རང་ཐར།
"གནའ་སྔ་མོ་སྔ་མོ་ཞིག་ལ་འཇིག་རྟེན་འདིར་ཉི་མ་བདུན་དང་ཟླ་བ་བདུན་ཡོད་པ་དང་།མུན་ཟེར་བ་ཞིག་གཏན་ནས་རུབ་རྒྱུ་མེད།" དུས་རྒྱུན་ལྟར་ཨ་མ་སྒྲོལ་མས་རང་གི་བྱིས་པ་གཉིས་ལ་གཏམ་རྒྱུད་ཅིག་ཤོད་འགོ་བརྩམས།དོ་ནུབ་ཟླ་བ་མེད་པས་ཁོ་མ་སྨད་ཚོའི་ཁང་ཆུང་ནང་སྨག་རུམ་གྱིས་ཁེངས་ཡོད་པ་ལས་སྲིན་བུ་མེ་འཁྱེར་གྱི་འོད་ཙམ་ཡང་མ་མཆིས།འདི་ལྟ་བུའི་མཚན་མོར།ཁྱིམ་མཚེས་ཚོའི་མཆོད་སྒྲོམ་སྟེང་སྤར་བའི་སྒྲོན་མེའི་འོད་ཟེར་ལ་ཟླ་བ་ཤར་བའི་མཚན་མོ་ལས་ལྷག་པའི་གསལ་ཆ་ཞིག་ལྡན་ཞིང་།ནང་གི་ཐབ་ཁ་དང་དེའི་ཐོག་བསྐྱོན་པའི་སྣོད་རེ་ཟུང་།ཀ་བ།ཆ་སྒམ།དེ་བཞིན་ཉལ་ཁྲི་དང་ཉལ་ཁྲིའི་ཐོག་ཉལ་བའི་མི་རྣམས་རབ་རིབ་ཅིག་མཐོང་ཐུབ་མོད།འོན་ཀྱང་ཨ་མ་སྒྲོལ་མ་མ་སྨད་གསུམ་ལ་མཆོད་མེ་སྤོར་བའི་མར་དང་དངུལ་མེད་པས།མཚན་མོའི་མཐའ་དང་མཚམས་མེད་པའི་མུན་ནག་སྟུག་པོས་ཁོ་མ་སྨད་ཚོ་དང་ཁོ་ཚོའི་ཁང་ཆུང་ཡོངས་སུ་བཏུམས་ཡོད།མོའི་བྱིས་པ་ཆེ་བ་སྟེ་ལོ་བདུན་ལ་སོན་པའི་བུ་ཆུང་དེ་མོའི་ཉལ་ཁྲིའི་མགོ་ན་བརྒྱབས་པའི་ཉལ་ཁྲིའི་སྟེང་སྔས་ཐུག་བྱས་ནས་ཉལ་ཡོད་ལ།མོས་བུ་མི་འཁྱག་པའི་ཆེད་དུ་རང་གི་སྤུ་རྫོང་སྟུག་པའི་རྩག་པ་བཟང་ཤོས་ནང་བསྙལ་བའི་ཐོགརྙིང་ཟད་དུ་གྱུར་པའི་འཕྱར་བ་ཞིག་ཀྱང་སྟེང་དུ་བཀབ་ཡོད།བྱིས་པ་ཆུང་བ་སྟེ་ལོ་ལྔ་ལ་ཐོན་པའི་བུ་མོ་དེ་རང་གིས་རུམ་ནས་ཡོད།སྨག་དེ་ལྟར་སྟུག་རུང་མོས་རང་གི་བུས་མ་ནེ་རྩག་པའི་གོང་ང་ལ་གཏུགས་ཏེ་འགོ་བརྩམས་མ་ཐག་པའི་གཏམ་རྒྱུད་ལ་ཉན་ནས་ཡོད་པ་རྟོགས་ཐུབ།
"སྐབས་དེ་དུས་གཟའ་སྒྲ་ཅན་ཞེས་པའི་བདུད་བྱ་ཞིག་ཡོད།" མོས་རུམ་དུ་ཡོད་པའི་བུ་མོའི་རྐང་པ་གཉིས་རང་ཉིད་ཀྱི་ཕོ་བར་གཏུགས་ཏེ་སྲོ་བཞིན་གཏམ་རྒྱུད་དེའི་མུ་མཐུད། "བདུད་བྱ་དེ་ནི་ཆེན་པོ་ཆེན་པོ་ཞིག་ཡིན་ཞིང་བྱམས་དང་སྙིང་རྗེའི་དྲི་མ་ཙམ་ཡང་མི་བྲོ་བས།དེས་སེམས་ཅན་མཐོང་ཚད་རིག་ཚད་ཚང་མ་ཁང་བྱིས་ཀྱིས་ས་ལ་འཐོར་བའི་འབྲས་རྡོག་སྒྲུག་སྒྲུག་བྱས་ནས་ཟ་རྐྱང་བྱེད་ཀྱི་ཡོད།ཅི་རེད།ཁྱོད་གཉིས་ཀྱིས་"འུན"མི་ཟེར་རམ། འདྲེ་ཡིས་ཉན་རྒྱུ་རེད།"
"འུན།ཨ་མ།ངས་འུན་ཟེར་ཚར།ད་འདྲེས་ཉན་མི་སྲིད།" སྒྲོལ་མ་དང་སྔས་ཐུག་བྱས་ཏེ་ཉལ་བའི་བུ་ཆུང་གིས་ལམ་སེང་དེ་ལྟར་བཤད་པ་དང་།རུམ་གྱི་བུ་མོས་ཀྱང"འུན།ཨ་མ།འུན"ཞེས་སྨྲས་ཏེ་ལག་ཆུང་མོའི་འགྲམ་པར་རེག་ཙམ་དང་ལུས་པོ་འགུལ་ཙམ་བགྱིས་ནས་མགྱོགས་མྱུར་གཏམ་རྒྱུད་ཀྱི་མཇུག་མཐུད་དགོས་པའི་བརྡ་བསྟན།ངོ་མ་འདི་ནི་ཨ་མ་སྒྲོལ་མ་མ་སྨད་ཚོའི་ཁང་ཆུང་ནང་ཧ་ལམ་དགོང་མོ་རྟག་པར་འབྱུང་བའི་གནས་ཚུལ་ཞིག་ཡིན་ཏེ།ཨ་མ་སྒྲོལ་མས་ཁྱིམ་མཚེས་ཀྱི་རྫི་བོས་ལྷས་སུ་ཕབ་ཡོང་བའི་(རྫི་སླའི་ཚབ་ཏུ་མོས་ཉིན་མོར་ཁྱིམ་མཚེས་ཀྱི་ཐགས་འཐག་རོགས་དང་།སྐྲ་སླ་རོགས།སྙི་བ་འདོན་རོགས་སོགས་ལས་ཀ་སྣ་ཚོགས་བྱེད་ཀྱི་ཡོད།)སྒོ་ཕྱུགས་རེ་ཟུང་དེ་གདང་ལ་བཏགས་ཏེ་འོ་མ་བཞོས་རྗེས།དཀའ་ཚེགས་ཆེ་བའི་ཉིན་གཅིག་གི་ལས་ཀ་རྫོགས་པ་ཡིན།དེ་ནས་མ་སྨད་གསུམ་གྱིས་དགོང་ཟས་གང་སྔ་སྔ་ཟ་བ་དང་།གཅིན་པ་བཏང་ནས་གང་མགྱོགས་མགྱོགས་ཉལ་གྱི་ཡོད།རྒྱུ་མཚན་ནི་ཉེ་འཁོར་གྱི་ཁྱིམ་མཚེས་གཞན་ཚོ་ལྟར་ཁོ་མ་སྨད་གསུམ་ལ་སྒྲོན་མེ་སྤོར་བྱེད་ཀྱི་ས་སྣུམ་མང་པོ་མེད།བྱིས་པ་གཉིས་ཀྱིས་དེ་འདྲའི་སྔ་པོ་ཉལ་རྒྱུ་ལ་ངོ་རྒོལ་དང་སུན་སྣང་མི་བྱེད་པ་དང་།དེ་ལས་ལྡོག་སྟེ་དགོང་དྲོའི་གྲིབ་སོ་གུག་དུས་ནས་བྱིས་པ་གཉིས་ཉལ་རྒྱུར་བྲེལ་ནས་ཡོད་དེ།སྒྲོན་མེ་ལ་ཕུ་བཏབ་ནས་ཁང་ཆུང་ནག་འཐིབས་སེར་གྱུར་མ་ཐགཨ་མས་ཁོ་གཉིས་གཏམ་རྒྱུད་སྣ་ཚོགས་ཀྱི་འཇིག་རྟེན་ལ་ཁྲིད་དེ་ལྟད་མོ་ཅི་དགར་ལྟ་ཆོག་པས་ཡིན།གཏམ་རྒྱུད་ལ་ཉན་སྐབས་ཁོ་གཉིས་ཀྱིས་བྱེད་དགོས་པའི་ལས་འགན་གཅིག་རང་ཡོད་པ་ནི།ཨ་མས་དབུགས་ལེན་པའི་ཆེད་དུ་ཤོད་མཚམས་འཇོག་སྐབས་ཁོ་གཉིས་ཀྱིས་ཉན་ཡོད་པའི་བརྡ་ལ་"འུན"ཟེར་དགོས་པ་དེ་ཡིན་ཞིང་།གལ་སྲིད་ཁོ་གཉིས་ཀྱིས"འུན"མ་ཟེར་ན།གཏམ་རྒྱུ་དེ་མཚན་མོའི་སྨག་རུམ་ནང་རླུང་བུ་དང་ལྷན་དུ་ཡར་མར་རྒྱུ་བཞིན་པའི་འདྲེ་རྣམས་ཀྱིས་ཉན་འགྲོ་ཟེར།འོན་ཀྱང་གཏམ་རྒྱུད་ནང་གི་དོན་རྐྱེན་ཛ་དྲག་ཆེ་དུས་དང་མི་སྣ་རྣམས་གསོན་ཉམས་ཆེ་སྐབས།ཁོ་གཉིས་ཀྱིས"འུན"ཟེར་རྒྱུ་བརྗེད་འགྲོ་བ་དང་།དོ་ནུབ་ཀྱང་བྱིས་པ་གཉིས་ཀྱིས་གཟའ་སྒྲ་ཅན་ཞེས་པའི་འཇིགས་སུ་རུང་བའི་སྣང་བརྙན་དེ་སེམས་སུ་སྒོམ་བཞིན་"འུན"ཟེར་རྒྱུ་ཕྲན་ཙམ་བརྗེད་སོང་བ་རེད།
"ཡ་ཡ་་་།འགྲིག་སོང་འགྲིག་སོང་།གཟའ་སྒྲ་ཅན་ཞེས་པ་དེས་ཉེ་འཁོར་གྱི་སྲོག་ཆགས་ཚང་མ་ཟོས་ནས་ཚར་རུང་།ཁོའི་ཕོ་བ་ད་དུང་ཕྱེད་ཙམ་ལས་གང་མེད།" ཨ་མ་སྒྲོལ་མས་སླར་ཡང་གཏམ་རྒྱུད་དེ་མུ་བསྟུད། "དེ་བས་ཁོས་ལྟོགས་རྔམ་ཆེན་པོས་གཡས་ལྟ་གཡོན་ལྟ་དང་ཡར་ལྟ་མར་ལྟ་བྱེད་དུས། ཉི་མ་སྤུན་བདུན་དང་ཟླ་བ་སྤུན་བདུན་བང་བསྒྲིགས་ནས་ནམ་མཁའི་དབྱིངས་སུ་འགྲོ་བཞིན་ཡོད་པ་མཐོང་། སྒྲ་ཅན་གྱིས་དེ་ཚོ་མཐོང་མ་ཐགཞེང་རྒྱ་ཆེ་བའི་གཤོག་པ་གཉིས་ཕག་སྒྲ་དང་བཅས་བརྡབས་ནས་ཤར་སེར་ཡར་དེ་ཚོའི་ཐད་དུ་འཕུར་བ་མ་ཟད།གཅིག་རྗེས་གཉིས་མཐུད་ཀྱིས་ཟ་འགོ་བརྩམས།ཁོས་ཉི་མ་རེ་དང་ཟླ་བ་རེ།ཡང་ཉི་མ་རེ་དང་ཟླ་བ་རེ་ཟོས།དེ་ནི་ང་ཚོའི་ཁང་པའི་རྒྱ་ཕིབས་འོག་ཏུ་ཡོད་པའི་ཁང་བྱིས་ཤིག་གིས་འབྲུ་རྡོག་རེ་དང་འབྲས་རྡོག་རེ།ཡང་འབྲུ་རྡོག་རེ་དང་འབྲས་རྡོག་རེ་བསྒྲུགས་ཏེ་ཟ་བ་དང་གཅིག་པ་གཅིག་རྐྱང་རེད།ཡུད་ཙམ་ལས་མ་འགོར་བར་བདུད་བྱ་དེས་ཉི་མ་དྲུག་དང་ཟླ་བ་དྲུག་ཁྱུར་མིད་བཏང་ཚར་བའི་ཁར།ཉི་མ་བདུན་པའམ་མཐའ་མ་དེའང་ཁ་ནང་དུ་བླུགས།སྐབས་དེར་འཇིག་རྟེན་ཧྲིལ་བོ་གློ་བུར་དུ་མུན་ནག་གིས་བཏུམས་ནས་ཅི་ཡང་མི་མཐོང་བར་གྱུར།ད་ལྟ་ནང་བཞིན་ནག་ཁུང་ནག་རྐྱང་དུ་གྱུར།" མོས་གཏམ་རྒྱུད་ནང་གི་བྱུང་བ་ཆེན་པོ་དེ་ཤུགས་ཆེ་རུ་གཏོང་ཆེད།ཕྲན་ཙམ་མཚམས་བཞག་སྟེ་ཁང་པའི་མུན་ནག་འོག་རྣ་བ་གཏད་དེ་ཉན་བཞིན་པའི་བྱིས་པ་གཉིས་ལ་བསྒུགས།
"འུན།འུན།ཨ་མ་དེ་ནས་ཅི་བྱུང་བ་རེད།" བྱིས་པ་གཉིས་ཀྱིས་བྲེལ་འཚབ་ངང་དྲིས།
"དེ་ནས་ཨེ།དེ་དུས་སློབ་དཔོན་པདྨ་འབྱུང་གནས་རྒྱ་གར་རྡོ་རྗེ་གདན་དུ་མཚམས་ལ་བཞུགས་ཡོད།ཁོང་གིས་གློ་བུར་དུ་ཉི་འོད་གྲིབ་ནས་འཇིག་རྟེན་ཧྲིལ་བོ་ནག་འཐིབས་སེར་གྱུར་བ་གཟིགས་པས།ཡ་མཚན་དགོངས་སྟེ་ཕྱོགས་ཚང་མ་ལ་དུས་གཅིག་ཏུ་གཟིགས་པ་དང་།ཐོགས་པ་མེད་པའི་མངོན་ཤེས་ཀྱིས་བདུད་བྱ་སྒྲ་གཅན་འཛིན་གྱིས་ཉི་མ་དྲུག་དང་ཟླ་བ་དྲུག་ཁོག་པའི་ནང་བཏང་ཟིན་པ་མ་ཟད།ཉི་མ་མཐའ་མ་དེའང་ཁ་ནང་དུ་བླུགས་ཚར་ནས་མིད་གྲབས་ཡོད་པ་དང་།ཉི་མ་དང་ཟླ་བ་མེད་ན་འཇིག་རྟེན་འདིའི་སེམས་ཅན་ཐམས་ཅད་མུན་ནག་ནང་དུ་ལྷུང་ནས་སྡུག་བསྔལ་ཚད་མེད་མྱོང་རྒྱུ་ཡིན་པ་མཁྱེན་པས།ཁོང་ལམ་སེང་མཚམས་ལས་གྲོལ་བ་དང་འགྲན་ཟླ་མེད་པའི་བརྫུ་འཕྲུལ་ལ་བརྟེན་ནས་སྐད་ཅིག་ཀྱང་མ་འགོར་བར་བདུད་བྱ་སྒྲ་གཅན་གྱི་འཁྲིས་སུ་ཕེབས།ཨོ།ད་དུང་ཁོང་གིས་རལ་གྲི་ཡང་བསྣམས་ནས་ཕེབས་པ་རེད།ཁོང་གིས་མངོན་ཤེས་ཀྱིས་བདུད་བྱ་དེ་བསད་ན།ཉི་མ་མཐའ་མ་དེའང་ཁོག་པའི་ནང་དུ་ཤོར་ནས་ཉི་མ་གཞན་དག་ལྟར་ཞུ་འགྲོ་བ་དང་མ་འོངས་ཀྱི་སེམས་ཅན་ཐམས་ཅད་མུན་ནག་ལས་མི་ཐར་བ་མཁྱེན་པས།རལ་གྲིས་གཞུ་ཐེངས་གཅིག་གིས་བདུད་བྱའི་ཨོལ་ཏོག་ཡུངས་ཏོག་གཏུབ་པ་ལྟར་བཅད་པས།ད་གཟོད་དེས་ཁ་ནས་མིད་པའི་ཉི་མ་དེ་ག་ལེར་གྲིས་གཏུབས་པའི་ཨི་ཁུང་ལས་ཁྲག་དང་མཉམ་དུ་ཕྱི་ལ་དོན་པ་དང་།འཇིག་རྟེན་སླར་ཡང་འོད་སྣང་གིས་ཁྱབ་པར་གྱུར།གློ་བུར་དུ་ས་རུབ་ནས་ཅི་ཡང་མི་མཐོང་བར་གྱུར་བ་དེས་མགོ་འཐོམས་པའི་མི་རྣམས་ཀྱིས་སླར་ཡང་འོད་སྣང་མཐོང་བས།དགའ་སྤྲོ་དཔག་མེད་སྐྱེས་ཤིང་དུས་ཡུན་གང་འཚམ་ཞིག་ལ་ལག་པ་གྱེན་དུ་བཀྱགས་ཏེ་དགའ་འབོད་དང་རྐང་འཁྲབ་བྱས་རྗེས།སྔར་བཞིན་སོ་སོའི་ལས་ཀའི་རྒྱུན་བསྟུད་པ་རེད།འོན་ཀྱང་དུས་དེ་ནས་བཟུང་འཇིག་རྟེན་འདིར་ཉི་མ་གཅིག་མ་གཏོགས་ལྷག་མེེད་པ་དང་།འཇིག་རྟེན་ཧྲིལ་པོའི་མུན་པ་ཐམས་ཅད་དེ་ཁོ་རང་ཁོ་ནས་སེལ་དགོས་སྟབས། ཤིན་ཏུ་དཀའ་ལས་ཁག་སྟེ་ཕྱི་དྲོ་ངལ་གསོ་བར་འགྲོ་དགོས་ཁེལ་གྱི་ཡོད།ཉི་མ་ཐང་ཆད་དེ་གཉིད་དུ་ཡུར་མ་ཐག་འཇིག་རྟེན་ཧྲིལ་བོ་མུན་པས་ཁྱབ་སྟེ་མི་དང་སྲོག་ཆགས་རྣམས་ཀྱིས་ཅི་ཡང་མི་མཐོང་བས།ཁོ་ཚོའང་ཉི་མ་དང་ལྷན་དུ་ཉལ་བའི་སྲོལ་ཆགས་པ་རེད།ད་ལྟ་ཉི་མ་ནུབ་རིའི་རྒྱབ་ཏུ་གཉིད་ཁུག་ནས་བསྡད་ཡོད་ཅིང་།སང་ཉིན་ནམ་ལང་ཁར་རྒྱུག་ཤར་གཅིག་གིས་ཤར་རིའི་རྩེ་ལ་སོང་སྟེ།དེ་ནས་ཚུར་ག་ལེར་ནམ་མཁའ་འཕྲེད་དུ་བཅད་དེ་ཡོང་རྗེས་ཡང་བསྐྱར་ངལ་གསོ་ཡི་ཡོད།ཅི་འདྲ་རེད།སློབ་དཔོན་པདྨས་དེ་ལྟར་འཇིག་རྟེན་འདི་དང་ང་ཚོ་མུན་ནག་ལས་བསྐྱབས་པ་རེད།ཁོང་ང་ཚོ་ལ་བཀའ་དྲིན་ཆེན་པོ་རེད་མི་འདུག་གམ།ད་ལྟ་ནང་བཞིན་ནག་ཁུང་ངེར་བསྡད་དེ་ནམ་ཟེར་བ་ཞིག་རྩ་བ་ནས་ལང་རྒྱུ་མེད་ན་ཅི་འདྲའི་སྡུག་པོ་ཡོད་རྒྱུ་རེད།ཁྱོད་གཉིས་ཀྱིས་བསམ་བློ་ཐོངས་དང་།" ཨ་མ་སྒྲོལ་མས་དེ་ལྟར་གཏམ་རྒྱུད་ཀྱི་མཇུག་དྲི་བ་ཞིག་དང་ལྷན་དུ་བསྡུས་ཏེ་བྱིས་པ་གཉིས་ཀྱིས་ཅི་ཟེར་ལ་བསྒུགས།
"ཨ་མ།ཉི་མ་མར་ཕྱི་ལ་དོན་ཚར་རྗེས་ཅི་བྱས་པ་རེད།སློབ་དཔོན་པདྨས་གཟའ་སྒྲ་གཅན་བསད་པ་ཨེ་རེད།" སྔས་མགོར་ཉལ་བའི་བུ་ཆུང་གིས་དེ་ལྟར་དྲིས།བྱིས་པ་གཉིས་ཀྱིས་སློབ་དཔོན་པདྨ་རྗེས་རབས་ཀྱི་སེམས་ཅན་ཚོ་ལ་བཀའ་དྲིན་ཇི་ཙམ་ཆེ་བའི་ཐད་ལ་བསམ་བློ་གཏོང་རྒྱུའི་ཚབ་ཏུ་ཉི་མ་བདུད་བྱའི་མིད་པའི་ཕྱི་ལ་དོན་ནས་ཉེན་ཁ་མེད་པར་གྱུར་ཚར་རྗེས།སློབ་དཔོན་པདྨས་གཟའ་སྒྲ་གཅན་ལ་ཅི་ཞིག་བྱས་ཡོད་དམ་སྙམ་བཞིན་ཡོད་པ་འདྲ།ཁོང་གིས་ཡང་བསྐྱར་གྲི་གཞུས་ཏེ་བདུད་བྱ་དེའི་སྐད་བཅད་ཡོད་དམ།ཡང་ན་གཟའ་སྒྲ་གཅན་གྱིས་སློབ་དཔོན་ལ་ཚུར་རྒོལ་བྱས་ཏེ་ཁོང་གཉིས་འཛིང་རེས་ཡུན་རིང་བྱས་ཡོད།སྒྲ་གཅན་ཡང་མཐུ་དང་རྫུ་འཕྲུལ་ལྡན་པའི་བདུད་བྱ་སྟོབས་པོ་ཆེ་ཞིག་མ་ཡིན་ནམ།
"ཉི་མ་ཕྱི་ལ་དོན་རྗེས་ཨེ།བདུད་བྱ་དེ་བྲོས་ཕྱིན་པ་རེད།སྟག་མོ་མཐོང་བའི་ཝ་ཞིག་ལྟར་ཕྱིར་བལྟས་མེད་པར་བྲོས་ཕྱིན་པ་རེད།བདུད་བྱ་དེས་རང་ཉིད་ལ་རྨས་སྐྱོན་ཐེབས་ཚར་བའི་ཐོགསློབ་དཔོན་ནི་དུས་གསུམ་གྱི་སངས་རྒྱས་ཡིན་ཞིང་མཐུ་དང་རྫུ་འཕྲུལ་ལ་འགྲན་ཟླ་མེད་པ་ཤེས་པས།ཁ་གཏད་གཅོག་རྒྱུའི་ཚབ་ཏུ་ཞེང་རྒྱ་ཆེ་བའི་གཤོག་ཟུང་ཕག་སྒྲ་དང་བཅས་རྡེབ་བཞིན་མཐའ་མེད་རྒྱ་མཚོའི་ཕར་ཁར་བྲོས་སོང་བ་རེད།སློབ་དཔོན་གྱིས་རྗེས་འདེད་མ་བཏང་བར་བདུད་བྱ་དེ་མཐའ་མེད་རྒྱ་མཚོའི་ཕར་ཁར་འཕུར་དུ་བཅུགདེའི་རྒྱུ་མཚན་ནི་ཁོང་གི་ཐོགས་པ་མེད་པའི་མངོན་ཤེས་ཀྱིས་གལ་སྲིད་སྒྲ་གཅན་བསད་པ་ཡིན་ན།དེ་ལ་བདུད་ཤུགས་ཆེ་བར་བརྟེན།སྐྱེ་བ་རྗེས་མར་དེ་བས་ཀྱང་སྟོབས་རྩལ་ཆེ་བའི་བདུད་བྱ་ཞིག་ཏུ་སྐྱེས་ཏེ་འཇིག་རྟེན་ཧྲིལ་བོ་ཁམ་གང་གིས་ཟ་བ་མཁྱེན་པས་རེད།དེའི་ཚབ་ཏུ་ཁོང་གིས་བདུད་བྱ་དེའི་སྐེ་ཡི་རྨ་ཁ་ནམ་ཡང་མི་སོས་པའི་སྨོན་ལམ་བཏབས་རྗེས།སླར་ཡར་རྒྱ་གར་རྡོ་རྗེ་གདན་དུ་ལོག་སྟེ་སྔར་ལྟར་མཚམས་དང་སྒོམ་སྒྲུབ་བྱས་ནས་བཞུགས།དེང་སང་ཉི་འཛིན་དང་ཟླ་འཛིན་འབྱུང་སྐབས།དོན་དངོས་ཐོག་གཟའ་སྒྲ་གཅན་མཐའ་མེད་རྒྱ་མཚོའི་ཕ་རུ་ནས་ལངས་ཏེ་ང་ཚོའི་ཉི་མ་དང་ཟླ་བ་ཟ་བར་ཡོང་བ་རེད།འོན་ཀྱང་།སློབ་དཔོན་པདྨས་བཟོས་པའི་སྐེ་ཡི་རྨ་ཁ་ད་རུང་ཡང་སོས་མེད་པས།ཁོས་ཉི་མའམ་ཟླ་བ་ཁ་ནས་ཡར་བཏང་རྗེས་མིད་པ་ནས་མར་དོན་ཡོང་བ་རེད།ཁྱོད་གཉིས་ཀྱིས་ལོ་སྔོན་མའི་ཟླ་འཛིན་དེ་དྲན་གྱི་ཨེ་འདུགཟླ་བ་ཅུང་ཙམ་ལ་མེད་པར་གྱུར་རྗེས་ཡང་ཚུར་དོན་བྱུང་བ་དེ།དེ་དུས་ཟླ་བ་སྒྲ་གཅན་གྱི་ཁ་ནང་དུ་སོང་ཏེ་མིད་པ་ནས་དོན་ཡོང་བ་རེད།སྔོན་ཆད་མི་མང་པོས་བདུད་བྱ་དེ་མཐོང་མྱོང་ཟེར།དེའི་སྦྲ་ཆེན་ལྟར་ཆེ་བའི་གཤོག་ཟུང་།ཕ་བོང་དང་མཚུངས་པའི་མགོབྲག་ཁུང་དང་འདྲ་བའི་ཁ།ད་དུང་སློབ་དཔོན་གྱིས་བཟོས་པའི་རྨ་སོགས་མཐོང་མྱོང་ཟེར།ཨོ།ཟླ་འཛིན་གྱི་རྗེས་སུ་ཟླ་བ་ཏོག་ཙམ་དམར་པོ་ཡིན་པ་ཁྱོད་གཉིས་ཀྱིས་དོ་སྣང་བྱུང་ངམ།དེ་ནི་སྒྲ་གཅན་གྱི་མིད་པའི་ཁྲག་འགོས་པ་རེད།འོན་ཀྱང་དེང་སང་གི་མི་རྣམས་བསོད་ནམས་ཆུང་བས་མི་རེ་གཉིས་ཀྱིས་མ་གཏོགས་མི་མཐོང་།ཁྱོད་གཉིས་ཀྱིས་མཐོང་ཨེ་བྱུང་།" ཨ་མ་སྒྲོལ་མས་ཡང་བསྐྱར་དྲི་བ་ཞིག་དང་ལྷན་དུ་གཏམ་རྒྱུད་དེའི་མཇུག་བསྐྱངས།
"མ་བྱུང་།མཐོང་མ་བྱུང་།" བྱིས་པ་གཉིས་ཀྱིས་ཧ་ལམ་དུས་གཅིག་ཏུ་ལན་བཏབས།ཁོ་གཉིས་ཀྱིས་ལོ་སྔོན་མའི་ཟླ་འཛིན་སྐོར་ལ་ཕྱིར་དྲན་བྱེད་སྐབས།གྲོང་མི་ཚོས་ཁྱི་གློད་པ་དང་།ཀི་འདེབས་པ།སྣོད་ཆས་རྡུང་བ།འདོན་པ་འདོན་པ།ད་དུང་འགའ་ཤས་ཀྱིས་རྒྱང་ཤེལ་ནང་བལྟས་ན་ཟླ་འཛིན་གསལ་པོར་མཐོང་ཐུབ་པའི་ཚུལ་གླེང་བ་སོགས་ཟང་ཟིང་ལང་ལོང་གི་རྣམ་པ་དང་།བུད་མེད་དང་བྱིས་པ་རྣམས་ཀྱིས་དུང་བན་ནང་ཆུ་བླུགས་ནས་ཟླ་བ་སྐྲག་ནས་འདར་བའི་ཚུལ་ལ་ལྟ་བ་ལས།ཨ་མས་བཤད་པའི་བདུད་བྱ་འཇིགས་སུ་རུང་བ་དེ་མཐོང་བ་མ་དྲན།
"དེང་སང་མཐོང་མཁན་འགའ་ཤས་ལས་མེད།ཨ་མས་ཀྱང་མཐོང་མྱོང་མེད།ད་ནི་དོ་ནུབ་ཀྱི་གཏམ་རྒྱུད་བཤད་ཚར་བ་ཡིན་པས།ང་ཚོ་གཉིད་ཁུག་རན་སོང་།སང་དགོང་ཨ་མས་<<རོ་སྒྲུང་>>བཤད་ཆོགཁྱོད་གཉིས་ཡང་བསྐྱར་གཅིན་པ་གཏོང་དགོས་ཨེ་འདུག"
"མི་འདུགམི་འདུག"
"དེས་ན་ང་ཚོས་དགོང་འདོན་འདོན།བླ་མ་ལ་སྐྱབས་སུ་མཆིའོ།།སངས་རྒྱས་ལ་་་་་་་་་་།ཆོས་ལ་་་་་་་་་་།" ཁོ་མ་སྨད་གསུམ་གྱིས་སྐྱབས་འགྲོ་ཚར་གསུམ་དང་བཛྲ་ཚར་གསུམ་བཏོན་ནས་སྣ་ཁུང་དང་བྲང་ཁར་ཕུ་བཏབས་ཏེ་གཉིད་ཁུག་པའི་སྟ་གོན་བགྱིས།དགོང་མོ་རེ་རེ་ལ་ཨ་མས་གཏམ་རྒྱུད་ཐུང་ངུ་རེ་བཤད་ཚར་རྟིང་།འདི་ལྟར་ལྷན་དུ་དགོང་འདོན་བཏོན་ནས་གཉིད་ཁུག་པ་ནི་ཁོ་མ་སྨད་གསུམ་གྱི་མཚན་མོ་རེ་རེའི་ཧ་ལམ་ཆད་མེད་ཀྱི་བྱེད་སྒོ་ཡིན་ལ།བྱིས་པ་གཉིས་ཀྱིས་ཡང་བསྐྱར་སྒྲུང་ཤོད་དགོས་པའི་རྙོག་དྲ་མ་བཟོས་པར་ཡུན་རིང་ཕྱིན་ཡོད།དགོང་འདོན་ཚར་རྗེས་མུན་ནག་གིས་བཏུམས་པའི་ཁོ་མ་སྨད་གསུམ་གྱི་ཁང་ཆུང་དེ་འཇམ་ཐིང་ངེར་གྱུར།
"ཨ་མ?" ཅུང་ཙམ་སོང་རྗེས་མུན་ནག་གི་ཁྲོད་ནས་བུ་ཆུང་གི་སྐད་གྲགས།
"ཨ?"
"ང་སྐྲག་གི་འདུགཨ་མའི་རུམ་དུ་ཉལ་ན་འགྲིག་གམ།"
"སྐྲག་རྒྱུ་ཅི་ཡོད།ངས་སྐྱབས་འགྲོ་དང་བཛྲ་བཏོན་ནས་སྣ་ཁུང་དང་བྲང་ཁར་ཕུ་བཏབས་ཏེ་ཉལ་ན།འདྲེ་གང་གིས་ཀྱང་གནོད་པ་སྐྱེལ་མི་ཐུབ་ལབས་མ་བྱུང་ངམ།སློབ་དཔོན་པདྨ་ལ་གསོལ་བ་ཐོབས་དང་ཅི་ཡང་མི་སྐྱོན།མ་གཞི་ལོ་བདུན་ལོན་ཚར་དུས།ད་དུང་ཨ་མའི་རུམ་དུ་ཉལ་ན་ངོ་མི་ཚའམ།ཕོ་སར་ཆགས་ཚར་དུས་འདྲེ་ལ་སྐྲག་རྒྱུ་ཅི་ཡོད། ཨ་མའང་འདིར་ཉལ་མི་འདུག་གམ། ད་གཉིད་ཁུག " ཨ་མ་སྒྲོལ་མས་བུ་ཆུང་ལ་སྐྲག་མི་དགོས་པའི་བསླབ་བྱ་ཐུང་ངུ་ཞིག་བགྱིས་པ་དང་།ཁོ་མ་སྨད་གསུམ་གྱི་ཁང་ཆུང་སླར་ཡང་ཁུ་སིམ་མེར་གྱུར།
ཅུང་ཙམ་གྱི་རྗེས་སུ།ཁང་པའི་མུན་ནག་གསེང་དུ་བྱིས་པ་གཉིས་གཉིད་ཁུག་སྟེ་སྣ་ཁུང་ནས་དབུགས་ཡར་རྔུབ་མར་གཏོང་བྱེད་པའི་སུར་སྒྲ་གཉོམ་པོ་ཞིག་གྲགས་མོད།འོན་ཀྱང།ཨ་མ་སྒྲོལ་མ་ཕྱིར་དྲན་ཟབ་མོ་ཞིག་གི་ནང་དུ་ལྷུང་ནས་ཉལ་ཡོད།མཚན་མོ་རེ་རེ་ལ།མོས་བྱིས་པ་གཉིས་ལ་རང་ཉིད་ཆུང་དུས་གོ་མྱོང་བའི་ངོ་མཚར་སྟོང་གིས་ཕྱུག་པའི་གཏམ་རྒྱུད་(མོས་གང་འཚང་བཟོ་བཅོས་ཀྱང་བྱེད་ཀྱིན་ཡོད།)རེ་བཤད་དེ་བསྙལ་རྗེས།ནམ་ཡང་བརྗེད་མི་ཐུབ་པའི་འདས་དོན་ཞིག་ལ་ཕྱིར་དྲན་བྱེད་ཀྱིན་དུས་ཡུན་རིང་པོར་ལྷག་འགྲོ།ཟླ་བ་ཡོད་པའི་མཚན་མོ་ལ་ལར།བྱིས་པ་གཉིས་གཉིད་ཁུག་པའི་སུར་སྒྲ་ཐོག་མར་གྲག་དུས།ཟླ་བ་དཀར་ཤིག་གེར་ཁོ་མ་སྨད་ཚོའི་ཁང་ཆུང་གི་ཤེལ་ཁྲའི་དཀྱིལ་དུ་ཡོད་རུང་།མོ་གཉིད་དུ་མ་ཡུར་སྔོན་ལ་ཟླ་བ་ཤེལ་ཁྲའི་ཟུར་ནས་ཡོལ་འགྲོ་ལ།ཁོ་མ་སྨད་ཚོའི་ཁང་ཆུང་ནང་དུ་བབས་པའི་ཟླ་འོད་གྲུ་བཞི་དེའང་ག་ལེར་འཕྲེད་དུ་བཞུད་འགྲོ།
“ཁོས་ངེད་མ་སྨད་ཚོ་བསྐྱུར་ནས་འགྲོ་བསམས་རུང་།ཡིན་ཅིག་བུད་མེད་དེ་ངའི་མཐོང་སར་འཁྲིད་དགོས་དོན་ཅི་ཡོད།" འདི་ནི་ཧ་ལམ་མཚན་མོ་རྟག་པར་ཨ་མ་སྒྲོལ་མའི་སེམས་སུ་འཁོར་བའི་དྲི་བ་ཞིག་ཡིན་ལ།མོའི་ཁྱོ་ག་གྲོང་ཁྱེར་གྱི་བུད་མེད་རྒྱ་ཆས་སྤྲས་པ་དེའི་རྗེས་སུ་ཕྱིན་ནས་ལོ་ངོ་གསུམ་ལྷག་འདས་རྗེས་ཀྱི་ད་ལྟ་ཡང་དང་ལེན་བྱེད་མི་ཐུབ་པ་ཞིག་རེད།ངོ་མ་མོས་དོ་ནུབ་ཀྱང་ཁྱོ་གས་མོ་དང་བྱིས་པ་གཉིས།ད་རུང་ཁོ་གཉིས་གས་ཕ་མའི་རོགས་སྐྱོར་ལ་བརྟེན་ནས་ལྷན་དུ་བསྐྲུན་པའི་ཁྱིམ་གཞི་ཆུང་ཆུང་དེ་བསྐྱུར་ནས་རྒྱ་ཆས་སྤྲས་པའི་བུད་མེད་དེ་དང་མཉམ་དུ་བུད་སོང་བའི་ཉིན་དེའི་སྐོར་ལ་ཕྱིར་དྲན་བྱེད་ཀྱིན་ཉལ་ཡོད།ཁང་པའི་མུན་ནག་ཁྲོད་དུ་མོའི་མིག་ཟུང་བཙུམས་ནས་ཡོད་རུང་།མོས་ཉིན་དེའི་དོན་རྐྱེན་རྣམས་ཁ་སང་རང་བྱུང་བ་ལྟར་མཐོང་ཐུབ།
མོས་སྟོན་སྨད་ཀྱི་ཉིན་དེའི་ཉིན་གུང་ཙམ་ལ་རླངས་འཁོར་གྱི་འུར་སྒྲ་ཞིག་གློ་བུར་དུ་རྣ་བར་ལྷུང་དུས་རང་ཉིད་ཀྱིས་ཁྱིམ་ལས་ཙག་ཙིག་ཅིག་བྱེད་བཞིན་བསྡད་ཡོད་པ་དྲན་ལ།དེ་ནས་ལམ་སེང་སྒོའི་འགྲམ་དུ་བརྒྱུགས་ཏེ་ཕྱི་ལ་བལྟས་པ་ན།ཏག་ཏག་ཁྱོ་གའི་མོ་ཊ(དོ་འཁོར)དྲོ་དྲོ་དེ་གྲོང་ཚོའི་མཐའ་ཡི་ས་ལམ་ཕྲ་མོ་དེ་དེད་དེ་ཤར་སེར་རང་ཚང་གི་ཕྱོགས་སུ་ཡོང་བཞིན་པ་མཐོང་།མོས་རང་ཉིད་ཀྱིས་དབྱར་ཁ་ཧྲིལ་བོ་དང་སྟོན་ཕྱེད་ལ་རེ་ཞིང་བསྒུགས་པའི་ཁྱོ་ག་གྲོང་ཁྱེར་ནས་ཕྱིར་རང་ཁྱིམ་དུ་ལོག་ཡོང་བ་མཐོང་བས།ཡིད་ལ་བརྗོད་ལས་འདས་པའི་དགའ་སྣང་ཞིག་སྐྱེས་ནས་བྲེལ་འཚབ་ངང་ནང་དུ་འཛུལ།
མོས་བྲེལ་འཚབ་ངང་ཐབ་ནང་དུ་ལྕི་བ་སྣོན་པ་དང་ཐབ་ཐོག་ཏུ་ཆུ་སྒྲིག་པ།ད་དུང་ཟས་ཞིམ་པོ་ཅི་ཞིག་གཡོ་དགོས་པའི་ཐད་ལ་བསམ་བློ་གཏོང་ཞོར།ཁྱོ་ག་དབྱར་ཧྲིལ་པོ་དང་སྟོན་ཕྱེད་ཙམ་གྲོང་ཁྱེར་དུ་བསྡད་དེ་ནང་དུ་མ་ལོག་པ་དེར་ཁོང་ཁྲོ་འཕར་མ་ལངས་ལ།ཡང་ཁོས་མ་སྨད་ཚོ་ལ་ཐོན་ཁར་ཁས་ལེན་བྱས་པའི་རྔན་པ་གང་དང་ཅི་ཞིག་ཁྱེར་ཡོད་སྙམ་པའི་རེ་བས་ཀྱང་ཁེངས།གང་ལྟར་མོས་སྨྲ་མི་ཤེས་པའི་བྲེལ་འཚབ་ངང་ཁྱོ་གའི་མོ་ཊ་སྒོ་ཁར་ཐོན་རྒྱུ་དང་ཟླ་མང་པོར་མ་མཐོང་བའི་ཁྱོ་གའི་ངོ་གདོང་མཐོང་རྒྱུར་བསྒུགས།འོན་ཀྱང་།མོ་ཕྱི་ལ་དོན་ནས་གློག་བསད་མ་ཐག་པའི་མོ་ཊའི་ཕྱོགས་སུ་འགྲོ་དུས།ཐོག་མར་མཐོང་བ་ནི་བུད་མེད་དེ་རེད།བུད་མེད་དེ་འཁོར་སྒམ་ནང་དུ་བསྡད་ཡོད་སྟབས་མོས་རླངས་འཁོར་གྱི་མདུན་ཤེལ་བརྒྱུད་དེ་མོའི་ཁོག་སྟོད་ལས་མི་མཐོང་མོད།བུད་མེད་དེས་སྟོད་དུ་རྒྱ་ཡི་སྟོད་ཐུང་ཟིང་སྐྱ་ཞིག་གྱོན་ཡོད་པ་དང་།ངོ་གདོང་ཤིན་ཏུ་དཀར་ཞིང་སེར་ཞད་ཅན་གྱི་སྐྲ་དེ་ལན་བུར་མ་བསླས་པར་རྒྱབ་ཏུ་བསྡམས་ཡོད་པ་མཐོང་།རྗེས་ཀྱི་ལོ་ཟླའི་ཁྲོད་དུ།ངོ་གདོང་དེ་ནི་གདོན་འདྲེ་ཞིག་ལྟར་ཨ་མ་སྒྲོལ་མའི་སེམས་དང་རྨི་ལམ་ནང་དུ་ཡང་ཡང་འཛུལ་ནས་མོ་ལ་བཟོད་ཐབས་མེད་པའི་ན་ཟུག་སྟེར།
ཨ་མ་སྒྲོལ་མས་འཁོར་སྒམ་ནང་གི་བུད་མེད་དེ་མཐོང་མ་ཐགགྲོང་ཚོའི་སྲང་ལམ་གཡས་གཡོན་ནས་རང་ཉིད་ཀྱི་རྣ་ལམ་དུ་ལྷུང་ཡོང་བའི་མི་སྙན་པའི་འཆལ་གཏམ་ཐམས་ཅད་ཆུ་མིག་བཞིན་གློ་བུར་དུ་བརྡོལ་བྱུང་། "མོའི་ཁྱོ་གས་གྲོང་ཁྱེར་ནས་བུད་མེད་གཞན་བཙལ་ཡོད།" "ཁོ་གྲོང་ཁྱེར་ན་སྐྱིད་པོ་བཏང་ནས་ཕྱིར་ཡོང་མི་སྲིད།" “ཁོ་མི་ཁྲེལ་མེད་ཅིག་རེད" “མོ་སྙིང་རྗེ” དེ་སྔོན་མོས་འཆལ་གཏམ་འདི་དག་ཐོས་ཐེངས་རེར་མ་གོ་ཁུལ་བྱས་ནས་འགྲོ་བ་དང་ཡང་ན་ཤོད་མཁན་དེ་ལ་ཁོང་ཁྲོ་ཟ་གི་ཡོད་དེ།མོས་རང་ཉིད་ཀྱི་ཁྱོ་ག་ལ་ཞེ་གཏིང་ནས་ཡིད་ཆེས་བྱེད་ཀྱི་ཡོད།ཞེེ་གཏིང་ནས་ཡིད་ཆེས་བྱེེད་ཀྱི་ཡོད་ཟེར་ན།མོས་ཁྱོ་གས་བུད་མེད་གཞན་ལ་རྩ་བ་ནས་སྟེན་གྱི་མེད་པའི་ཡིད་ཆེས་བྱེད་པ་མ་ཡིན་ཏེ།གོ་སྐབས་བཟང་པོ་ཐོབ་ན(མང་ཤོས་ཀྱིས་འཚོལ་གྱི་ཡོད།)དམ་འཛིན་མི་བྱེད་པའི་འབྲོག་པའི་ཁྱོ་ག་ཞིག་ཕལ་ཆེར་མེད་པ་དེ་སུས་མི་ཤེེས། ཡིན་ན་ཡང་།མོས་རྟག་ཏུ་ཁྱོ་གས་གྲོང་ཁྱེར་ན་སྐྱིད་པོ་ཡིད་ཚིམ་པ་ཞིག་བཏང་རྗེས་ཕྱིར་རང་ཉིད་ཀྱི་པང་དུ་ལོག་ཡོང་བའི་ཡིད་ཆེས་བྱེད་ཀྱིན་ཡོད་ལ། དེ་དུས་ཁོ་ལ་འཁང་དང་ཁོང་ཁྲོ་འདོད་བློ་ཁེངས་པ་ཞིག་སྟོན་དགོས་བསམས་ནས་བསྡད་ཡོད།དེ་བས་མོས་མོ་ཊའི་མདུན་ཤེལ་བརྒྱུད་དེ་ངོ་གདོང་དཀར་བའི་བུད་མེད་དེ་མཐོང་རྟིང་།མགོ་དང་བྲང་ལ་གློ་བུར་དུ་ཅི་ཞིག་ཕོག་པ་ལྟར་ནག་འཐིབས་སེ་དང་ལྗིད་ཏིག་གེར་གྱུར་ནས་གོམ་པའི་སྤོ་མཚམས་ཀྱང་ཆད་སོང་བ་མ་ཟད།ནུས་ཤུགས་ཡོད་ཚད་ཀྱིས་རྐང་པ་བརྟན་པོར་བཙུགས་པས་མ་གཏོགས་ས་ལ་འགྱིལ་སོང་།
དེ་ནས་ཁྱོ་ག་མོ་ཊའི་འཁོར་སྒམ་ནས་བབས་ཤིང་ལཱ་སྒྱེ་ཆེན་པོ་ཞིག་ཁྱེར་ཏེ་ཡར་ཡོང་བ་ན།མོ་ད་དུང་ཡང་སྔར་གནས་སུ་ལངས་ཏེ་བུད་མེད་དེའི་ཕྱོགས་སུ་བལྟས་ཡོད་ཅིང་།ད་ལྟ་བུད་མེད་དེའི་མགོ་བསྒུར་ནས་ཡོད་པས་མོའི་སེར་ཞད་ཅན་གྱི་སྐྲ་ལས་མི་མཐོང་།ཨ་མ་སྒྲོལ་མས་ད་དུང་ཡང་རང་ཉིད་ཀྱི་དོགས་པ་དེ་དག་དངོས་གནས་མིན་པའི་རེ་བ་སེམས་གཏིང་ནས་བྱས་མོད།འོན་ཀྱང་ཁྱོ་ག་མདུན་དུ་ཐོན་ནས་འཚམས་འདྲིའམ་ཅི་ཞིག་ཤོད་དུས།(མོས་ཡག་པོ་ཞིག་མ་གོ) ཁོའི་ངོ་གདོང་ལ་གནོང་གིས་ཁེངས་ཡོད་པ་དང་མོའི་མིག་མདའ་ལས་གཡོལ་ཐབས་བྱེད་པ་དེས་མོའི་དོགས་པ་དང་སེམས་ཁྲལ་ཡོད་ཚད་དངོས་ཡོད་ཡིན་པའི་ར་སྤྲོད་བྱས།ཡ་མཚན་པ་ཞིག་ལ།མོའི་དོགས་པ་དང་སེམས་ཁྲལ་ཐམས་ཅད་དངོས་ཡོད་ཡིན་པ་གསལ་པོར་གྱུར་རྗེས།མོས་ཆོ་ངེ་འདོན་པའམ་སྡིགས་མོ་བྱེད་པ།ཡང་ན་ཁོང་ཁྲོ་སྟོན་པ་སོགས་ཅི་ཡང་མ་བྱས་པར།ཁ་རོག་ལཱ་སྒྱེ་པང་བའི་ཁྱོ་གའི་རྗེས་བསྙེགས་ནས་ཡར་ཁྱིམ་དུ་ཕྱིན།མོའི་ངོ་གདོང་དང་འགྲོ་སྟངས་ལ་ཚིག་གིས་མཚོན་མི་ནུས་པའི་ན་ཟུག་ཅིག་གིས་ཁེངས་ཡོད།
ཁྱིམ་དུ་ལོ་གཅིག་དང་ཟླ་འགའ་ལ་ལོན་པའི་བུ་མོ་མལ་ཁྲིའི་སྟེང་དུ་བཞག་པའི་བལ་ཚང(བལ་གྱིས་བཟོས་པའི་བྱིས་པ་སྙལ་ས་ཞིག་ཡིན)ནང་གཉིད་དུ་ཡུར་ནས་འདུག་ཅིང་།ཁོ་གཉིས་ནང་དུ་ཐོན་ནས་ཧ་ལམ་སྐར་ཆ་གཅིག་ཙམ་ཡང་མ་ཕྱིན་གོང་དུ་ལོ་བཞི་ལ་བསླེབས་པའི་བུ་ཆུང་དེ་དབུགས་ཧལ་ཧལ་ངང་ནང་དུ་འཛུལ།ཁོ་གྲོང་པའི་བྱིས་པ་གཞན་དག་དང་ལྷན་དུ་རྩེད་མོར་རོལ་བཞིན་པའི་ཚེ་ན།ཨ་ཕའི་མོ་ཊ་འབྱོར་བ་མཐོང་ནས་བྱ་འཕུར་བ་བཞིན་ཁྱིམ་དུ་རྒྱུགས་འོངས་པ་རེད།ཨ་མ་སྒྲོལ་མས་ད་དུང་ཡང་ཚིག་གཅིག་ཀྱང་མ་བཤད་པར་སྒོ་མཚམས་ཀྱི་གྱང་ལ་བསྙེས་ནས་མིག་ཟུང་རྡོག་སྣ་ཁོ་ནར་ཅེར་ནས་བསྡད།ངོ་མ་མོས་ཅི་ཞིག་བཤད་དགོས་སམ།ཅི་ཞིག་འབྱུང་བཞིན་པ་མི་ཤེས་པའི་བུ་ཆུང་གིས་ཨ་ཕས་ལཱ་སྒྱེའི་ནང་ནས་བཏོན་ཡོང་བའི་རྩེད་ཆས་དང་གྱོན་ཆས་རྣམས་དགའ་ཚུལ་ཆེན་པོས་ཨ་མའི་ཕྱོགས་སུ་སྟོན་པའམ་ངོམ་ཅི་ཐུབ་བགྱིས་མོད།མོས་ཁོ་ལ་སྐྱོ་སྣང་གིས་ཁེངས་པའི་འཛུམ་རེ་བཙན་ཚུགས་ཀྱིས་བསྟན་པ་ལས་ཁ་ཅི་ཡང་མ་གྲགས།ཁྱོ་གས་ཀྱང་བུ་ཆུང་ལ་ཁ་ཡ་བྱེད་ཁུལ་གྱིས་མོའི་ངོ་གདོང་ལ་ལྟ་རྒྱུ་གཡོལ་ནས་བསྡད།ཁོ་ཚང་གི་ཁང་ཁྱིམ་ཆུང་ཆུང་ནང་དུ་ཅི་འདྲའི་དོགས་མི་བདེ་བ་དང་སྐྱོ་སྣང་གི་མཁའ་དབུགས་ཤིག་གིས་བཏུམས་ཡོད་པ་བུ་ཆུང་གིས་ག་ལ་རྟོགས།ཁོའི་སེམས་པ་ཆུང་ཆུང་དེ་ཨ་ཕ་མཐོང་བ་དང་ཁོང་གིས་ཁྱེར་ཡོང་བའི་རྔན་པས་སྟེར་བའི་དགའ་སྤྲོས་ཁེངས་ནས་ཡོད།
དེ་ལྟར་དུས་གང་འཚམ་ཞིག་ལ་བསྡད་མཐར།ཁྱོ་ག་བུ་ཆུང་གི་འཁྲིས་ནས་ཡར་ལངས་ཤིང་དོགས་མི་བདེ་བ་དང་ངོ་གནོང་བའི་ངང་སྒོ་མཚམས་ཀྱི་གྱང་ལ་བསྙེས་ནས་ཡོད་པའི་མོའི་སར་ཡོང་སྟེ་ཅི་ཞིག་སྨྲ་རྩིས་བྱས་པ་ན།ད་གཟོད་གཞི་ནས་མོས་ཁ་གྲགས། "ཁྱོད་ཀྱིས་ཅི་ཡང་བཤད་མི་དགོས།ད་ལྟ་རང་འགྲོ་རོགས།ཁྱོད་ཀྱིས་ངེད་མ་སྨད་ཚོ་སྔ་མོ་ནས་དོར་ཚར་་་།ད་རུང་ཁྱོད་ཀྱིས་མོ་འདིར་་་།འིན་འིན་འིན” མོས་ཚིག་དང་མིག་ཆུ་ལྷན་དུ་བསྡམས་ཡོད་པ་བཞིན་སྐད་ཆ་བཤད་པ་དང་སྦྲགས།གློ་བུར་དུ་ངུས་བྱུང་བས་རྔན་པར་མགོ་འཁོར་བའི་བུ་ཆུང་ཡང་ཧང་སང་བའི་ངང་ཨ་མའི་ཕྱོགས་སུ་འཁོར་ནས་ཅེར།ད་ནི་མོས་ཕྲག་པ་སིག་སིག་འདར་ནས་ཆོ་ངེ་འདོན་པ་དང་།ལག་རྒྱབ་ཀྱིས་ཇི་ལྟར་ཕྱིས་རུང་མཆི་མའི་རྒྱུན་ཐག་གཅོད་མ་ཐུབ་པར་མཁུར་ཚོས་ནས་བཞུར་ཏེ་བྲང་གཞུང་དུ་འཐིགས།མཚམས་དེར་བལ་ཚང་ནང་བསྙལ་བའི་བུ་མོ་ཡང་གཉིད་ལས་སད་དེ་ངུ་མགོ་བརྩམས་སྟབས།ཁོ་ཚང་གི་ཁང་ཆུང་ནང་ངུ་སྐད་ཀྱི་ཟིང་ཆས་ཁེངས།
"སྐབས་དེ་དུས་ཁོས་བཤད་འདོད་པའི་སྐད་ཆ་དེ་ཅི་ཡིན་ནམ།" དོ་ནུབ་ཁང་ཆུང་གི་མུན་ནག་ཁྲོད་དུ་ཨ་མ་སྒྲོལ་མས་ལག་ཡ་རུམ་དུ་ཉར་བའི་བུ་མོ་ཡི་དལ་བུར་ཡར་འཕགས་མར་ནོན་བྱེད་བཞིན་པའི་ཕོ་བའི་ཐོག་བཞག་སྟེ་ཉིན་དེའི་སྐོར་ལ་ཕྱིར་དྲན་བྱེེད་ཀྱིན་ཉལ་དུས།སེམས་ལ་ཉིན་དེར་ཁྱོ་གས་ཅི་ཞིག་བཤད་འདོད་པ་ཡིན་ནམ་སྙམ་པའི་ཤེས་འདོད་ཡ་མཚན་ཅན་ཞིག་ཐེངས་དང་པོར་སྐྱེས་ཤིང་།དེ་ནས་མོས་ཉིན་དེར་གཉིད་ལས་སད་དེ་ངུ་བཞིན་པའི་བུ་མོ་ལ་ནུ་མ་བསྣུན་ཏེ་ངུ་ཁ་བླངས་རུང་།རང་ཉིད་ཀྱི་མིག་ཆུ་གཏན་ནས་འགོག་མ་ཐུབ་པར་ངུས་པ་དང་།ཁྱོ་ག་སླར་ཡང་མོའི་གམ་དུ་འོངས་ནས་ཅི་ཞིག་བཤད་པར་རྩོམ་དུས།མོས་ཡང་བསྐྱར"ཁྱོད་ད་ལྟ་རང་རྒྱུགས།ངེད་མ་སྨད་ཚོའི་ཉེ་སར་ཡོང་མི་དགོས"ཞེས་ངུ་བཞིན་སྨྲས་ཏེ་ཁོ་ལ་ཁ་གྲག་ཏུ་མ་བཅུག་པ་སོགས་རེ་རེ་བཞིན་སེམས་སུ་འཁོར་ལ།དེ་རྗེས་སླར་ཁོ་ད་རུང་ཁ་རོག་མགོ་བོ་བསྒུར་ནས་ཉལ་ཁྲིའི་ཟུར་དུ་ཡུན་རིང་བསྡད་དེ་མ་སོང་བས།མོས"ཅི་རེད།ཁྱོད་ད་དུང་འགྲོ་རྒྱུ་མིན་ནམ།ཨ་ཙི།ང་ནི་ཅི་འདྲའི་བླུན་མོ་ཞིག་རེེད།ད་ངས་ཤེས་སོང་།ཁྱོད་ཀྱིས་འདྲེ་མོ་དེ་ཁྲིད་ཡོང་ནས་ང་ཕྱི་ལ་འཕུད་འདོད་པ་རེད།ཁྱོད་ལ་ངོ་ཚ་ཞེ་ཁྲེལ་ཞེས་པ་ཞིག་ཡོད་དམ།སྔོན་ཆད་ང་དང་རྒན་འཁོགས་ཚོའི་(ཁོ་གཉིས་ཀྱི་ཕ་མ)ཁ་ལ་མ་བརྩིས་པར་ཁྱོད་ཀྱིས་ཁྱིམ་གྱི་སྒོ་ཕྱུགས་བཙོངས་ནས་མོ་ཊ་ཉོས་པ་རེད།དེ་དུས་ཁྱོད་ཀྱིས་ཁྱིམ་ཚང་འདི་ཕྱུག་པོ་ཆགས་པ་བྱེད་རྒྱུའི་སྐད་ཆ་ཅི་འདྲའི་སྙན་པོ་མ་བཤད།ད་ནི་ཁྱོད་ཀྱིས་འདྲེ་མོ་དེ་ཁྲིད་ཡོང་ནས་ང་ཕྱི་ལ་འཕུད་འདོད་པ་རེད།མ་གཞི་ཁྱོད་ལ་དེ་དུས་ནས་འཆར་གཞི་འདི་ཡོད་ཀྱི་རེད།ང་ནི་ཅི་འདྲའི་རྨོངས་འཐོམས་ཤིག་རེད།ང་འགྲོ་ཆོགང་ལ་བྱིས་པ་གཉིས་མ་གཏོགས་ཅི་ཡང་མི་དགོས།ཁྱོད་ཀྱིས་ངེད་མ་སྨད་ཚོ་ལ་ཅི་འདོད་བྱེད་ཆོག་མོད།ལས་རྒྱུ་འབྲས་ཀྱིས་ཐར་པ་གཏོང་སོང་མིན་ངས་རྒྱང་ནས་ལྟ་ཆོགགྲོང་ཁྱེར་གྱི་འདྲེ་མོ་ཞིག་གི་ཆེད་དུ་བཟའ་ཟླའི་དམ་ཚིག་དང་སོ་སོའི་ཤ་ལས་ཆད་པའི་བུ་རྒྱུད་རྡོ་ལུ་བཞིན་རྒྱབ་ཏུ་དོར་མཁན་ཁྱོད་ལ་ནམ་མཁའི་ལྷ་དང་བླ་མས་དྲང་བདེན་བྱས་སོང་མིན་ལྟ་ཆོགརེད།ང་འགྲོ་ཆོག"ཅེས་རང་ཉིད་ཀྱི་སྐབས་དེའི་ན་ཟུག་དང་ཚོར་སྣང་རྣམས་མིག་ཆུ་དང་ལྷན་དུ་ཕྱི་ལ་བཏོན་པ་མ་ཟད།ཐོས་ན་འཇིགས་ལངས་པའི་དམོད་མོ་དང་སྡིགས་མོ་ཅི་ངན་གང་སྡུག་ཤོད་ཀྱིན་བྱིས་པ་གཉིས་ཁྲིད་དེ་འགྲོ་གྲབས་བྱས་དུས།ཁོས"ང་འགྲོ་ཆོག"ཅེས་བཤད་དེ་ཤར་སེར་སྒོ་ལས་ཕྱིར་དོན་སོང་བ་དང་།ཧོན་ཐོར་བའི་བུ་ཆུང་རང་ཉིད་ཀྱི་འཁྲིས་སུ་ཡོང་ནས་མོ་ལ་འཐམ་པ་སོགས་ཉིན་དེའི་དོན་རྐྱེན་རྣམས་ཆུ་ཡི་གཉེར་མ་བཞིན་གཅིག་རྗེས་གཉིས་མཐུད་ཀྱིས་མོའི་སེམས་སུ་སླར་ཡང་ཐེངས་གཅིག་འཁོར་ལ།ཡང་དེ་ནས་ཕྱི་ལ་མོ་ཊའི་གློག་སྤར་བའི་སྒྲ་གྲགས་ཤིང་།སྒྲ་དེ་ཇེ་རིང་དང་ཇེ་དམའ་རུ་ཕྱིན་ནས་ཡལ་དུས། རང་ཉིད་ཀྱིས་ད་རུང་བྱིས་པ་གཉིས་པང་དུ་བཟུང་ནས་ངུ་བཞིན་བསྡད་པའི་ཐོགཁོང་གི་བཟོད་གླགས་བྲལ་བའི་ན་ཟུག་དེ་དང་ལྷན་དུ་ཁོའི་མོ་ཊ་གཡང་ལས་ལྷུང་སོང་ན་སྙམ་པའི་སྡང་སེམས་ཤིག་རླུང་དམར་ལྟར་འགོག་ཐབས་མེད་པར་ལངས་པ་དྲན་སོས་བྱུང་།
"ངོ་མ་ཁོ་ལ་སྐད་ཆ་ཞིག་བཤད་དུ་བཅུག་ན་འགྲིག་ཨང་།" ཁྱོ་ག་ཕྱིན་པའི་རྗེས་ཀྱི་ལོ་གསུམ་ནང་དོ་ནུབ་གཞི་ནས་ཨ་མ་སྒྲོལ་མ་ལ་ཐེངས་དང་པོར་ཚོར་སྣང་འདི་འདྲ་ཞིག་སྐྱེས།ཡག་རུང་སྡུག་རུང་ཁོ་ནི་རང་ཉིད་ཀྱི་འཁྲིས་སུ་བྲང་ཁ་ལྷེམ་ལྷེམ་དུ་འཕར་ལྡིང་བྱེད་ཀྱིན་གཉིད་དུ་ཡུར་བའི་གཅེས་ཕྲུག་གཉིས་ཀྱི་ཨ་ཕ་ཡིན། ངོ་མ་འདས་པའི་ལོ་གསུམ་ལྷག་ནང་མོས་ཁོ་དང་བུད་མེད་དེ་གཉིས་ལ་དམོད་མོ་དང་ཞེ་འཁོན་བྱེད་ཞོར།ལྐོག་ནས་མོས་ཁོ་ལ་བརྩི་མཐོང་བྱས་པ་བཞིན་གྲོང་ཁྱེར་གྱི་བུད་མེད་དེས་མ་བྱས་པས། (མོས་གྲོང་ཁྱེར་གྱི་བུད་མེད་རྣམས་ཧམ་པ་ཆེ་ཚུལ་དང་ཐ་ན་ཁྱོ་ག་ལ་ཟ་མ་བཟོ་རུ་འཇུག་པའི་གཏམ་འགའ་ཐོས་མྱོང་།) ཁོ་སྐྲ་རྩི་བྱུགས་པའི་གྲོང་ཁྱེར་གྱི་བུད་མེད་དེ་ལ་ཞེ་ལོག་ནས་ཕྱིར་རང་ཁྱིམ་དུ་ལོག་ཡོང་བའི་རེ་བ་བརྒྱབས་མོད།འོན་ཀྱང་ཁོ་རང་གཏན་ནས་ཕྱིར་ལོག་མ་བྱུང་ལ།གྲོང་ཁྱེར་དུ་ཕྱིན་པའི་ཁྱིམ་མཚེས་རྒན་པོ་ཚོས་ཁོས་བྱིས་པ་གཉིས་ལ་བསྐུར་བའི་གྱོན་ཆས་(མོ་ལའང་གྱོན་ཆས་འགའ་ཡོད།)དང་ཀ་ར་ལྷན་དུ།ཁོ་རང་བདེ་པོ་ཡིན་པ་དང་།ཁོ་དང་གྲོང་ཁྱེར་གྱི་བུད་མེད་དེ་གཉིས་ལ་བུ་མོ་ཞིག་བཙས་ཡོད་པའི་གཏམ་ཉུང་ངུ་རེའང་ཁྱེར་ཡོང་།ཁོས་གྲོང་ཁྱེར་ན་བུད་མེད་དེ་དང་ལྷན་དུ་བདེ་སྐྱིད་ཀྱི་འཚོ་བ་ཞིག་ལ་རོལ་བཞིན་པ་མ་ཟད།བྱིས་པའང་སྐྱེས་ཟིན་པའི་གནས་ཚུལ་དེ་ཐོས་ཐེངས་རེའམ་བསམ་ཐེངས་རེ་ལ།མོའི་བྲང་ཁ་དམ་ཤིག་གེར་དང་སེམས་པ་ལྗིད་ཏིག་གེར་གྱུར་ནས་ཇི་ཙམ་ངུ་མྱོང་བ་མོ་ཁོ་ནས་མ་གཏོགས་ཤེས་མཁན་གཏན་ནས་མེད།ཡིན་ན་ཡང་།དོ་ནུབ་མོས་ཁྱོ་གས་སྐྲ་རྩི་བྱུགས་པའི་བུད་མེད་དེ་དང་ལྷན་དུ་གྲོང་ཁྱེར་ན་འཚོ་བ་ཞིག་ལ་རོལ་བཞིན་པའི་ཐད་ལ་བསམ་བློ་གཏོང་སྐབས།རྒྱུན་ལྡན་གྱི་འཁོན་སེམས་དང་སྡང་ཟུག་དེ་མ་ལངས།མོས་ཁོ་རང་གཏན་ནས་ཕྱིར་མི་ཡོང་བའི་དངོས་ཡོད་དེ་དང་ལེན་བྱས་པ་ཨེ་ཡིན།
ཨ་མ་སྒྲོལ་མའི་སེམས་སུ་ཉིན་ཤས་གོང་དུ་ཁྱིམ་མཚེས་བཀྲ་ཤིས་ཀྱིས་གྲོང་ཁྱེར་ནས་ཁྱེར་ཡོང་བའི་འགྱིག་ཁུག་དེ་འཁོར།མོའི་ཁྱོ་ག་རྙིང་པས་གྲོང་ཁྱེར་ནས་བསྐུར་ཡོང་བའི་འགྱིག་ཁུག་དེའི་ནང་དུ།བྱིས་པ་གཉིས་ལ་གྱོན་ཆས་དང་།རྩེད་ཆས།དེ་བཞིན་མངར་ཟས་འགའ་ཡོད་པ་དང་ལྷན་དུ་ཕྱི་བའི་པགས་པའི་སྐེད་ཆིངས་ཤིག་ཀྱང་ཡོད།མོས་བྱིས་པ་དང་པོ་སྟེ་བུ་དེ་སྐྱེས་པའི་རྗེས་སུ།གྲང་གཞི་བྱུང་ནས་རྒྱུན་དུ་སྐེད་པ་ན་བས།ཁོས་དེ་སྔོན་ཕྱི་བའི་པགས་པའི་སྐེད་ཆིངས་ཉོ་དགོས་ཚུལ་བཤད་མྱོང་།
ད་ནི་ཧ་ལམ་ནམ་ཕྱེད་ཟིན་ལ་ཉེ་ཞིང་ཟླ་བ་མེད་པའི་མཚན་མོའི་མཁའ་དབྱིངས་སུ་སྐར་མ་གྲངས་མེད་འོད་ཆེམ་ཆེམ་དུ་ཤར་འདུག་པ་ནི་རྔོ་སླང་ཆེན་པོ་ཞིག་གི་མཐིལ་དུ་ཡོས་ཁྲ་བཀྲམ་པ་དང་འདྲ།སྒྲོལ་མ་མ་སྨད་ཚོའི་ཁང་ཆུང་ནང་སྔར་བཞིན་མུན་སྟུག་པ་དང་།ཁང་ཆུང་གི་ཤེལ་ཁྲ་ཆུང་ཆུང་དེ་བརྒྱུད་དེ་གྲོང་པའི་ཁྱི་ཟུག་པའི་སྐད་རེ་ཟུང་ཨ་མ་སྒྲོལ་མའི་རྣ་ལམ་དུ་ལྷུང་།མོས་བུ་མོའི་བྲང་ཁར་བཞག་པའི་ལག་ཡ་རུམ་ནས་བཏོན་ཏེ་སྔས་མགོར་གཉིད་པའི་བུ་ཆུང་གི་མགོ་ལ་བརྐྱངས་པ་མ་ཟད།ཡུད་ཙམ་གྱི་རིང་ལ་དལ་བུར་བྱིལ་བྱིལ་བྱས་རྗེས།སླར་ཕྱིར་བསྐུམས་ནས་སྔར་ལྟར་བུ་མོའི་བྲང་ཁའི་སྟེང་དུ་བཞག་ཅིང་།མོའང་རྨི་ལམ་གྱི་ཞིང་ཁམས་སུ་ཕྱིན།མོའི་མ་འོངས་ཀྱི་རེ་བ་ཡོད་ཚད་གཉིད་དུ་ཡུར་བའི་བུ་ཆུང་དང་བུ་མོ་གཉིས་ལ་བཅོལ་ཡོད།།
༢༠༡༦/༨/༡༦ཉིན་བྲིས།
༢༠༢༤།༡༢།༢༢ཉིན་བཟོ་བཅོས་བཏང་།