སེར་བྱེས། འཇམ་དབྱངས་མཁས་བཙུན།
༢༠༢༣་༡༠་༢༣
རྟེན་འབྲེལ་བསྟོད་པ་ནི་རྗེ་རིན་པོ་ཆེ(༡༣༥༧-༡༤༡༩)་ཡིས་མཛད་པའི་ལྟ་བའི་སྐོར་གྱི་ལེགས་བཤད་རྨད་དུ་བྱུང་བ་ཞིག་རེད། གཞུང་འདི་ནི་རྗེ་རིན་པོ་ཆེ་ཁོང་དབུ་མའི་ལྟ་བ་མཐར་ཐུག་ལ་ངེས་པ་གཏིང་ཚུགས་རྙེད་པའི་ཚུལ་བསྟན་པའི་སྐབས་དེ་ག་རང་ལ་མཛད་པ་ཡིན་པས། སྟོན་པའི་བཀའ་དྲིན་དང་། བསྟན་པའི་ཟབ་ཁྱད། ཉམས་རྟོགས་ཀྱི་ཚན་ཁ་སོགས་ཚིག་འབྲུ་རེ་རེའི་ཐོག་ནས་མངོན་ཡོང་བ་ཡིན། འདིར་ཁྱོན་བསྡོམས་ཚིགས་བཅད་གྲངས་ ༥༨ ཡོད་པ་རེད།
ལེགས་བཤད་འདི་ལ་འགྲེལ་བ་གྲངས་ ༥༤ ཟིན་འདུག་ཅིང་། གསན་ཡིག་དང་འདོན་ཚུལ་སོགས་ཀྱང་མང་པོ་མཇལ་རྒྱུ་འདུག །དེས་ཀྱང་མ་ཚད་བླ་མ་རྣམས་ཀྱིས་བསྟན་བཅོས་འདི་ལ་བཀའ་ཆོས་གནང་བ་ཤིན་ཏུ་མང་བའི་ནང་ནས་རྒྱལ་བ་ཐམས་ཅད་མཁྱེན་པ་འདི་ཉིད་གཅིག་པུས་ཀྱང་བཀའ་ཆོས་གནང་བའི་གྲངས་ཐོ་ ༣༣ ཟིན་འདུག །གྲངས་ཐོ་དེ་དག་ནི་ཁོ་བོས་མཐོང་ཐོས་བྱུང་བ་ཁོ་ན་ལ་གཞིར་བྱས་པ་ཡིན་པས། དེ་ལས་ཀྱང་མང་བ་ཡོད་ཆོག་གོ །
འདིར་འགྲེལ་ཆེན་ཁག་ཅིག་གི་ས་བཅད་རྣམས་ཟུར་འདོན་ཞུས་པ་ནི། གཅིག་ནས་ཀློག་པ་པོ་རྣམས་ལ་ལེགས་བཤད་འདིར་རྒྱུས་ལོན་ཅུང་ཟད་ཡོང་རེ་དང་། གཉིས་ནས་གཞུང་གི་དཀར་ཆག་སྒྲིག་ཚུལ་དམིགས་བསལ་བ་འདི་ལ་དོ་སྣང་ཅུང་ཟད་ཡོང་བའི་ཆེད་དུ་ཡིན། རང་རེའི་སྤྱི་སྒེར་རྣམས་ལ་དཔེ་དེབ་པར་སྐྲུན་བྱེད་པའི་གོམས་གཤིས་བཟང་པོ་ཡོད་ན་ཡང་། དཀར་ཆག་སྒྲིག་སྲོལ་གྱི་ལམ་ལུགས་ལ་ཁ་སྣོན་ཅུང་ཟད་དགོས་པར་མཐོང་ནས་ཁོ་བོས་འདི་བྱས་པའོ། །
གསལ་བཤད། བསྡུས་ཡིག་གི་མཚོན་དོན་ནི། ཚ་ནི་ཚིགས་བཅད་དེ། ཚ༣ ལྟ་བུ་ལ་མཚོན་ན། ཚིགས་བཅད་གསུམ་པ་ཞེས་པའོ། །
བླ་ན་མེད་པའི་འཇུག་ངོགས།
རྒྱལ་བ་དགེ་འདུན་རྒྱ་མཚོ(༡༤༧༦-༡༥༤༢)འི་འགྲེལ་བ།
ཀ༡ ཐུབ་པ་ལ་རྟེན་འབྲེལ་གསུངས་པའི་སྒོ་ནས་བསྟོད་པ[1]།
ཁ༡ རྟེན་འབྲེལ་གྱི་སྒོ་ནས་བསྟོད་པ་མདོར་བསྟན་པ། ཚ༡
ཁ༢ རྒྱས་པར་བཤད་པ།
ག༡ རྟེན་འབྲེལ་གྱི་སྒོ་ནས་བསྟོད་པའི་རྒྱུ་མཚན།
ང༡ རྟེན་འབྲེལ་གྱིས་འཁོར་བའི་རྩ་བ་གཅོད་པས་བསྟན་པའི་སྙིང་པོར་བསྟན་པ། ཚ༢ ཚ༣[2]
ང༢ དེས་ན་རྟེན་འབྲེལ་གྱི་སྒོ་ནས་བསྟོད་པ་མཆོག་ཏུ་བསྔགས་པ། ཚ༤
ག༢ བསྟོད་པ་དངོས།
ང༡ རྟེན་འབྲེལ་གཟིགས་ཚུལ་གྱི་སྒོ་ནས་སྤྱིར་བསྟོད་པ།
ཅ༡ རྟེན་འབྲེལ་གཟིགས་ཤིང་གསུངས་པས་སྟོན་པ་སྨྲ་བ་གཞན་ལས་ཁྱད་ཞུགས་པར་བསྔགས་པ།
ཆ༡ རྟེན་འབྲེལ་གསུངས་པ་ལེགས་འདོམས་ཀྱི་མཆོག་ཏུ་བསྟན། ཚ༥
ཆ༢ གསུངས་པའི་རྟེན་འབྲེལ་སྤྲོས་པའི་དྲ་བ་གཅོད་བྱེད་དུ་བསྟན། ཚ༦
ཆ༣ རྟེན་འབྲེལ་སྟོན་པ་མཆོག་ཏུ་བསྔགས་པ། ཚ༧ ཚ༨
ཅ༢ རྟེན་འབྲེལ་ཇི་ལྟར་གཟིགས་ཤིང་གསུངས་པའི་ཚུལ་དོན་བསྡུ་བ།
ཆ༡ རང་བཞིན་སྟོང་པ་རྟེན་འབྲེལ་གྱི་དོན་དུ་གཟིགས་ཤིང་གསུངས་ཚུལ།
ཇ༡ རྒྱས་པར་བཤད་པ།
ཉ༡ སྟོང་པ་དང་རྟེན་འབྲེལ་དོན་གཅིག་ཏུ་མི་འདོད་པས་ཐུབ་པའི་བཞེད་པ་མ་རྟོགས་པར་བསྟན། ཚ༩ ཚ༡༠
ཉ༢ སྟོང་པ་དང་རྟེན་འབྲེལ་དོན་གཅིག་ཐུབ་པའི་བཞེད་པ་མཆོག་ཏུ་བསྒྲུབ་པ།
ཏ༡ རང་བཞིན་གྱིས་སྟོང་པ་ལ་བྱ་བྱེད་ཐམས་ཅད་འཐད་ཅིང་ལོག་ཕྱོགས་ལ་མི་འཐད་པར་བཞེད།
ཐ༡ རང་བཞིན་གྱིས་སྟོང་པའི་ཕྱོགས་ལ་བྱ་བྱེད་ཐམས་ཅད་འཐད་པར་བཞེད། ཚ༡༡
ཐ༢ དེ་ལས་ལྡོག་པར་མཐོང་བ་རྣམས་མཐར་ལྟའི་གཡང་དུ་ལྷུང་བར་བཞེད[3]། །ཚ༡༢
ཐ༣ རྒྱུ་མཚན་དེས་ན་རྟེན་འབྲེལ་མཐོང་བ་ལེགས་པར་བསྔགས། ཚ༡༣
ཏ༢ ཆོས་ཐམས་ཅད་རྟེན་འབྲེལ་ཡིན་པའི་རྒྱུ་མཚན་གྱིས་རང་བཞིན་སྟོང་པར་གསུངས་ཚུལ།
ཐ༡ གསུངས་ཚུལ་དངོས།
ད༡ ཆོས་ཐམས་ཅད་ལྟོས་ནས་གྲུབ་པས་རྟེན་འབྲེལ་དུ་བསྟན་པ། ཚ༡༤
ད༢ རྟེན་འབྲེལ་དུ་གྲུབ་པས་རང་བཞིན་གྱིས་སྟོང་པར་བསྟན་པ། ཚ༡༥
ད༣ རང་བཞིན་གྱིས་གྲུབ་ན་མྱང་འདས་སོཊ་མི་རུང་བར་བསྟན་པ། ཚ༡༦
ཐ༢ དེ་ལ་རྒོལ་བ་གཞན་གྱིས་གླགས་མི་རྙེད་པར་བསྟན་པ། ཚ༡༧
ཏ༣ ཚུལ་དེ་ཉིད་ཀྱིས་སྟོན་པ་སྨྲ་བ་བླ་ན་མེད་པར་གྲུབ་པ། ཚ༡༨ ཚ༡༩
ཇ༢ བསྡུས་ཏེ་བསྔགས་པ། ཚ༢༠ ཚ༢༡
ཉ༡ ཚིག་དོན།
ཉ༢ འཕྲོས་དོན་ཅུང་ཟད་བཤད་པ།
ཆ༢ དེ་ལྟར་མ་རྟོགས་ན་བསྟན་པའི་སྙིང་པོ་མི་རྟོགས་པར་བསྟན་པ།
ཇ༡ རྟེན་འབྲེལ་ཁས་བླངས་ནས་རང་བཞིན་སྟོང་པ་མི་འདོད་པ་བཞད་གད་ཀྱི་གནས་སུ་བསྟན། ཚ༢༢ ཚ༢༣
ཇ༢ དངོས་སྨྲ་བའི་སྐྱེ་བོ་བསྟན་པའི་སྙིང་པོ་ལས་ཕྱི་རོལ་ཏུ་གྱུར་པར་བསྟན། ཚ༢༤ ཚ༢༥
ཇ༣ རྟེན་འབྲེལ་ཁས་ལེན་བཞིན་དུ་རང་བཞིན་གྱིས་གྲུབ་པ་ཁས་ལེན་པ་འགལ་བར་བསྟན། ཚ༢༦
ཇ༤ དེས་ན་ཆོས་ཐམས་ཅད་སྒྱུ་མ་ལྟ་བུར་གྲུབ། ཚ༢༧
ཆ༣ རྟོགས་ན་སྟོན་པ་ལ་ཚད་མས་དྲངས་པའི་དད་པ་སྐྱེ་བར་བསྟན་པ།
ཇ༡ དངོས་པོའི་གནས་ལུགས་བསྟན་པས་ངེས་ཤེས་སྐྱེ་བའི་ཚུལ།
ཉ༡ དངོས་པོའི་གནས་ལུགས་བསྟན་པས་གཞན་གྱི་ཀླན་ཀའི་སྐབས་མེད། ཚ༢༨ ཚ༢༩
ཉ༢ རྟེན་འབྱུང་གི་ལམ་ལ་བརྟེན་ནས་གཞན་ལའང་ངེས་ཤེས་སྐྱེ་བའི་ཚུལ། ཚ༣༠
ཇ༢ ཉེས་པའི་རྩ་བ་ལྡོག་པས་ངེས་ཤེས་སྐྱེ་བའི་ཚུལ། ཚ༣༡ ཚ༣༢ ཚ༣༣
ཇ༣ གསུང་གི་དོན་རྟོགས་པས་བདེ་བ་སྟེར་བས་ངེས་ཤེས་སྐྱེ་བའི་ཚུལ། ཚ༣༤ ཚ༣༥ ཚ༣༦ ཚ༣༧
ང༢ གསུང་ཚུལ་གྱི་ངོས་ནས་བྱེ་བྲག་ཏུ་བསྟོད་པ།
ཅ༡ རྟེན་འབྲེལ་གསུང་ཚུལ་དགོས་པ་དང་བཅས་པ།
ཆ༡ ཐུབ་པས་གདུལ་བྱས་མྱང་འདས་ཐོབ་པའི་ཕྱིར་དུ་རྟེན་འབྲེལ་གྱི་ཆོས་བསྟན་ཚུལ། ཚ༣༨
ཆ༢ དེ་ལྟར་གསུངས་པའི་བསྟན་པ་འཛིན་པར་གུས་པའི་རྒྱུ་མཚན། ཚ༣༩
ཆ༣ གཟུང་བྱ་བསྟན་པ་རིན་པོ་ཆེའི་ཆེ་བ་བཤད་པ། ཚ༤༠
ཅ༢ ཐུབ་པས་ནན་ཏན་གྱིས་བསྒྲུབས་པའི་ཆོས་ཚུལ་ཟབ་མོ་རྟོགས་པར་བཞེད་པར་འཁྲུངས་པའི་ཚུལ།
ཆ༡ ཐུབ་པས་ནན་ཏན་གྱིས་བསྒྲུབས་ཚུལ། ཚ༤༡
ཆ༢ དེ་རྟོགས་པར་བཞེད་པ་ཇི་ལྟ་བ་འཁྲུངས་ཚུལ[4]། ཚ༤༢ ཚ༤༣ ཚ༤༤ ཚ༤༥
ཅ༣ དེ་ལ་བརྟེན་ནས་ཐུབ་པའི་དགོངས་པ་ཇི་ལྟར་བཙལ་བ།
ཆ༡ འཚོལ་བའི་རྒྱུ། ཚ༤༦
ཆ༢ བཙལ་བའི་ཚུལ། ཚ༤༧
ཆ༣ ཇི་ལྟར་རྙེད་པ།
ཇ༡ ཚེགས་ཆུང་ངུས་མ་རྙེད་པའི་ཚུལ་བསྟན། ཚ༤༨
ཇ༢ དེ་ནས་བླ་མའི་དྲིན་གྱིས་རྙེད་པའི་ཚུལ། ཚ༤༩ ཚ༥༠ ཚ༥༡
ཁ༣ དོན་བསྡུ་བ། ཚ༥༢
ཀ༢ མཇུག་རྩོམ་པའི་རྒྱུ་མཚན་དང་བསྔོ་བ།
ཁ༡ རྩོམ་པའི་རྒྱུ་མཚན། ཚ༥༣
ཁ༢ བསྔོ་བ།
ག༡ ཚེ་རབས་ཐམས་ཅད་དུ་དགེ་བའི་བཤེས་གཉེན་གྱིས་རྗེས་སུ་འཛིན་པར་སྨོན་པ། ཚ༥༤
ག༢ སྟོན་པ་དང་བསྟན་པའི་ངང་ཚུལ་ཤེས་ནས་སྟོན་པ་ལ་ཡིད་ཆེས་པར་སྨོན་པ། ཚ༥༥
ག༣ ཕན་མཛད་ལུས་སྲོག་ལ་མི་བལྟ་བ་ཐུབ་བསྟན་འཛིན་པར་སྨོན་པ། ཚ༥༦
ག༤ བརྟེན་ནས་[5]རྟེན་འབྲེལ་ཟབ་མོའི་ལུགས་འཕེལ་བའི་ཐབས་ལྷུར་ལེན་པར་སྨོན་པ་འདྲེན་པ། ཚ༥༧
ག༥ དེ་ལྟར་བརྩོན་པ་ལ་བསྟན་སྲུང་རྣམས་ཀྱིས་གྲོགས་མཛད་པར་སྨོན་པ། ཚ༥༨
ཊཱིཀྐ་འོད་དཀར་འཕྲེང་བ།
ཕུར་ལྕོག་ངག་དབང་བྱམས་པ(༡༦༨༢-༡༧༦༢)འི་འགྲེལ་བ།
ཀ༡ མཆོད་པར་བརྗོད་པ། ཚ༡
ཀ༢ བསྟན་བཅོས་ཀྱི་ལུས་དངོས།
ཁ༡ རྟེན་འབྱུང་གི་སྒོ་ནས་བསྟོད་པའི་རྒྱུ་མཚན། ཚ༢ ཚ༣ ཚ༤
ཁ༢ དེ་ཡི་སྒོ་ནས་བསྟོད་པ་དངོས།
ག༡ མདོར་བསྟན་པ།
ང༡ རྒྱུ་རྐྱེན་ལ་རག་ལས་པས་རང་བཞིན་མེད་པར་གསུངས་པ་ངོ་མཚར་བ། ཚ༥
ང༢ དེའི་ཚེ་མི་མཁས་པ་རྣམས་ལ་རང་བཞིན་ཡོད་པར་འཁྲུལ་པ་སྐྱེ་བའི་རྒྱུ་མཚན་དེ་ཉིད། མཁས་པ་ལ་རང་བཞིན་མེད་པར་ངེས་པ་སྐྱེ་བའི་རྒྱུ་མཚན་ཡང་དག་ཏུ་སོང་བས་ངོ་མཚར་བ། ཚ༦
ང༣ སྟོན་ཚུལ་དེ་སྟོན་པ་གཞན་ལ་མེད་པས་ངོ་མཚར་བ། ཚ༧ ཚ༨
ག༢ རྒྱས་པར་བཤད་པ།
ང༡ ཡིད་ཆེས་ཀྱི་དད་པའི་སྒོ་ནས་བསྟོད་པ་རྒྱས་པར་བཤད་པ།
ཅ༡ བསྟན་པ་སྐྱོན་མེད་དུ་ཡིད་ཆེས་རྙེད་ཚུལ།
ཆ༡ མདོར་བསྟན་དང་པོ་གཉིས་ཀྱི་དོན་རྒྱས་པར་བཤད་པ།
ཇ༡ རྒྱུ་རྐྱེན་ལ་རག་ལས་པའི་རྒྱུ་མཚན་གྱིས་རང་བཞིན་མེད་པར་གསུངས་པའི་སྒོ་ནས་བསྟོད་པ་རྒྱས་པར་བཤད་པ།
ཉ༡ སྟོན་པའི་བཞེད་པ་མཐར་ཐུག་གི་ལྟ་བ་ངོས་བཟུང་བ། ཚ༩ ཚ༡༠ ཚ༡༡ ཚ༡༢ ཚ༡༣
ཉ༢ དེ་ངེས་བྱེད་ཀྱི་རིགས་པ་ཡང་དག་འགོད། ཚ༡༤ ཚ༡༥
ཉ༣ རིགས་པས་གྲུབ་པའི་དོན་དེའི་ལྡོག་ཕྱོགས་ལ་གནོད་པ་བསྟན་པ། ཚ༡༦ ཚ༡༧ ཚ༡༨ ཚ༡༩
ཉ༤ མཐུན་ཕྱོགས་ལ་བྱ་བྱེད་ཐམས་ཅད་འཐད་པའི་གྲུབ་དོན་དེ་ལ་བསྔགས་པའི་སྒོ་ནས་སྟོན་པ་ལ་བསྟོད་པ། ཚ༢༠ ཚ༢༡
ཇ༢ དེ་ཉིད་མི་མཁས་པ་ལ་མཐར་འཛིན་བརྟན་བྱེད། མཁས་པ་ལ་སྤྲོས་པའི་དྲ་བ་མ་ལུས་པ་གཅོད་པའི་སྒོར་གྱུར་པའི་དོན་རྒྱས་པར་བཤད་པའི་སྒོ་ནས་བསྟོད་པ།
ཉ༡ བྱིས་པ་རྣམས་འཆིང་བའི་སྒོར་འགྱུར་ཚུལ། ཚ༢༢ ཚ༢༣ ཚ༢༤ ཚ༢༥
ཉ༢ མཁས་པ་ལ་སྤྲོས་པ་མ་ལུས་པ་གཅོད་བྱེད་དུ་འགྱུར་ཚུལ། ཚ༢༦ ཚ༢༧
ཆ༢ དེ་གཉིས་ལ་ངེས་པ་རྙེད་ན་མི་འཇིགས་པ་བཞི་དམ་བཅས་པ་སོགས་གསུང་རབ་ཀྱི་གནད་གཞན་ལ་ཡང་ངེས་པ་བདེ་བླག་ཏུ་རྙེད་ཚུལ[6]། ཚ༢༨ ཚ༢༩ ཚ༣༠
ཅ༢ དེ་ལ་བརྟེན་ནས་སྟོན་པ་སྐྱོན་མེད་དུ་ཡིད་ཆེས་རྙེད་ཚུལ[7]། ཚ༣༡ ཚ༣༢ ཚ༣༣ ཚ༣༤ ཚ༣༥ ཚ༣༦
ཅ༣ ཡིད་ཆེས་རྙེད་པས་སྟོན་པའི་བསྟན་པ་འཛིན་པར་སྤྲོ་བ་སྐྱེས་ཚུལ[8]།
ཆ༡ སྟོང་པ་རྟེན་འབྱུང་གི་ལམ་མཆོག་ཏུ་རྟོགས་དཀའ་བ། ཚ༣༧
ཆ༢ སྟོན་པའི་མཛད་པ་ཀུན་གྱི་མཆོག་ཡིན་པས་འཛིན་སྤྲོ་བ[9]། ཚ༣༨
ཆ༣ སེམས་ཅན་ཤིན་ཏུ་གདུལ་དཀའ་བ་ཡང་འདུལ་བར་མཛད་པས་འཛིན་པར་སྤྲོ་བ[10]། ཚ༣༩
ཆ༤ ལུང་གི་བསྟན་པ་ཁྱད་ཆོས་གསུམ་དང་ལྡན་པས་འཛིན་པར་སྤྲོ་བ[11]། ཚ༤༠
ང༢ བཀའ་དྲིན་རྗེས་དྲན་གྱི་གུས་པའི་སྒོ་ནས་བསྟོད་པ་རྒྱས་པར་བཤད་པ།
ཅ༡ བཀའ་དྲིན་དྲན་པ། ཚ༤༡
ཅ༢ དངོས་སུ་མ་ཐོས་པས་སྐྱོ་བ། ཚ༤༢ ཚ༤༣
ཅ༣ གསུང་ཚུལ་དྲན་ནས་སྤྲོ་བ། ཚ༤༤ ཚ༤༥
ང༣ དད་གུས་དེ་གཉིས་རང་གིས་ཇི་ལྟར་བཙལ་ཅིང་རྙེད་པའི་ཚུལ།
ཅ༡ རྐྱེན་གང་གིས་བཙལ་བ། ཚ༤༦
ཅ༢ བརྩོན་པ་ཇི་ལྟ་བུས་བཙལ་བ། ཚ༤༧ ཚ༤༨
ཅ༣ འགྲེལ་བྱེད་གང་གི་གཞུང་ལ་བརྟེན་ནས་རྙེད་པ། ཚ༤༩ ཚ༥༠ ཚ༥༡
ག༣ དོན་བསྡུས་ཏེ་ཚུལ་དེས་སངས་རྒྱས་རྗེས་སུ་དྲན་པར་གཞན་ཡང་བསྐུལ་བ། ཚ༥༢
ཁ༣ བསྟོད་པ་མཛད་པ་པོའི་ཁྱད་པར་བསྟན་པ། ཚ༥༣
ཀ༣ མཇུག་གི་བྱ་བ།
ཁ༡ བསྔོ་བ། དོན་ཚན་ལྔ། ཚ༥༤ ཚ༥༥ ཚ༥༦ ཚ༥༧ ཚ༥༨
ཁ༢ མཛད་བྱང་།
ལེགས་བཤད་ནོར་བུའི་བང་མཛོད།
ལྕང་སྐྱ་རོལ་པའི་རྡོ་རྗེ(༡༧༡༧-༡༨༥༡)འི་འགྲེལ་བ།
ཀ༡ བསྟན་བཅོས་ལ་འཇུག་པའི་སྒོ་མཆོད་པར་བརྗོད་པ།
ཁ༡ འགྱུར་ཕྱག་དང་མཐུན་པའི་མཆོད་བརྗོད།
ཁ༢ ལུས་རྣམ་གཞག་གི་ཚུལ་གྱིས་མཆོད་པར་བརྗོད་པ། ཚ༡
ཀ༢ འཇུག་བྱ་བསྟན་བཅོས་ཀྱི་རང་བཞིན།
ཁ༡ རྟེན་འབྲེལ་གསུང་པ[12]འི་སྒོ་ནས་བསྟོད་པའི་རྒྱུ་མཚན།
ག༡ རྟེན་འབྲེལ་འཁོར་བའི་རྩ་བ་གཅོད་བྱེད་དུ་སྟོན་པ། ཚ༢
ག༢ རྟེན་འབྱུང་ཟབ་མོ་བསྟན་པའི་སྙིང་པོར་བསྟན་པ། ཚ༣
ག༣ རྟེན་འབྲེལ་གསུངས་པའི་སྒོ་ནས་སྟོང་པ་ཉིད་སྟོན་པའི་སྒོ་མཆོག་ཏུ་སྟོན་པ། ཚ༤
ཁ༢ སངས་རྒྱས་ཁོ་ན་གྲོལ་བ་དོན་གཉེར་ལ་མི་བསླུ་བར་སྒྲུབ་པ།
ག༡ བཅོམ་ལྡན་འདས་ཀྱི་ལུང་གི་བསྟན་པ་སྐྱོན་མེད་དུ་སྒྲུབ་པ།
ང༡ སྟོང་པ་ཉིད་སྟོན་པའི་བཀའ་རྣམས་སྐྱོན་མེད་དུ་སྒྲུབ་པ།
ཅ༡ རང་བཞིན་གྱིས་སྟོང་པ་རྟེན་འབྱུང་གི་དོན་དུ་གསུངས་ཚུལ།
ཆ༡ མདོར་བསྟན་པ།
ཇ༡ སྟོང་པ་རྟེན་འབྱུང་གི་དོན་དུ་གསུངས་ཚུལ་དངོས། ཚ༥
ཇ༢ རྟེན་འབྱུང་གི་རྒྱུ་མཚན་གྱིས་རང་བཞིན་གྱིས་གྲུབ་མ་གྲུབ་ཏུ་ལྟ་བ་འཆིང་གྲོལ་གྱི་རྒྱུར་བསྟན་པ། ཚ༦
ཇ༣ རྒྱུ་མཚན་དེས་སྟོན་པ་གཞན་ལས་ཁྱད་ཞུགས་པར་བསྒྲུབ་པ། ཚ༧ ཚ༨
ཆ༢ རྒྱས་པར་བཤད་པ།
ཇ༡ རང་བཞིན་གྱིས་སྟོང་པ་རྟེན་འབྱུང་གི་དོན་དུ་ཤར་བ་བཅོམ་ལྡན་འདས་ཀྱི་རང་ལུགས་མཐར་ཐུག་ཏུ་བསྟན་པ།
ཉ༡ རྟེན་འབྱུང་མ་མཐོང་བ་དང་མཐོང་བ་ཡང་དེའི་དོན་རང་བཞིན་གྱིས་མེད་པར་མ་ཤེས་པ་རྣམས་ཀྱིས་བཅོམ་ལྡན་འདས་ཀྱི་རང་ལུགས་མ་རྟོགས་པར་བསྟན་པ། ཚ༩ ཚ༡༠
ཏ༡ རྟེན་འབྲེལ་གྱི་དོན་ངོས་བཟུང་བ།
ཏ༢ དེ་ཉིད་སྒྲུབ་པའི་གཏན་ཚིགས་གཞན་ཐམས་ཅད་ཀྱི་གནད་གཏན་ཚིགས་འདི་ལ་ཐུག་ཚུལ་དངོས།
ཉ༢ རང་བཞིན་གྱིས་སྟོང་པ་རྟེན་འབྱུང་གི་དོན་དུ་ཤར་བ་བཅོམ་ལྡན་འདས་ཀྱི་རང་ལུགས་མཐར་ཐུག་ཏུ་བསྟན་པ་དངོས།
ཏ༡ ཐུབ་པས་སྟོང་པ་རྟེན་འབྱུང་གི་དོན་དུ་གོ་ན་རང་བཞིན་མེད་པ་ལ་བྱ་བྱེད་འཐད་པར་བཞེད་པ། ཚ༡༡
ཏ༢ དེ་ལྟར་མ་གོ་ན་མཐར་ལྟུང་བར་བཞེད་པ། ཚ༡༢
ཏ༣ དེས་ན་རྟེན་འབྲེལ་དང་སྟོང་པ་མི་འགལ་བ་ཐུབ་པའི་དགོངས་པ་མཐར་ཐུག་ཏུ་བསྟན་པ་དངོས། ཚ༡༣་༡+༢
ཉ༣ རང་བཞིན་གྱིས་སྟོང་པ་རྟེན་འབྱུང་གི་དོན་དུ་ཤར་བའི་ཚད་བསྟན་པ། ཚ༡༣་༣+༤ ཚ༡༤
ཇ༢ བཅོམ་ལྡན་འདས་ཀྱིས་ཆོས་ཐམས་ཅད་རང་བཞིན་གྱིས་སྟོང་པར་གསུངས་ཚུལ།
ཉ༡ ཆོས་ཐམས་ཅད་རང་བཞིན་མེད་པར་གསུངས་ཚུལ་དངོས། ཚ༡༥
ཉ༢ རང་བཞིན་གྱིས་ཡོད་ན་མྱང་འདས་མི་འཐད་པར་གསུངས་ཚུལ། ཚ༡༦
ཉ༣ དེ་ལྟར་གསུངས་པ་ལ་ཆོས་མཐུན་གྱི་རྒོལ་བ་མེད་པར་བསྟན་པ། ཚ༡༧
ཇ༣ རང་བཞིན་གྱིས་མེད་ཀྱང་རྟེན་འབྱུང་གི་བྱ་བྱེད་འཐད་པར་གསུངས་ཚུལ། ཚ༡༨ ཚ༡༩
ཇ༤ རང་བཞིན་གྱིས་སྟོང་པ་ལ་རྒྱུ་འབྲས་ཀྱི་རྣམ་གཞག་འཐད་པར་མ་ཟད་བརྟེན་ནས་འབྱུང་བ་ཉིད་ཀྱིས་མཐར་ལྟ་བ་ལ་མི་བརྟེན་པར་གསུངས་པ་ལ་མཆོག་ཏུ་བསྔགས་པ། ཚ༢༠ ཚ༢༡
ཅ༢ དེ་ལྟར་ཁས་མི་ལེན་པ་ལ་གནོད་བྱེད་བསྟན་པ།
ཆ༡ རྟེན་འབྲེལ་རང་བཞིན་གྱིས་གྲུབ་པར་འདོད་པ་ཤིན་ཏུ་སྨད་པའི་གནས་སུ་བསྟན་པ། ཚ༢༢ ཚ༢༣
ཆ༢ དེ་ལྟར་ཁས་ལེན་པ་རྣམས་རྒྱལ་བ་དགྱེས་པའི་ལམ་ལ་རེ་ཞིག་བཀྲི་ཐབས་མེད་པར་བསྟན་པ། ཚ༢༤ ཚ༢༥
ཆ༣ ཁས་བླངས་ནང་འགལ་གྱི་གནོད་བྱེད་བསྟན་པ་དངོས། ཚ༢༦
ཅ༣ སྟོང་པ་རྟེན་འབྱུང་གི་དོན་དུ་གསུངས་པས་སྒྲོ་སྐུར་གྱི་ལྟ་བ་སྤོང་ཚུལ།
ཆ༡ ཐུབ་པའི་དབང་པོས་རྟེན་འབྱུང་སྒྱུ་མ་ལྟ་བུར་གསུངས་ཚུལ། ཚ༢༧
ཆ༢ རྟེན་འབྱུང་གསུངས་པས་སྒྲོ་སྐུར་གྱི་ལྟ་བ་སྤོང་ཚུལ་ལས་ཐུབ་པའི་བཀའ་ལ་སུས་ཀྱང་གླགས་མི་རྙེད་པར་ངེས་ཚུལ། ཚ༢༨ ཚ༢༩
ང༢ དཔེ་དེས་བཀའ་གཞན་རྣམས་ཀྱང་སྐྱོན་མེད་དུ་སྒྲུབ་པ། ཚ༣༠
ག༢ དེ་ལས་སངས་རྒྱས་ཉིད་གྲོལ་བ་དོན་གཉེར་ལ་མི་བསླུ་བར་སྒྲུབ་པ།
ང༡ ཕྱི་ནང་གི་སྟོན་པའི་ཁྱད་པར་བཤད་པ། ཚ༣༡ ཚ༣༢
ང༢ ཁྱད་པར་དེ་ཤེས་པས་སངས་རྒྱས་ཁོ་ན་ལ་གུས་པར་རིགས་པ། ཚ༣༣ ཚ༣༤
ང༣ རྗེ་བཙུན་བླ་མ་དང་རང་ཉིད་ཀྱང་རྒྱུ་མཚན་མཐོང་ནས་ཐུབ་པ་ལ་གུས་པར་བསྟན་པ། ཚ༣༥ ཚ༣༦
ང༤ བསྟན་པ་དང་སྟོན་པ་ཚད་མར་བསྒྲུབ་པའི་དོན་བསྡུ་བ། ཚ༣༧
ཁ༣ དེ་ལས་རྒྱལ་བའི་བསྟན་པ་ཁོ་ན་ཐར་འདོད་ཀྱི་འཇུག་ངོགས་སུ་བསྟན་པ།
ག༡ ཐུབ་པའི་བཀའ་ཐམས་ཅད་མྱང་འདས་འཐོབ་པའི་ཐབས་སུ་བསྟན་པ། ཚ༣༨
ག༢ དེས་ན་རྒྱལ་བའི་བསྟན་པ་ལ་འཇུག་རིགས་པར་བསྟན་པ། ཚ༣༩
ག༣ རྩོམ་པ་པོ་རང་ཉིད་ཁྱད་ཆོས་གསུམ་ལྡན་གྱི་བསྟན་པ་འདི་འཛིན་པ་ལ་སྤྲོ་བར་བསྟན་པ། ཚ༤༠
ཁ༤ དེ་ལ་བརྟེན་ནས་སངས་རྒྱས་ཀྱི་བཀའ་དྲིན་རྗེས་སུ་དྲན་ཚུལ།
ག༡ རྩོམ་པ་པོས་སངས་རྒྱས་རྗེས་སུ་དྲན་ཚུལ།
ང༡ ཐུབ་པའི་དབང་པོས་སློབ་པ་ལམ་གྱི་གནས་སྐབས་སུ་ཆོས་འདིའི་ཆེད་དུ་དཀའ་བ་སྤྱད་པ་རྗེས་སུ་དྲན་ཚུལ། ཚ༤༡
ང༢ ཆོས་འདི་ཐུབ་པའི་དབང་པོ་ལས་དངོས་སུ་ཐོས་ན་ཅི་མ་རུང་སྙམ་དུ་རྗེས་སུ་དྲན་ཚུལ། ཚ༤༢ ཚ༤༣
ང༣ རྟེན་འབྱུང་ཟབ་མོའི་དོན་གསུངས་ཚུལ་རྗེས་སུ་དྲན་པས་ཐུགས་སྤྲོ་བའི་ཚུལ། ཚ༤༤ ཚ༤༥
ག༢ གདུལ་བྱ་གཞན་ལ་སངས་རྒྱས་རྗེས་སུ་དྲན་ཚུལ་འདོམས་པ།
ང༡ ཟབ་མོ་རྟེན་འབྱུང་གི་དོན་འདི་འཚོལ་བའི་ཚུལ།
ཅ༡ བོད་དུ་གྲགས་པའི་གཞུང་ཐོར་བུ་རྣམས་ལ་ཡིད་མི་རྟོན་པར་འཕགས་ཡུལ་མཁས་པའི་རྗེས་སུ་འབྲང་དགོས་པར་གདམས་པ།
ཆ༡ བོད་སྔ་མའི་བཤད་སྲོལ་ལ་ཡིད་བརྟན་མི་རུང་བར་བསྟན་པ། ༤༦
ཆ༢ འཕགས་ཡུལ་མཁས་པའི་རྗེས་སུ་འབྲང་དགོས་པ། ཚ༤༧
ཅ༢ པཎ་གྲུབ་ཀྱི་བཤད་སྲོལ་ལ་ཡང་མི་མཐུན་པ་མང་དུ་ཡོད་པ། ཚ༤༨
ཅ༣ ཟབ་དོན་འགྲེལ་བ་ལ་ཀླུ་སྒྲུབ་ཡབ་སྲས་ཚད་མར་བསྟན་པ། ཚ༤༩ ཚ༥༠ ཚ༥༡་༡+༢
ཅ༤ ལུགས་འདི་སྟོན་པའི་བཤེས་གཉེན་བསྟེན་དགོས་པར་གདམས་པ། ཚ༥༡་༣+༤
ང༢ རྙེད་ནས་དེ་ལས་སངས་རྒྱས་རྗེས་སུ་དྲན་པར་གྱིས་ཞེས་གདམས་པ་དངོས། ཚ༥༢
ཁ༥ མཇུག་བསྡུ་བ། ཚ༥༣
ཀ༣ བསྟན་བཅོས་མཐར་ཕྱིན་པའི་བྱ་བ།
ཁ༡ བསྟན་བཅོས་འདི་བརྩམས་པའི་དགེ་བ་བསྔོ་བ།
ག༡ འགྲོ་བ་རྣམས་བཤེས་གཉེན་དམ་པས་འཛིན་པའི་རྒྱུར་བསྔོ་བ། ཚ༥༤
ག༢ བསྟན་པ་རིན་པོ་ཆེ་ལ་རྒྱུ་མཚན་ཤེས་ནས་དད་པ་ཐོབ་པས་ས་སྟེང་གང་བར་སྨོན་པ། ཚ༥༥
ག༣ རྗེ་རང་ཉིད་ཀྱིས་སྐྱེ་བ་ཐམས་ཅད་དུ་བསྟན་པ་རིན་པོ་ཆེ་ལུས་སྲོག་བཏང་ནས་ཀྱང་འཛིན་པ་ལ་ལེ་ལོ་འགོག་པའི་རྒྱུར་བསྔོ་བ། ཚ༥༦
ག༤ བསྟན་པ་སྤེལ་བའི་རྒྱུར་བསྔོ་བ། ཚ༥༧
ག༥ བསྟན་པ་འཛིན་ཅིང་སྤེལ་བ་ལ་སྲུང་མ་ཁྱད་པར་ཅན་གྱིས་གྲོགས་བྱེད་པར་སྨོན་པ། ཚ༥༨
ཁ༢ ལེགས་བཤད་འདི་ཕུན་ཚོགས་ལྔ་ལྡན་དུ་བརྩམས་ཚུལ།
སྤེལ་མར་བསྟོད་པ་སྤྲིན་གྱི་སྒྲ་དབྱངས།
ཅོ་ནེ(༡༨༧༠-༡༩༣༢)འི་འགྲེལ་བ།
༡༽ འཇུག་ཅིང་གླེང་བསླང་བ་སྙན་འགྱུར་སྒྲ་དབྱངས་རྒྱ་མཚོའི་གདངས་སུ་བཀུག་པའི་སརྒ་སྟེ་དང་པོ།
༢༽ དངོས་ཀྱི་ཚུལ་ལས་རྟེན་འབྱུང་གསུངས་པ་བསྟོད་པའི་སྒོ་ངོ་མཚར་ཅན་དུ་བསྒྲུབས་པའི་སརྒ་སྟེ་གཉིས་པ། ཚ༡ ནས་ ཚ༨
༣༽ དངོས་ཀྱི་ཚུལ་ལས་སྟོང་པ་རྟེན་འབྱུང་གི་དོན་དུ་བཞེད་ཅིང་གསུངས་པའི་ཚུལ་ལ་བསྟོད་པའི་སརྒ་སྟེ་གསུམ་པ། ཚ༩ ནས་ ཚ༡༧
༤༽ དངོས་ཀྱི་ཚུལ་ལས་སྟོང་པ་རྟེན་འབྱུང་གི་དོན་དུ་མཐོང་བའི་ཡོན་ཏན་བསྟན་པའི་སརྒ་སྟེ་བཞི་པ། ཚ༡༨ ནས་ ཚ༢༡
༥༽ དངོས་ཀྱི་ཚུལ་ལས་སྟོང་པ་རྟེན་འབྱུང་གི་དོན་དུ་མ་མཐོང་བའི་ཉེས་དམིགས་བསྟན་པའི་སརྒ་སྟེ་ལྔ་པ། ཚ༢༢ ནས་ ཚ༢༥
༦༽ དངོས་ཀྱི་ཚུལ་ལས་སྟོང་པ་རྟེན་འབྱུང་གི་དོན་དུ་གསུངས་པས་མཐར་ལྟ་སྤོང་ཞིང་བཀའ་ཐམས་ཅད་ཚད་མར་བསྒྲུབས་པའི་སརྒ་སྟེ་དྲུག་པ། ཚ༢༦ ནས་ ཚ༣༠
༧༽ དངོས་ཀྱི་ཚུལ་ལས་སྟོན་པ་ཉག་གཅིག་གྲོལ་བ་དོན་གཉེར་ལ་མི་བསླུ་བར་བསྒྲུབས་པའི་སརྒ་སྟེ་བདུན་པ། ཚ༣༡ ནས་ ཚ༣༧
༨༽ དངོས་ཀྱི་ཚུལ་ལས་བསྟན་པ་ཁོ་ན་ཐར་འདོད་ཀྱི་འཇུག་ངོགས་སུ་བསྟན་པའི་སརྒ་སྟེ་བརྒྱད་པ། ཚ༣༨ ནས་ ཚ༤༠
༩༽ དངོས་ཀྱི་ཚུལ་ལས་སྟོན་པའི་བཀའ་དྲིན་རྗེས་སུ་དྲན་ཚུལ་གྱི་སརྒ་སྟེ་དགུ་པ། ཚ༤༡ ནས་ ཚ༤༥
༡༠༽ དངོས་ཀྱི་ཚུལ་ལས་སྟོན་པའི་དགོངས་པ་བཙལ་ཏེ་རྙེད་ནས་གུས་པ་སྐྱེས་ཚུལ་གྱི་སརྒ་སྟེ་བཅུ་པ། ཚ༤༦ ནས་ ཚ༥༣
༡༡༽ དངོས་ཀྱི་ཚུལ་ལས་བསྟན་པ་རིན་པོ་ཆེ་རིང་དུ་གནས་པར་བསྔོ་སྨོན་མཛད་ཚུལ་གྱི་སརྒ་སྟེ་བཅུ་གཅིག་པ། ཚ༥༤ ནས་ ཚ༥༨
༡༢༽ མཐར་ཕྱིན་པའི་དགའ་བའི་རླུང་གིས་ཡིད་ཀྱི་སྤྲིན་ཕུང་ཆེས་ཆེར་བསྐྱོད་དེ་ཡི་རངས་པའི་ཚིག་གི་འབྲུག་སྒྲ་ལྡིར་བའི་སརྒ་སྟེ་བཅུ་གཉིས་པའོ། །
[1] ན་མོ་ཞེས་སོགས་ཀྱི་རྒྱ་སྐད་ལ་བཤད་པ་མ་མཛད།
[2] གཞུང་དུ། འཇིག་རྟེན་ཞེས་བྱ་བ་ལ་སོགས་པ་ཚིགས་སུ་བཅད་པ་གསུམ་གསུངས་སོ། །ཞེས་འབྱུང་བ་ནི་ས་བཅད་འདི་ལ་ཚིགས་བཅད་གསུམ་ཡོད་པའི་དོན་མིན་གྱི། འདི་དང་འབྲེལ་བའི་བཤད་པའོ། །དེ་ཉིད་ལས། བཤད་མ་ཐག་པའི་ཚིགས་སུ་བཅད་པ་གསུམ་གྱིས་བསྡུས་པའི་དོན་འདི་ཡིན་ཏེ། ཞེས་སོགས་ཀྱིས་ཀྱང་འགྲུབ་བོ། །
[3] མ་དཔེའི་ནང་དུ་ས་བཅད་འདི་བཀྲམ་པའི་སྐབས་ཆད་ཅིང་། འགྲེལ་བའི་སྐབས་མངོན་ནོ། །
[4] ས་བཅད་འདིའི་དོན་ནི། དེ་རྟོགས་འདོད་ཀྱི་བློ་ཇི་ལྟར་སྐྱེས་ཚུལ། ཞེས་པ་སྟེ། འདིའི་འགྲེལ་བཤད་སྐབས། དེ་རྟོགས་པར་བཞེད་པ་ཇི་ལྟར་འཁྲུངས་པའི་ཚུལ་ཡང་ཡོད་དེ། ཞེས་འབྱུང་བས་སོ། །
[5] བརྟེན་ནས་ཞེས་པ་འདི་ལྷག་མ་མིན་ནམ་སྙམ།
[6] མ་དཔེར་གཉིས་པ་ནི་ཞེས་མི་འབྱུང་མོད། ས་བཅད་གཉིས་པའི་མཚམས་འདི་ནས་འཛིན་དགོས་པ་འདྲ།
[7] མ་དཔེར་གཉིས་པ་ནི་ཞེས་མི་འབྱུང་མོད། ས་བཅད་གཉིས་པའི་མཚམས་འདི་ནས་འཛིན་དགོས་པ་འདྲ།
[8] མ་དཔེར་གསུམ་པ་ནི་ཞེས་མི་འབྱུང་མོད། ས་བཅད་གསུམ་པའི་མཚམས་འདི་ནས་འཛིན་དགོས་པ་འདྲ།
[9] མ་དཔེར་གཉིས་པ་ཞེས་མི་འབྱུང་མོད། རྒྱུ་མཚན་གཉིས་པའི་མཚམས་འདི་ནས་འཛིན་དགོས་པ་འདྲ།
[10] མ་དཔེར་གསུམ་པ་ཞེས་མི་འབྱུང་མོད། རྒྱུ་མཚན་གསུམ་པའི་མཚམས་འདི་ནས་འཛིན་དགོས་པ་འདྲ།
[11] མ་དཔེར་བཞི་པ་ཞེས་མི་འབྱུང་མོད། རྒྱུ་མཚན་བཞི་པའི་མཚམས་འདི་ནས་འཛིན་དགོས་པ་འདྲ།
[12] དུས་གསུམ་གྱི་དབང་དུ་བྱས་ན་གསུངས་ཞེས་ཡང་འཇུག་འབྲི་དགོས་ཤིང་། མིང་མཐའ་འདྲེན་སྟངས་ཀྱི་དབང་དུ་བྱས་ན་གསུང་བ་ཞེས་མིང་གཞི་མོ་བ་ཡིག་འབྲི་དགོས་པས། དཔེ་རྙིང་ལ་དཔྱད་དགོས་སོ། །