ནགས་ཀྱི་ཤིང་ལོ་ནས།
བེ་ཏའི་ལྗོན་ཤིང་རྩེ་མོ་གནམ་དུ་བསྙེགས།།
ལོ་མའི་གསེང་ནས་རྟ་བདུན་འོད་ཟེར་འཕྲོས།།
ནོར་འཛིན་པང་ན་བན་བུན་སྨུག་པས་འཁྱུད།།
དཔེ་སྐྱོར་བ་ཞིག་ཞོགས་པའི་ཉི་ཟེར་གཡེང་།།
བྱང་རླུང་སེབ་སེབ་བྱང་ནས་ལྷོ་རུ་ལྡང་།།
རླུང་བུའི་སྣེ་ནས་ལྗོན་པའི་དྲི་ཞིམ་བྲོ།།
ལྕུག་ཕྲན་ཡལ་ག་རླུང་གིས་སྒུལ་དང་ལྷན།།
བྱིའུའི་ཚོགས་རྣམས་ཞོགས་པའི་ཉི་འོད་སྒུག །
ཉི་མས་མ་ཚིག་ཁ་དོག་དམར་མདངས་རྒྱས།།
རླུང་བུས་མ་ཁུར་ལོ་མ་ལྗང་མདོག་སྣུམ།།
སྦྲང་མས་མ་འཇིབ་ཟེའུ་འབྲུ་རུམ་དུ་ཉར།།
ཁང་ཟུར་མེ་ཏོག་ཞོགས་པའི་ཉི་ཟེར་སྒུག །
གྲོག་མས་མ་ཟས་རྩ་བ་སུ་རུ་འཁྱིལ།།
ཙི་ཙིས་མ་བཏོགས་འབྲས་བུས་རང་ལུས་འཁྱུད།།
སད་ཀྱིས་མ་གདུང་ཡལ་གར་ཟིལ་བ་འཁྲིགས།།
ཁང་རྒྱབ་ཨཱམ་སྡོང་ཞོགས་པའི་ཉི་ཟེར་སྒུག །
དཀར་དཀར་འོ་མའི་རྒྱ་མཚོ་རུམ་དུ་བླུགས།།
ཁྲ་ཁྲ་གོ་ལའི་ས་ཁྲ་གོས་སུ་གྱོན།།
རོག་རོག་སྣ་ལུང་ཅན་གྱི་བ་ཕྱུགས་ཚོགས།།
རྩྭ་ཆུ་རོལ་བཞིན་ཞོགས་པའི་ཉི་ཟེར་སྒུག །
ཞོགས་པའི་སྨུག་པ་ལྗོན་པའི་ནགས་ནས་འཁྲིགས།།
ཞོགས་པའི་ཉི་ཟེར་འཛིན་མའི་པང་དུ་འཁྱིལ།།
ཞོགས་པའི་རིག་པ་དཔེ་དེབ་ཁྲོད་དུ་གསལ།།
ཞོགས་པའི་ཚོར་བ་སྨྱུ་གུའི་སོ་རུ་ཡོད།།
༢༠༡༧–༢–༢༡