མངོན་བརྗོད་ཀྱི་སྡོམ། མཁས་དབང་མཁྱེན་རབ་ནོར་བུ། འགྲེལ་བ། འབྲི་སྐལ་བཟང་།
འདྲེན་མཆོག་མཉམ་མེད་སྟོན་པ་ཤཱཀྱའི་རྒྱལ།།
རྒྱུད་ཀྱི་བཀའ་བབ་ཆོས་རྒྱལ་ཟླ་བ་བཟང་།།
ལོ་ཙཱ་ཆེན་པོ་ཟླ་བའི་འོད་ཟེར་སོགས།།
དུས་འཁོར་རྒྱུད་དོན་གསལ་མཛད་རྣམས་ལ་འདུད།།
མཐའ་ཡས་གྲངས་ཀྱི་མངོན་བརྗོད་མང་མཆིས་པས།།
ཕུ་ཐག་ཆོད་པའི་ཞིབ་བཤད་མི་ནུས་ཀྱང་།།
རང་མཉམ་འགའ་ལ་ཅུང་ཟད་ཕན་སླད་དུ།།
རྣམ་གྲངས་འགའ་ཞིག་གསལ་བའི་དོན་ལ་བརྩོན།།
དེ་ཡང་མངོན་བརྗོད་ཤེས་ན་མིང་ལ་མི་རྨོངས། ཞེས་གླེང་བ་ལྟར་མངོན་་བརྗོད་ལ་ཚིག་གི་མཛེས་ཉམས་སྟོན་པ་དང་། དོན་གྱི་གོ་བ་འཁྲུལ་མེད་དུ་སྟོན་པ་སོགས་ཀྱི་ཁྱད་ཆོས་བླ་ན་མེད་པ་དུ་མ་ཞིག་ལྡན་ཡོད། མངོན་བརྗོད་ཀྱི་མིང་ཕལ་ཆེ་བ་ནི་ཆོས་དེའི་ཁྱད་ཆོས་སོགས་ཆོས་དེ་ངོས་འཛིན་པའི་སྐབས་འཇུག་བདེ་ལ་གོ་སླ་བ་བཅས་ཀྱི་དགེ་མཚན་ལྡན་པ། དཔེར་ན། ཉི་མ་ལ་ཚ་ཟེར་ཅན། སྣང་བྱེད། མེ་ཟླུམ་ལྟ་བུ་བརྗོད་སྐབས་ཉི་མའི་ཁྱད་ཆོས་དང་འབྲེལ་བའི་མིང་ཡིན་པས་མིང་དེ་ལ་བརྟེན་ནས་ཉི་མ་ཞེས་བ་དེ་ཚ་ཟེར་ལྡན་པ་དང་། དེས་སྣང་བར་བྱེད་པ། དེ་ཉིད་མེ་ཡི་ཕུང་པོ་ཟླུམ་པོ་ཞིག་ཡིན་པ་ལྟ་བུའི་དོན་མང་པོ་ཞིག་རྟོགས་ཐུབ། དེ་བཞིན་སྤྲིན་ལ་ཆུ་འཛིན་དང་། ཤིང་ལ་རྐང་འཐུང་། འབྲུག་སྐད་ལ་སྤྲིན་གྱི་སྒྲ་ཞེས་པ་ལྟ་བུ་མིང་གཅིག་པུ་ལ་བརྟེན་ནས་འབྱུང་བའི་འགྲོས་དང་གནས་སྟངས་མང་པོ་ཞིག་གསལ་བའི་ནུས་པ་ལྡན་ཡོད། ད་ནི་སྐབས་སུ་བབས་པ་གྲངས་ཀྱི་མངོན་བརྗོད་ཀྱི་སྐོར་བཤད་ན་སྐབས་དོན་དང་འཚམས་པ་ཡིན་པས་དེར་འཇུག་པར་འདོད། གྲངས་ཀྱི་མངོན་བརྗོད་ཅེས་པ་ནི་གྲངས་ཀ་གཅིག་གཉིས་སོགས་ལ་མིང་གི་རྣམ་གྲངས་མི་འདྲ་བ་མང་པོ་ཞིག་བཀོལ་ནས་བརྗོད་པ་ལ་ཟེར། གྲངས་ཀྱི་མངོན་བརྗོད་འདི་ནི་ཚིག་ཉུང་ངུ་ཞིག་ལས་མེད་ཀྱང་དོན་མང་པོ་ཞིག་གི་མདུད་རྒྱ་འགྲོལ་ཐུབ་པའི་དགེ་མཚན་དང་ལྡན་པ་ཡིན།
