སྤྱིའི་ཨང་། ༡༦

ཁྲིད་གཞུང་། དྲང་ངེས་ལེགས་བཤད་སྙིང་པོ་དབུ་མ་སྤྱི་བཤད་དང་རང་རྒྱུད་པའི་སྐོར་ཆ་ཚང་།

འཁྲིད་མཁན། དགེ་བཤེས་ངག་དབང་ཐོགས་མེད།

འགྲེམ་སྤེལ་སྒྲིག་སྦྱོར། ནགས་ལྷ་རྩོམ་སྒྲིག་ཁང་།

༢༠༢༢ ལོར་སྒྲིག་སྦྱོར་བྱས།

ངོ་སྤྲོད་མདོར་བསྡུས།

སེར་བྱེས་ལྷ་རམས་པ་དགེ་བཤེས་ངག་དབང་ཐོགས་མེད་མཆོག་ནི་ནགས་ཤོད་འབྲི་རུའི་ཡུལ་དུ་འཁྲུངས། ལྟར་མོས་དགོན་དུ་ཆོས་ཞུགས་གནང་ནས་དགོན་དེའི་སློབ་གཉེར་ཆ་ལག་དང་བཅས་པ་ལེགས་པར་སྦྱངས། སྤྱི་ལོ་ ༡༩༩༣ ལོར་འཕགས་ཡུལ་དུ་ཕེབས་ནས་སེར་བྱེས་མཁས་སྙན་གྲྭ་ཚང་དུ་ཞུགས། གཞུང་ལུགས་ཁག་ལ་སློབ་གཉེར་རིམ་པར་གནང་ནས་ཟུར་གསར་འཛིན་གྲྭའི་སྐབས་སྦྱངས་འབྲས་རྩེར་སོན་གྱིས་རིགས་ཆུང་ཨང་དང་པོའི་མཚན་གནས་བཞེས། དབུ་གསར་འཛིན་གྲྭར་ཕེབས་སྐབས་དོན་གཉེར་ཅན་རྣམས་ལ་དཔེ་ཁྲིད་གནང་བའི་དབུ་བཙུགས། འདུལ་བ་འཛིན་གྲྭར་ཕེབས་སྐབས་གདན་ས་གསུམ་གྱི་མཁས་མང་འདུས་པའི་དབུས་སུ་འཇང་དགུན་ཆོས་ཀྱི་མཚན་ཕུད་དམ་བཅའ་བཞག །སྤྱི་ལོ་ ༢༠༠༩ ལོར་དགེ་ལུགས་རྒྱུགས་སྤྲོད་ལ་ཕེབས། ལྷ་རམས་ལོ་རིམ་གཉིས་ལ་ཨང་དང་པོ་དང་གཉིས་པའི་མཚན་གནས་བཞེས། སྤྱི་ལོ་༢༠༡༤ ལོར་ལྷ་རམས་དགེ་བཤེས་ཀྱི་མཚན་གནས་བཞེས། སྤྱི་ལོ་༢༠༡༥ ལོར་རྒྱུད་ལ་ཞུགས་ནས་གསང་སྔགས་རྡོ་རྗེ་ཐེག་པའི་གཞུང་ལ་སྦྱངས། ལོ་གསུམ་རེའི་ནང་རྩོད་རྒྱུགས་ཐེངས་རེ་གནང་སྲོལ་ཡོད་པ་བཞིན་རྩོད་གྲྭར་ཞུགས་ནས་ཨང་གཉིས་པའི་མཚན་གནས་བཞེས། དེ་ནས་གདན་སར་ཕེབས་ནས་སློབ་མའི་ཚོགས་ལ་གཞུང་ཆེན་ཁག་གི་དཔེ་ཁྲིད་གནང་བཞིན་བཞུགས་ཡོད།