགས་ལུ་གུའི་བལ་དཀར་མ་བྲེགས་པ།།
རང་དབང་རྩེན་པའི་རྩྭ་ཐང་ཡངས་ས་གང་།།
བཟོད་པའི་དབུ་རྨོག་དཀར་པོ་མགོ་ལ་གྱོན།།
ལྷག་བསམ་ལུག་ཆུང་ཚར་དཀར་ལུས་ལ་བཀླུབས།།
གཞན་ཕན་ཨ་ཤེ་དཀར་པོ་སྐེད་པར་བཅིངས།།
དུས་གསུམ་སྒོ་གསུམ་ཐུལ་ན་ཞི་བདེ་ལགས།།