ཐེད་པོ།
ལར་ནས་བོད་ཀྱི་བརྡ་སྤྲོད་རིག་པའི་ཕྱི་མོར་གྱུར་པ་སུམ་ཅུ་པ་དང་རྟགས་ཀྱི་འཇུག་པ་གཉིས་ནི་སུས་ཤིག་བརྩམས་མིན་དང་དུས་ཚོད་གང་ཞིག་ལ་བརྩམས་མིན་གྱི་ཐད་མཁས་པའི་འདོད་ཚུལ་མི་མཐུན་པ་སྣང་ནའང་། ཡོངས་གྲགས་ལ་དུས་རབས་བདུན་པར་བྱོན་པའི་ཐོན་མི་སམབྷོ་ཊས་བརྩམས་པར་བཞེད་ལ། སྐབས་བབ་ཀྱི་བཤད་པར་བྱ་བའི་གཞི་རྐང་དེའང་སུམ་རྟགས་གཉིས་ཀྱི་ཟླས་ཕྱེ་བའི་རྟགས་འཇུག་གི་ཅི་ཕྱིར་འཇུག་གི་གཞུང་དོན་གྱི་འགྲེལ་ཚུལ་དང་ངོས་འཛིན་སྐོར་བོད་ཀྱི་སྔ་རབས་བརྡ་སྤྲོད་སྨྲ་བའི་མཁས་པའི་འགྲེལ་བ་གྲགས་ཆེ་བ་ཁ་ཤས་ཤིག་གི་འདོད་ཚུལ་ལ་ཅུང་ཟད་བཤད་པར་བྱ་བའི་གཞིའོ།།
བོད་སྔ་རབས་པའི་མཁས་པའི་ཁྲོད་ན་བརྡ་སྤྲོད་རིག་པར་འགྲེལ་བ་མཛད་པོ་གནམ་གྱི་སྐར་ཚོགས་ལྟར་ཇི་སྙེད་ཅིག་བྱུང་ཡོད་ཅིང་དེ་དག་གིས་སུམ་རྟགས་གཉིས་ཀྱི་དངོས་ཤུགས་ཀྱི་བསྟན་དོན་ལ། བརྒྱ་ཁ་གཅིག་ཆོད་དང་ཆུ་བརྒྱ་ཟམ་འདུས་ཀྱི་དཔེ་རུ་མ་སོང་བར་སུམ་རྟགས་ཀྱི་ཚིག་ཟུར་རེ་རེ་ནས་གཡས་འཐེན་གཡོན་འཐེན་གྱིས་འགྲེལ་བཤད་སྣ་མང་ཞིག་བྱས་ཏེ་འདོད་ཚུལ་མ་འདྲ་བ་སྣ་ཚོགས་ཤིག་བྱུང་ཡོད་ལ། རྟགས་ཀྱི་འཇུག་པའི་བརྗོད་བྱའི་གཙོ་བོ་སྔོན་འཇུག་གི་ཅི་ཕྱིར་འཇུག་པའི་གཞུང་གི་བསྟན་དོན་གྱི་ངོས་འཛིན་ཐད་ལའང་རང་ཉིད་ཀྱི་ལུང་རིགས་ཀྱི་རྒྱབ་རྟེན་རེ་རྒྱུ་མཚན་དུ་བྱས་ཏེ་འགྲེལ་བཤད་མ་འདྲ་བ་རེ་བྱས་པར་སྣང་།
༡༽རྩ་ཚིག་གི་འགྲེལ་སྟངས་ལ་འདོད་ཚུལ་མི་མཐུན་པ།
རྟགས་འཇུག་གི་རྩ་བར། ཅིའི་ཕྱིར་འཇུག་པ་བྱེད་ཅེ་ན། །ཕོ་ནི་འདས་དང་གཞན་བསྒྲུབ་ཕྱིར། །མ་ནིང་གཉིས་ཀ་ད་ལྟར་ཆེད། །མོ་ནི་བདག་ད་མ་འོངས་ཕྱིར། །ཤིན་ཏུ་མོ་ནི་མཉམ་པས་སོ།།[1] ཞེས་པའི་རྩ་བའི་ཚིག་འདི་ནི་སྔོན་འཇུག་གི་ཅི་ཕྱིར་འཇུག་པ་བསྟན་པའི་རྩ་བའི་ཚིག་ཡིན་ལ། བདག་གཞན་གྱི་རྣམ་གཞག་དངོས་སུ་བསྟན་པའི་རྩ་གཞུང་ཡང་ཤོ་ལོ་ཀ་འདིས་སྟོན་པར་བྱེད། རྩ་བའི་ཚིག་དེར་མཁས་པ་རྣམས་ཀྱི་འགྲེལ་བཤད་དང་ངོས་འཛིན་མི་འདྲ་ཞིང་། སི་ཏུ་པཎ་ཆེན་མ་ཕེབས་པའི་ཡར་སྔོན་གྱི་བོད་ཀྱི་བརྡ་སྤྲོད་ཀྱི་འགྲེལ་བ་གྲགས་ཆེ་ཤོས་ནི་ཞ་ལུ་ལོ་ཙཱ་བ་ཆོས་སྐྱོང་བཟང་པོས་བརྩམས་པའི་བྱཱཀ་ར་ཎའི་རྟགས་ཀྱི་འཇུག་པ་རྣམ་པར་གསལ་བའི་ལེགས་བཤད་དང་། རྣམ་གླིང་པཎ་ཆེན་དཀོན་མཆོག་ཆོས་གྲགས་ཀྱི་སུམ་རྟགས་ཀྱི་འགྲེལ་བ་ལེགས་བཤད་སྣང་བྱེད་ནོར་བུ། བྲ་ཏི་དགེ་བཤེས་རིན་ཆེན་དོན་གྲུབ་ཀྱི་སུམ་རྟགས་འགྲེལ་བ་ཀུན་བཟང་དགོངས་རྒྱན་སོགས་ཡིན་ཞིང་། དེ་དག་གིས་རྩ་ཚིག་གི་ངོས་འཛིན་ཐད་ལ། མོ་ནི་བདག་ད་མ་འོངས་ཕྱིར། ཞེས་པའི་རྩ་བའི་ཚིག་རྐང་དེར་སི་ཏུ་པཎ་ཆེན་མ་ཕེབས་པའི་ཡར་སྔོན་དུ་འགྲེལ་བ་མང་ཆེ་བས་གཅིག་མཐུན་གྱིས་མོ་ནི་བདག་དང་མ་འོངས་ཕྱིར་ཞེས་ད་ཡི་ཚབ་ཏུ་དང་ཞེས་བྲིས་པ་སྟེ་ཞ་ལུ་ལོ་ཙཱ་བ་ཆོས་སྐྱོང་བཟང་པོས། སྔོན་འཇུག་གི་མོ་འ་ཡིག་ནི་དངོས་པོ་བདག་དང་དུས་མ་འོངས་པ་སྟོན་པའི་ཕྱིར་དུ་འཇུག་[2]ཅེས་དང་། རྣམ་གླིང་པཎ་ཆེན་དཀོན་མཆོག་ཆོས་གྲགས་ཀྱི་སུམ་འགྲེལ་ལེགས་བཤད་སྣང་བྱེད་ནོར་བུར། མོ་ནི་དངོས་པོ་བདག་དང་། དུས་མ་འོངས་པ་སྟོན་པའི་ཕྱིར་འཇུག་པ་གཙོ་ཆེ་ཞིང་དོན་གྱི་བདག་གཞན་གཉིས་ཀ་ལ་འཇུག་པ་ཡོད་ཀྱང་དངོས་བསྟན་ལྟར་བདག་གི་ཁོངས་སུ་བསྡུས་ནས་དཔེར་བརྗོད་ན[3]། ཞེས་དང་། གཞན་ཡང་ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས་ཀྱིས། གསུམ་པ་སྔོན་འཇུག་གི་མོ་འ་ཡིག་དགོས་པ་ཅིའི་ཕྱིར་འཇུག་པ་ནི། དངོས་པོ་བདག་གཞན་གཉིས་ལས་བདག་དང་། དུས་གསུམ་ལས་གཙོ་བོར་མ་འོངས་པ་སྟོན་པའི་ཕྱིར་འཇུག་གོ[4] །ཞེས་གསུངས་པ་དང་། བྲ་ཏི་རིན་ཆེན་དོན་གྲུབ་ཀྱི་བཞེད་པ་ཡང་གཅིག་མཚུངས་སུ་སྣང་བ་སྟེ་ཁོང་གི་རྟགས་འགྲེལ་རྟགས་འཇུག་གི་བཤད་སྦྱར་ཚིགས་བཅད་མ་མདོར་བསྡུས་ལས་མེད་ཀྱང་དབྱངས་ཅན་དགའ་བློས་བརྩམས་པའི་དེ་ཡི་འགྲེལ་བར། གསུམ་པ་སྔོན་འཇུག་གི་མོ་འ་ཡིག་དགོས་པ་ཅིའི་ཕྱིར་འཇུག་པ་ནི། དངོས་པོ་བདག་གཞན་གཉིས་ལས་བདག་དང་། དུས་གསུམ་ལས་གཙོ་བོར་མ་འོངས་པ་སྟོན་པའི་ཕྱིར་འཇུག་གོ [5]།ཞེས་དུས་རབས་བཅོ་བརྒྱད་ཀྱི་དཀྱིལ་ཙམ་བར་བྱུང་བའི་འགྲེལ་བ་སྔ་མ་གྲགས་ཆེ་བ་མང་ཆེ་བས་འདོད་ཚུལ་གཅིག་མཐུན་བྱུང་ཞིང་། དུས་རབས་བཅོ་བརྒྱད་ཀྱི་སྨད་ཀྱི་ཆར་རིག་པའི་གནས་མཐའ་དག་ལ་གཞན་དྲིང་མི་འཇོག་པའི་མཁས་པ་ཆེན་པོ་སི་ཏུ་བསྟན་པའི་ཉིན་བྱེད་བྱོན་པ་དང་། ཁོང་གིས་སྔར་གྱི་འགྲེལ་བ་རྣམས་དང་ཁུངས་བཙུན་གྱི་བཀའ་བསྟན་གྱི་གཞུང་ལུགས་རྣམས་ལ་གཞི་རྟེན་བྱས་ཐོག་དངོས་ཡོད་ཀྱི་སྐད་ཆའི་འགྲོས་རིམ་དང་ལག་ལེན་བཅས་ལ་ཞིབ་འཇུག་དང་དགོངས་ཞིབ་མཐིལ་ཕྱིན་པ་མཛད་དེ་གོང་བཞིན་འགྲེལ་ན་བྱ་ཚིག་གི་རྣམ་གཞག་མང་པོ་ཞིག་མི་འདུ་བར་དགོངས་ནས་འགྲེལ་ཆེན་ལས། སྔོན་འཇུག་གི་མོ་འ་ཡིག་ནི།དངོས་པོ་བདག་དང་། དུས་ད་ལྟ་བ་དང་མ་འོངས་པ་དག་བསྒྲུབ་པའི་ཕྱིར་འཇུག་གོ[6] །ཞེས་རྩ་བའི་ཚིག་མོ་ནི་བདག་དང་མ་འོངས་ཕྱིར་ཞེས་པ། མོ་ནི་བདག་ད་མ་འོངས་ཕྱིར་ཞེས་བཅོས་ནས། སྔོན་འཇུག་གི་མོ་ཡིག་འ་ནི་བདག་གཞན་གཉིས་ལས་བདག་དང་། དུས་གསུམ་ལས་ད་ལྟ་བ་དང་མ་འོངས་པ་གཉིས་བསྒྲུབ་པའི་ཕྱིར་འཇུག་པར་གསུངས་ཤིང་། དེ་ལྟར་མ་གསུངས་ན་བྱེད་མེད་ལས་ཚིག་སྐབས་སུ་སྔོན་འཇུག་འ་ཡིག་དུས་ད་ལྟར་འཇུག་པ་ཇི་སྙེད་ཅིག་ཡོད་པ་མི་འདུ་བས་དེའི་རྣམ་གཞག་སྟོན་པའི་ཆེད་དུ་རྩ་ཚིག་མོ་ནི་བདག་ད་མ་འོངས་ཕྱིར་ཞེས་པ་དེ་ཐོན་མིའི་དགོངས་པ་རྨ་མེད་པ་ཡིན་སྙམ།
༢༽ བདག་གཞན་གྱི་ངོས་འཛིན་གཅིག་མཐུན་མ་བྱུང་བ།
སྔ་རབས་ཀྱི་བོད་ཀྱི་བརྡ་སྤྲོད་གཞུང་ལུགས་འགྲེལ་བ་མཛད་པོ་རྣམས་ཀྱི་ཁྲོད་དུ་སྔོན་འཇུག་གི་ཅི་ཕྱིར་འཇུག་གི་གཞུང་ནས་བསྟན་པའི་བདག་གཞན་གྱི་ངོས་འཛིན་ཐད་འདོད་ཚུལ་དང་ལྟ་ཚུལ་མི་མཐུན་པ་ཇི་སྙེད་ཅིག་བྱུང་ཡོད། དུས་རབས་བཅོ་ལྔའི་དཀྱིལ་ཙམ་ལ་ཕེབས་པའི་བོད་ཀྱི་བརྡ་སྤྲོད་མཁན་པོ་ཞ་ལུ་ལོ་ཙཱ་བའི་རྟགས་འགྲེལ་ནང་། བས་འཕུལ་གཞན་ལ་འཇུག་པ། བདག་ཉིད་མྱ་ངན་ལས་འདས་ནས་སེམས་ཅན་མྱ་ངན་ལས་བཟླ་བར་བྱའོ།།ཞེས་དང་། དས་འཕུལ་བདག་གཞན་གཉིས་ཀ་ལ་འཇུག་པ་ནི། དགེ་བོ། དགའ་བ། དགོས་པ་ལ་སོགས་པ་རང་གཞན་གཉིས་ཀ་ལ་སྤྱིར་རུང་བའི་སྒྲ་རྣམས་ཡིན་ལ། ཞེས་དང་། སྔོན་འཇུག་གི་མོ་འ་ཡིག་ནི་དངོས་པོ་དང་དུས་མ་འོངས་པ་སྟོན་པའི་ཕྱིར་དུ་འཇུག་སྟེ། དཔེར་ན། མགོན་པོ་ཆེན་པོ་བདག་ཆེན་པོ་བདག་འཚལ་ལོ། །ཞེས་དང་། བདག་ཕྱག་འཚལ་དང་བདག་འདུད་དོ། །ཞེས་བདག་གི་སྒྲ་སྦྱར་བ་དང་[7]། ཞེས་སོགས་བདག་གཞན་གྱི་ངོས་འཛིན་ནི་ང་དང་ཁོང་ཞེས་པའི་བདག་གཞན་ལ་ངོས་བཟུང་བ་དང་། བྱ་ཚིག་ཙམ་ལ་ངོས་བཟུང་བ་སོགས་ངོས་འཛིན་དཔྱིས་ཕྱིན་པ་ཞིག་བྱུང་མེད། དེ་བཞིན་རྣམ་གླིང་པཎ་ཆེན་གྱི་ལེགས་བཤད་སྣང་བྱེད་ནོར་བུར། སྔོན་འཇུག་གི་མ་ནིང་གི་ཡི་གེ་ག་ད་གཉིས་ནི། བདག་གམ་བྱེད་པ་པོ་ལ་ཡོད་པའི་ལས་དང་། གཞན་ནམ་བྱ་བ་གཞི་ལ་ཡོད་པའི་ལས་གཉིས་ཀ་དང་ཞེས་དང་། བདག་གཞན་གྱི་དཔེར་བརྗོད་དུ། རང་ཡིད་གཅིག་པུ། གཅུད་ལ་བོར་བ། ཞེས་དང་། གཞན་གྱི་དཔེར་བརྗོད་ལ། གཅན་གཟན། ལ་གཅན་པ[8]། ཞེས་སོགས་བདག་གཞན་གྱི་དཔེར་བརྗོད་ནི་མིང་རྐྱང་སོགས་ཅི་རིགས་པ་བཞག་ནས་ངོས་འཛིན་གསལ་བོ་ཞིག་གཏན་ནས་བྱུང་མེད། དེའི་རྗེས་སུ་བྲ་ཏི་དགེ་བཤེས་རིན་ཆེན་དོན་གྲུབ་ཕེབས་ནས་སྤྱིར་བདག་གཞན་གྱི་དབྱེ་བའམ་རྣམ་གཞག་ནི་བྱ་བའི་ཚིག་གི་ཐོག་ནས་བྱེད་དགོས་པ་ངོས་འཛིན་གསལ་བོ་ཞིག་བྱུང་འདུག་ཀྱང་། བདག་གཞན་གྱི་གོ་དོན་རྨ་མེད་པ་ཅི་ཞིག་ཡིན་པ་དང་བྱ་ཚིག་གང་འདྲ་ཞིག་གི་སྒང་ནས་བདག་གཞན་གྱི་དབྱེ་བ་འཇོག་དགོས་མིན་ངོས་འཛིན་གསལ་བོ་ཞིག་བྱུང་མེད་པར་སྙམ། དེའི་ངོས་འཛིན་མཐིལ་ཕྱིན་པ་འགྲེལ་བ་བྱེད་པོ་ནི་སི་ཏུ་པཎ་ཆེན་མཆོག་ཡིན་ཞིང་། དེ་ཡང་ཁོང་གིས། ལས་གང་ཞིག་བྱེད་པ་པོ་གཞན་དང་དངོས་སུ་འབྲེལ་བའི་དབང་དུ་བྱས་ནས། བྱེད་པ་པོའི་དངོས་པོ་དེ་ཉིད་དང་དེའི་བྱེད་པ་དང་བཅས་པ་ལ་ནི་བདག་ཅེས་བྱ་ཞིང་། དེས་བསྒྲུབ་པར་བྱ་བའི་ཡུལ་གྱི་དངོས་པོ་བྱ་བ་དང་བཅས་པ་ལ་ནི་གཞན་ཞེས་བྱའོ།།[9] ཞེས་བདག་གཞན་ངོས་འཛིན་གསལ་བོ་བྱས་ཤིང་། བདག་གཞན་གྱི་དབྱེ་བ་དེ་ཡང་བྱ་ཚིག་ཐམས་ཅད་ཀྱི་སྟེང་ནས་འཇོག་ཏུ་མེད་པར་ངེས་པར་དུ་བྱེད་པ་པོ་གཞན་དང་དངོས་སུ་འབྲེལ་བའི་བྱ་ཚིག་ལ་གཞི་བྱས་ནས་དབྱེ་དགོས་པར་བཤད་པས། བྱ་ཚིག་ལ་ཡང་ཐ་དད་པ་དང་ཐ་མི་དད་པ་ཞེས་དབྱེ་བ་གཉིས་གསར་དུ་མཛད་ཡོད། འོན་ཀྱང་འགྲེལ་ཆེན་ནང་གཞན་ལ་འཇུག་ན་བྱ་བ་ལ་འཇུག་པར་མ་གོ་ནས་དེ་གཉིས་སུ་དབྱེ་བ་ལྟ་བུར་མཛད་པས་འགོས་པདྨ་རྒྱལ་མཚན་གྱིས་མཛད་པའི་འཛམ་གླིང་རྒྱན་གཅིག་ནང་དུ་སྐྱོན་དུ་གསུངས་པ་དང་། ལས་གང་ཞིག་ལ་བྱེད་པོ་གཞན་དངོས་སུ་ཡོད་ན་བདག་ཡིན་དགོས་པའི་ངེས་པ་མེད་པར་བདག་འགྲོ་ལྟ་བུ་བྱེད་པ་པོ་དངོས་སུ་ཡོད་ཀྱང་བདག་དོན་ཕལ་པ་ལས་བདག་དངོས་མིན་པ་དབྱངས་ཅན་གྲུབ་པའི་རྡོ་རྗེས་གསལ་ཁ་གཏད་པ་སོགས་ནི་བསམ་གཞིགས་བྱ་དགོས་པའི་གནད་དུ་འཁུམས་སོ།།
༣༽མཐའ་བསྡོམས།
དུས་རབས་རིམ་བྱུང་གི་བོད་ཀྱི་བརྡ་སྤྲོད་མཁན་པོ་རྣམས་ཀྱིས་དུས་རབས་བཅོ་བརྒྱད་སི་ཏུ་པཎ་ཆེན་ལ་ཐུག་གི་བར་ཅི་ཕྱིར་འཇུག་གི་གཞུང་དོན་ཟུར་དང་ཕྱོགས་མ་འདྲ་བ་རེ་རེའི་ངོས་ནས་བསྐྱར་འགྲེལ་དང་ཡང་འགྲེལ་ཇི་སྙེད་ཅིག་མཛད་ཡོད་ནའང་། གཞུང་དོན་དཔྱིས་ཕྱིན་པ་ཞིག་དེའི་ཡར་སྔོན་ལ་རྟོགས་མེད་ཚོད་དུ་སྣང་། སི་ཏུའི་འགྲེལ་ཆེན་བརྩམས་པ་ནས་བཟུང་སྤྱིར་བརྡ་སྤྲོད་པའི་གཞུང་ལུགས་དང་ཡང་སྒོས་རྟགས་འཇུག་གི་སྔོན་འཇུག་ཅི་ཕྱིར་འཇུག་གི་གཞུང་དོན་སྤྱི་འགྲོས་ལྟ་བུ་ཞིག་བྱུང་ནས་སྔར་ན་མེད་པའི་མཛད་རྗེས་བཞག་ཡོད། དེ་དོན་དཔྱིས་ཕྱིན་པ་རྟོགས་པར་བརྡ་སྤྲོད་ཀྱི་གཞུང་ག་གེ་མོ་ཞིག་བལྟས་པ་ཙམ་གྱིས་ཤེས་རྒྱུ་ཞིག་མིན་པར། བཀའ་བསྟན་སོགས་གནའ་རབས་ཀྱི་གཞུང་ལུགས་ཀྱི་ཡིག་ཆ་ཁུངས་བཙུན་རྣམས་ལ་བལྟ་ཀློག་དང་ཞིབ་འཇུག་བྱས་ན་ད་གཟོད་དེའི་དོན་ཚུལ་བཞིན་རྟོགས་པར་ཐེ་མི་ཚོམ་པ་ཡིན་པས་གནད་དུ་ཆེ་སྙམ་མོ། །
དཔེ་ཐོ།
སི་ཏུའི་འགྲེལ་ཆེན། སི་ཏུ་བསྟན་པའི་ཉིན་བྱེད། ཤེས་རིག་དཔར་ཁང་།
སི་འགྲེལ་གྱི་འབྲེལ་ཡོད་བརྡ་སྤྲོད་འགྲེལ་པ་པད་དཀར་ཆུན་པོ། ཞ་ལུ་ལོ་ཙཱ་བ་སོགས། སྒྲོལ་མ་གླིང་།
སུམ་རྟགས་ཀྱི་རྩ་འགྲེལ་ལ་དཔྱད་པའི་གཏམ་བརྡ་སྤྲོད་པའི་གྲུབ་མཐའི་གླེང་བརྗོད་ཆེན་མོ་འཛམ་གླིང་རྒྱན་གཅིག འགོས་པདྨ་རྒྱལ་མཚན།
བརྡ་སྤྲོད་རིག་པའི་དཔྱད་རྩོམ་ཕྱོགས་བསྒྲིགས། འཕྲུལ་དེབ།
[1]སུམ་རྟགས་དང་སྙན་ངག་གི་རྩ་བ་ཉེར་མཁོ། ཤོག་གྲངས། ༦ ཞང་ཀང་གྱི་ལིང་དཔེ་སྐྲུན་ཀུང་ཟི།
[2]སི་འགྲེལ་གྱི་འབྲེལ་ཡོད་བརྡ་སྤྲོད་འགྲེལ་པ་པད་དཀར་ཆུན་པོ། ཤོག་གྲངས། ༤༣ ལྷག་པ་ཚེ་རིང་གིས་གཙོ་སྒྲིག་ཞུས། བོད་ཀྱི་བཙུན་མའི་ལས་འཆར་ནས་དཔར་སྐྲུན་ཞུས།
[3]གོང་བཞིན། ཤོག་གྲངས། ༡༤༦ གོང་བཞིན།
[4]གོང་བཞིན། ཤོག་གྲངས། ༢༡༥ གོང་བཞིན།
[5]གོང་བཞིན། ཤོག་གྲངས། ༣༤༦ གོང་བཞིན།
[6]སི་ཏུའི་འགྲེལ་ཆེན། ཤོག་གྲངས། ༡༦༦ བོད་ཀྱི་ཤེས་རིག་དཔར་ཁང་།
[7]སི་འགྲེལ་གྱི་འབྲེལ་ཡོད་བརྡ་སྤྲོད་འགྲེལ་པ་པད་དཀར་ཆུན་པོ། ཤོག་གྲངས། ༣༩ བོད་ཀྱི་བཙུན་མའི་ལས་འཆར་ནས་དཔར་སྐྲུན་ཞུས།
[8]གོང་བཞིན། ཤོག་གྲངས། ༡༤༢ གོང་བཞིན།
[9]སི་ཏུའི་འགྲེལ་ཆེན། ཤོག་གྲངས། ༡༣༨ ཤེས་རིག་དཔར་ཁང་།