ནགས་ཤོད་སྐལ་རྒྱན་པས།
ཀུན་གསལ་སྒེག་མོའི་བཞིན་རས་ཕྱོགས་སུ་འཛུམ།།
མཚམས་སྤྲིན་གསར་པའི་ལང་ཚོ་མཆོག་ཏུ་མཛེས།།
གྲང་རླུང་བསིལ་བསིལ་ལུས་ལ་སིམ་པ་ཡི། །
དྭངས་གཙང་མཁའ་ལ་འདྲེས་པའི་སེམས་པ་སྐྱིད། །
མཛེས་ལྡན་ལྗོན་པའི་མགོ་བོ་དལ་གྱིས་དགྱེ། །
སྒྲོ་ལྡན་སྤུ་སྡུག་གཤོག་ལྷབ་ཐིབས་ཀྱིས་གཡོ། །
སྐད་སྙན་འགྱུར་ཁུག་ནགས་མའི་ཀློང་ནས་གྲག།
ཡིད་འོང་སྐྱེད་ཚལ་ལྷགས་པའི་སེམས་པ་སྐྱིད། །
ནགས་གཡག
དགུན་ཁ།
ལྷམ་མགོ་ཁ་བ་འབྱར་བའི་ནམ་དུས་དེར།།
རྐང་ཆུང་འཁྱགས་པས་བསྡམས་པའི་ཡུལ་ལུང་དེར།།
ཇི་ཙམ་འཁྱགས་ཀྱང་སེམས་ལ་དྲོད་ཅིག་ཡོད།།
དེ་ནི་ཡུལ་མེད་བདག་འདྲ་ཉིད་ཀྱིས་དྲན།།
དཔྱིད་ཀ
སྒོ་ཟོག་གོམ་པ་འཁྱོར་བའི་ནམ་དུས་དེར།།
ཟོག་རྫི་རྫི་གླུ་ཟད་པའི་ཡུལ་ལུང་དེར།།
ཇི་ཙམ་རིད་ཀྱང་སེམས་ལ་སྟོབས་ཤིག་ཡོད།།
དེ་ཡང་ཡུལ་མེད་བདག་འདྲ་ཉིད་ཀྱིས་དྲན།།
ནགས་གཡག
བསིལ་རླུང་འཇམ་པོ་ཞིག་གི་ལྡང་ཕྱོགས་དེས།།
མཚོ་མོའི་རླབས་ཕྲེང་དག་གི་རྒྱུགས་ཕྱོགས་དེས།།
འཁྱམ་པོ་ཁེར་འདུག་ཅིག་གི་སྙིང་ཁམས་ན།།
སེམས་པ་འཁྱག་པ་སྟོང་གི་རྫོང་ཞིག་བཅས།།
གནམ་མཐའི་སྤྲིན་ནག་དེ་ཚོ་འཚུབ་ཅིག་ལངས།།
སེམས་པའི་འཆར་སྒོ་དག་ཀྱང་དྲག་ཏུ་ལྡིང།།
སྡོང་རྒན་སྐམ་པོའི་ཡལ་ག་སྐྱ་ཟིང་ཟིང་།།
ཁེར་རྐྱང་འཁྱམ་པོའི་ཅོ་སྤུ་ཚ་ཟིང་ཟིང་།།