Web Toolbar by Wibiya
 
འདུ་ཤེས་དགུ། Wednesday, 13 November 2013 02:52 PDF Print E-mail

   ནགས་ཤོད་སྐལ་རྒྱན།

 

               ལུས་ལང་ཚོ་དར་བའི་གཞོན་ནུ་ཚོ། །
              ལུས་བྱད་གཟུགས་དབྱིབས་ལ་མ་ཆགས་ཤིག །

          ལུས་ཡུན་རིང་མི་འཚོ་མི་རྟག་ཉིད། །
         ལུས་འཚོ་བའི་འོག་རོལ་རྣམ་པར་བམ། །

 

 

               ལུས་ཤ་ལྤགས་སྲ་མཁྲེགས་མངོན་ཞེན་ཀྱང་། །
              ལུས་ཕྱི་ནང་མི་མཚུངས་མི་རྟག་པ། །
              ལུས་ནང་དུ་རྣམ་པར་འབུ་ཡིས་གཞིགས། །
              ལུས་ཁོང་སྟོང་མགྲོན་ཁང་སྟོང་པ་དངོས། །

 

              ལུས་བྱུག་པའི་དྲི་ཞིམ་མ་ཆགས་ཤིག །
              ལུས་རྨ་དགུ་འབྲེལ་བའི་དྲི་ང་བ། །
             གནས་ཐ་དད་རྣག་འཛག་རྣམ་པར་གནག །
              ལུས་མི་རྟག་མི་གཙང་ཕུང་པོ་སྒོམས། །

 

            ལུས་འདི་དང་དེ་ནས་ཁྲག་འགྱེད་ཅིང་། །
            ལུས་ནང་ནས་རབ་ཏུ་ཁྲག་འཛག་པས། །
           ལུས་རྒྱན་འཆང་མཛེས་སྡུག་སྙིང་པོ་ཅི། །
           ལུས་ཁྲག་གིས་རྣམ་པར་དམར་བ་ཞིག །

 

         ལུས་ཁ་དོག་མཛེས་ཀྱང་ཡུད་ཙམ་ཡིན། །
        ལུས་པགས་པའི་རྒུད་པ་མི་རྟག་པ། །
        ལུས་མཛེས་པའི་ཁ་དོག་ཆགས་ཞེན་སྤོངས། །
       ལུས་གསལ་བར་སྔོ་བས་རྣམ་པར་བསྔོས། །

 

       ལུས་རུས་པ་རུས་ཚིགས་སྦྲེལ་མ་དང་། །
      ལུས་མི་སྡུག་ཀེང་རུས་རུས་པའི་ཚོགས། །
      ལུས་རྒུད་པའི་ཁ་སོ་ལྷན་གཅིག་འཐོར། །
     སོ་རུས་པའི་འབྱོར་ལ་ཆགས་ཞེན་སྤོངས། །

 

       ལུས་ཡན་ལག་ཉིང་ལག་གཞན་དུ་འཐོར། །
       ལུས་ཆ་ཅན་ཆ་ཤས་ཀུན་འཐོར་བས། །
       ལུས་མཐའ་མ་མི་བརྟན་རྣམ་པར་འཐོར། །
       ལུས་ཡན་ལག་སྒེག་པར་མ་ཞེན་ཞིག །

 

        ལུས་ནུ་མ་ལ་སོགས་ཤ་རྒྱས་ཀྱང་། །
        ལུས་ཁྱི་སྤྱང་ཕན་ཚུན་རྣམ་པར་ཟོས། །
       ལུས་ཡིད་བརྟན་མེད་པའི་མི་རྟག་པ། །
       ལུས་ཤ་རྒྱས་མ་ཆགས་འཇིག་པ་ཉིད། །