ནགས་ཀྱི་ཤིང་ལོ།
དངོས་ཀུན་སྟོང་པར་གཟིགས་པའི་ལྷ་ལམ་ནས།།
རྟེན་འབྱུང་གཏམ་གྱི་སྦྱོར་བའི་ཆར་འབེབས་པས།།
འགྲོ་བའི་ཞིང་སར་ཐར་པའི་ས་བོན་ཆེ།།
སྐྲུན་མཛད་རྣམ་འདྲེན་མཆོག་དེར་གུས་ཕྱག་འཚལ།།
བདེ་བར་གཤེགས་པའི་ཆོས་ཚུལ་རྒྱ་མཚོ་ལས།།
མཐའ་བྲལ་དབུ་མའི་གཏམ་གྱི་ནོར་བུའི་གཏེར།།
དྲི་མེད་རིགས་པའི་སྟོབས་ཀྱིས་ལེན་མཛད་པ།།
ཀླུ་རྒྱལ་སྦྲུལ་གྱི་གདེངས་ཀ་ཅན་དེར་འདུད།།
སྟོན་མཆོག་གསུང་གི་མེ་ཏོག་བཅུད་ཀྱིས་འཚོ།།
ཀླུ་དབང་སྦྲང་མའི་ལྟོ་བ་ལས་འཁྲུངས་པའི།།
རྟེན་འབྱུང་སྦྲང་རྩིའི་མངར་ལ་ཆགས་ལྡན་པ།།
གྲགས་པའི་མཚན་ཅན་ཟླ་བའི་ཞབས་ལ་འདུད།།
སྣང་ལ་མི་བདེན་སྒྱུ་མའི་གྲོང་ཁྱེར་གཟིགས།།
སྟོང་ལ་མི་སླུའི་ལས་འབྲས་ངེས་པ་རྙེད།།
སྣང་སྟོང་འགལ་མེད་ཐ་སྙད་ཚད་གྲུབ་པ།།
གངས་ཅན་མཁས་པའི་གཙུག་རྒྱན་ལ་ཕྱག་འཚལ།།
ཞེས་མཆོད་པར་བརྗོད་པའི་ཚིག་གིས་མདུན་བསུས་ནས་གང་ཞིག་འབྲི་བར་འདོད་པ་ནི་རྩ་ཤེས་ཀྱི་མཆོད་བརྗོད་ལས་གང་གི་རྟེན་ཅིང་འབྲེལ་བར་འབྱུང་། །ཞེས་སོགས་ཀྱི་སྐབས་སུ་གསུངས་པའི་རྟེན་འབྱུང་དང་དབུ་མ་ཚིག་གསལ་དང་རྩ་ཤེའི་ཊིཀ་ཆེན་ལས་ཕྲད་ལྟོས་རྟེན་གསུམ་རྣམ་གྲངས་པ་གསུངས་པ་དེ་དོན་གཅིག་མིང་གི་རྣམ་གྲངས་པ་ཡིན་མིན་གྱི་སྐོར་ཅུང་ཙམ་དཔྱད་པར་འདོད།
དེ་ཡང་ཐོག་མར་དཔྱད་པའི་གཞི་རྣམ་གྲངས་པ་ཞེས་པ་དེ་ལ་ཡང་། དོན་གཅིག་མིང་གི་རྣམ་གྲངས། དཔེར་ན། ཉི་མའི་གཉེན། བུ་རམ་ཤིང་པ། ཟས་གཙང་སྲས། ཞེས་པ་དེ་རྣམས་དོན་གཅིག་ལ། བདག་ཅག་གི་སྟོན་པ་ཤཱཀྱ་ཐུབ་པའི་མིང་གི་རྣམ་གྲངས་ཡིན་པ་ལྟ་བུ་དང་། ཡང་བཤད་པའི་རྣམ་གྲངས་ཞེས་པ། སྤྱིར་དངོས་པོ་དང་ཡོད་པ་གཉིས་དོན་གཅིག་མིན་ཡང་། བཤད་པའི་སྐབས་ལ་ལར་ཡོད་པ་ལ་དངོས་པོའི་སྒྲས་བཤད་པ་ལྟ་བུ་དང་། གཞན་ཡང་གྲངས་སམ་སྡེ་ཚན་གྱི་རྣམ་གྲངས། དབྱེ་བའི་རྣམ་གྲངས་སོགས་མང་མོད་ཀྱང་། འདིར་འབྲི་བར་འདོད་པ་ནི། ཕྲད་ལྟོས་རྟེན་གསུམ་དོན་གཅིག་མིང་གི་རྣམ་གྲངས་ཡིན་མིན་དཔྱད་པར་འདོད་པ་ཡིན། དེ་ལ་དང་པོར་གང་ལ་དཔྱད་པར་བྱ་བའི་གཞུང་འགོད་པ་དང་། དེའི་དོན་ལ་དཔྱོད་པ་གཉིས། དང་པོ་ནི། "གང་གིས་རྟེན་ཅིང་འབྲེལ་བར་འབྱུང་། །"ཞེས་སོགས་དཔལ་མགོན་འཕགས་པ་ཀླུ་སྒྲུབ་ཀྱིས་སྟོན་པ་ཐུབ་པའི་དབང་པོ་ལ་རྟེན་འབྱུང་མཐའ་བྲལ་དུ་གསུང་པའི་སྒོ་ནས་བསྟོད་པའི་རྩ་ཤེས་ཀྱི་མཆོད་བརྗོད་ཀྱི་གཞུང་ཚིག་དང་། རྩ་ཤེའི་ཊིཀ་ཆེན་རིགས་པའི་རྒྱ་མཚོ་ལས། "དེ་ལ་ཕྲད་ལྟོས་རྟེན་གསུམ་རྣམ་གྲངས་པར་གསུངས་པས་རྟེན་པའི་སྒྲ་དོན་ནི་ཤེས་བྱ་ཐམས་ཅད་ལ་ཡོད་ལ་འབྱུང་བ་ལ་གཉིས་ཡོད་པའི་སྐྱེ་བ་ནི་འདུས་བྱས་མིན་པ་ལ་མེད་ཀྱང་དེ་ལ་རྟེན་ནས་འགྲུབ་པ་ཡང་འབྱུང་བའི་དོན་དུ་གསུངས་པ་ཡོད་དེ། བྱེད་པོ་ལས་ལ་བརྟེན་བྱས་ཤིང་། །ལས་ཀྱང་བྱེད་པོ་དེ་ཉིད་ལ། །བརྟེན་ནས་འབྱུང་བ་མ་གཏོགས་པ། །འགྲུབ་པའི་རྒྱུ་ནི་མ་མཐོང་ངོ་། །ཞེས་ལས་ལ་བརྟེན་ནས་བྱེད་པ་པོ་འབྱུང་བར་གསུངས་ཀྱང་ལས་བྱེད་པ་པོའི་སྐྱེད་བྱེད་མིན་པ་དང་། རིགས་པ་དེ་ཆོས་གཞན་ལ་ཡང་སྦྱར་བར་གསུངས་པའི་སྐབས་སུ་ཚད་མ་དང་གཞལ་བྱ་དང་བསྒྲུབ་བྱ་དང་སྒྲུབ་བྱེད་ཕན་ཚུན་ལ་བརྟེན་ནས་འབྱུང་བར་གསུངས་ཀྱང་ཕན་ཚུན་སྐྱེད་བྱེད་དུ་མི་རུང་ངོ། །"ཞེས་པའི་གཞུང་དང་། དབུ་མ་ཚིག་གསལ་ལས། "ཕྲད་ནས་ཞེས་བྱ་བའི་སྒྲ་ཡང་བལྟོས་ནས་ཞེས་བྱ་བའི་སྒྲའི་རྣམ་གྲངས་ཡིན་པའི་ཕྱིར་དང་། རྟེན་ཅིང་འབྲེལ་པར་འབྱུང་བ་ཞེས་བྱ་བའི་སྒྲ་ནི། དེ་དང་དེ་རྟེན་གང་འབྱུང་བ། །རང་གི་དངོས་པོར་དེ་མ་སྐྱེས། །ཞེས་སློབ་དཔོན་ཀླུ་སྒྲུབ་ཀྱིས་ཀྱང་ཕྲད་ནས་ཞེས་བྱ་བའི་དོན་ཉིད་དུ་ཞལ་གྱིས་བཞེས་པའི་ཕྱིར་རོ། །"ཞེས་པའི་གཞུང་འདི་གསུམ་མོ། །
དེ་ཡང་ཚིག་གསལ་གྱི་གཞུང་ཚིག་འདི་ནི་ཊིཀ་ཆེན་ལས། ཕྲད་ལྟོས་རྟེན་གསུམ་རྣམ་གྲངས་པར་གསུངས་པས། ཞེས་པའི་ལུང་ཁུངས་དེ་ཡིན། གཉིས་པ་དེའི་དོན་ལ་དཔྱད་པ་ལ། ཞར་བྱུང་རྟེན་འབྲེལ་ཕྲ་རགས་དང་རྟེན་འབྲེལ་རྟོགས་པའི་གཞན་སྡེ་ཡོད་མེད་ལ་མདོར་ཙམ་དང་། སྐབས་དོན་གཉིས་ལས། དང་པོ་ལ། རྟེན་འབྲེལ་ལ་ཕྲ་རགས་ཀྱི་དབང་དུ་བྱས་ན་གསུམ་ཙམ་དབྱེ་ཆོག །དེ་ཡང་རྒྱུ་རྐྱེན་ལ་ལྟོས་པའི་རྟེན་འབྲེལ་དང་། ཆ་ཤས་ལ་ལྟོས་པའི་རྟེན་འབྲེལ། བདག་གཞི་ལ་ལྟོས་པའི་རྟེན་འབྲེལ་དང་གསུམ་ཡིན་ལ། དེའི་དང་པོ་ནི་རང་སྡེའི་གྲུབ་མཐའ་སྨྲ་བ་བཞི་ཀའི་ཚད་མས་གྲུབ་པ་དང་། གཉིས་པ་ནི་དབུ་མ་ཐལ་རང་གཉིས་ཀའི་ཚད་མས་གྲུབ་པ་དང་། གསུམ་པ་ནི་ཐལ་འགྱུར་བ་ཁོ་ནའི་ཚད་མས་གྲུབ་པ་ཡིན་པས་ཕྲ་རགས་དེ་ལྟར་རོ། །དེ་ཡང་བྱེས་མདོ་གཉིས་དང་སེམས་ཙམ་པས་རྟེན་འབྲེལ་ལ་འདུས་བྱས་ཀྱིས་ཁྱབ་པར་ཞལ་གྱིས་བཞེས་པ་དང་། རང་རྒྱུད་པས་ཆོས་ཐམས་ཅད་ལ་རྟེན་འབྲེལ་གྱིས་ཁྱབ་པར་ཞལ་གྱིས་བཞེས་ཀྱང་རྟོག་པས་ཕར་བཏགས་ཙམ་ཞལ་གྱིས་མི་བཞེས། དབུ་མ་ཐལ་འགྱུར་བས་ཆོས་ཐམས་ཅད་རྟེན་འབྲེལ་དང་དེ་ཡང་རྟོག་པས་ཕར་བཏགས་ཙམ་གྱི་རྟེན་འབྲེལ་དུ་ཞལ་གྱིས་བཞེས་པ་ཡིན་ནོ། །
འོ་ན་གཞན་སྡེ་ཕྱི་རོལ་པས་རྟེན་འབྲེལ་རྟོགས་པ་ཡོད་མེད་གང་ཡིན་ཞེས་ན། སྟོང་ཐུན་སྐལ་བཟང་མིག་འབྱེད་ལས། "རྟེན་འབྲེལ་གྱི་གཏན་ཚིགས་འདི་ཉིད་ཀྱི་ཡང་ཕྱོགས་ཆོས་ནི་དངོས་པོ་རྣམས་རྒྱུ་མེད་དུ་སྐྱེ་བར་འདོད་པ་མ་གཏོགས་གཞན་རྣམས་ཀྱི་ངོར་གྲུབ་ཟིན་པས་སྒྲུབ་མི་དགོས་ལ།" ཞེས་གསུངས་པས་རྒྱུ་མེད་སྨྲ་བ་རྒྱང་འཕེན་ལས་གཞན་གྲངས་ཅན་པ་ལ་སོགས་པའི་ཕྱི་རོལ་པས་རྟེན་འབྲེལ་རྟོགས་པ་ཡོད་ཅེས་པ་ནི་ཤིན་ཏུ་མི་འཐད་དེ། མགོན་པོ་ཀླུ་སྒྲུབ་དང་དཔལ་ལྡན་ཟླ་བ་གྲགས་པ་རྗེ་རིན་པོ་ཆེ་བློ་བཟང་གྲགས་པ་སོགས་ཀྱིས་གཞན་སྡེས་རྟེན་འབྲེལ་རྟོགས་པ་ཕར་ཞོག །རྟེན་འབྲེལ་ཁས་ལེན་པ་དང་སྨྲ་བ་སོགས་ཀྱང་མེད་པར་གསུངས་པའི་ཕྱིར། དེ་ཡང་རིགས་པ་དྲུག་ཅུ་པ་ལས། "གང་དག་གིས་ནི་མ་བརྟེན་པར། །བདག་གམ་འཇིག་རྟེན་མངོན་ཞེན་པ། །དེ་དག་ཀྱེ་མ་རྟག་མི་རྟག །ལ་སོགས་ལྟ་བས་འཕྲོགས་པ་ཡིན། །"ཞེས་དང་། ཡང་དེ་ཉིད་ལས། "གལ་ཏེ་ཡོད་པར་སྨྲ་བ་རྣམས། །དངོས་མཆོག་བཟུང་ནས་གནས་པ་ནི། །ལམ་དེ་ཉིད་ལ་གནས་པ་སྟེ། །དེ་ལ་ཡ་མཚན་ཆུང་ངུའང་མེད། །"ཅེས་གསུངས་པ་དང་། རིགས་པ་དྲུག་ཅུ་པའི་ཟླ་འགྲེལ་ལས། "མུ་སྟེགས་ཅན་རྟེན་ཅིང་འབྲེལ་བར་འབྱུང་བ་མི་སྨྲ་བ་རྣམས་ཀྱི་དངོས་པོ་རྣམས་ལ་ངོ་བོ་ཉིད་ཡོད་པར་མངོན་པར་ཞེན་པ་གང་ཡིན་པ་དེ་ནི་རང་གི་གྲུབ་པའི་མཐའ་ལས་བྱུང་བ་དང་མི་འགལ་བས།" ཞེས་དང་། ཡང་ཟླ་འགྲེལ་ལས། "ཡང་ན་འདི་ནི་དོན་གཞན་ཏེ། གྲངས་ཅན་ལ་སོགས་པ་གང་དག་མ་བརྟེན་པར་བདག་རྟག་པ་དང་། ངོ་བོ་ཉིད་ཀྱིས་གྲུབ་པ་དང་། རྟེན་ཅིང་འབྲེལ་བར་འབྱུང་བ་མ་ཡིན་པ་དང་། འཇིག་རྟེན་ཡང་རང་བཞིན་གྱི་བདག་ཉིད་དང་། རང་བཞིན་ཡང་འགྱུར་བ་མེད་པའི་ཕྱིར་ངོ་བོ་ཉིད་ཀྱིས་གྲུབ་པར་ཞེན་ལ་འགྱུར་བའི་ཚོགས་ནི་ལྡོག་པར་འདོད་དོ། །"ཞེས་གསུངས་པ་དང་། དྲང་ངེས་ལེགས་བཤད་སྙིང་པོ་ལས། "གང་ཟག་དང་ཆོས་བརྟེན་ནས་འབྱུང་བའི་རྟེན་འབྲེལ་མི་འདོད་པར་དེ་གཉིས་བདེན་པར་འདོད་པའི་གཞན་སྡེ་ནི་རྟག་ཆད་ཀྱི་ལྟ་བའི་གཡང་དུ་ལྷུང་ལ།" ཞེས་དང་། ཡང་དེ་ཉིད་ལས། "དངོས་པོ་རྣམས་རྟག་པར་སྨྲ་བའི་ཕྱི་རོལ་བ་རྟེན་འབྲེལ་ཁས་མི་ལེན་པས་ཆོས་བདེན་པར་གྲུབ་པ་འདོད་པ་ནི་རང་གི་སྟོན་པའི་ལུགས་མིན་པས་མཚར་བའི་གནས་མིན་ལ།" ཞེས་གསུངས་པ་དང་། དེ་བཞིན་རྟེན་འབྲེལ་གྱི་རྟགས་ཀྱིས་བདེན་མེད་སྒྲུབ་པའི་ཚེ། རྟགས་དེ་རང་སྡེ་དངོས་སྨྲ་བས་འགལ་རྟགས་སུ་འདོད་པ་དང་། ཕྱི་རོལ་པ་ལ་མ་གྲུབ་པའི་གཏན་ཚིགས་སུ་འགྱུར་ཏེ། རྟེན་འབྲེལ་བསྟོད་པ་ལས། "རྟེན་ཅིང་འབྲེལ་བ་འབྱུང་བའི་ཚུལ། །འགལ་བ་དང་ནི་མ་གྲུབ་པ། མཐོང་བ་འདི་ཡིས་ཁྱོད་ཀྱི་ལུགས། །ཇི་ལྟར་ཁོང་དུ་ཆོད་པར་ནུས། །"ཞེས་གསུངས་པའི་ཕྱིར། གཞན་སྡེས་རྟེན་འབྲེལ་རྟོགས་མི་ནུས་པ་དང་ཁས་ལེན་མི་ནུས་པ་མ་ཟད་སྨྲ་བ་ཡང་མི་ནུས་ཏེ། བདག་ཅག་གི་སྟོན་པའི་སྐུ་གསུང་ཐུགས་ཀྱི་ཡོན་ཏན་གཞན་རྣམས་ཀྱི་སྒོ་ནས་བསྟོད་པ་མཐའ་ཡས་པ་ཡོད་ཀྱང་། གང་དག་སུ་ཞིག་གིས་སྟོན་པས་རྟེན་འབྱུང་གསུངས་པའི་སྒོ་ནས་བསྟོད་པ་ལས་ལྷག་པའི་ངོ་མཚར་བ་མེད་པའི་ཕྱིར། དེ་ལྟར་རྟེན་འབྲེལ་བསྟོད་པ་ལས། "དེ་ལྟར་ལགས་ན་མགོན་ཁྱོད་ལ། །བསྟོད་པའི་སྒོར་ནི་སུ་ཞིག་གིས། །བརྟེན་ནས་འབྱུང་བ་གསུངས་པ་ལས། །ངོ་མཚར་གྱུར་པ་ཅི་ཞིག་རྙེད། །"ཅེས་གསུངས་པའི་ཕྱིར། འོ་ན་སྟོང་ཐུན་སྐལ་བཟང་མིག་འབྱེད་ལས་དེ་ལྟར་གསུངས་པ་དེ་ཇི་ལྟར་འགྲེལ་ཞེས་ན། ཆད་པར་སྨྲ་བ་ལས་གཞན་གྲངས་ཅན་པ་ལ་སོགས་པ་སྐྱེ་བ་སྔ་ཕྱི་དང་རྒྱུ་འབྲས་ཀྱི་རྣམ་བཞག་ཁས་ལེན་པ་ཙམ་ལ་གསུངས་པ་ཡིན་པས་སྐྱོན་མེད་ཅེས་ལན་འདེབས་པར་འདོད། གཉིས་པ་སྐབས་དོན་ཕྲད་ལྟོས་རྟེན་གསུམ་རྣམ་གྲངས་ཡིན་མིན་བཤད་པ་ལ། ཕྱོགས་སྔ་མའམ་ཆོས་རའི་ནང་གི་དོགས་དཔྱོད་འགོད་པ་དང་། མཁས་པ་གཞན་གྱི་གསུང་ཚུལ། རང་གི་འདོད་པ་བརྗོད་པ། རྩོད་པ་སྤོང་བ་དང་བཞི་ལས། དང་པོ་ནི། ཆོས་རའི་ནང་གི་རྩོད་ཟླ་བ་ཁ་ཅིག་གིས། ཕྲད་ལྟོས་རྟེན་གསུམ་རྣམ་གྲངས་པ་གསུངས་པ་ནི་བཤད་པའི་རྣམ་གྲངས་ཙམ་ཡིན་པ་ལས་དོན་གཅིག་མིང་གི་རྣམ་གྲངས་མ་ཡིན་ཞེས་འདོད། རྒྱུ་མཚན་ཅི་རེད་ཟེར་དུས། ཆོས་དེ་གཞི་དེ་ལ་ལྟོས་པ་དང་རྟེན་པ་གང་རུང་ཡིན་ན། ཆོས་དེ་གཞི་དེ་ལ་ཕྲད་པས་མ་ཁྱབ། དཔེར་ན། ཚུར་རི་ཕར་རི་ལ་ལྟོས་པ་དང་རྟེན་པ་ཡིན་ཡང་ཚུར་རི་ཕར་རི་དང་མ་ཕྲད། མྱུ་གུ་རང་གི་བརྒྱུད་རྒྱུ་ལ་ལྟོས་པ་དང་རྟེན་པ་ཡིན་ཡང་དེ་དང་མ་ཕྲད། གཞན་ཡང་ཕན་ཚུན་འབྲེལ་མེད་དོན་གཞན་གྱི་མི་གཉིས་ཕྲད་པ་ཡོད་པ་གང་ཞིག་དེ་ལྟར་ཕྲད་པའི་ཚེ་ཕན་ཚུན་ལྟོས་པ་དང་རྟེན་པ་གང་ཡང་མ་ཡིན་ཞེས་ཟེར། དེའི་བསམ་ཚུལ་ནི་ཕྲད་ལྟོས་རྟེན་གསུམ་རྣམ་གྲངས་པའམ་དོན་གཅིག་ཅེས་པ། ཆོས་དེ་གཞི་དེ་ལ་ལྟོས་པ་དང་རྟེན་པ་ཡིན་ན་གཞི་དེ་དང་ཕྲད་པ་ཡིན་དགོས་པ་དང་། ཆོས་དེ་གཞི་དེ་དང་ཕྲད་ན་དེ་ལ་ལྟོས་པ་དང་རྟེན་པར་དགོས་པ་ཞིག་འདོད་ཀྱི་འདུག་མོད། ཕྲད་ལྟོས་རྟེན་གསུམ་རྣམ་གྲངས་པ་ཡིན་པའི་དོན་དེ་ལྟར་མ་ཡིན་པར་འོག་ཏུ་རང་གི་འདོད་པ་བརྗོད་པའི་སྐབས་སུ་གསལ་ཡོང་། གཉིས་པ་མཁས་པ་གཞན་གྱི་བཤད་ཚུལ་དང་གསུང་ཚུལ་ནི། ལ་ལ་དག་འདི་ལྟར། "འདིར་ཕྲད་ལྟོས་རྟེན་གསུམ་རྣམ་གྲངས་པར་གསུངས་པ་དོན་ གཅིག་མིང་གི་རྣམ་གྲངས་ལ་བྱས་ནས་འབྲེལ་ཚུལ་ཞིག་ཡོད་ཀྱང་། རང་རང་གི་གདགས་གཞི་ལ་བརྟེན་ནས་བཏགས་པ་ཙམ་དུ་གྲུབ་པའི་རྟེན་འབྲེལ་དང་། རང་རང་གི་ཆ་ཤས་ལ་བརྟེན་ནས་གྲུབ་པའི་རྟེན་འབྲེལ་འཇོག་པའི་སྐབས་སུ་རང་གི་ཆ་ཤས་དང་རང་གི་གདགས་གཞི་དེ་ལ་ཕྲད་ལྟོས་རྟེན་གསུམ་དོན་གཅིག་མིང་གི་རྣམ་གྲངས་ཡིན་པ་ལུང་དེའི་དོན་ཡིན་གྱི། གཞི་གང་ལ་སྦྱར་ཡང་དེ་གསུམ་མིང་གི་རྣམ་གྲངས་ཙམ་དུ་བཞེད་པ་སུ་ཡང་མེད་པས།"ཞེས་བཤད། འདི་དག་གི་བསམ་ཚུལ་ནི་ཕྲད་ལྟོས་རྟེན་གསུམ་རྣམ་གྲངས་པ་གསུངས་པ་ནི། དེ་གསུམ་དོན་གཅིག་མིང་གི་རྣམ་གྲངས་སུ་འགྲེལ་ཚུལ་ཞིག་ཡོད་ཀྱང་སྤྱིར་དེ་རྣམས་དོན་གཅིག་མ་ཡིན་པར་འདོད་པར་འདུག །དོན་གཅིག་འགྲེལ་ཚུལ་ནི་ཆོས་རྣམས་རང་རང་གི་གདགས་གཞི་ལ་བརྟེན་པའི་རྟེན་འབྲེལ་དང་རང་རང་གི་ཆ་ཤས་ལ་ལྟོས་པའི་རྟེན་འབྲེལ་འཇོག་པའི་སྐབས་སུ། རང་རང་གི་གདགས་གཞི་དང་ཆ་ཤས་དེ་ལ་ཕྲད་ལྟོས་རྟེན་གསུམ་དོན་གཅིག་ཡིན་ཞེས་འདོད་པར་འདུག་པས། དེ་དག་ཀྱང་སྔ་མ་ཆོས་རའི་ནང་གི་རྩོད་ཟླ་བ་རྣམས་ཀྱི་བསམ་པ་དང་མཐུན་པར་སྙམ། གཞན་ཡང་མཁས་པའི་གསུང་ཚུལ་ལ། གྲུབ་མཐའ་ལྷུན་པོའི་མཛེས་རྒྱན་ལས། "སྤྱིར་འཕྲད་ལྟོས་རྟེན་གསུམ་རྣམ་གྲངས་པར་ཡང་གསུངས་མོད་ཀྱང་གོ་བ་ཆགས་སླ་བའི་ཕྱིར་ཕྲལ་ནས་བརྗོད་ན།" ཞེས་པ་དང་། དེ་ནས། "འཕྲད་པ་ཞེས་བྱ་བས་ནི་གཏན་ཚིགས་ཀྱི་དོན་དངོས་པོ་རང་གི་རྒྱུས་བསྐྱེད་པའི་རྟེན་འབྲེལ་འཛིན་པ་ཡིན་ལ།" ཞེས་སོགས་དང་། ཡང་དེ་ཉིད་ལས། "ལྟོས་པ་ཞེས་བྱ་བས་ནི་འདུས་བྱས་དང་འདུས་མ་བྱས་ཀྱི་ཆོས་རྣམས་རང་རང་གི་ཆ་ཤས་ལ་ལྟོས་ནས་རང་གི་བདག་ཉིད་རྙེད་པའི་གཏན་ཚིགས་བསྟན་པ་སྟེ།" ཞེས་སོགས་དང་། ཡང་དེ་ཉིད་ལས། "བརྟེན་པ་ཞེས་བྱ་བས་ནི་ཆོས་ཐམས་ཅད་བརྟེན་ནས་བཏགས་པའི་གཏན་ཚིགས་ཀྱི་དོན་བསྟན་པ་སྟེ།" ཞེས་སོགས་གསུངས་པས། ལྕང་སྐྱ་རིན་པོ་ཆེའི་བཞེད་པ་ནི། ཕྲད་ལྟོས་རྟེན་གསུམ་གྱི་རྣམ་བཞག་གོ་སླ་བའི་དབང་དུ་བྱས་ན། ཕྲད་པ་ནི། རྒྱུ་དང་རྐྱེན་ལ་བརྟེན་ནས་འབྱུང་བའི་རྒྱུ་འབྲས་ཀྱི་རྟེན་འབྲེལ་དང་། དེ་ཡང་རྒྱུ་འབྲས་ཀྱི་རྟེན་འབྲེལ་ལ་ཕྲད་པ་ཞེས་གསུངས་པ་ནི་རྒྱུ་འབྲས་གཉིས་ཀྱི་སྐྱེ་འགག་གི་བྱ་བ་གཉིས་ཕྲད་པ་ཡིན་གྱི་རྒྱུ་འབྲས་གཉིས་ཕྲད་པ་མིན་ཞེས་གསུངས། ལྟོས་པ་ནི། རང་རང་གི་ཆ་ཤས་ལ་བརྟེན་ནས་འབྱུང་པའི་རྟེན་འབྲེལ་དང་། རྟེན་པ་ནི། རང་རང་གི་གདགས་གཞི་ལ་བརྟེན་ནས་འབྱུང་བའི་ཕར་བཏགས་ཙམ་གྱི་རྟེན་འབྲེལ་ལ་གསུང་འདུག་པས། རྟེན་འབྲེལ་ཕྲ་རགས་གསུམ་ལ་སོ་སོར་སྦྱར་ནས་གསུངས། ཡང་དེ་ཉིད་ལས། "འཕྲད་ལྟོས་རྟེན་གསུམ་རྣམ་གྲངས་པར་བྱས་པའི་སྒོ་ནས་ཀྱང་གཏན་ཚིགས་ཕྱི་མ་ཁོ་ནར་འཆད་ཚུལ་གཞན་དག་གིས་མ་ཐོན་པ་ཞིག་ཡོད་དེ་འདིར་མི་སྤྲོའོ། །"ཞེས་ཀྱང་གསུངས་འདུག་པས་ཕྲད་ལྟོས་རྟེན་གསུམ་དོན་གཅིག་མིང་གི་རྣམ་གྲངས་ཡིན་པ་དེ། དབུ་མ་ཐལ་འགྱུར་བའི་ལུགས་ཀྱི་ཐུན་མོང་མ་ཡིན་པ་གདགས་གཞི་ལ་ཕར་བཏགས་ཙམ་གྱི་རྟེན་འབྱུང་གི་གཏན་ཚིགས་ཁོ་ན་ལ་སྦྱར་དགོས་པ་ལྟ་བུ་ཞིག་གསུངས་འདུག་པས། སྤྱིར་ཕྲད་ལྟོས་རྟེན་གསུམ་རྣམ་གྲངས་པར་ཞལ་གྱིས་བཞེས་པ་འདྲའོ། ། གསུམ་པ་རང་གི་འདོད་པ་བརྗོད་པ་ལ། དམ་བཅའ་འགོད་པ་དང་དེའི་སྒྲུབ་བྱེད་བསྟན་པ་གཉིས་ལས། དང་པོ་དམ་བཅའ་འགོད་པ་ནི། སྤྱིར་ཕྲད་ལྟོས་རྟེན་གསུམ་དོན་གཅིག་མིང་གི་རྣམ་གྲངས་ཡིན་པ་མ་ཟད། རྟེན་འབྲེལ་ལ་ཕྲ་རགས་གསུམ་དུ་ཕྱེ་བའི་ཕྲ་རགས་སོ་སོ་ལ་ཡང་སོ་སོའི་ཕྲད་ལྟོས་རྟེན་གསུམ་དོན་གཅིག་མིང་གི་རྣམ་གྲངས་ཡིན་པས་ཆོས་ཐམས་ཅད་ཀྱི་སྟེང་དུ་དེ་གསུམ་དོན་གཅིག་ཏུ་ཡོད་པ་ཡིན་ནོ། །གཉིས་པ་སྒྲུབ་བྱེད་འགོད་པ་ནི། འདུས་བྱས་དང་འདུས་མ་བྱས་ཀྱི་ཆོས་གང་དང་གང་ཡིན་པ་དེ་དང་དེ་ནི། ཕྲད་ནས་གྲུབ་པའམ་འབྱུང་བ་དང་། ལྟོས་ནས་གྲུབ་པའམ་འབྱུང་བ། རྟེན་ནས་གྲུབ་པའམ་འབྱུང་བ་གསུམ་ཀ་ཡིན་དགོས་པའི་ཕྱིར། ཁྱབ་པ་ཡོད་དེ། ཕྲད་ལྟོས་རྟེན་གསུམ་རྣམ་གྲངས་པའམ་དོན་གཅིག་ཞེས་པ་ཕྲད་ནས་གྲུབ་པ་དང་ལྟོས་ནས་གྲུབ་པ་རྟེན་ནས་འབྱུང་བ་གསུམ་ལ་ཡིན་པའི་ཕྱིར། དེ་ལྟར་ཡང་དབུ་མ་ཚིག་གསལ་ལས། "ཕྲད་པའི་དོན་ནི་ཕྲད་ནས་འབྱུང་བ་ནི་རྟེན་ཅིང་འབྲེལ་པར་འབྱུང་བའོ་ཞེས་དོན་གྱི་ཁྱད་པར་ཞལ་གྱིས་མ་བཞེས་པའི་རྟེན་ཅིང་འབྲེལ་བར་འབྱུང་བའི་སྒྲ་ལ་ཡང་ཡོད་པ་ཡིན་ལ། དོན་གྱི་ཁྱད་པར་ཞལ་གྱིས་བཞེས་པ་ལ་ཡང་ཡོད་པ་ཡིན་ཏེ། མིག་དང་གཟུགས་ལ་བརྟེན་ནས་མིག་དང་གཟུགས་ཕྲད་ཅིང་མིག་དང་གཟུགས་ལ་བལྟོས་ནས་ཞེས་བཤད་པའི་ཕྱིར་རོ། །"ཞེས་གསུངས་པའི་ཕྱིར། ཚིག་གསལ་གྱི་ལུང་འདིས་མིག་དང་གཟུགས་ཕྲད་ནས་མིག་གི་རྣམ་ཤེས་འབྱུང་བ་དང་། མིག་དང་གཟུགས་ལ་ལྟོས་ནས་མིག་གི་རྣམ་ཤེས་འབྱུང་བ། མིག་དང་གཟུགས་ལ་རྟེན་ནས་མིག་གི་རྣམ་ཤེས་འབྱུང་བ་བསྟན་པས། མིག་གི་རྣམ་ཤེས་དེ་ཕྲད་ནས་གྲུབ་པ་དང་ལྟོས་ནས་གྲུབ་པ་རྟེན་ནས་གྲུབ་པའི་རྟེན་འབྲེལ་དུ་གསུངས། རིགས་པ་དེ་ཆོས་རང་རང་གི་ཆ་ཤས་དང་གདགས་གཞི་ལ་སྦྱར་ནས་རྟེན་འབྲེལ་ཕྲ་རགས་སོ་སོ་ལ་རང་རང་གི་ཕྲད་ལྟོས་རྟེན་གསུམ་དོན་གཅིག་མིང་གི་རྣམ་གྲངས་ཡིན་པ་འདི་ལྟར། རགས་པ་རྒྱུ་རྐྱེན་གྱི་རྟེན་འབྲེལ་གྱི་ཕྲད་ལྟོས་རྟེན་གསུམ་རྣམ་གྲངས་པ་སྦྱོར་ཚུལ་ནི། དངོས་པོ་རྣམས་རང་རང་གི་རྒྱུ་དང་རྐྱེན་དུ་མ་ཕྲད་ནས་འབྱུང་བ། རང་རང་གི་རྒྱུ་དང་རྐྱེན་དུ་མ་ལ་ལྟོས་ནས་འབྱུང་བ། རང་རང་གི་རྒྱུ་དང་རྐྱེན་དུ་མ་ལ་རྟེན་ནས་འབྱུང་བའོ། །ཅུང་ཟད་ཕྲ་བ་ཆ་ཤས་ཀྱི་རྟེན་འབྲེལ་ལ་སྦྱོར་ཚུལ་ནི། ཆོས་རྣམས་རང་རང་གི་ཆ་ཤས་དུ་མ་ཕྲད་ནས་གྲུབ་པ། རང་རང་གི་ཆ་ཤས་དུ་མ་ལ་ལྟོས་ནས་གྲུབ་པ། རང་རང་གི་ཆ་ཤས་དུ་མ་ལ་རྟེན་ནས་གྲུབ་པའོ། །ཕྲ་མོ་གདགས་གཞི་ལ་ཕར་བཏགས་ཙམ་རྟེན་འབྲེལ་ལ་སྦྱོར་ཚུལ་ནི། ཆོས་ཐམས་ཅད་རང་རང་གི་གདགས་གཞི་དུ་མ་ཕྲད་ནས་གྲུབ་པ། རང་རང་གི་གདགས་གཞི་དུ་མ་ལ་ལྟོས་ནས་གྲུབ་པ། རང་རང་གི་གདགས་གཞི་དུ་མ་ལ་རྟེན་ནས་གྲུབ་པའོ། ། གཞི་པ་རྩོད་པ་སྤོང་བ་ནི། ཁ་ཅིག་ཕྲད་ལྟོས་རྟེན་གསུམ་དོན་གཅིག་མིང་གི་རྣམ་གྲངས་སུ་མི་འཐད་དེ། ཕྲད་པ་དེ་རྒྱུ་རྐྱེན་གྱི་དངོས་པོ་ལ་མ་གཏོགས་ཆོས་ཐམས་ཅད་ལ་སྦྱར་དུ་མེད་དེ། རྩ་ཤེའི་ཊིཀ་ཆེན་ལས། "དེ་ལ་ཕྲད་ལྟོས་རྟེན་གསུམ་རྣམ་གྲངས་པར་གསུངས་པས་རྟེན་པའི་སྒྲ་དོན་ཤེས་བྱ་ཐམས་ཅད་ལ་ཡོད་ལ་"ཞེས་གསུངས་པའི་ཕྱིར་ཟེར་ན་ཁྱབ་པ་མ་བྱུང་སྟེ། དེའི་དོན་ནི་ཕྲད་ལྟོས་རྟེན་གསུམ་ལས་རྟེན་ནས་འབྱུང་བ་གཅིག་པུ་ཤེས་བྱ་ཐམས་ཅད་ལ་ཡོད་ལ་ཕྲད་ནས་གྲུབ་པ་དང་ལྟོས་ནས་གྲུབ་པ་གཉིས་དངོས་པོ་མ་གཏོགས་ཤེས་བྱ་གཞན་ལ་མེད་པའི་དོན་མ་ཡིན་པར། ཕྲད་ནས་གྲུབ་པ་དང་ལྟོས་ནས་གྲུབ་པ་རྟེན་ནས་གྲུབ་པ་གསུམ་ཆོས་ཐམས་ཅད་ལ་ཡོད་ལ། འོན་ཀྱང་ཕྲད་ནས་འབྱུང་བ་དང་། ལྟོས་ནས་འབྱུང་བ། རྟེན་ནས་འབྱུང་བ་ཞེས་པའི་སྐབས་ཀྱི་འབྱུང་བ་དེ་སྐྱེ་བ་ལ་འབྱུང་བ་ཞེས་པ་དང་དེ་ལ་བརྟེན་ནས་འགྲུབ་པ་ལ་འབྱུང་བ་ཞེས་པ་གཉིས་ཡོད་པས། སྐྱེ་བའི་འབྱུང་བ་ལ་བྱས་ན་དངོས་པོ་མ་གཏོགས་གཞན་ལ་མེད་པའི་དོན་ཡིན་ཏེ། ལུང་དེའི་འཕྲོ་དེ་ཉིད་ལས། "འབྱུང་བ་ལ་གཉིས་ཡོད་པའི་སྐྱེ་བ་ནི་འདུས་བྱས་མིན་པ་ལ་མེད་ཀྱང་དེ་ལ་བརྟེན་ནས་འགྲུབ་པ་ཡང་འབྱུང་བའི་དོན་དུ་གསུངས་པ་ཡོད་དེ།" ཞེས་གསུངས་པའི་ཕྱིར།
རང་གི་རྟོག་ངོར་ཤར་བའི་རི་མོ་ལས།།
གཞན་ལ་ཕན་པའི་གསོས་སུ་འགྱུར་བ་མེད།།
བརྗོད་བྱ་གཞུང་གི་དོན་ལས་ཕྱིར་ཕྱོགས་ན།།
ཉེས་ཚོགས་ཅི་མཆིས་མཁས་རྣམས་བཟོད་པར་གསོལ།།
༢༠༢༥/༡/༡༠ ཉིན་བྲིས།