སེར་ལྷོ་དགེ་བཤེས་མཁས་གྲུབ་ཤེས་རབ།
ཐེངས་ཤིག་ཐང་དཀར་རྒོད་པོ་སྤྲུལ་ནས་རི་ཆེན་བྱ་རྐང་རྩེ་ལ་ལྡིང་། །
སྐབས་ཤིག་ནག་པོ་སྦྲུལ་ལ་བརྫུས་ནས་འཇིགས་རུང་ནགས་ཀྱི་སྐེད་པ་བཅད། །
མཚམས་རེ་ཐུབ་པ་ཆེན་པོའི་ཚུལ་གྱིས་མཆོད་རྟེན་གམ་དེར་ཙོག་པོར་བཞུགས། །
ལན་རེ་རྔུལ་ནག་ཐིགས་པ་འཛག་བཞིན་རང་ལུས་རྡོ་དང་ཤིང་ལ་བརྡར། །
ངོ་མཚར་ང་ཚོའི་འགྲོ་འདུག་དེ་ཚོར་ཕྱིར་དྲན་བརྒྱ་ཡི་གནས་ལུགས་ལྡན། །
སྐབས་འགར་མོན་པའི་ཟ་ཁང་དེ་རུ་བྱ་རྒོད་བཞིན་དུ་ལྟོ་ལ་རུབ། །
ལན་འགར་རྐུ་མ་ནག་ཅན་ལྟ་བུར་གསང་བའི་ཟས་འགའ་ཤག་ལ་བསྒྲུབས། །
མཚམས་འགར་མགྲོན་པོ་ཕར་འབོད་ཚུར་འབོད་གཡས་གཡོན་དག་ཀྱང་འུར་གྱིས་དཀྲོཌ། །
རྒྱུན་དུ་མཆོད་རྟེན་གཡས་གཡོན་དེ་ནས་ཅི་ཞིག་རེག་ན་དེ་ཞིག་བཟས། །
ངོ་མཚར་ང་ཚོའི་ཟ་འདུག་དེ་ཚོར་ཕྱིར་དྲན་སྟོང་གི་སྤྲོ་སྣང་མངའ། །
ཆོས་འཕེལ་མགོ་ལ་མགོ་སྤུ་མེད་ཀྱང་སྨྲ་ཉུང་བཙུན་པའི་སྤྱོད་པ་མཛེས། །
ཟླ་བ་ཁྱོད་རང་ཁ་དོག་ནག་ཀྱང་སྤྲོ་སྣང་རྩེ་དགའི་གཤིས་ཀ་དཀར། །
ཆུང་བདག་ཁོ་ནི་གཏི་མུག་མང་ཡང་ཉམ་ཆུང་རིག་པ་ཀུན་ལས་གསལ། །
རྒྱ་བོ་ཁོ་རང་ཁ་ངོ་རྩུབ་ཀྱང་དྲང་ཚུགས་འཛིན་པ་ཀུན་གྱིས་བསྔགས། །
ང་རང་མ་གཏོགས་ཁྱོད་ཚོ་ཚང་མ་ཕྱིར་དྲན་འོས་པའི་གྲོགས་བཟང་རེད། །
ཨ་ཅོ་ཁྱོད་རང་ཆུང་ཆུང་ཡིན་ཡང་མི་གཞི་ཁོག་པ་ཤིན་ཏུ་ཆེ། །
ཨ་ཅག་ཁྱོད་རང་རིལ་རིལ་ཡིན་ཡང་སེམས་བཟང་སྨྲ་བ་ལྷག་ཏུ་བདེ། །
ཨ་ནེ་ཁྱོད་རང་ལུག་ལུག་ཡིན་ཡང་ཀུན་སྤྱོད་ཀུན་དང་ཧ་ཅང་མཐུན། །
རྒྱ་རྒན་མ་གཏོགས་ཁྱོད་ཚོ་ཚང་མ་དོན་གྱི་ཆོས་གྲོགས་བཟང་པོ་སྟེ། །
མ་བསམ་ས་ནས་ཁྱོད་ཚོ་འཕྲད་པ་སྔོན་བསགས་དགེ་བའི་རྣམ་སྨིན་རེད། །
རྒྱ་རྒན་ཁོ་ཡང་སྡུག་རྒྱུ་མི་གདའ་གནས་ལུགས་མང་པོ་བཤད་རྒྱུ་གདའ། །
བཤད་རྒྱུ་གདའ་སྟེ་ཡག་རྒྱུ་མི་གདའ་ཁ་ལ་ང་དེ་འཛར་བསྡད་གདའ། །
ཨ་ཙི་ཁ་ལ་བདག་པོ་མི་གདའ་ཉོ་ཆ་སྡུག་འགའ་རག་རན་གདའ། །
ཆོས་གྲོགས་ཁྱོད་ཚོས་ཐུགས་ལ་མ་འཇོག་ཁོ་བོས་བཤད་ཚད་རྩེད་མོ་ཡིན། །
གོ་སྐབས་བྱུང་ན་བཟོད་གསོལ་ཞིག་ཀྱང་ཟ་ཁང་ཞིག་ནས་ཞུས་ན་ཆོག །
ཡུན་རིང་ཞིག་བྲི་རྒྱུ་མ་བྱུང་བས་དེ་རིང་ཐེངས་ཤིག་མེ་འཁོར་ནང་རོགས་མེད་སྟབས་གང་དྲན་དུ་བྲིས་པ་ཡིན། དྲྭ་གྲོགས་རྣམ་པ་དང་ལྷག་པར་རྡོར་གདན་ལ་ཡོད་པའི་ཆོས་གྲོགས་ཚོ་སྤྲོ་བར་སྨོན།