Web Toolbar by Wibiya
 
ཀུན་གཞི་ལ་དཔྱད་པ། Monday, 15 October 2012 09:32 PDF Print E-mail

                                                                                                                           དགའ་ལྷོ་འབྲི་ཚུལ་ཁྲིམས་རྒྱལ་བ།

 ཀུན་གཞི་རྣམ་ཤེས་སྐོར་ལ་དཔྱད་པ།འདིར་ཀུན་གཞི་རྣམ་ཤེས་ཀྱི་སྐོར་ལ་ཅུང་ཟད་གླེང་བར་འདོད་པས་ཐོག་

མར་ཀུན་གཞིའི་རྣམ་ཤེས་འདོད་པའི་རང་སྡེ་གྲུབ་མཐའ་སྨྲ་བ་གང་དང་གང་ཡོད་སྙམ་ན། ཡོངས་གྲགས་ལྟར་ན་སེམས་ཙམ་པ་དང༌།    དེ་ཡང་སེམས་ཙམ་ལུང་གི་རྗེས་འབྲང་ཁོ་ན་ཡིན་པར་འདོད་ལ།   འོན་ཀྱང་དབུ་མ་རང་རྒྱུད་པའི་སློབ་དཔོན་འཕཌ་སེང་གཉིས་ཀྱི་གཞུང་ཉི་སྣང་དང༌།བསྡུས་འགྲེལ་གཉིས་སུ་ཀུན་གཞི་གསལ་བར་གསུངས་པ་དང༌། མཁས་གྲུབ་ཐམས་ཅད་མཁྱེན་པའི་ཕར་ཕྱིན་རྣམ་བཤད་རྟོགས་དཀའི་སྣང་བར་འཕགས་སེང་གཉིས་ཀྱིས་ཀུན་གཞིའི་རྣམ་ཤེས་བཞེད་པར་གསུངས་ཡོད། དེས་ན་འདིར་སེམས་ཙམ་ལུང་གི་རྗེས་འབྲང་གིས་འདོད་པའི་ཀུན་གཞི་རྣམ་ཤེས་ཀྱི་དོན་ལ་ཅུང་ཟད་དཔྱད་པ་ལ། དེ་ཡང་ཀུན་གཞི་རྣམ་ཤེས་ཞེས་པ་ནི་དམིགས་པ་དབང་དོན་བག་ཆཌ་གསུམ་པོ་གང་རུང་ལ་དམིགས་ཤིང་རྣམ་པ་རིས་སུ་མ་བཅད་པར་ངོ་བོ་མ་སྒྲིབ་ལུང་མ་བསྟན་དང་གྲོགས་སེམས་བྱུང་ཀུན་འགྲོ་ལྔ་པོ་ཁོ་ན་དང་མཚུངས་པར་ལྡན་པའི་གཙོ་བོ་ཡིད་ཀྱི་རྣམ་ཤེས་ཞིག་ལ་འཇོག་པ་ཡིན་ཏེ། རྩ་བ་ལས། དེ་ལ་བརྟེན་གྱུར་ཀུན་གཞི་ནི། །དོན་དང་སེམས་ཅན་བག་ཆགས་ལ། །རྣམ་པར་རིག་པ་མི་རིག་པ། །ལུང་དུ་མ་བསྟན་རེག་ལ་སོགས། །ལྔ་ཉིད་དང་ལྡན་ཞེས་གསུངས་པའི་ཕྱིར།

འོ་ན་ཀུན་གཞིའི་དམིགས་པ་ལ་དབང་དོན་བག་ཆགས་གསུམ་པོ་གང་རུང་དགོས་ན། དེ་གསུམ་དེའི་དམིགས་པ་ཡིན་ཚུལ་གང་ཡིན་སྙམ་ན། དེ་ལ་བག་ཆགས་དམིགས་པར་འགྱུར་ཚུལ་ནི། དོན་གཟུགས་སྒྲ་སོགས་ཀུན་གཞི་ལ་སྣང་ནས་དམིགས་པར་བྱེད་པ་ལྟར་མ་ཡིན་པར་བག་ཆགས་སད་པའི་དབང་གིས་གཟུགས་སོགས་ཀུན་གཞིའི་ཡུལ་དུ་འགྱུར་བས་དེའི་དམིགས་པར་བཞག་པ་ཡིན་ཏེ། ཀུན་གཞི་རྒྱ་ཆེར་འགྲེལ་བློ་གླིང་དཔར་མ་ཤོག་གྲངས་༡༤ལས། དེ་ཡང་བག་ཆཌ་དམིགས་པར་འགྱུར་བའི་དོན་དངོས་སུ་མེད་ཀྱང་དེའི་མཐུས་གནས་དོན་ལུས་སུ་སྣང་རུང་ཡིན་པས་དམིགས་པར་འགྱུར་ཏེ། ཞེས་གསུངས་པའི་ཕྱིར་ཞེ་ན། དེ་ལྟར་ན་བག་ཆགས་ཀུན་གཞིའི་ཡུལ་མ་ཡིན་པར་ཐལ། དེའི་དམིགས་པ་དང་རྣམ་པ་གང་ཡང་མ་ཡིན་པའི་ཕྱིར། འདོད་ན། གཟུགས་མེད་ཀྱི་ཀུན་གཞི་ལ་ཡུལ་མེད་པར་འགྱུར་ཏེ། བག་ཆཌ་དམིགས་པ་མ་ཡིན་པ་གང་ཞིག།།དབང་དོན་གཉིས་ཀྱང་དེའི་ཡུལ་མ་ཡིན་པའི་ཕྱིར། འདོད་ན། གཟུགས་མེད་ཀྱི་ཀུན་གཞི་དེ་ཉིད་ཡུལ་མེད་པའི་ཡུལ་ཅན་ཡིན་པ་དང༌། གང་ཡང་མ་རིག་པའི་རིག་པ་ཡིན་པ་དང༌། ཡང་ན། ཡུལ་ཅན་དང༌། རིག་པ་ཡང་མ་ཡིན་པར་འགྱུར་བ་དང༌། མ་ཚད་འཁོར་སེམས་བྱུང་ཀུན་འགྲོ་ལྔ་དང་མཚུངས་ལྡན་རྣམ་པ་ལྔ་མཚུངྶ་མ་ཡིན་པར་འདོད་དགོས་ལ། དེ་ལྟར་ན། དམིགས་རྣམ་མི་འཛིན་པར་འགྱུར་བའི་ཕྱིར། དེ་ཡང་མི་འཐད་དེ། སུམ་ཅུ་པའི་འགྲེལ་བ་ལས། དམིགས་པ་མེད་པ་དང༌། རྣམ་པ་མེད་པའི་རྣམ་པར་ཤེས་པ་ནི་མི་རུང་ངོ། ཞེས་དང༌། དུལ་བ་ལྷའི་འགྲེལ་བཤད་ལས། ཀུན་གཞི་རྣམ་པར་ཤེས་པ་དམིགས་པ་དང༌། རྣམ་པ་མེད་པ་ནི་ཁོ་བོའང་མི་འདོད་མོད་ཀྱི། ཞེས་གསུངས་པའི་ཕྱིར་དང༌། རྩ་བ་ལས། རྫས་གཅིག་ཐ་དད་གང་ཡང་མིན། །ས་བོན་དམིཌ་རྣམ་ཡོད་པ་དང༌།།ཞེས་དང༌། ཀུན་གཞི་རྒྱ་ཆེར་འགྲེལ་ལས། ས་བོན་དང་ཀུན་གཞི་རྣམ་ཤེས་གཉིས་རྫས་གཅིག་མ་ཡིན་ཏེ།གཞན་དུ་ན་ཀུན་གཞི་ས་བོན་ཆ་དེ་ལ་དམིགས་རྣམ་ཡོད་པར་འགྱུར་རོ།ཞེས་ལུགས་འདི་ལ་ཀུན་གཞི་དང་དེའི་སྟེང་གི་ས་བོན་གཉིས་རྫས་གཅིག་ཡིན་ན་དེ་གཉིས་གཅིག་ཡིན་དགོས་ལ། དེ་ལྟར་ན་ས་བོན་ལ་དམིགས་རྣམ་ཡོད་དགོས་ཏེ། ཀུན་གཞི་ཡིན་པའི་ཕྱིར། ཞེས་པའི་དོན་ཡིན་པའི་ཕྱིར། ཡང་ཁ་ཅིག །གཟུགས་མེད་ཀྱི་ཀུན་གཞིའི་ཡུལ་དུ་དབང་དོན་གཉིས་མེད་ལ་བག་ཆགས་དམིགས་པ་མ་ཡིན་ཡང༌། དེ་ལ་དམིགས་པ་མེད་པའི་སྐྱོན་མེད་དེ། གཟུགས་མེད་ཀྱི་མིང་གཞིའི་ཕུང་པོ་དེ་དེའི་དམིགས་པ་ཡིན་པའི་ཕྱིར་ཏེ། སུམ་ཅུ་པའི་འགྲེལ་པ་ལས་བག་ཆཌ་དང༌། གནས་དང་བཅས་པའི་དབང་པོའི་གཟུགས་དང་མིང་སྟེ། དེའི་དམིགས་པ་ཤིན་ཏུ་ཕྲ་བའི་ཕྱིར་རོ།

ཞེས་གསུངས་པའི་ཕྱིར། ཁྱབ་སྟེ་དེའི་མིང་ཞེས་གཟུགས་མེད་ལ་སྦྱར་དགོས་པའི་ཕྱིར་ཞེས་དང༌།གཞན་ཡང་རིགས་པའི་སྒྲུབ་བྱེད་ལ་དབང་སོགས་དམིགས་པར་འཇོག་པའི་དོན་ཡང་དེ་དག་ཉེ་བར་བླང་བྱ་དང༌། ཀུན་གཞི་ཁོ་ན་དེ་དག་ཉེ་བར་ལེན་པ་པོའི་གང་ཟག་ཡིན་པའི་ཕྱིར་ཞེས་ཟེར། དེ་ལྟར་ན། ཟག་བཅས་ཉེ་བར་ལེན་པའི་ཕུང་པོ་ལྔ་ཀ་ཀུན་གཞིའི་དམིགས་པ་ཡིན་པར་ཐལ། དེ་དག་ཉེ་བར་བླང་བྱ་དང༌། ཀུན་གཞི་ལེན་པ་པོའི་གང་ཟག་ཡིན་པའི་ཕྱིར། འདོད་ན། ཕུང་པོ་ཕྱི་མ་བཞི་པོ་ཀུན་གཞིའི་ཡུལ་ཡིན་པར་ཐལ། དེ་དག་ཉེ་བར་བླང་བྱ་ཡིན་པའི་ཕྱིར། འདོད་ན། ལུགས་འདིའི་འདུ་བྱེད་ཀྱི་ཕུང་པོར་འདོད་པའི་གསུང་རབ་ཡན་ལག་བཅུ་གཉིས་ཀྱང་ཀུན་གཞིའི་དམིགས་པ་ཡིན་པར་ཐལ། རྒྱུ་མཚན་སྔ་མ་དེའི་ཕྱིར། འདོད་མི་རིགས་ཏེ། དབང་དོན་བག་ཆཌ་གསུམ་ལས་གཞན་པའི་ཡིད་ཤེས་ཀྱི་ཡུལ་ཡིན་པའི་ཕྱིར་ཏེ། རྩ་བ་ལས། དབང་དོན་ལས་གཞན་དྲུག་པའི་ཡུལ། །ཀུན་གཞིའི་ཡུལ་དུ་མི་འགྱུར་ཏེ། །ཞེས་དང༌། དེའི་ཐད་ཀྱི་རྒྱ་ཆེར་འགྲེལ་ཤོག་གྲངས་ ༡༧ ལས། དབང་དོན་བག་ཆགས་གསུམ་ལས་གཞན་པའི་ཡིད་ཤེས་ཀྱི་ཡུལ་ཡན་ལག་བཅུ་གཉིས་ལྟ་བུ་དང༌། འདས་སོགས་སྒྲོ་བཏགས་