ལམ་བཟང་པོ།
ལོ་ཟླ་ལྷོད་མེད་གཙང་པོའི་རྒྱུན་བཞིན་འགྲོ།།
ཕ་ཡུལ་དྲན་གདུང་དབྱར་གྱི་མཚོ་ལྟར་རྒྱས།།
མི་ཚེ་ཐུང་ཐུང་ས་མཐར་འཛེད་དགོས་པ།།
ཚེ་སྔོན་ལས་ཀྱིས་བྲིས་པའི་ཐོད་ཡིག་འདྲ།།
དྲིན་ཅན་ཨ་མ་འཇིག་རྟེན་བརྗེས་སོང་སྐད།།
ཨ་ཕའི་བདེ་འཚམ་འབྲུ་གཅིག་གོ་སྐལ་མེད།།
སྤུན་ཉེ་དགའ་འདྲིས་རྣམས་ཀྱང་དེ་བཞིན་ཉིད།།
བསོད་ནམས་དབེན་པའི་བུ་རུལ་ལས་དབང་ལགས།།
སྔོན་ཆད་ཁེར་རྐྱང་མིང་གིས་གང་སར་འདུར།།
གཡར་ཁྱིམ་ནང་དུ་གཅིག་པུར་རང་ཡུལ་བསྒོམས།།
ད་ནི་གཅེས་པའི་མ་བུ་གཉིས་པོ་འདི།།
བདག་གི་སེམས་ཀྱི་ཆགས་ས་ཉིད་དུ་གྱུར།།
འདི་ནས་མི་ཚེའི་ལམ་ཕྱོགས་བརྗེས་པ་འདྲ།།
རང་གི་ཕུགས་བསམ་གཅིག་གཅིག་ཉིག་ཉིག་དེ།།
བུ་ཡི་མདུན་ལམ་སྒང་དུ་འཕོས་འདྲ་བྱུང་།།
དེ་ནི་ཕ་མ་ཞེས་པའི་དོན་ཡིན་སྙམ།།
འོན་ཀྱང་རང་ཡུལ་ལོག་ཏུ་བཏུབ་མིན་གང་།།
ལ་དང་ལུང་པ་གྲོང་དང་གྲོང་ཁྱེེར་སོགས།།
ཚེ་སྨད་ས་ཕྱོགས་གང་དུ་གྱར་ཡང་རུང་།།
དྲན་ཤེས་བག་ཡོད་སྙིང་ལ་གཏེར་བཞིན་སྦ།།
རང་ཉིད་ད་བར་ཀུན་ལྟར་འཚོ་བྱེད་པའི།།
ཕ་སྐད་མ་ཡིག་བཀའ་དྲིན་ཡིད་བཅངས་ཏེ།།
ཅི་ཞིག་བྲེལ་ཞིང་གང་ལ་འཚུབས་ན་ཡང་།།
འདི་ཉིད་མི་འདོར་བུ་ལ་འཕྲོད་པར་བྱ།།
རིགས་ལ་ཞེན་པ་ཟེར་ཡང་དེ་རང་ཡིན།།
དྲིན་ལ་དྲིན་ལན་འཇལ་ཚུལ་དེ་རང་ཡིན།།
རང་གི་ངོ་བོ་སྲུང་སྟངས་དེ་རང་ཡིན།།
དེ་ནི་ཞེ་ལ་བསྟིམས་པའི་དམ་བཅའ་ཡིན།།