ནགས་ཤོད་ཅོང་བརྡ།
རྫ་ཁྲ་ཡག་འབྲོང་ལམ་གོང་མ་ལ། །
འབྲོང་མི་ཐར་ཁ་བའི་འགག་སྒོ་ཞིག །
རྩོམ་འདིའི་ནང་གཏམ་དཔེ་ཞིག་དང་འབྲེལ་ནས་བུད་མེད་ཀྱི་ནུས་སྟོབས་བཤད་འཆར་ཡིན། གཏམ་དཔེ་ཟེར་བ་ནི་གཏམ་བཤད་དུས་ཁ་གསལ་གོ་བདེ་ཡོང་བའི་ཆེད་དུ་དེ་དང་འདྲ་བའི་དཔེ་ཞིག་འཇོག་དར་བ་དེའི་བསྡུས་མིང་ཡིན། དེས་ན་ངས་སྔོན་འགྲོའི་ཚུལ་དུ་བཤད་རྒྱུར། ངས་སྔོན་མ་ཞིག་ལ་<<བུད་མེད་གནམ་གྱི་ཕྱེད་ཀ་ཡིན་>>ཞེས་པའི་ཆེད་རྩོམ་ཞིག་འབྲི་མྱོང་། རྩོམ་དེ་<<གདང་ལ་རི་བོ>>འི་རྩོམ་སྒྲིག་ཁང་དུ་ཕུལ་བ་དང་། ལོ་དེའི་དུས་དེབ་ཏུ་ཡང་འཁོད་ཡོད། དུས་དེབ་དེ་མཁས་པའི་དྭངས་རྩེ་ཨ་མྱེ་རྨ་ཆེན་བཀྲ་ཤིས་ཚེ་རིང་ལ་དཔར་ཕུད་དུ་ཕུལ་ཡོད་ས་རེད། ཁོང་གིས་རྒྱས་གཟིགས་ཀྱང་གནང་ཡོད་པ་འདྲ། གདང་ལ་རི་བོའི་རྩོམ་སྒྲིག་པར་བུད་མེད་གནམ་གྱི་ཕྱེད་ཀ་ཡིན་ཞེས་པ་དེ་འབྲི་མཁན་ནགས་ཤོད་ཅོང་བརྡ་ཟེར་བ་དེ་སུ་རེད་ཅེས་བཀའ་འདྲི་གནང་བ་དང་། དེས་རྩོམ་ཡག་པོ་བྲིས་འདུག་ཅེས་བསྟོད་པའི་མེ་ཏོག་འཐོར་བ། དེའི་ནང་གི་ཐ་སྙད་རེ་འགའ་བཅོས་ཐུབ་ན་རྩོམ་དེ་ཧ་ཅང་ཡག་པོ་འདུག་ཅེས་གསུངས་སྐོར་གདང་ལ་རི་བོའི་རྩོམ་སྒྲིག་པས་སྔ་རྗེས་སུ་ཐེངས་གཉིས་ཕྲན་ལ་བཤད་བྱུང་།
དེ་ལྟ་བུའི་མཁས་པའི་དྭངས་རྩེ་ཞིག་གིས་ངའི་རྩོམ་ལ་ཆེ་བསྟོད་གནང་བ་ནི། ངའི་རྩོམ་ཆུང་གི་གོམས་སྟབས་དལ་བ་ནས་མགྱོགས་པ་དང་། མེད་པ་ནས་ཡོད་པར་གྱུར་པ་སོགས་ཀྱི་སྐུལ་མ་ཐེབས་ཡོད་ཁོ་ཐག་ཡིན། ཕྲན་ཆུང་བུད་མེད་ཀྱི་ནུས་སྟོབས་གོང་འཕེལ་གཏོང་བའི་ཟབ་སྦྱོང་ཞིག་ལ་ཞུགས་མྱོང་། ཟབ་སྦྱོང་དེ་ནས་ངས་བུད་མེད་ཚོར་ང་ཚོ་སྐྱེས་པ་ཚོས་མི་ཤེས་མི་ཚོར་བའི་ལུས་སེམས་ཀྱི་དཀའ་ངལ་མང་པོ་ཞིག་ཡོད་པ་ཤེས་བྱུང་། དཔེ་ཆུང་ཆུང་ནང་གི་ཡང་ཆུང་ཞིག་བཞག་ན། ཚོགས་ཐོག་དེར་བུ་མོ་ཞིག་གིས་བཤད་རྒྱུར་”སྐྱེས་པ་ཚོས་བུ་མོ་ཞིག་ལ་དགའ་ན་ང་ཁྱོད་ལ་དགའ་ཞེས་བཤད་ཐུབ་ཀྱི་འདུག །ང་ཚོས་སྐྱེས་པ་ཞིག་ལ་ཕར་དགའ་ན་ཟུར་ནས་རྣམ་འགྱུར་གཏོང་བ་མ་གཏོགས་དངོས་སུ་ལབ་མི་ཐུབ་པའི་དཀའ་ངལ་འདི་ག་འདྲ་བྱས་ནས་སེལ་ཐུབ་བམ་”ཞེས་པ་སོགས་རེད། ང་ཚོས་རྒྱུན་དུ་དོན་དག་འདིའི་རིགས་སྣང་མེད་ཡིན་པ་མ་ཟད། བུ་མོ་ཞིག་ལ་མ་དགའ་ནའང་ཤ་སྐྱིའི་ཟ་འཕྲུག་འཇོམས་ཆེད་དུ་ང་ཁྱོད་ལ་དགའ་ཞེས་རྫུན་གྱི་གཏམ་རིང་ཞིག་འཐེན་རྒྱུར་ངོ་མདོག་ཙམ་ཡང་མི་འགྱུར། གང་ལྟར་ངས་བུད་མེད་གནམ་གྱི་ཕྱེད་ཀ་ཡིན་ཞེས་པའི་རྩོམ་དེ་ཟབ་སྦྱོང་དེའི་ནང་གི་མྱོང་ཚོར་གནད་དུ་བཟུང་ནས་བྲིས་པ་ཡིན། ངས་རྩོམ་དེའི་ནང་དུ་འབྲི་མ་ཐུབ་པའི་བུད་མེད་ཀྱི་འཇོན་ནུས་མང་པོ་ཞིག་གཏམ་དཔེ་འདིའི་ནང་དུ་བསྡུས་འདུག་པས། ད་ནི་གཏམ་དཔེ་འདིའི་ཁྱབ་ཁོངས་ནས་ཅུང་ཟད་བཤད་རྒྱུ་ཡིན། གཏམ་དཔེ་དངོས་ནི་”རྫ་ཁྲ་ཡག་འབྲོང་ལམ་གོང་མ་ལ། །འབྲོང་མི་ཐར་ཁ་བའི་འགག་སྒོ་ཞིག །དམའ་རྒྱ་གྲོང་རྩེད་ར་གོང་མ་ལ། །ཕོ་མི་ཐར་མཛེས་མའི་འགག་སྒོ་ཞིག །”ཅེས་པ་འདི་ཡིན། འདིའི་ཚིག་རྐང་དང་པོ་གཉིས་དཔེ་དང་། གཉིས་པ་གཉིས་དཔེ་ཅན་ཡིན།
སྤྱིར་བཏང་འབྲོང་མི་ཐར་བའི་ལམ་ཞིག་ཧ་ལམ་མེད་ཀྱང་། རྫ་ཁྲ་ཡག་གི་རྫ་ལམ་གོང་མའམ་ཆེས་མཐོ་བའི་རྫ་ལམ་དེར་འབྲོང་དར་མ་ཡང་མི་ཐར་བའི་ཁ་བ་འབབ་རྒྱུ་ཡོད་པ་བཞིན། དམའ་རྒྱ་གྲོང་རྩེད་ར་གོང་མ་ལ་སྐྱེས་པ་ཕོ་མི་ཐར་བའི་མཛེས་མའི་འགག་སྒོ་ཞིག་ཡོད་པར་བཤད་པ་རེད། སྐབས་འདིར་”མཛེས་མའི་འགག་སྒོ་”ཞེས་པའི་མཛེས་མ་ལ་རིགས་གཉིས་ཡོད་ཆོག་སྟེ། ནང་གི་སེམས་མཛེས་པའི་མཛེས་མ་དང་། ཕྱིའི་གཟུགས་མཛེས་པའི་མཛེས་མ་གཉིས་ཡིན། ནང་གི་སེམས་མཛེས་ན་འདྲ། ཕྱིའི་སྐྱེས་གཟུགས་མཛེས་ན་འདྲ། ཐམས་ཅད་ཀྱིས་ཁས་ལེན་ཐུབ་པའི་མཛེས་མ་ཞིག་སྲིད་ལ་མེད་པས། མཛེས་མ་ཐམས་ཅད་མཛེས་མ་མིན། རང་སེམས་ཤོར་ན་མཛེས་མ་ཡིན་ཞེས་པའི་གཏམ་དཔེ་འདི་བྱུང་བ་ཡིན། དཔེ་དེའི་གོ་བ་གཞན་པ་ཞིག་བླངས་ན། བུད་མེད་ཡོད་ཚད་མཛེས་མ་ཡིན་པ་སྒྲུབ་མི་འདུག་གམ། གང་ལགས་ཤེ་ན། བུད་མེད་སོ་སོ་ལ་མཛེས་པར་མཐོང་མཁན་རེ་རེ་ཡོད་ཁོ་ཐག་ཡིན་པས་སོ། །དེར་བརྟེན་དགེ་ཆོས་ཀྱིས་གཟུགས་ཀྱི་ནང་ནས་མཆོག་གྱུར་པ། སྐྱེས་པའི་མིག་ལ་བུད་མེད་གཟུགས་ཀྱང་མཛེས་གསུངས་པ་མིན་ནམ། འདིར་ད་དུང་དཔེ་གཞན་ཞིག་དྲངས་ན་”ཁ་ཤོའི་ཁའི་སྤམ་ཆ་”ཞེས་པའི་དམངས་ཁྲོད་ཀྱི་དགོད་གཏམ་ཞིག་ཀྱང་ཡོད། དེ་ནི་ཕོ་གསར་ཞིག་གིས་མནའ་མ་ཁ་ཤོ་ཞིག་བླངས་པ་དང་། ཕོ་གསར་དེའི་ཨ་མས་འདི་ཁ་ཤོ་འདུག་ཅེས་མི་འདོད་པའི་རྣམ་འགྱུར་བསྟན་པས། ཕོ་གསར་དེས་ཨ་མ་ཁྱོད་ཀྱིས་ངའི་ལྟ་ས་ནས་ལྟོས་དང་ཁ་ཤོའི་ཁའི་སྤམ་ཆ་ག་འདྲ་མི་འདུག་ཅེས་བཤད་སྐད། དེར་བརྟེན། ནང་གི་སེམས་མཛེས་པར་མཐོང་ན་འདྲ། ཕྱིའི་གཟུགས་མཛེས་པར་མཐོང་ན་འདྲ། ཡོད་ཚད་སྐྱེས་པ་སོ་སོའི་སེམས་ཀྱི་འཛིན་སྟངས་ཡིན་པ་དེའོ། །
དེས་ན། ང་ཚོས་འདང་ཞིབ་མོ་བརྒྱབ་ན་དངོས་གནས་གཏམ་དཔེ་འདི་ཧ་ཅང་གོ་རྒྱུ་ཅན་ཞིག་ཡིན་ཏེ། བདག་ཅག་གི་སྟོན་པས་ཀྱང་གྲགས་འཛིན་མའི་དོན་དུ་ཤ་རུས་གདུང་རྒྱུད་གཅིག་པའི་ཕུ་བོ་ལྷས་བྱིན་ལ་དགྲ་བསགས་པ་དང་། མཛེས་མའི་འགག་སྒོ་ནས་ཐར་མི་ཐར་བྱུང་བའི་ཚུལ་བསྟན་མི་འདུག་གམ། སངས་རྒྱས་གཉིས་པར་སྐད་པའི་སློབ་དཔོན་པདྨས་ཀྱང་ཁྱིམ་ཐབ་བཟུང་བ་དང་། སྐྱ་སར་བབས་པའི་ཚུལ་བསྟན་མི་འདུག་གམ། མདའ་འཕངས་ན་དམ་བཅའ་གསུམ་ལྡན་ཡིན་པའི་རྒྱལ་པོ་རྰ་མ་ཎས་ཀྱང་མངའ་འབངས་སྐར་ཚོགས་འདྲ་བོ་བསྐྱུར་ཏེ། སི་ཏཱ་ཁྲིད་ནས་ནགས་རྫོང་ནང་དུ་འཛུལ་སོང་བ་མིན་ནམ། ཡང་མོའི་དོན་དུ་རྔ་ཡབ་གླིང་ཕྲན་ཁྲག་གི་རྒྱ་མཚོ་བསྐྱིལ་མྱོང་བ་མིན་ནམ། ས་བཅུ་ཐོབ་པའི་སངས་རྒྱས། གོང་མ་ལྷ་ཡི་ཕོ་ཉ། འོག་མ་ཀླུ་ཡི་ཚ་བོ་སེང་ཆེན་ནོར་བུ་དགྲ་འདུལ་གྱིས་ཀྱང་འབྲུག་མོའི་དོན་དུ་གཡུལ་ཆེན་བཤམས་མི་འདུག་གམ། འདི་དག་ནི་དཔའ་ཞིང་དཀྱིལ་ཆེ་བ། བཙན་ཞིང་རྒོད་པའི་སྐྱེས་པ་མང་པོ་ཞིག་མཛེས་མའི་འགག་སྒོ་ནས་ཐར་མི་ཐར་བྱ་མྱོང་བའི་དཔེ་མཚོན་ཤ་སྟག་རེད།
དེ་བཞིན་དམངས་ཁྲོད་ཀྱི་གཏམ་རྒྱུད་ཅིག་ལས་སྡེ་ཁྲ་ལུའི་དཔོན་པོ་ང་རང་ཡིན། དཔོན་ང་རང་དཔོན་པོ་ནང་ལ་ཡོད་ཅེས་བཤད་པར་གྲགས། དེའི་དོན་ནི་ཁོ་སྡེ་ཆེན་པོའི་དཔོན་པོ་ཡིན་ནའང་ཁོའི་ཁྱིམ་དུ་ཡོད་པའི་མཛའ་མོ་དེ་ཁོའི་དཔོན་པོ་ཡིན་པར་བཤད་པ་རེད། དོན་དག་སྟབས་བདེ་བོར་བཤད་ན་དཔོན་བཙན་ནའང་བུད་མེད་ཀྱི་འགག་སྒོ་ནས་མི་ཐར་ཚུལ་བཤད་པ་དེ་རེད། ད་དུང་རྒྱུན་དུ་ང་ཚོས་གོ་སར། ང་ཚོས་མཐོང་སར། ང་ཚོ་དང་འབྲེལ་བ་ཡོད་པ་དང་འབྲེལ་བ་མེད་པ་མང་པོ་ཞིག་ཤོ་བག་རྒྱན་འཇོག་བྱ་བ་དང་། ཐ་མ་སྣ་ཐ་འཐེན་པ། ཆང་ཨ་རག་བཏུང་བ། དོན་དག་ཡོད་ས་མེད་སར་དཔུང་ཐུག་རྒྱག་པ་སོགས་ཨར་སྤྱོད་དེ་འདྲ་བ་ཞིག་ཨང་ཞེས་བརྒྱ་ཡར་འགྲོས་གླེང་ཞིང་། སྟོང་ཕྱིར་ཡོང་གིས་བཤད་བཞིན་པའི་ཕོ་གསར་སྣང་མཐོ་མང་པོ་ཞིག་གཉེན་བསྒྲིགས་པ་དང་མི་དེ་རྦད་དེ་འགྱུར་ཏེ། ཡ་རབས་ཚུལ་མཐུན་ལས་ལ་བརྩོན་པ། མི་རང་རྩིས་ཅན་ཞིག་ཏུ་འགྱུར་འགྲོ་བ་མ་མཐོང་ངམ། འདིའང་མཛེས་མའི་འགག་སྒོ་ལས་མ་ཐར་བའི་རྣམ་པ་གཞན་ཞིག་ཀྱང་རེད། དེས་མ་ཟད། ཕོ་གསར་གཅིག་གཅིག་ཉིག་ཉིག་གིས་བུད་མེད་གཅིག་གི་དོན་དུ་ཚེ་སྲོག་རྟ་རྔ་འདྲ་བོ་བཏང་འདུག་ཟེར་བ་རྒྱུན་དུ་གོ་རྒྱུ་མི་འདུག་གམ།
ད་དུང་མགོ་གསེར་ཞྭ་ཅན་གྱི་བླ་མ་མང་པོས་སེང་གེ་ཁ་སྤྲོད་ཅན་གྱི་གསེར་ཁྲི་བཞག་ནས་བུད་མེད་ཅིག་ཁྲིད་དེ་ཕེབས་སོང་བ་མ་ཐོས་སམ། མཁས་ཤིང་བཙུན་པའི་དགེ་བཤེས་དང་མཁན་པོ་མང་པོས་གློ་བུར་དུ་ལམ་གསར་པ་ཞིག་ལ་གོམ་པ་སྤོས་པ་མ་མཐོང་ངམ། ཁས་བླངས་ཤིང་དམ་བཅས་པའི་བཙུན་ཆུང་རིག་རྒོད་མང་པོས་སྡེ་ཆེན་གྲོང་ནས་བུད་མེད་ཀྱིས་ལག་གཡུག་བྱ་གི་འདུག་ཅེས་རྒྱུགས་ཡོང་བ་མ་ཤེས་སམ། འདི་དག་ཀྱང་མཛེས་མའི་འགག་སྒོ་ལས་མ་ཐར་བའི་ལྟད་མོ་ཞིག་རེད་དོ། །
ད་དུང་ཙི་ན་བ་ཚོས་བུད་མེད་ཀྱི་རྐང་པ་བཅིངས་ནས་ཆུང་ཆུང་བཟོ་བ་ནི་གཞན་དུ་བྲོས་མི་འགྲོ་བའི་ཆེད་དུ་ཡིན་པ་དང་། ཁ་ཆེའི་རྒྱལ་ཁབ་འགར་བུད་མེད་ཀྱི་མགོ་ལ་རས་ནག་པོ་བཀབ་པ་ནི། རང་གི་དགའ་མའི་བཞིན་རས་གཞན་གྱིས་མཐོང་མི་འགྲོ་བའི་ཆེད་དུ་ཡིན་སྐད། ང་ཚོ་སྡེ་བ་གཞུང་གིས་ཀྱང་བུད་མེད་ལ་སྒྲོག་བརྒྱབ་ནས་གོམ་ཞེང་ཆེན་པོ་སྤོ་ཐབས་མེད་པ་བཟོ་བ་ནི་འོག་ཁ་ཆེ་རུ་མི་འགྲོ་བའི་ཆེད་དུ་ཡིན་པ་སོགས་ནི་། འགྲོ་བ་མིའི་ཐོབ་ཐང་སོགས་བཤད་ན་ལུགས་མཐུན་མིན་ན་ཡང་། གསེར་དངུལ་དང་། གཟི་བྱུ་རུ། དར་གོས་ཆེན་སོགས་སྒམ་གྱི་ནང་དུ་བཅུག་པ་དང་།
དེ་ལ་སྒོ་ཟྭ་བརྒྱབས་ཤིང་ས་ཆ་བཙན་ས་ཞིག་ལ་ཉར་ཚགས་བྱེད་པ་སོགས་ནི། རིན་པོ་ཆེ་དེ་དག་ལ་ཀྱག་ཀྱག་བྱས་ནས་སྒོ་ཟྭ་བརྒྱབ་པ་མ་ཡིན་པར། དེ་དག་རྩ་ཆེ་དྲགས་པས་ཡིན་པ་བཞིན། བུད་མེད་ཉར་ཚགས་བྱེད་སྟངས་འདི་རང་འདོད་ཁོ་ནའི་དབང་དུ་སོང་ཡོད་ནའང་། སོ་སོའི་མཛའ་མོ་སྒྲོག་བརྒྱབས་ནས་ཤ་འཁོན་ནི་མེད། ཤ་འཁོན་ཡོད་ན་མཛའ་མོར་མི་འགྱུར་བས། ཉར་ཚགས་བྱེད་མ་ཤེས་པ་མ་གཏོགས་ཉར་ཚགས་མ་འདྲ་བ་ཞིག་བྱེད་དགོས་པའི་སེམས་ཚེགས་ཆེན་པོ་ཞིག་ཡོད་པ་ནི། བཤད་སྟངས་གཞན་ཞིག་ནས་བཤད་ན་སྐྱེས་པ་རང་ཉིད་ཀྱང་དམའ་རྒྱ་གྲོང་རྩེད་ར་གོང་མ་རུ་མཛེས་མའི་འགག་སྒོ་ནས་མ་ཐར་བའི་རྣམ་པ་ཞིག་ཀྱང་ཡིན་ནོ། །
འོ་ན་སྙན་གྲགས་ཡོད་པ་དང་མེད་པ། གོ་ས་མཐོ་བ་དང་དམའ་བ། འཇོན་ནུས་ཡོད་པ་དང་མེད་པ་སོགས་ཡོད་ཚད་མཛེས་མའི་འགག་སྒོ་ནས་མི་ཐར་བ་འདི་སྐད་ཆ་དྲང་པོ་ཞིག་བཤད་ན་བུད་མེད་ཀྱི་ནུས་སྟོབས་མ་ཡིན་ནམ། བུད་མེད་ཀྱི་རིན་ཐང་མ་ཡིན་ནམ། བུད་མེད་ཀྱི་ཤུགས་རྐྱེན་མ་ཡིན་ནམ། བུད་མེད་ཀྱི་དགོས་མཁོ་མ་ཡིན་ནམ། དམའ་རྒྱ་གྲོང་རྩེད་ར་གོང་མ་ན་ཕོ་མི་ཐར་མཛེས་མའི་འགག་སྒོ་ཞིག་ཡོད་དོ། །ཞེས་དམངས་ཁྲོད་ཀྱི་གཏམ་དཔེ་ཞིག་གིས་སྣ་དྲངས་ཏེ་བྲིས་སོ། །