ནགས་ཤོད་སྐལ་རྒྱན།
མེས་པོ་དམ་པའི་ཞལ་ལུང་སྐད་ཡིག་གཉིས། །
གངས་ཅན་པ་ཡི་བླ་སྲོག་ཡིན་ནོ་ཞེས། །
ཡང་ཡང་སྨྲ་བའི་སྐད་ཡིག་རིན་ཆེན་བདག། །
རིམ་བྱོན་མེས་པོ་རྣམས་ལ་སྙིང་ནས་འདུད། །
རང་སྐད་ཡི་གེའི་ཚེ་སྲོག་ལ་ཆགས་པ། །
གདོང་དམར་བོད་ཀྱི་བཅུ་ཕྲག་རིག་གནས་ཀྱི། །
སྣ་ཚོགས་རིགས་པའི་གཟུགས་བརྙན་འབུམ་ཤར་བ། །
མེས་པོའི་ཤེས་རབ་གསལ་བའི་མེ་ལོང་འབྲི། །
ཞེས་ཤིས་པ་བརྗོད་པ་དང་བརྩམ་པ་དམ་བཅའ་སྔོན་དུ་བཏང་ནས་གང་གླེང་བར་བྱ་བ་ནི། རང་རེའི་བོད་ཀྱི་ལོ་རྒྱུས་རྣམས་སུ་སྒྲུང་དང་། ལྡེའུ། བོན་གསུམ་གྱིས་བོད་ཀྱི་རྒྱལ་རབས་བསྐྱངས་ཞེས་པ་ལྟར། སྒྲུང་དང་། ལྡེའུ། བོན་གསུམ་ནི་བོད་ཀྱི་ལོ་རྒྱུས་ནང་དུ་གྲགས་ཆེ་ལ། དེ་དག་ལས་ལྡེའུ་འདི་བོད་ཀྱི་གནའ་མིའི་ངག་རྒྱུན་དུ་ཆུ་རྒྱུག་རྒྱུག་བཞིན་ཡོད་པའི་རིག་གནས་ཤིག་སྟེ། ནང་དོན་གབ་ཚིག་སྒོ་ནས་རིགས་པའི་ལམ་ཡངས་པ་དང་། སྙན་འཇེབས་ཚིག་རྒྱན་སྒོ་ནས་གདོད་མའི་སྙན་ངག་གི་ཉམས་ཆེ་བ། མཚོན་སྦྱོར་ཀུན་གྱི་བློ་ངོར་འཇུག་བདེ་བ། གཏན་ཚིགས་འཚོ་བ་དངོས་ལ་འབབ་ཆེ་བ་སོགས་རིག་གཞུང་གི་མ་ལག་གལ་ཆེན་ཞིག་ཡིན། རིགས་པའི་འཕྲུལ་འཁོར་རེ་རེའི་ནང་དུའང་འཚོ་བ་དངོས་ལ་གཞོལ་བའི་གནས་ལུགས་སྦྲང་རྩི་ལྟར་མངར་བ་དང། སྐྱེ་བོ་ཀུན་གྱིས་ཅི་དགར་ལོངས་སྤྱོད་ཐུབ་པ་སོགས། དམངས་ཁྲོད་དུ་ཤུགས་རྐྱེན་ཅི་བས་ཆེ་བ་མེས་པོའི་ཞལ་ལུང་ངམ། གདམས་ངག་འདི་དག་བོར་རླག་ཏུ་སོང་ན་ཤིན་ཏུ་ཕངས་སྙམ་ནས། ནགས་ཤོད་འབྲི་རུའི་དམངས་ཁྲོད་དུ་དར་སྲོལ་ཆེ་བའི་ཡོངས་གྲགས་ཀྱི་ལྡེའུ་རྣམས་བརྗེད་བྱང་དུ་དགོད་རྒྱུ་ཡིན། དེ་ཡང་སྤྱིར་བོད་ཀྱི་རྩེད་མོའི་རིགས་ལ་འཇུག་སྐབས་རང་རང་གི་ཐ་སྙད་བཀོལ་སྤྱོད་སྣ་ཚོགས་ཡོད་པ་སྟེ། སྒོ་སྣུད། སྒྲུང་ཤོད། ཤོ་བག་རྩེེད། གླུ་ཤགས་རྒྱག། །ཤེད་རྡོ་འགྱོགས། ཤེད་གཡུགས། ཐག་པ་འཐེན། རྟ་རྒྱུགས། མདའ་འཕེན། བྲོ་གར་འཁྲབ་ཅེས་སོགས་ཐ་སྙད་བཀོལ་སྟངས་མི་འདྲ་བ་སྣ་ཚོགས་ཡོད་པ་བཞིན། སྐབས་འདིར་ནགས་ཤོད་འབྲི་རུའི་དམངས་ཁྲོད་དུ་ཡོངས་གྲགས་རྒྱུགས་ཆེ་བའི་ཐ་སྙད༼ལྡེའུ་འགྱེད་༽ཅེས་པ་འདི་བཀོལ་སྤྱོད་བྱས་ཡོད།
འདི་ལ་གསུམ། སྔོན་འགྲོ་དང་། དངོས་གཞི། མཇུག་གསུམ་ལས།
དང་པོ་ནི།
ལྡེའུ་འགྱེད་སྐབས་ཀྱི་སྒྲིག་ལམ་སྐོར། ལྡེའུ་འགྱེད་སྐབས་སུ་ཁྲིམས་སྒྲིག་བརྩི་སྲུང་ཇི་ལྟར་བྱེད་དགོས་པ་ནི། འཛམ་གླིང་གི་རྩེད་མོ་སྤྱི་སྲོལ་ལྟར་ལྡེའུ་འགྱེད་མཁན་ཕྱོགས་གཉིས་དགོས་པ་དང་། དེ་ཡང་མི་གཉིས་ནས་ཚོགས་པ་ཕན་ཚུན་བར་འགྱེད་ཆོག་ལ། གནམ་སྡེ་དང་ས་སྡེ་ཞེས་ཐོག་མར་རང་མོས་སྒོ་ནས་སམ་ཡང་ན། མཛུབ་ཤོ་གཡུགས་པ་སོགས་ཀྱི་སྒོ་ནས་སྡེ་པ་སོ་སོར་འབྱེད་དགོས། གནམ་སྡེ་དང་ས་སྡེ་སོ་སོར་ངེས་རྗེས་གནམ་ལ་འཕུར་མཁན་གནམ་སྡེའི་རྒྱུ་དང་། ས་ལ་རྒྱུ་མཁན་ས་སྡེའི་རྒྱུར་ངེས་པ་ཡིན། འདི་གཉིས་ནི་རྒྱལ་ཕམ་ཅི་ཞིག་འབྱུང་མིན་དང་ཐོབ་ཤོར་གང་ཞིག་ཡོང་མིན་གྱི་མ་རྩ་ལྟ་བུ་ཡིན་པས་ཤིན་ཏུ་གལ་ཆེན་ཆགས་ཡོད།
ལྡེའུ་འགྱེད་སྐབས་དང་པོ་གནམ་སྡེས་འགོ་གཙུགས་ནས་ས་སྡེས་ལན་རྒྱག་པ། དེ་རྗེས་ས་སྡེས་འགྱེད་ནས། གནམ་སྡེས་ལན་རྒྱག་པ་སོགས་རེ་མོས་ཀྱིས་ཐ་མའི་རྒྱལ་ཕམ་ལ་གཏུགས་ནས་འགྲོ་བ་ཡིན། ལན་རྒྱག་སྐབས། ལན་དང་པོ་ནོར་ན། ལྡེའུ་འགྱེད་མཁན་གྱིས་མ་ཐིག་ཁ་ལ་གཅིག །ལན་གཉིས་པ་ནོར་ན། མ་ཐིག་ཁ་ལ་གཉིས། ལན་གསུམ་པ་ནོར་ན། མ་ཐིག་ཁ་ལ་གསུམ་ཞེས་གུ་ཡངས་ཐེེངས་གསུམ་གཏོང་སྲོལ་ཡོད་པ་ལྟར། ཁྱོད་ཀྱིས་ལན་ཐེངས་གསུམ་རྒྱག་ཆོག །ལན་གསུམ་ཀ་ཏག་ཏག་མ་ཐིག་ན། སྡེ་རེ་སྤྲོད་དགོས་ལ་སྤྲོད་སྟངས་དང་ཟ་སྟངས་རིམ་པ་མི་འདྲ་བ་ཁ་ཤས་ཡོད། ཁ་གཏད་ཀྱིས་གཞན་སྡེ་ཟ་བའི་སྐབས། རྔམ་རྔམ་རྫིག་རྫིག་ལྟ་བུའི་སྒོ་ནས་༼ཟ་ཟ་འཆའ་འཆའ་གནམ་སྡེའི་གྲལ་ལ་ཡར་བཙུད།༽ཅེས་དང་། ས་སྡེས་ཟ་སྐབས་༼ཟ་ཟ་འཆའ་འཆའ་ས་སྡེའི་གྲལ་ལ་མར་བཙུད་ཅེས་༽བརྗོད་པ་དང་། མཐའ་མ་འོག་སྡེ་ལེབ་འཛབ་༼ཕྱགས་༽ཀྱིས་རྒྱལ་ཕམ་ལ་གཏུགས་སྐབས། ཟ་ཟ་འཆའ་འཆའ་གནམ་སྡེའི་གྲས་ལ་འུར་ལྡིར་རེ་ཡར་འཕུར་ཤོག་ཟེར་བ་དང་། ས་སྡེས་འུར་ལྡིར་རེར་ས་སྡེའི་གྲས་ལ་མར་བོབས་ཤོག་ཅེས་བརྗོད་ནས། དེ་རྗེས་ལན་དངོས་གནས་གང་ཡིན་གསལ་བཤད་ངེས་གཏན་བྱེད་དགོས་པ་ཡིན། གནམ་རྒྱུ་དང་ས་རྒྱུ་ཕན་ཚུན་སྤྲོད་སྐབས་རིགས་མི་འདྲ་བ་དང་། མིང་མི་འདྲ་བ་རྣམས་སོ་སོར་སྤྲོད་དགོས་པ་ལས། ཡང་སྐོར་བསྐྱར་སྐོར་སྤྲོད་ལེན་མི་ཆོག་པ་དང་། སྤྲོད་པའི་རིམ་པའང་དྲིས་ལན་རེ་རེ་ལན་མ་ཐེབས་ཚེ། སྡེ་རེ་རེ་དང་། ལན་གཉིས་རེ་མ་ཐེབས་ཚེ། གཉིས་རེ་སྤྲོད་དགོས་པ་སོགས་སྤྲོད་སྟངས་མི་འདྲ་བ་ཁ་ཤས་ཡོད་དེ། དཔེར་ན། ས་སང་(ཚང་)ལ་མི་ལོ་སྤུན་གསུམ་ཡོད། སྤུན་གསུམ་མ་ཐིག་སྡེ་གསུམ་ཟ། ཞེས་དང་། འབྲི་ཟེའུ་ཆུང་མ་ལ་མཚོ་ལྔ་ཡོད། མཚོ་ལྔ་མ་ཐིག་སྡེ་ལྔ་ཟ། ཞེས་དང་། ཨ་མཚར་མཚར་ལ་མཚར་དགུ་ཡོད། མཚར་དགུ་མ་ཐིག་སྡེ་དགུ་ཟ། ཞེས་དང་། གཉའ་ཀ་ལོའི་ཚིགས་ཆེན་མ་ཐེ་བའི། མགོ་སྟག་མོའི་འཛུམ་ཆེན་བཅོ་བརྒྱད་ཡོད། ཐིག་ན་མཁས་པའི་གྲལ་ལ་འཇོག། །མ་ཐིག་ཤོག་སྡེ་ལེབ་འཛབ་(ཆ་ཚང་བསྡུ་བའི་དོན་)ཡིན། ཞེས་སོགས་དྲི་བའི་ནང་དོན་མ་ཐིག་པའམ། ལན་མ་ཐེབས་ཚེ་འོག་སྡེ་གཅིག་དང་གཉིས་སོགས་སྤྲོད་དགོས་པའི་སྐབས་དང་དེ་བཞིན་ལྷག་མ་ཆ་ཚང་སྤྲོད་དགོས་པའི་སྐབས་སོགས་ཅི་རིགས་ཡོད་པ་ཡིན། སྐབས་འདིར་མཐའ་མའི་རྒྱལ་ཕམ་ལ་ཐུག་ཡོད་པས་ཧ་ཅང་ཉེན་ཁ་ཆེ་བ་དང་། ཕྱོགས་གཉིས་སུའི་རང་སྡེ་དང་པོར་རྫོགས་ན་རང་བཞིན་གྱིས་ཕམ་པར་ཐག་ཆོད་པ་ཡིན་པས་སྒྲིག་ཁྲིམས་འདི་དག་ངེས་པར་དུ་ལག་ལེན་ཡོད་པའི་ཐོག་ནས་ལྡེའུ་འགྱེད་དགོས་པ་ཡིན།
དེ་ཡང་གནམ་སྡེས་དང་པོར་ལྡེའུའི་སྒྲོམ་གཞི་སློང་སྐབས། ལྡེའུ་ཡ་ཆེན་དང་མ་ཆེན་ནས་འགོ་འཛུགས་དང་། དེ་ལ་ས་སྡེས་ལན་རྒྱག་པ་སོགས་རེ་མོས་ཀྱིས་ཐ་མའི་རྒྱལ་ཕམ་ལ་གཏུགས་དགོས་པ་ཡིན་ནོ། །
གཉིས་པ་ནི།
དྲི་བ་དང་ལན་གྱི་སྒོ་ནས་འགྲོ་བ་ནི། ལྡེའུ་ཡ་ཆེན་བཅོ་བརྒྱད་ཅི་རེད། ལྡེའུ་མ་ཆེན་བཅོ་བརྒྱད་ཅི་རེད། ལྡེའུ་ལེའུ་ཅི་རེད། ལྡེའུ་རྟགས་འཕར་མ་ཅི་རེད། ལྡེའུ་པུ་ར་རུག་ཅི་རེད། སྐྱ་རིང་ཅི་རེད། སྐྱ་ཐུང་ཅི་རེད། སྔོ་རིང་ཅི་རེད། སྔོ་ཐུང་ཅི་རེད།
ལྡེའུ་ཡ་ཆེན་བཅོ་བརྒྱད་གནམ་རེད། ལྡེའུ་མ་ཆེན་བཅོ་བརྒྱད་ས་རེད། ལྡེའུ་ལེའུ་ཨབ་རེད། ལྡེའུ་རྟགས་འཕར་མ་སྐར་མ་རེད། ལྡེའུ་པུ་ར་རུག་ལྡེའུ་རེད། སྐྱ་རིང་ལམ་རེད། སྐྱ་ཐུང་ཁབ་རེད། སྔོ་རིང་ཆུ་རེད། སྔོ་ཐུང་གྲི་རེད།
བྱ་ཀ་ཀ་ཀེ་ཀེ་མཆུ་རིང་མ། རྒྱ་མཚོའི་ནང་ནས་ལྕེབ་ཞིག་བླངས། བྲག་དམར་མཐིལ་ལ་མན་(ངལ་)ཞིག་གསོ། སྤང་དཀར་མགུལ་ལ་རྗེས་ཤིག་བཞག །རྗེས་ཤིག་བཞག་ནས་མིང་ཞིག་བཏགས། དེ་ཅི་རེད།
བྱ་མཆུ་རིང་མ་སྨྱུ་གུ་དང་། རྒྱ་མཚོ་སྣག་ཚ་དང་། བྲག་དམར་མཛུ་གུ་དང་། སྤང་དཀར་མགུལ་ཤོག་བུ་དང་། དེར་རྗེས་ཤིག་བཞག་པ་སྟེ། ཡི་གེ་བྲིས་པ་དང་། མིང་བཏགས་པ་སྟེ་དོན་བསྟན་པ་རེད།
ཙན་དན་སྡོང་པོའི་རྩེ་མོ་ལ། གཡུ་འབྲུག་སྔོ་མོས་འགྱིང་འགྲོས་བྱེད། དེ་ཅི་རེད།
སྤོས་མེ་སྤར་བའི་རྩེ་མོར་དུ་བ་གནམ་ལ་ལྡིང་བ་རེད།
ཕྱི་དཀར་དཀར་སྐུ་དཀར་མཛེས་པོ་མ། ནང་དམ་ཆོས་པོ་ཏི་འགྲིག་པོ་མ། དེ་ཅི་རེད།
ཤ་མོང་རེད།
གྲ་བཞི་གྲུ་བཞི་ཤོ་འདྲ། རྔ་མའི་ལྕང་ལོ་གཡུ་འདྲ། དེ་ཅི་རེད།
ཐབ་ལས་མེ་བཏང་བའི་དུད་པ་གནམ་ལ་འགྲོ་བ་རེད།
ས་ནག་གད་པའི་ཁུག་སོ་(ཁུག་ཀྱོག་)ལ། སྦྲུལ་ནག་ཞིག་ཁག་ཉལ་ཁུག་ཉལ་(ཉལ་སྟངས་ཞིག་)བྱས། དེ་མ་དེ་ཡི་སྟེང་ཐོག་ལ། སྙུག་ཚིགས་གསུམ་ལ་ལ་ལྡིང་འདྲ་བ། དེ་མ་དེ་ཡི་སྟེང་ཐོག་ལ། སྲིན་མོ་སྟོང་སྲིན་ལྔ་བརྒྱ་འཚོགས། དེ་མ་དེ་ཡི་སྟེང་ཐོག་ལ། ལུག་གཡང་དཀར་འཁྲབ་ཐོ་འགྱེད་འདྲ་ཡོད། དེ་མ་དེ་ཡི་སྟེང་ཐོག་ལ། བན་ཆོས་པ་མིན་ཀྱང་གསུང་སྐད་འུ་རུ་རུ། དེ་ཅི་རེད།
ས་ནག་གི་གད་ཁུག་ལ་དཀར་ལཱ་དམར་ལཱའི་རྩ་བ་སྦྲུལ་ནག་འཁྱིལ་བ་ལྟར་ཡོད་པ་དང་། དེའི་སྟེང་དུ་སྡོང་བུ་སྙུག་ཚིགས་གསུམ་ལྟར་ཡོད་པ་དང་། དེའི་སྟེང་དུ་རམ་བུ་སྲིན་མོ་སྟོང་སྲིན་ལྔ་བརྒྱ་འཚོགས་འདྲ། དེའི་སྟེང་དུ་ཐོ་དཀར་ལོ་དཀར་ལུག་གཡང་དཀར་འཁྲབ་ཐོ་འགྱེད་འདྲ། དེའི་སྟེང་དུ་སྦང་མ་སྦང་མདུང་(སྦྲང་མ་སྦྲང་མདུང་)བབས་ནས་གླུ་དབྱངས་དར་དིར་སྒྲོག་པ་བན་ཆོས་པ་མིན་ཀྱང་ཆོས་སྒྲ་ལྟར་གསུང་སྐད་འུ་རུ་རུ་ཟེར་བ་རེད།
སྟག་མིན་ཀྱང་སྟག་རིས་ཁྱུག་ཁྱུག །གཟིག་མིན་ཀྱང་ཐིག་ལེ་ཉིག་ཉིག །བ་གླང་མིན་ཀྱང་དབུགས་ངར་ལྷང་ལྷང་། དེ་ཅི་རེད། སྦང་མ་སྦང་མདུང་(སྦྲང་མ་སྦྲང་མདུང་)མདུང་རེད།
གློད་དུས་རི་གང་། མནན་དུས་མཐེབ་གང་། དེ་ཅི་རེད། མིག་རེད།
བུ་སྒུ་རུས་ཕ་རྡུང་། ཕ་རྒས་པོ་དབུགས་ངར་ཤོར། དེ་ཅི་རེད།
རྔ་ལྕགས་ཀྱིས་རྔ་རྡུང་དུས་རྔས་སྒྲ་གྲགས་པ་རེད།
ཀོ་བའི་གཞུ་རྒྱུད་རིང་མོ་ལས། །
དུང་མདའ་དཀར་ཆེན་འཕངས་ན་ཡང། །
ཤིང་འབེན་སྒོར་མོ་གཏོར་མ་ཐུབ། །
མཛུབ་མོའི་མཐེབ་ཤ་ཤུགས་མེད་ཅི་རེད། །
ཤིང་གི་ཟོ་བའི་ནང་དུ་འབྲི་ཡི་འོ་མ་འཇོ་བ་རེད།
རིང་རྒྱུ་ང་ལས་རིང་བ་མེད། ལུག་གཡང་དཀར་སྒལ་པ་ངས་མི་སྙོབ། དེ་ཅི་རེད། ལམ་རེད།
ཐུང་རྒྱུ་ང་ལས་ཐུང་བ་མེད། གནམ་ས་གཉིས་དེ་ངས་སྙོབ། དེ་ཅི་རེད།
རང་ཐག་གི་ལྟེ་བ་རེད།
ཆུང་རྒྱུ་ང་ལས་ཆུང་ས་(བ་)མེད། བཙན་རྒྱུ་ང་ལས་བཙན་ས་(པ་)མེད། དེ་ཅི་རེད།
སྒོ་ལྕགས་རེད།
ཕྲ་རྒྱུ་ང་ལས་ཕྲ་ས་(བ་)མེད། སྔོ་མོ་གྲི་ཡིས་ང་མི་ཆོད། དེ་ཅི་རེད།
སྟོང་སྐུད་རེད།
རྩེ་ལ་རྩེ་རྩེ། ཞབས་ལ་ཞམ་ཞམ། མིང་ལ་བྱམས་པ་ཚེ་རིང་། ཅི་རེད།
ཇེམ་ཙེ་རེད།
ཕ་རིའི་རི་ལས་མི་ལྔ་རྒྱུཌ། ཚུར་རིའི་རི་ལས་མི་ལྔ་རྒྱུཌ། གྲོས་ཁ་མི་འགྲིགས་ཐ་ར་ར། དེ་ཅི་རེད།
ལག་པ་གཉིས་ཀྱིས་ལྷམ་སྒྲོག་བཅིངས་པ་རེད།
བྱིའུ་སྤྲེ་ལ་ཡུག །རྔ་མ་སྐྱ་ལ་ཡུག །ཟ་རྒྱུ་རྡོ་བྱེད། གནས་ཚང་མིས་གཡར། དེ་ཅི་རེད།
འུར་ཐག་(འུར་རྡོ་)རེད།
ལུང་པ་ཕུ་མེད་མདོ་མེད་ལ། །གསེར་གྱི་ཨོ་ཡོ་(ཁྱི་ཕྲུག་)ཆང་ཐེར་ཐེར(ཁྱིའི་སྐད་གདངས་)། །དེ་ཅི་རེད།
ཕྱི་བ་རེད།
དཀར་རིལ་ཡར་འགོས་(འཛེགས་)དུས། །ནག་རིལ་ཐུར་དུ་འགྲིལ། དེ་ཅི་རེད།
ལུག་ལ་ལ་འགོས་(འཛེགས་)དུས་རིལ་མ་མར་གཏོང་བ་རེད།
ནག་རིལ་སྐོར་རྒྱུག་ལིང་ལིང་། །ཡུལ་སྡེ་ཧ་ཤར་(ཧབ་ཆ་)ཚག་ཚག །དེ་ཅི་རེད།
ཡོས་རྔོ་བ་རེད།
ར་ཕོ་སྔོན་པོ་སྒོར་རོ་རོ། རྩིད་པ་དཀར་པོ་ཞམ་ཞམ། དེ་ཅི་རེད།
རང་འཐག་གིས་ཡོས་འཐག་སྐབས་རྩམ་པ་འབབ་བཞིན་པ་རེད།
མེད་རབས་མུག་རབས་སྤྲང་པོའི་ཁ་འདྲ། །ཟོས་རབས་འཐུང་རབས་ཕྱུག་པོའི་བུ་འདྲ། །དེ་ཅི་རེད།
ཤེར་སྙིང་དང་། གདུགས་དཀར་རེད།
མགོ་རྭ་ཅོ་གཉིས་དེ་ས་ལ་བཙུགས། སྡུག་སྡིག་པའི་དབུགས་ངར་གནམ་ལ་ལངས། དེ་ཅི་རེད།
བོད་མདའི་མེ་རུ་གཉིས་ས་ལ་བཙུགས་ནས་མེ་མདའ་རྒྱག་པའི་སྒྲ་གནམ་ལ་གྲགས་པ་རེད།
ཐམས་ཅད་རྣམ་ཅད་(ཚང་མ་)མར་ཉལ་དུས་ནག་རུ་སྤུན་གཉིས་ཡར་ལངས། དེ་ཅི་རེད།
མཚན་མོར་ཐམས་ཅད་མར་ཉལ་བའི་སྐབས་མགོའི་རྭ་ཅོ་གཉིས་གནམ་ལ་ལངས་པ་དེ་རེད།
ཁྱེད་གཉིས་ཕར་སོང་ངེད་གཉིས་དེར་སྡོད། དེ་ཅི་རེད།
རྐང་བཞིའི་སེམས་ཅན་རྣམས་ཀྱི་ལག་སུག་གཉིས་ཕར་སོང་བའི་རྗེས་སུ་རྐང་སུག་གཉིས་དེར་འཇོག་པ་རེད།
ས་སང་གི་མི་ལོ་སྤུན་གསུམ། ཅི་རེད།
རྒྱུགས་རྐྱང་ལ་ཡོད་ཀྱང་འཁྱེར་མི་ལོ། །
ཤུགས་འབྲོང་ལ་ཡོད་ཀྱང་འགེལ་མི་ལོ། །
ཚིལ་དྲེད་ལ་ཡོད་ཀྱང་ཟ་མི་ལོ། །
ས་སང་གི་མི་ལེན་སྤུན་གསུམ། ཅི་རེད།
དམར་སུ་(དགུན་དུས་ཀྱི་ལྕི་བའི་རིགས་ཤིག་)རློན་པས་མེ་མི་ལེན། །
རྔ་མ་ནག་པོས་ཚོས་མི་ལེན། །
དཀར་ཡོལ་དཀར་པོས་དུག་མི་ལེན།
ས་སང་གི་མི་ཕན་སྤུན་གསུམ། ཅི་རེད།
རྡུང་ལ་མི་ཕན་ཤ་ཕོའི་རུ་བཅུ། །
བསུབ་(རྨུག་)ལ་མི་ཕན་གླ་བའི་མཆེ་བ། །
འཕུར་ལ་མི་ཕན་ཁྱིམ་བྱའི་གཤོག་པ། །
ས་སང་གི་སྡང་མོ་སྤུན་གསུམ། ཅི་རེད།
ན་དམར་སྨན་ཕྱེས་ལྷམ་ལ་སྡང་། །
ལྷམ་ཟོན་པ་ཅན་ལ་སྒོས་སྡང་ཡིན། །
དཀར་འཇམ་ཁ་བས་མིག་ལ་སྡང་། །
མིག་ཆ་ག་ཅན་ལ་སྒོས་སྡང་ཡིན། །
སྤེན་ནེ་རི་ཁྲས་གོས་ལ་སྡང་། །
གོས་ཕྲུག་དཀར་ཅན་ལ་སྒོས་སྡང་ཡིན། །
ཨོང་(འཕོངས་)རིལ་མ་ཡིས་སྡོད་མི་ཤེས། སུག་བཞི་མ་ཡིས་འགྲོ་མི་ཤེས། དེ་ཅི་རེད།
སླེ་བོ་རེད།
གྲ་སྒྲིག་གྲོས་རའི་རྣ་གཡོར་(རྣ་བ་ཆེན་པོ་)དེ་ཚོས་པགས་ཐུམ་བསག་འདྲུད་(འཕྲེད་ནས་དྲུད་པ་)ཉིག་ཉིག །དཔའ་བོ་གོང་དཀར་མགུལ་རིང་དེ་ཚོས་ཁོག་སྟོད་སོག་འགྱུར་ལིང་ལིང་། །མགོ་བདེ་གློ་སྐྱ་ཁྲ་རིལ་དེ་ཚོས་ཕར་ལྟ་ཚུར་ལྟ་ཤིག་ཤིག །རྐུ་མ་རྐུ་མཆུ་ནག་རིལ་དེ་ཚོས་རྐུ་རྒྱུགས་འཇབ་གསུམ་ལིང་ལིང་། དེ་ཅི་རེད།
གྲ་སྒྲིག་གྲོས་རའི་རྣ་གཡོར་ཏེ། སྤྱང་ཀིས་གྲ་སྒྲིག་བྱས་ནས་ཟོག་གསོད་སྐབས། དཔའ་བོ་གོང་དཀར་མགུལ་རིང་སྟེ། རྒོད་ཀྱིས་སོག་འགྱུར་ལིང་ལིང་བྱས་ནས་ལྟ་བ་དང་། མགོ་བདེ་གློ་སྐྱ་ཁྲ་རིལ་ཏེ། སྐྱ་ཀ་ཁྲ་མོས་ཕར་ལྟ་ཚུར་ལྟ་ཤིག་ཤིག་བྱེད་པ་དང་། རྐུ་མ་རྐུ་མཆུ་ནག་རིལ་ཏེ། ཕོ་རོག་རྐུ་རྒྱུགས་འཇབ་གསུམ་ལིང་ལིང་བྱེད་པ་རེད།
འབྲི་ཟེའུ་ཆུང་མ་ལ་མཚོ་ལྔ་ཡོད། མཚོ་ལྔ་མ་ཐིག་སྡེ་ལྔ་ཟ། དེ་ཅི་རེད།
མིག་གཉིས་ཆུ་ཡི་མཚོ་དང་གཅིག །
ནུ་བཞི་འོ་མའི་མཚོ་དང་གཉིས། །
བྱང་ཁོག་ཁྲག་གི་མཚོ་དང་གསུམ། །
གྲོད་པུ་བཙོ་ཡི་མཚོ་དང་བཞི། །
མགོ་བོ་ཀླད་པའི་མཚོ་ལྔ་རེད། །
རྟ་འདོ་བ་ཞིག་ལ་འཛུམ་ལྔ་ཡོད། འཛུམ་ལྔ་མ་ཐིག་སྡེ་ལྔ་ཟ། དེ་ཅི་རེད།
ལོང་ཁ་གཡས་གཡོན་རྩྭ་ཆུའི་འཛུམ་གཉིས་དང་། །
སྐེ་འགྱིང་གཡས་གཡོན་ཉི་ཟླའི་འཛུམ་གཉིས་དང་། །
དཔྲལ་བ་བདག་པོའི་འཛུམ་བཅས་འཛུམ་ལྔ་ཡིན། །
ར་ཚེ་ཚེ་ཞིག་ལ་སྨྲ་ལྔ་ཡོད། སྨྲ་ལྔ་མ་ཐིག་སྡེ་ལྔ་ཟ། དེ་ཅི་རེད།
སྨྲ་རེད་(ར་ཡི་སྐད་གདངས་)སྨྲ་ལེའི་སྨྲ་དང་གཅིག །
ཨོག་མ་སྨྲ་ལེ་སྨྲ་དང་གཉིས། །
ར་མ་སྨྲ་ལེའི་སྨྲ་དང་གསུམ། །
ནུ་མ་སྨྲ་ལེའི་སྨྲ་དང་བཞི། །
རིལ་མ་སྨྲ་ལེའི་སྨྲ་ལྔ་ཡིན། །
ལུག་ཨ་ཐོང་ཞིག་ལ་པ་དགུ་ཡོད། པ་དགུ་མ་ཐིག་སྡེ་དགུ་ཟ། དེ་ཅི་རེད།
ཀླད་པ་པ་ལེའི་པ་དང་གཅིག །
སོག་པ་པ་ལེའི་པ་དང་གཉིས། །
མིད་པ་པ་ལེའི་པ་དང་གསུམ། །
རུས་པ་པ་ལེའི་པ་དང་བཞི། །
རྒྱུས་པ་པ་ལེའི་པ་དང་ལྔ། །
པགས་པ་པ་ལེའི་པ་དང་དྲུག །
མཆིན་པ་པ་ལེའི་པ་དང་བདུན། །
མཁྲིས་པ་པ་ལེའི་པ་དང་བརྒྱད། །
དཔུང་པ་པ་ལེའི་པ་དང་དགུ། །
ལུག་མ་མོ་ཞིག་ལ་མ་དགུ་ཡོད། མ་དགུ་མ་ཐིག་སྡེ་དགུ་ཟ། དེ་ཅི་རེད།
ཁྲུས་མ་མ་ལེའི་མ་དང་གཅིག །
རྫི་མ་མ་ལེའི་མ་དང་གཉིས།།
ཨོག་མ་མ་ལེའི་མ་དང་གསུམ། །
མཁལ་མ་མ་ལེའི་མ་དང་བཞི། །
རྒྱུ་མ་མ་ལེའི་མ་དང་ལྔ། །
རྔ་མ་མ་ལེའི་མ་དང་དྲུག། །
ནུ་མ་མ་ལེའི་མ་དང་བདུན། །
འོ་མ་མ་ལེའི་མ་དང་བརྒྱད། །
རིལ་མ་མ་ལེའི་མ་དང་དགུ། །
བྱ་གོ་བོ་ཞིག་ལ་འདྲ་དགུ་ཡོད། འདྲ་དགུ་མ་ཐིག་སྡེ་དགུ་ཟ། དེ་ཅི་རེད།
མགོ་བླ་མ་མིན་ཀྱང་བླ་མས་གསེར་ཞུ་གྱོན་པ་འདྲ། །རྒྱབ་སྔགས་པ་མིན་ཀྱང་སྔགས་པས་དར་ནག་ཆོས་གོས་གྱོན་པ་འདྲ། །མདུན་ལྷ་རྗེ་མིན་ཀྱང་ལྷ་རྗེས་སྨན་ཁུག་བཏགས་པ་འདྲ། །སྐད་རྫི་བོ་མིན་ཀྱང་ཀི་རེད་དང་གཤི་རེད་(ཀི་སྒྲ་དང་ཤུ་སྒྲ་)རྫི་བོ་འདྲ། །བརླ་སྟག་ཤར་མིན་ཀྱང་སྟག་ཤར་ཀྱིས་དར་དཀར་དོ་ལྷུག་(གོས་ཐུང་ལྷུག་ལྷུག་པོ་)གྱོན་པ་འདྲ། །རྐང་སོག་པོ་མིན་ཀྱང་སོག་ལྷམ་གྱོན་ནས་སོག་པོས་ཉམས་འགྲོས་བྱེད་པ་འདྲ། །ངོ་ཌ་རུ་མིན་ཀྱང་གཡས་ལྟ་གཡོན་ལྟ་གཅོད་པའི་ཌ་རུ་དཀྲོལ་བ་འདྲ། །སྐེ་སོ་པ་མིན་ཀྱང་མཐོ་མཐོ་དང་དམའ་དམའ་ལ་མགོའི་སོ་པ་འདྲ། །འགྲོ་དུས་ཚོང་པ་མིན་ཀྱང་སོག་འགྱུར་དང་ཉམས་འགྱུར་ཚོང་པ་འགྲོ་བ་འདྲ། །
འདིའི་འཕྲོས་ལོ་རྗེས་མར་མུས་འགོད་བྱ་རྒྱུ་ཡིན།