Web Toolbar by Wibiya
མདུན་ངོས། ནགས་ཀྱི་རྡོ་ཕུར་བཅུ་གསུམ་གྲས།
 
ནགས་ཀྱི་རྡོ་ཕུར་བཅུ་གསུམ་གྲས།

naglha slideno3
མ་བཅོས་ལྷུན་གྱིས་གྲུབ་པའི་ནགས་ཀྱི་རྡོ་ཕུར་བཅུ་གསུམ་གྲས་ཀྱི་གཅིག

འཛམ་གླིང་རལ་པའི་རྩེ་ན་ཁ་བའི་མུ་ཁྱུད་དཀར་པོ་གདུགས་ལྟར་འཁྱིལ་བའི་བསིལ་ལྡན་ཁ་བའི་ལྗོངས་ཀྱི་རང་བྱུང་གི་སྐྱེ་དངོས་ལ་བློ་ཁ་ཕྱོགས་མཁན་ཞིག་ཡིན་ཕྱིན་ཆད། སོག་ལ་ཉྭ་འདྲ་བཅུ་གསུམ། བེ་ལ་འབྲོང་ཉལ་བཅུ་གསུམ། ནགས་ལ་རྡོ་ཕུར་བཅུ་གསུམ་ཞེས་གྲགས་པའི་རང་བྱུང་གི་སྐྱེ་དངོས་འདི་གསུམ་ཐོས་མ་མྱོང་མཁན་མེད་པ་ལྟ་བུའི་ཚད་དུ་བསླེབས་ཡོད། དེ་དག་གི་ནང་ནས། རིན་ཆེན་གཏེར་རྫས་དུ་མས་མངོན་པར་འབུར་དུ་ཐོན་པ། མ་བཅོས་ལྷུན་གྱིས་གྲུབ་པའི་ངོ་མཚར་བཀོད་པ་དུ་མས་མཛེས་པའི་རྡོ་ཕུར་འདི་ནི། ནགས་ཀྱི་རྡོ་ཕུར་བཅུ་གསུམ་ནང་གི་ཡ་གྱལ་ཞིག་སྟེ། རྒྱང་ནས་བལྟས་ན་རྒྱལ་མོ་རྔུལ་ཆུའི་དཀྱིལ་དུ་མཆོད་པའི་སྡོང་བུ་བཙུགས་འདྲ། ཉེ་ས་ནས་བལྟས་ན་ལྕགས་ཀྱི་ཀ་བ་གསོན་པོ་ཞིག་གནམ་དུ་ཀྲོང་ངེར་བསླངས་པ་དང་འདྲ་ཞིང༌། མཁས་བླུན་སུ་ཞིག་གིས་མཐོང་རུང༌། རེ་ཞིག་དབང་མེད་དུ་ཧར་གྱིས་གཡེང་དགོས་པའི་ཁྱད་མཚར་དུ་མས་ཕྱུག་པའི་རང་བྱུང་གི་སྐྱེ་དངོས་ཤིག་ཡིན་ཏེ། སྔར་ཆོས་རྒྱལ་སྲོང་བཙན་སྒམ་པོས་རྒྱ་བཟའ་ཀོང་ཇོ་བཙུན་མོར་བསུ་སྐབས། ལུང་པ་འདི་ནས་དབུས་ལ་བསུས་མྱོང་ཞིང༌། རྒྱ་བཟའ་ཡང་ལུང་པ་འདིར་འབྱོར་སྐབས། དྭངས་གཙང་ཁོར་ཡུག་ཤིན་ཏུ་ཉམས་དགའ་བས་ལམ་བར་གྱི་ངལ་དུབ་སེལ་ཏེ་ལུས་སེམས་བདེ་བར་འཁོད། རྔུལ་ཆུའི་འགྲམ་ངོགས་ནས་ཀྱང་རྡོ་ཕུར་འདི་ལ་ལྟད་མོར་གཡེངས་སྐབས། རྡོ་ཕུར་འདི་ཡི་རང་བཞིན་གྱི་བཀོད་མཛེས་ལ་ངོ་མཚར་ཤིན་ཏུ་ཆེན་པོ་སྐྱེས་ཏེ། སྤྱན་ཆབ་ཕྲེང་རྡོག་རེ་ཟུང་ཆུ་བོའི་ནང་དུ་ལྷུང་སྟབས། དོན་ལ་རྒྱ་མོ་ཧ་ལས་ནས་ངུ་ཤོར་བས། ཆུ་མོ་འདི་ཡི་མིང་ལ་རྒྱ་མོ་ངུ་ཆུ་ཞེས་མིང་ཐོག་མར་ཐོགས་ཀྱང༌། ཕྱིས་སུ་ཡུལ་སྐད་དབང་བཙན་སྟབས་རྒྱལ་མོ་རྔུལ་ཆུ་ཞེས་ཐ་སྙད་ཟུར་ཆགས་པ་ཡིན་ཞེས་བཤད་སྲོལ་ཡོད། ད་དུང་དེང་རབས་ཀྱི་དངོས་ཁམས་རིགས་པ་སྨྲ་བ་ཚོས་ཀྱང་རྡོ་ཕུར་འདི་ལ་ཁྱད་མཚར་ཅན་གྱི་ཡོན་ཏན་གཞན་ཞིག་ལྡན་པ་མཐོང་བ་ནི། ལུང་པ་འགའ་ལ་ཆུ་ཐིགས་ཟགས་ཤུལ་གྱི་བྲག་རྡོ་ལ་ཨི་ཁུང་དོད་འགྲོ་བ་དངོས་པོའི་ཆོས་ཉིད་ཡིན་ཅིང༌། ལོ་ངོ་ཁྲི་ཕྲག་ཙམ་གྱི་རིང་ལ་ཆུ་བོ་རྒྱུགས་ཤུལ་དུ་ཡོད་པའི་བྲག་རྡོ་རྣམས་ལ་ཆུ་ཡིས་དེད་ཤུགས་ཀྱིས་བོང་ཚད་གྲུ་གང་ཙམ་འཛད་ཀྱི་ཡོད་པ་མངོན་སུམ་དུ་མཐོང་བས། རྡོ་ཕུར་འདི་ནི་ལོ་ངོ་ས་ཡ་མང་པོའི་རིང་ལ་སྐད་ཅིག་ཀྱང་ཡོལ་བ་མེད་པ་ཆུ་མོ་རྔུལ་ཆུའི་རྦ་རླབས་ཀྱིས་བརྡར་ཀྱང་འཛད་དུ་མེད་པའི་རིན་ཆེན་གཏེར་རྫས་ཀྱི་ནུས་པ་ཁྱད་པར་ཅན་ཞིག་ཡིན་པ་ཚོད་དཔགས་དང་རྟོག་ཞིབ་ཀྱང་བྱེད་བཞིན་ཡོད།། ངོ་སྤྲོད་མཚམས་སྦྱོར་མདོར་བསྡུས་སུ་ནགས་ཤོད་བ་བསྟན་སྐྱོང་གིས།།

ལོ་རྒྱུས་འདི་ཐེངས་ 1926 བཀླགས་འདུག