བསྟན་འཛིན་སྟོབས་ལྡན།
ཆོས་དཔེ།
གངས་ཅན་སྐྱབས་གཅིག་བསྟན་འཛིན་རྒྱ་མཚོ་ཡི།།
ཟབ་མོའི་གཞུང་ལུགས་མ་ལུས་མཁྱེན་པའི་བློ།།
མཁས་དགུའི་གཙུག་གནས་རྒྱལ་བ་བློ་བཟང་པའི།།
ཆོས་ཉིད་རྟོགས་པའི་བློ་ལྟར་གཏིང་དཔག་བྲལ།།
དངོས་དཔེ།
ཟབ་མོའི་གཞུང་ལུགས་མཁྱེན་པ་བློ་བཟང་གྲགས་པ་བཞིན།།
ལེགས་ཉེས་བླང་དོར་འདོམས་ལ་ས་སྐྱ་པཎ་ཆེན་མཚུངས།།
རིས་མེད་འགྲོ་དོན་མཛད་ལ་རྒྱལ་བའི་སྲས་དང་འདྲ།།
ཁ་བའི་༸སྐྱབས་མགོན་སངས་རྒྱས་ཤཱཀྱ་ཐུབ་པའི་སྤུན།།
བཟློག་དཔེ།
རྒྱལ་ཀུན་སྙིང་རྗེའི་རང་གཟུགས་མིག་མི་འཛུམ།།
མི་ཡི་རྣམ་རོལ་བསྟན་འཛིན་རྒྱ་མཚོ་བཞིན།།
སྙན་ངག་སྨྲ་བའི་ཁྱུ་མཆོག་ཙོང་ཁ་པས།།
ཟླ་མེད་རྒྱལ་བསྟན་ནོར་འཛིན་ལྟོ་བར་བཀྲམ།།
ཕན་ཚུན་གྱི་དཔེ།
མ་ནོར་ལམ་བཟང་སྟོན་ལ་ཁྱོད་བཞིན་དུ།།
ཟས་གཙང་སྲས་ཀྱིས་བདེན་བཞི་ཆོས་འཁོར་བསྐོར།།
རྣམ་འདྲེན་མཆོག་གིས་འགྲོ་ལ་གདམས་པ་ལྟར།།
བདག་གི་བླ་མས་ཞི་བདེ་སྒྲུབ་ཐབས་གསུངས།།
ངེས་པའི་དཔེ།
མཐོང་ཙམ་ཡིད་ལ་བདེ་བ་སྦྱིན་བཞིན་པའི།།
༸སྐྱབས་མགོན་མཆོག་གི་བྱམས་པའི་འཛུམ་དཀར་ནི།།
སྙིང་ན་སྡུག་པའི་མ་ལོའི་བཞིན་དཔལ་དང་།།
མཚུངས་ལས་རིགས་མཐུན་གཞན་ཞིག་མ་མཆིས་སོ།།
ངེས་མེད་ཀྱི་དཔེ།
ལེགས་བཤད་ཟབ་མོ་རིས་མེད་སྦྱིན་བཞིན་པའི།།
ཁ་བའི་སྲོག་འཆང་བསྟན་འཛིན་རྒྱ་མཚོ་ནི།།
དྲན་པའི་དབང་པོ་ཉིད་དང་ཡང་དག་མཚུངས།།
རིགས་མཐུན་གཞན་ཡང་ཁྱེད་ཀྱི་སྤུན་ཟླ་འོས།།
བསྡུས་པའི་དཔེ།
རྒྱལ་བསྟན་གཞུང་ལུགས་མ་ལུས་རྟོགས་པ་ཡིས།།
ཐུབ་པ་མཆོག་དང་མཚན་ཉིད་མཐུན་པ་མིན།།
ཁྱོད་ཀྱིས་ཉེར་གཅིག་དུས་ཀྱི་འགྲོ་རྣམས་ལ།།
དམ་བཅའ་བཞི་ཡིས་ཡང་དག་བསྐྱངས་པས་ཀྱང་།།
ཕུལ་བྱུང་གི་དཔེ།
ངུར་སྨྲིག་རྒྱན་གྱིས་སྤུད་པའི་ཐུབ་པའི་དགེ་སྦྱོང་དང་།།
བསམ་བཞིན་སྤྲུལ་པའི་སྐུར་བཞེངས་ཕྱག་ན་པད་མོ་གཉིས།།
སོ་སྐྱེའི་འདྲེན་ལམ་ཆ་ལུགས་ཙམ་ཞིག་ཁྱད་པར་ལས།།
ལུང་རིགས་འབུམ་གྱིས་བརྟགས་ཀྱང་ཐ་དད་འཇོག་ཏུ་བྲལ།།
རབ་བཏགས་ཀྱི་དཔེ།
ཁ་བའི་སྙིང་ནོར་བསྟན་འཛིན་རྒྱ་མཚོ་ཡི།།
མཚན་གྱི་སྙན་པ་ས་སྟེང་ཁྱབ་པ་ལ།།
མཐུན་ཕྱིར་དབྱར་སྐྱེས་རྔ་སྒྲས་སྙེམས་མ་བྱེད།།
ཆོས་དུང་དཀར་པོའི་སྒྲ་ཡང་གསལ་བའི་ཕྱིར།།
རྨད་བྱུང་གི་དཔེ།
སྤུ་རྒྱལ་བཙན་པོའི་བླ་རི་ཡར་ལྷ་ཤམ་པོ་ཡིས།།
འཆར་ཁའི་དམར་སེར་མཚམས་སྤྲིན་གསར་མ་གོས་གྱོན་ནས།།
མེས་པོའི་རིག་གཞུང་འཛིན་སྐྱོང་སྤེལ་བའི་ལས་ནུས་ན།།
གང་ལ་ཕོག་པའི་༸སྐྱབས་མགོན་ཉིད་དང་ཡང་དག་མཚུངས།།
རྨོངས་པའི་དཔེ།
བཀའ་ཆོས་ཟབ་མོ་རྣ་བའི་བདུད་རྩི་ལ།།
ཐོབ་ཚེ་འཕགས་ཡུལ་བསླེབས་བསམས་དགའ་བ་རྒྱས།།
སྡེབ་ལེགས་ཚིག་གི་བསྟན་བཅོས་བཀླགས་པ་ཡིས།།
ཁྱོད་ཉིད་སྙམ་ནས་ཞལ་མཇལ་ཡོང་བར་རེ།།
ཐེ་ཚོམ་དཔེ།
དག་གསལ་སྙན་པའི་གསུང་སྐད་ཐོས་པ་འདི།།
ཐུབ་པས་བདེན་བཞི་ཚོགས་ལ་འཆད་པའམ།།
ཡང་ན་༸སྐྱབས་མགོན་༸རྒྱལ་བའི་དབང་པོ་ཡིས། །
དམངས་ལ་བཀའ་ཆོས་གོ་བདེ་གནང་ངམ་ཅི།།
གཏན་འབེབས་དཔེ།།
མེས་པོའི་རིག་གཞུང་མ་ལུས་ཐུགས་སུ་བཏགས།།
དཀའ་སྡུག་མདུན་དུ་མགོ་འཕང་མི་གློད་པར།།
དོན་མཛད་ཡེ་ཤེས་འོད་མཆོག་མ་ལགས་ཏེ།།
ཞལ་མཇལ་དྲོན་པོ་ཡོད་ཕྱིར་༸གོང་ས་མཆོག །
སྦྱར་བའི་དཔེ།
བཞིན་འཛུམ་མི་ནུབ་འགྲོ་བའི་དོན་དུ་གཟིགས།།
ཉམ་ཐག་ཡིན་ཡང་སྤུན་གྱི་ས་རུ་འགོད།།
ཡུལ་མཐུན་ཆོས་ཀྱི་ཟབ་དགུ་སྟོན་མཁས་པ།།
༸གོང་ས་མཆོག་ནི་སྤྱན་རས་གཟིགས་དང་མཚུངས།།
མཉམ་ཉིད་ཀྱི་དཔེ།
བསླབ་གསུམ་གཙང་མའི་ངུར་སྨྲིག་གོས་ཀྱིས་བརྒྱན།།
ཞི་བའི་ཉམས་ལྡན་བསྟན་འཛིན་རྒྱ་མཚོ་མཆོག །
གངས་རིའི་ཤིང་རྟ་བློ་བཟང་གྲགས་པ་བཞིན།།
སྨྲ་བར་མཁས་པས་ཀུན་གྱི་ཡིད་དབང་ཕྲོགས།།
སྨད་པའི་དཔེ།
སྟོན་ཟླ་འོད་མདངས་གསལ་ཡང་ཕྱོགས་རེ་ཙམ།།
རྒྱུད་མངས་རྣ་བར་འཇེབས་ཀྱང་ཚིག་དོན་དབེན།།
མེ་ཏོག་གང་ལ་བཀོད་པའི་༸སྐྱབས་མགོན་ལ།།
ཇི་ལྟར་མཚུངས་པའི་ཁྱད་ཆོས་ག་ལ་ཡོད།།
བསྔགས་པའི་དཔེ།
རབ་དཀར་སྟོང་ཟླའི་ཞལ་རས་དྲི་མ་བྲལ།།
རྒྱུད་མངས་ཁོག་པར་སྲིད་པའི་སྒྲ་གཡང་བཞུགས།།
བོད་ཀྱི་༸སྐྱབས་མགོན་བསྟན་འཛིན་རྒྱ་མཚོ་ཡི།།
རྗེས་སུ་རྐང་པ་འཇོག་ལ་ངལ་བ་ཅི་ཞིག་ཡོད།།
བརྗོད་འདོད་དཔེ།།
ལ་ལའི་སྙིང་ལ་ཚིག་གི་ཚེར་མ་དང་།།
ལ་ལ་སེམས་ལ་བལ་དཀར་གྱུར་ཀྱང་རུང་།།
ཁོ་བོའི་སྒོ་གསུམ་སྨྲ་བའི་འབབ་སྟེགས་ལས།།
༸གོང་ས་མཆོག་ནི་སངས་རྒྱས་མཚུངས་བརྗོད་འདོད།།
འགལ་བའི་དཔེ།
ཁ་བའི་རྡུལ་བརྩེགས་རི་རྒྱལ་ལྷུན་པོ་དང་།།
སྟོན་དུས་མཁའ་ཡི་ཉ་རྒྱས་རི་དྭགས་མཚན།།
ལྷ་མིའི་༸སྐྱབས་གཅིག་བསྟན་འཛིན་རྒྱ་མཚོ་གསུམ།།
ཕན་ཚུན་རྣམ་པ་འགལ་བ་སུ་ཡིས་བསྙོན།།
དགག་པའི་དཔེ།
བྱམས་བརྩེའི་སྦྱོར་བ་ལེགས་ཀྱང་ཉེ་འཁོར་ཙམ།།
མཚན་སྙན་བསྟོད་ཚིག་མང་རུང་ར་སྐོར་ནང་།།
སྔོན་བྱོན་ཁ་བ་རི་པའི་བླ་མ་ནི།།
༸གོང་ས་ཡིད་བཞིན་མཆོག་ལ་འགྲན་ནུས་ཅི།།
ངོ་བསྟོད་དཔེ།
གདོད་ནས་དག་ཅིང་སངས་རྒྱས་ས་རུ་གནས།།
ཐུགས་ནི་བརྩེ་བའི་ཉིང་ཁུ་ལས་གྲུབ་དང་།
༸གོང་ས་མཆོག་ནི་བརྩེ་བའི་སེམས་མངའ་གཉིས།།
འགྲོ་བའི་བདེ་སྡུག་གཟིགས་ལ་ཁྱད་པར་མེད།།
དེ་ཉིད་བརྗོད་པའི་དཔེ།
འདི་ཉིད་བོད་མི་ཡོངས་ཀྱི་༸སྐྱབས་མགོན་མཆོག །
ཡིན་མོད་འདབ་མ་བརྩེགས་པའི་ལྷུན་པོ་མིན།།
བྱམས་ལྡན་ཨ་མའི་བརྩེ་མིན་བླ་མ་ཡིས།།
ཉིན་མཚན་དབྱེར་མེད་བྱམས་ཀྱིས་བསྐྱངས་པ་ལགས།
ཐུན་མོང་མིན་པའི་དཔེ།
མཚན་སྙན་གོ་ལའི་ཁྱོན་ལ་གྲགས་པ་ཡི།།
༸རྒྱལ་བའི་དབང་པོ་བསྟན་འཛིན་རྒྱ་མཚོ་ཡི།།
མཚུངས་ཟླ་འོས་པའི་དངོས་ཤིག་འཁོར་བ་ན།།
མེད་ཕྱིར་ཁྱོད་ཀྱི་སྤུན་དུ་ཁྱོད་ཉིད་འགོད།།
འབྱུང་མིན་གྱི་དཔེ།
དྲིན་ཆེན་མ་ལོའི་བྱམས་བརྩེ་མ་ལུས་པར།།
བྱེད་པོས་བསམ་བཞིན་ཕྱོགས་གཅིག་སྤུངས་པ་ལྟར།།
༸གོང་ས་སྐྱབས་མགོན་མཆོག་གིས་འགྲོ་བ་རྣམས།།
ཉེ་རིང་ཆགས་སྡང་མེད་པར་ཀུན་ལ་བྱམས།།
སྲིད་མིན་གྱི་དཔེ།
གངས་དཀར་ལྷུན་པོའི་རྩེ་ལས་མེ་ལྕེ་དང་།།
མ་ཕམ་གཡུ་མཚོའི་དཀྱིལ་ལས་དུག་ཤིང་བཞིན།།
ལྷ་མིའི་རྣམ་འདྲེན་རྩ་བའི་བླ་མ་ཡི།།
ཞལ་ལས་གནོད་པའི་ཚིག་ཅིག་འབྱུང་སྲིད་དམ།།
མང་བའི་དཔེ།
ཀླུ་སྒྲུབ་ཕྱོགས་གླང་དབྱིག་ཐོགས་ཞི་ལྷ་དང་། །
བློ་བཟང་གྲགས་པ་རྣམས་ཀྱི་མཛད་པ་བཞིན། །
༸གོང་ས་མཆོག་གིས་ཉེར་གཅིག་དུས་རབས་ལ།།
ཡུལ་དུས་འཚམ་པའི་སློབ་གཉེར་ལམ་སྲོལ་གཏད།།
རྣམ་འགྱུར་དཔེ།
༸གོང་ས་མཆོག་གི་སེམས་ཅན་བརྩེ་བའི་སེམས།།
ཕྱག་སྟོང་སྤྱན་སྟོང་ཐུགས་ལས་གཡར་བ་བཞིན།།
འཚེ་མེད་ཞི་བའི་ལྟ་གྲུབ་གསུངས་པ་གང་།།
ཟས་གཙང་སྲས་ཀྱིས་བསམ་བཞིན་གནང་བ་བཞིན།།
ཕྲེང་བའི་དཔེ།
ཤཱཀྱའི་གཙོ་ཡིས་རང་གི་བསྟན་པ་བཞིན།།
ཀླུ་སྒྲུབ་ཡབ་སྲས་དབུ་མའི་ལྟ་བ་བཞིན།།
ཙོང་ཁ་པ་ཡིས་ཁ་བའི་ལྗོངས་ལ་བཞིན།།
ཁྱེད་ཀྱིས་ཉེར་གཅིག་ནང་པའི་ལམ་སྲོལ་གཏད།།
ངག་དོན་དཔེ།
ཁྱོད་ཞལ་བྱམས་པའི་འཛུམ་མདངས་གསལ་བ་དང་།།
འགྲོ་ལ་བརྩེ་བའི་སྤྱན་གྱིས་གཟིགས་པ་ནི།།
ཆུ་སྐྱེས་འདབ་མ་ལྷུག་པོར་གྲོལ་བ་ལ།།
ཞིམ་མངར་ཟེའུ་འབྲུས་མཚོན་བཞིན་ངོ་མཚར་ཆེ།།
ངག་དོན་བཞིན་སྒྲ་དུ་མ་ཅན།
ཀུན་གསལ་ཁྱོན་བཞིན་ཁྱེད་ཀྱི་མཁྱེན་པའི་ཐུགས།།
ཆུ་འཛིན་འཁྲིགས་བཞིན་སེམས་ཅན་བརྩེ་བ་ཅན།།
སྦྲང་ཆར་འཇོ་བ་བཞིན་དུ་ཁྱེད་ཀྱི་གསུང་།།
ཕྱོགས་མེད་ཀུན་ལ་བསྙམས་པས་སྐོམ་གདུང་བསལ།།
ཟླ་བོ་དངོས་པོའི་དཔེ།
ཁ་བའི་ལྗོངས་སུ་སྤྲུལ་སྐུ་མང་བྱོན་ཡང་།།
༸གོང་ས་མཆོག་གི་གོང་ན་སུ་ཞིག་ཡོད།།
རྩྭ་ཐང་ངོགས་སུ་མེ་ཏོག་བཀྲ་ན་ཡང་།།
ཨུ་དུམ་ཝ་ར་བཞད་པ་གཅིག་རེ་ཙམ།།
མཚུངས་སྦྱོར་གྱི་དཔེ།
ཐུབ་པ་མཆོག་ནི་རྟེན་འབྱུང་སྨྲ་བོ་དང་།།
༸གོང་ས་སྐྱབས་མགོན་ཞི་བདེའི་དེད་དཔོན་ཉིད།།
ཐུབ་པས་བདེན་བཞི་ཆོས་ཀྱི་འཁོར་ལོ་བསྐོར།།
ཁྱེད་ཀྱིས་དམ་བཅའ་བཞི་ཡིས་འཇིག་རྟེན་བསྐྱངས།།
རྒྱུའི་དཔེ།
འགྲོ་བ་ཀུན་ལ་བྱམས་པས་ཕ་མ་དང་།།
ཟབ་མོ་བསླབ་བྱ་གནང་བས་ཕ་མའི་ངག །
བཞིན་རས་འཛུམ་གྱིས་གང་བས་ཕ་མའི་ཞལ།།
བརྩེ་བས་བསྐྱངས་པས་དྲིན་ཆེན་ཕ་མ་མཚུངས།།