སྙན་ངག་པ།ནག་པོ་བཀྲ་ཤིས།
ལང་ཚོའི་མཛེས་སྡུག་སྤོབས་པས་ཁུར་ཏེ་རྟ་ལམ་བཅད་ནས་བྱང་ལ་སོང་།།
སེམས་པས་མ་ངོམས་རི་བོའི་ཚོགས་ཀྱང་ལག་ཏུ་ལེན་པའི་ངར་རྒྱལ་དེས།།
ཅི་ཡང་མི་འཇིགས་དཔའ་བོའི་གཏམ་རྒྱུད་སེམས་སུ་སྦྲུམ་པའི་སྙིང་ཁམས་བསྐྱེད།།
རྒྱལ་ཁམས་རྒོད་པོས་ཤུགས་ཀྱིས་གཤགས་ཏེ་གླིང་བཞིར་རྡོག་རྗེས་གྲངས་སུ་ཕབ།།
ལེ་དབར་སྟོང་གི་སྒར་ས་རེ་ནས་འཇིག་རྟེན་ལས་ཀྱི་ཆོས་ཉིད་མྱངས།།
བརྒྱ་གྲོང་མི་ཡུལ་དལ་གྱིས་མྱུར་ཏེ་ཡུལ་གྱལ་སྐྱེ་བ་པང་དུ་བླངས།།
སྐྱིད་སྡུག་བར་ནས་བློ་སྒོ་ཕྱེ་མཁན་ཡབ་ཆེན་གང་དེ་ཡིད་ངོས་སུ།།
དྲན་པ་རེ་རེས་འདང་ཞིག་བརྒྱབ་ན་རླབས་ཆེན་སྐྱེ་བོའི་གཤིས་ཤིག་སྣང་།།
གདམས་པ་རེ་རེ་ཐོད་དུ་ལྷུང་བྱུང་ཁྱོད་ནི་དཔུང་དང་བདག་གི་མགོན།།
གཞོན་པའི་དུས་སུ་མང་པོ་མ་བསམ་སྟོབས་ཤུགས་རང་གིས་གསོན་པར་བྱེད།།
མི་ཚེའི་འགྲུལ་ལམ་ངང་གིས་བསྐྱོད་ན་ངོ་མཚར་ཁོ་ནས་མདུན་དུ་བསུ།།
རྩྭ་ཐང་མེ་ཏོག་སྐར་མའི་ཕུང་རྣམས་མཛེས་པ་གཅིག་པུ་སུ་ཡི་དོན།།
ཆུང་འདྲིས་ཟླ་འཛུམ་པད་མའི་རྣ་རྒྱན་རྒྱང་ལྟ་བྱེད་སའི་རི་གྲོང་དེར།།
སྟོན་ཟླའི་འོག་ནས་གྱེས་དགོས་བྱུང་སོང་དགོངས་པ་མ་འཚོམ་ཟླ་འཛུམ་ལགས།།
མཛའ་སེམས་མིག་ཆུ་རྒྱ་མཚོར་བཏབ་ཡོད་དམ་ཚིག་འོ་ཆུ་མཚོན་ཐབས་ཡིན།།
རི་བོའི་ཕར་རྒྱབ་སྤྲིན་དཀར་ལང་ལོང་སུ་དང་གང་གི་སེམས་པ་རེད།།
ཐག་རིང་མགྲོན་པོ་རེ་ཐག་མ་ཆད་ཆུ་མོའི་འགྲམ་ནས་གླིང་བུ་བུས།།
རླབས་ཕྲེང་རེ་རེས་རྒྱང་དུ་བསྐྱུར་བ་ན་ཟུག་ལས་ལ་ལྡོག་མ་ཐུབ།།
ཕོ་རབས་མུ་མེད་འདོམ་གྱིས་འཇལ་ཏེ་རྟ་ཕོའི་རྨིག་སྒྲ་གང་ནས་མཆེད།།
རི་སྤྱང་ལ་ལུང་དུས་གསུམ་མི་འདུག་གཡང་མོའི་ཁྱུ་རྣམས་བདེ་བར་མཛོད།།
རྔོན་པ་རྒས་པོས་བུ་ཕྲུག་དོན་དུ་དམྱལ་ཁམས་འགྲིམ་པ་བཀའ་དྲིན་ཆེ།།
འཚོ་བ་ཙམ་གྱིས་དོན་གོ་ཆོད་ན་དད་པ་མི་འགྱུར་དཀོན་མཆོག་དཔང་།།
༢༠༢༥/༡༢/༢༥མ་ཇུ་ཀ་ཏྲི་ལ་ནས་བྲིས།