ནགས་ལྷ་རྩོམ་སྒྲིག་ཁང་གི་འགན་འཛིན། འབྲོང་ངུར་བསྟན་འཛིན་ལམ་བཟང་[འབྲོང་ངུར་ཕོ་ཉ]ནི། སྐྱེ་ཡུལ། ནགས་ཤོད་འབྲི་རུ་རྫོང་ཁུལ་གྱི་ཤག་ཆུ་ཁའི་གྲོང་གསེབ་སྒོ་ཆུ་རུ། ཨ་མ་བསོད་ནམས་དང་། ཨ་ཕ་འབྲུག་རྒྱལ་གཉིས་ལ་མིང་སྲིང་བརྒྱད་སྐྱེས་པའི་ནང་གི་ང་རང་ཆེ་འོག་གསུམ་པ་དེ་ཡིན།
རང་ལོ་བདུན་ཙམ་ནས་ཕ་དམ་པས་ང་ལ་དབྱངས་གསལ་དང་། འབྲུ་དེད། བསྡུད་དེད་བཅས་ཡི་གེའི་འབྲི་ཀློག་གི་རྨང་གཞི་ཡག་པོ་ཞིག་བསླབས། རང་ལོ་བརྒྱད་ཙམ་ནས་ཤག་ཆུའི་སློབ་ཆུང་དུ་ལོ་གསུམ་ལྷག་ཙམ་རིང་ལ་བོད་རྒྱ་ཨང་གསུམ་གྱི་རྨང་གཞིའི་སློབ་སྦྱོང་ཕྲན་བུ་བྱེད་མྱོང་།
ཆུང་ནས་བཟུང་ང་རང་གི་ཕ་དམ་པས་ཡི་གེ་འབྲི་ཀློག་ཙམ་མ་ཚད་དག་ཡིག་ངག་སྒྲོན་དང་། སུམ་རྟགས་འབྲེལ་བ་སི་ཏུའི་ཞལ་ལུང་། ལེགས་བཤད་ལྗོན་དབང་དང་། དཀའ་གནད་གསལ་བའི་མེ་ལོང་། ས་སྐྱ་ལེགས་བཤད། ཆོས་ཀྱི་རྣམ་གྲངས་བཅས་བློར་འཛིན་དུ་བཅུགས་པ་དང་འགྲེལ་བཤད་དང་། སུམ་རྟགས་ལ་དཔེར་བརྗོད་འཇོག་ཏུ་བཅུགས་པ་དང་།
ནག་རྩིས་དང་། གསོ་རིག་སྐྱ་རིང་གསར་པ། ལོ་ཐོ་ལྟ་སྟངས་བཅས་བསླབས་པ། རྒྱལ་རབས་གསལ་བའི་མེ་ལོང་དང་། འགོས་ལོའི་དེབ་སྔོན་དང་། ཚལ་པའི་དེབ་དམར། མདོ་སྨད་ཆོས་འབྱུང་། ལྷོ་རོང་ཆོས་འབྱུང་།
གུ་བཀྲའི་ཆོས་འབྱུང་སོགས་ཡང་ནས་བསྐྱར་དུ་ཀློགས་འཇུག་པ་དང་གོ་བསྡུར་བྱེད་པ་གོ་དཀའ་བའི་ཚིག་དོན་ལ་འགྲེལ་བཤད་གནང་བ། དག་ཡིག་གསར་བསྒྲིགས་དང་། བོད་རྒྱ་ཚིག་མཛོད་ཆེན་མོ་ཇི་ལྟར་ལྟ་སྟངས་བཅས་བསླབས་གནང་བར་བསྟེན་ངའི་མི་ཚེའི་ནང་ལ་བོད་ཀྱི་ལོ་རྒྱུས་དང་། རིག་གནས། ནང་ཆོས། རྩོམ་རིག་བཅས་ལ་དགའ་མོས་ཤ་གསེང་རུས་གསེང་དུ་འཐིམ་ཡོད་པའི་རྒྱུ་མཚན་ཨ་ཕ་ཁོང་གི་དཀའ་དྲིན་ལས་བྱུང་བ་ཡིན་ལ་ཁོང་ནི་ང་རང་གི་ཕ་ཙམ་དུ་མ་ཟད་ངའི་དགེ་རྒན་བཀའ་དྲིན་ཅན་ཞིག་ཀྱང་ཡིན།
རང་ལོ་བཅུ་གསུམ་ཐོག་འབྲོང་ངུར་ཆོས་རྗེ་རིམ་བྱོན་གྱི་གདན་ས་ཤག་ཝ་ཐང་འབྲོང་ངུར་དགོན་དུ་༧སྐྱབས་རྗེ་རི་དབངརིན་པོ་ཆེ་ལས་རབ་ཏུ་བྱུང་། དགོན་དེར་སྒྲིག་ཞུགས་ཀྱིས་ཆོས་སྤྱོད་དང་། བསང་གསོལ། ཀུན་རིག བདེ་མཆོག དཀོན་མཆོག་སྤྱི་འདུས། འབྲོང་ལུགས་ཐུན་མིན་ཞི་ཁྲོ་ཕུར་གསུམ། འཛམ་དཀར་གཡང་སྒྲུབ་སོགས་གསར་རྙིང་གི་རྒྱུད་སྡེ་དེ་དག་བློ་འཛིན་དང་། ཕྱག་ལེན་དང་། གར་འཆམ དབྱངས་རོལ། གཏོར་བཟོ་སོགས་ལ་སྦྱངས་བརྩོན་ཆེན་པོས་རང་རྐྱ་འཕེལ་བ་བྱས།
རང་ལོ་བཅུ་བཞིའི་སྐབས་ཉི་གྲགས་མཁན་ཆེན་དཀོན་མཆོག་རྒྱལ་མཚན་ལས་ཀུན་བཟང་བླ་མའི་ཞལ་ལུང་དང་། བླ་མ་སྐུ་གསུམ་སྔོན་འགྲོ། ཉི་གྲགས་གསང་འདུས་དབང་ཆེན་སོགས་ཞུས་ནས་བླ་མ་སྐུ་གསུམ་སྔོན་འགྲོའི་བསགས་སྦྱོང་ཡང་བྱས།
རང་ལོ་བཅུ་དྲུག་སྐབས་སྐྱབས་རྗེ་རི་དབང་རིན་པོ་ཆེ་ལས། ཡང་ཟབ་སྔོན་འགྲོ་དང་། ཐང་རྒྱལ་ཚེ་སྒྲུབ། འབྲི་གུང་འཕོ་བ་ཆེན་མོ། གཞན་ཡང་ཕྱིས་སུ་རིན་འབྱུང་བརྒྱ་རྩའི་དབང་། བླ་མ་ལྔ་བཅུ་པ་སོགས་ཁྲིད་ཡིག་མང་པོ་ཞུས།
ཨ་ཕ་དམ་པ་འབྲུག་རྒྱལ་གྱི་བསླབ་བྱ་དང་ལམ་སྟོན་གཞིར་བཟུང་༧ གོང་ས་༧ རྒྱལ་བ་ཡིད་བཞིན་ནོར་བུ་མཆོག་གི་ཞབས་བརྟན་དུ་དམིགས་ནས་གྲུབ་ཆེན་ཐང་སྟོང་རྒྱལ་པོའི་ཚེ་སྒྲུབ་འཆི་མེད་དཔལ་གཏེར་གྱི་བསྙེན་མཚམས་སྒྲུབ་ཐེངས་རེ་ལ་ཉིན་ཧྲིལ་པོ་བདུན་རེར་མཚམས་དམ་པོ་བྱས་པ་སྔ་ཕྱིར་ཐེངས་མ་བཅུ་ལྷག་ཙམ་ང་རང་གཅིག་པུར་ས་གནས་འབོག་འཇུ་དང་། ཀ་མཆོག་སྒྲུབ་ཁང་། ཤག་འབྲོང་ངུར་དགོན་བཅས་སུ་སྒྲུབ་པ་བྱེད་ཐུབ་པ་བྱུང་།
རང་ལོ་བཅོ་བརྒྱད་ཐོག་གྲུབ་དབང་ཐེག་མཆོག་རྡོ་རྗེ་ལས་གཅོད་དབང་ནམ་མཁའ་སྒོ་འབྱེད་དང་། ཚོགས་ལས་རིན་ཆེན་ཕྲེང་བ་དང་། གདན་ཐོག་གཅིག་མའི་སྒྲུབ་ཐབས་སོགས་གཅོད་ཀྱི་ཆ་ལག་ཚང་མའི་དབང་ལུང་ཁྲིད་གསུམ་ཞུས་ནས་གཅོད་ཀྱི་ཞག་བརྒྱ་དང་། བསྙེན་ཆེན་གདན་ཐོག་གཅིག་མ། ཁ་བསྐང་སྦྱིན་བསྲེག་དང་བཅས་པ་ལེགས་པར་བསྒྲུབས་ཐུབ་བྱུང་།
རང་ལོ་བཅུ་དགུའི་ཐོག་ཚེ་རབ་གཏན་གྱི་སྐྱབས་གནས་རྩ་བའི་བླ་མ་བཀའ་དྲིན་ཅན། གསུམ་ལྡན་རྡོ་རྗེ་འཛིན་པ། སྤངས་རྟོག་ཡོན་ཏན་རྫོགས་པའི་ནགས་ཤོད་གྲུབ་དབང་ཆོས་བཟང་རིན་པོ་ཆེ་ཡབ་སྲས་ཀྱིས་བརྩེ་བའི་རྗེས་སུ་བཟུང་ནས་འགོམ་དགོན་སར་གྱི་ཡན་ལག་ཀ་མཆོག་ཐར་པ་གླིང་གི་སྒྲུབ་ཁང་དུ་ཚུད་ནས་ལོ་ངོ་གསུམ་ལྷག་ཙམ་རིང་སྒྲུབ་བརྒྱུད་ལམ་གྱི་ཡང་སྙིང་ཕྱག་རྒྱ་ཆེན་པོ་ལྔ་ལྡན་གྱི་ཉམས་ལེན་ལ་བར་ཆད་མེད་པར་ལེགས་པར་གྲུབ།
རང་ལོ་ཉེར་གསུམ་ཐོག་ཤར་ཁུམ་བུ་རྒྱུད་བལ་ཡུལ་རྒྱལ་ས་དང་རིམ་བཞིན་རྒྱ་གར་དུ་འབྱོར་ནས་༧ གངས་ཅན་པ་ཡོངས་ཀྱི་གཙུག་ནོར་༧ གོང་ས་༧ སྐྱབས་མགོན་ཆེན་པོ་ཞལ་མཇལ་བའི་སྐལ་བ་བཟང་པོ་ཐོབ། ཀུན་བཟང་བླ་མའི་ཞལ་ལུང་དང་། རྗེ་བཙུན་མི་ལའི་རྣམ་མགུར། རྒྱལ་སྲས་ལག་ལེན་དང་། བྱང་ཆུབ་ལམ་རིམ། སྤྱོད་འཇུག་ཆེན་མོའི་མཚོན་པས་བློ་སྦྱོང་དང་མན་ངག་རིགས་དང་།
དྲང་ངེས་ལེགས་བཤད་སྙིང་པོ་དང་། དབུ་མ་སྙིང་པོ་དང་། དབུ་མ་འཇུག་པ་སོགས་གཞུང་ཆེན་མང་པོ་དང་།
དཔལ་དུས་ཀྱི་འཁོར་ལོའི་དབང་ཆེན། བཀའ་བརྒྱད་དབང་ཆེན་གྱི་གཙོས་གསང་སྔགས་གསར་རྙིང་གི་དབང་ཆེན་དང་རྗེས་གནང་ཧ་ཅང་མང་པོ་ཐོབ།
ཚིག་གསུམ་གནད་བརྡེགས་དང་། རྫོགས་པ་ཆེན་པོ་སེམས་ཉིད་ངལ་གསོ་སོགས་ཟབ་ཅིང་རྒྱ་ཆེ་བའི་ཆོས་ཀྱི་བདུད་རྩི་དུ་མ་ཐོབ་པ་སྟེ་ཤིན་ཏུ་སྐལ་བ་བཟང་པོ་བྱུང་།
ལྷག་པར་སྔ་ཕྱིར་དམིགས་བསལ་མཇལ་ཁ་མང་པོ་ཐོབ་པ་དང་།འབྲོང་ངུར་ཆོས་རྗེ་གོང་མའི་ཡང་སྤྲུལ་སྐོར་སྙན་ཞུ་འབུལ་ལམ་བཞིན་ངོས་འཛིན་བརྟག་ཡིག་རིན་པོ་ཆེ་བསྩལ་བའི་མཚོན་བཀའ་དྲིན་ཚེ་རབ་ཀུན་ཏུ་དྲིན་ལན་འཇལ་མི་ཐུབ་པ་དུ་མས་བསྐྱངས་པ་མ་ཟད་ཚེ་རབ་ཀུན་ཏུ་རྗེས་འཛིན་དབུག་དབྱུང་བསྩལ་བ་མ་ཟད་གུས་པའི་གསོལ་འདེབས་ཀྱི་རྟེན་དུ་འཕགས་པ་སྤྱན་རས་གཟིགས་ཀྱི་སྐུ་ཞིག་ཀྱང་གནང་།
གཞན་ཡང་སྐྱབས་རྗེ་གྲུབ་དབང་པདྨ་ནོར་བུ་སོགས་དགེ་བའི་བཤེས་གཉེན་ཚད་ལྡན་དུ་མ་ལས་དབང་ལུང་ཁྲིད་གསུམ་ཧ་ཅང་མང་པོ་ཞུ་བའི་སྐལ་བ་བཟང་པོ་ཅན་དུ་གྱུར།
སྔ་ཕྱིར་དཔལ་ལྡན་རྫོང་སར་བཤད་གྲྭ་དང་། སྔ་འགྱུར་གདན་ས་རྣམ་གྲོལ་གླིང་གི་ཡན་ལག་སྔ་འགྱུར་མཐོ་སློབ་ཆེན་མོ་སོགས་ལ་བགྲང་བྱ་བཅུ་གཉིས་རིང་དུ་སུམ་རྟག་དག་གསུམ་སྙན་ངག་དང་། བློ་རིག་དང་། རྟགས་རིག ཐུན་མོང་གི་རིག་གནས་གཞི་རྩར་བཟུང་སྟེ།
རྒྱ་གཞུང་གཞུང་ཆེན་བཅུ་གསུམ་དང་། ཚད་མ་རྣམ་འགྲེལ་དང་། ཚད་མ་རིག་གཏེར། རྒྱུད་ཀྱི་རྒྱལ་པོ་དཔལ་གསང་བ་སྙིང་པོ་སོགས་མདོ་སྔགས་གཞུང་ཆེན་དུ་མ་ལ་སློབ་གཉེར་བྱ་རྒྱུའི་གོ་སྐབས་བཟང་པོ་ཐོབ།
ལྷག་དོན་༧སྐྱབས་རྗེ་གྲུབ་དབང་པད་ནོར་རིན་པོ་ཆེ་ལས་དབང་ལུང་མང་པོ་ཞིག་ཐོབ་པའི་ནང་ནས་གནམ་ཆོས་ཐུགས་ཀྱི་གཏེར་ཁ་སྔོན་འགྲོའི་ཁྲིད་སྦྱོང་ཉམས་ལེན་བཅས་ཡོངས་སུ་རྫོགས་པ་ཞུས་གྲུབ་རྗེས་ཟབ་ལམ་འཕོ་བ་རྟག་ཐོན་སྤྱན་ལམ་འབུལ་རྒྱུ་བྱུང་བ་ཆེས་སྐལ་བ་བཟང་པོ་དེ་ནམ་ཡང་དྲན་ཀློང་ནས་ཡལ་མི་ཐུབ་པ་དེ་ཡིན།
སྔ་འགྱུར་མཐོ་སློབ་ཆེན་མོའི་རྒྱུན་ལས་ཀྱི་བསྐོ་བཞག་གནང་བ་ལྟར་སྔ་འགྱུར་རིག་མཛོད་རྩོམ་སྒྲིག་པ་ལོ་གཅིག་བྱས། གྲོགས་པོ་གསུམ་དང་མཉམ་དུ་གདང་ལ་རི་བོ་ཞེས་པའི་རྩོམ་སྒྲིག་ཚོགས་པ་གསར་འཛུག་དང་། དུས་དེབ་འདོན་སྤེལ། མཁས་པའི་བགྲོ་གླེང་གོ་སྒྲིག་བཅས་བྱས།
འབྲོང་ངུར་ཆོས་རྗེ་རིན་པོ་ཆེའི་གསུང་རྩོམ་དཔེར་ན། བཟང་སྤྱོད་འགྲེལ་ཆེན་དང་། མཚན་བརྗོད་འགྲེལ་ཆེན། ཐེག་ཆེན་ཚུལ་འཇུག་འགྲེལ་ཆེན། བྱ་ཚིག་རྣམ་གཞག་རྒྱ་ཆེར་བཤད་པ་སོགས་ཀྱི་ཞུས་དག་དང་། སྔོན་གླེང་བྲིས་པ་དང་། སློབ་སྟོན་པ། རྩོམ་སྒྲིག་བཅས་པའི་འགན་ཁུར་ཞུས།
འབྲོང་ངུར་ཆོས་མཛོད་ཅེས་པའི་པོད་འཕྲེང་བཞི་ཅན་དཔར་བསྐྲུན་དང་། དཔེ་རྙིང་བསྡུ་སྒྲིག་གི་གཙོ་འགན་ཁུར། གཞན་ཡང་སྔ་འགྱུར་རིག་འཛིན་དུས་དེབ་དང་། ལྷུན་པོའི་མཛེས་རྒྱན་གཉིས་ཀྱི་རྩོམ་སྒྲིག་པ་ཡང་བྱེད་མྱོང་།
སྤྱི་ལོ་2015 ལོ་ནས 2019 དྷ་ས་བོད་ཀྱི་དཔེ་མཛོད་ཁང་དང་། མོན་ཡུལ་བྱམས་བརྩེ་དགའ་ཚལ་སློབ་གྲྭ། གདན་ས་ཆེན་པོ་བཀྲིས་ལྷུན་པོའི་སློབ་གྲྭ། དྭགས་པོ་གྲྭ་ཚང་། ཤུགས་གསེབ་སྔ་འགྱུར་མཐོ་སློབ་བཅས་ལ་དགེ་རྒན་བྱས་ནས། སུམ་རྟགས་དག་གསུམ། སྙན་ངག་མེ་ལོང་མ། ས་སྐྱ་ལེགས་བཤད། སྤྱོད་འཇུག་ཆེན་མོ་སོགས་སློབ་མ་བརྒྱ་ཕྲག་གཉིས་ལས་བརྒལ་བར་ལྷག་བསམ་རྣམ་དག་གིས་སློབ་ཁྲིད་བྱ་རྒྱུའི་གོ་སྐབས་བཟང་པོ་ཐོབ།
རང་ཉིད་ཀྱིས་བརྩམས་པའི་སྙན་ངག་དང་ལོ་རྒྱུས་དེབ་བཅས་བོད་ཀྱི་དཔེ་མཛོད་ཁང་ནས་པར་བསྐྲུན་གནང་། བོད་རིག་པའི་མཁས་དབང་ཇོ་སྲས་བཀྲིས་ཚེ་རིང་དང་། རྒན་ན་ག་སངས་རྒྱས་བསྟན་དར་རྣམ་གཉིས་ལས་ཀྱང་ལོ་རྒྱུས་དང་། རིག་གནས་ཟབ་ཁྲིད་ཞུ་རྒྱུ་བྱུང་བའི་ཧ་ཅང་དགའ་སྤོབས་ཆེན་པོ་བྱུང་།
སྤྱི་ལོ་2014 ལོར་རྒྱལ་བ་ཀརྨ་པ་ཨོ་རྒྱན་འཕྲིན་ལས་ཀྱི་འཁྲུངས་སྐར་གོ་སྒྲིག་པས་གཙོ་སྒྲུབ་གནང་བའི་བོད་གཞིས་བྱེས་གཉིས་ཀྱི་སྨྱུག་ཐོག་པ་བརྒྱ་ལྷག་གི་རྩོམ་ཡིག་ནང་ནས་ཕུལ་བྱུང་ཨང་དང་པོའི་གཟེངས་བསྟོད་དེ་ངའི་རྩོམ་ཡིག་ལ་ཐོབ་མྱོང་།
སྔ་འགྱུར་རིག་མཛོད་རྩོམ་སྒྲིག་ཁང་གིས་རྩོམ་སྒྲིག་པའི་ཕྱག་འཁྱེར་དང་། སྔ་འགྱུར་མཐོ་སློབ་ཆེན་མོ་ནས་ཕར་ཕྱིན་རབས་འབྱམས་དང་། མཐའ་བྲལ་སྨྲ་བའི་དབང་ཕྱུག་ཅེས་པའི་གཟེངས་བསྟོད་ཕྱག་ཁྱེར་བསྩལ། རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེས་འབྲོང་ངུར་བླ་མཆན་གྱི་མཚན་བསྩལ།
2012 ལོའི་ས་རཱ་མཐོ་སློབ་ཀྱི་གངྒའི་བཞད་སྒྲའི་འགྲན་རྩོམ་ཕུལ་བྱུང་ཨང་དང་པོ་ཡང་ཁོ་བོའི་རྩོམ་ཡིག་ལ་ཐོབ་མྱོང་། བོད་ཀྱི་དཔེ་མཛོད་ཁང་གིས་གཟེངས་བསྟོད་ཕྱག་ཁྱེར། གཞན་ཡང་བོད་རིག་པའི་ཟབ་སྦྱོང་ཕྱག་ཁྱེར་སོགས། ཟབ་སྦྱོང་དང་། རྩོམ་ཡིག་འགྲན་བསྡུར་སོགས་ལས་གཟེངས་བསྟོད་ཕྱར་འཁྱེར་མང་པོ་ཐོབ་བྱུང་།
2019 ལོར་ཨོ་གླིང་གཞིས་སྤོས་རྗེས་སུ་དབྱིན་ཡིག་རྨང་གཞི་ནས་སྦྱོང་བཞིན། ཨོ་གླིང་གི་ལོ་རྒྱུས་དང་། རིན་ཐང་། རྩ་ཁྲིམས་སོགས་གཞི་རྩའི་རྒྱུན་ཤེས་དང་། འཕྲོད་རྟེན་ཞབས་ཞུའི་ཆེད་སྦྱོང་དང་དེ་མཐུན་ངོས་འཛིན་དཔང་ཡིག་ལག་ཁྱེར་ཡང་ཐོབ་པ་དང་བསྟུན། འཚོ་བ་དང་ཁོར་ཡུག་གསར་པ་ཞིག་གི་ནང་ནས་ལས་རིགས་འདྲ་མིན་གྱི་ཉམས་མྱོང་ཟབ་མོ་ཐོབ་བྱུང་།
སྣ་མང་མི་རིགས་ཀྱི་དད་མོས་དང་། ལྟ་སྟངས། རིགས་གཞུང་དང་རྒྱབ་ལྗོངས་མི་འདྲ་བའི་ཕྱོགས་མང་པོ་ཞིག་མཐོང་བ་དང་མཉམ་དུ་དེ་དག་ལ་འབྲེལ་འདྲིས་ཀྱིས་སྔར་ལས་ཕྱོགས་མང་པོར་མཐོང་རྒྱ་དང་། སྤྱི་ཚོགས་དང་འཚོ་བའི་ཉམས་མྱོང་ཟབ་མོ་ཐོབ་བྱུང་།
མི་ཚེ་ནི་ནམ་ཡང་གཏན་ཁེལ་མེད་པ་དང་། འཚོ་བ་ནི་ཅི་འདྲའི་འགྱུར་ལྡོག་ཅན་ཞིག་ནའང་། ང་རང་སྔར་བཞིན་བོད་ཀྱི་སྐད་ཡིག་དང་། རྩོམ་རིག་ལ་དགའ་བཞིན་ཡོད།
སྤྱི་ལོ་2025 ཟླ་བ 9 ཚེས 14 ལ་འབྲོང་ངུར་བསྟན་འཛིན་ལམ་བཟང་གིས་བྲིས།
