འགོམ་བསྟན་འཛིན་ལམ་བཟང་ནི་ཁམས་ནགས་ཤོད་འབྲི་རུར་སྐྱེས། ཆུང་དུས་སུ་ཁྱིམ་དུ་ཨ་མྱེ་དམ་པའི་དྲུང་ནས་བོད་ཡིག་ཀ་ཁ་འབྲུ་འདེད་ནས་སྦྱོར་ཀློག་བཅས་ཐོག་མར་སྦྱངས། རིམ་པས་འགོམ་དགོན་གསར་དགོན་དུ་ཆོས་ཞུགས་བྱས།
༢༠༠༧ གྱི་ལོ་མཇུག་ཙམ་ལ་རྒྱ་གར་དུ་འབྱོར་ཞིང་ཤེས་རབ་དགའ་ཚལ་སློབ་གྲྭར་ཟླ་ཤས་རིང་དབྱིན་བོད་ཀྱི་རྨང་གཞི་སློབ་སྦྱོང་བྱས། དེ་རྗེས་རྒྱ་གར་ལྷོ་ཕྱོགས་ཐེག་མཆོག་རྣམ་གྲོལ་གླིང་གི་བཤད་གྲྭར་ཞུགས།
དེར་ལོ་ངོ་དྲུག་གི་རིང་ནང་རིག་པའི་གཞུང་ལུགས་དང་རྒྱལ་རབས་ཆོས་འབྱུང་སོགས་ཐུན་མོང་དང་ཐུན་མིན་གྱི་རིག་གནས་བཅས་ལ་འབད་བརྩོན་དང་ལྷན་དུ། སྔ་འགྱུར་རིག་མཛོད་རྩོམ་སྒྲིག་ཁང་དུ་དུས་དེབ་པདྨའི་རང་མདངས་ཀྱི་རྩོམ་སྒྲིག་པའི་ཁོངས་སུ་ལོ་ངོ་གཅིག་གི་རིང་ལས་ཀ་བྱས། ༢༠༡༣ ནས་རྒྱ་གར་བྱང་ཕྱོགས་སུ་གནས་སྤོས་ཏེ་སློབ་སྦྱོང་གི་ཞོར་དུ་གདང་ལ་རི་བོ་དུས་དེབ་དང་དྲ་རྒྱ་ཐོག་མར་གཉེར་མཁན་གྱི་གྲས་ཡིན་པ་བཞིན། དེ་གའི་རྩོམ་སྒྲིག་པའི་ཚོགས་མི་དང་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་ཁོངས་གཏོགས་ནགས་ཤོད་འབྲི་རུའི་ཡུལ་སྐད་ཚོགས་ཆུང་གི་ཚོགས་མི་བྱེད་མུས་ཡིན། གཞན་ཡང་བོད་ཀྱི་བང་ཆེན་གསར་འགོད་པ་དང་སྔ་འགྱུར་རིག་འཛིན་ཟླ་ཟུང་དུས་དེབ་ཀྱི་རྩོམ་སྒྲིག་ལས་མི་བྱས། ༢༠༡༩ ལོར་འཕགས་ཡུལ་རྫོང་སར་ཆོས་ཀྱི་བློ་གྲོས་བཤད་གྲྭའི་མཐོ་སློབ་ཏུ་ལོ་ཕྱེད་ཙམ་ལ་རྩོམ་རིག་སྐོར་ཆེད་སྦྱོང་དང་། ད་ཆར་སྔ་འགྱུར་རིག་འཛིན་ཟླ་ཟུང་དུས་དེབ་ཀྱི་རྩོམ་སྒྲིག་ཁང་དུ་ལས་ཀ་སྔར་ལྟར་བྱེད་བཞིན་ཡོད་ཐོག ཞོར་དུ་ནགས་ཤོད་འབྲི་རུ་ཀུན་ཕན་གླིང་གི་རྒྱ་གར་འབྲེལ་མཐུད་པ་དང་། དེ་བཞིན་ནགས་ལྷ་རྩོམ་སྒྲིག་པའི་ཚོགས་མིར་གསར་དུ་འོས་འདེམས་གྱིས་ལས་ཀ་འགོ་འཛུགས་མུས་བཅས་སོ།།
