དགའ་ཤར་ནགས་ཤོད་དགེ་བཤེས་ལྷ་རམས་པ་བློ་བཟང་ཕུན་ཚོགས།
མི་ཚེའི་བདེ་སྐྱིད་དོན་དུ་གཉེར་མཁན་ཞིག་ལ་མཚོན་ན། ཁྱིམ་ཚང་གི་བདེ་ཐབས་ནི་བདེ་སྐྱིད་ཀྱི་རྨང་གཞི་ལྟ་བུ་ཡིན། ཁྱིམ་ཚང་ནི་རང་གི་མི་ཚེ་འགོ་འཛུགས་སའམ། ཡང་ན་མཇུག་བསྐྱལ་ས་དེ་ཡིན་པ་མ་ཟད། བརྩེ་བ་ཟད་མཐའ་མེད་པའི་དྲོད་ཁོལ་འཁྱིལ་ས་ཞིག་ཀྱང་ཡིན། གནས་འདི་ལ་ཁྱིམ་མི་ཀུན་གྱིས་བྱམས་བརྩེ་དང་། གུ་ཡངས། བཟོད་གསན་སོགས་ཀྱི་ནུས་པ་མཉམ་འདོན་བྱས་ཏེ། དོན་དམ་པའི་འཆམ་མཐུན་བསྐྲུན་དགོས་པ་ཡིན། དེ་ཡང་རིག་པའི་གཞུང་ལུགས་དང་མཐུན་པའི་ཁྱིམ་ཚང་བདེ་ཐབས་ཀྱི་སློབ་སྦྱོང་དང་ཤེས་ཡོན་ཡོད་པ་ཅན་དུ་བཟོ་དགོས། ཆོས་པ་ཚོས་ཀྱང་བྱམས་བརྩེའི་ཉམས་ལེན་ནི། རང་གི་ནང་མི་ལས་འགོ་བཙུགས་ཏེ། འཇིག་རྟེན་ཁམས་ཀྱི་སྲོག་ཆགས་ཡོད་ཚད་ལ་བྱམས་བརྩེའི་བློ་སྐྱེད་ཀྱི་ཡོད།
གཞན་ཡང་རྒྱུན་དུ་མི་རྣམས་ཀྱིས་གྲོགས་པོ་བཟང་པོ་ཞིག་དང་། བཟའ་ཟླ་བཟང་པོ་ཞིག་ལ་རེ་སྨོན་དང་བཙལ་འཚོལ་བྱེད་ཀྱི་ཡོད་ཀྱང་། རང་ཉིད་མི་བཟང་པོ་ཞིག་ཆགས་ཐབས་ལ་དེ་ཙམ་དོ་སྣང་བྱེད་ཀྱི་མེད། རོགས་པ་བཟང་པོ་ཞིག་འཚོལ་རྒྱུ་དེ་གལ་ཆེན་པོ་རེད་དེ། རང་ལ་རོགས་པ་བཟང་པོ་དགོས་པ་བཞིན་གཞན་ལའང་དེ་ལྟར་དགོས་པ་མ་ཟད། རང་གི་ཞི་བདེ་དང་འཆམ་མཐུན་དག་གཙོ་བོ་རང་ལས་འབྱུང་དགོས་པ་ཡིན་པས། གཙོ་བོ་རང་ཉིད་མི་བཟང་པོ་བཟོ་རྒྱུ་དེ་ཆེས་གལ་ཆེ་བ་ལོས་ཡིན།