Web Toolbar by Wibiya
 

སྙན་རྩོམ།

དེ་རིང་།

                               ནགས་ཀྱི་ཤིང་ལོ་ནས།

མེ་ལྟར་ཚ་བའི་ཉི་མ་དེས།།

ས་གཞི་འདི་ཡང་འབར་རམ་ཅི།།

བར་སྣང་ལས་ཀྱས་མེ་འོད་འཕྲོས།།

རྐང་འཐུང་ཚོགས་རྣམས་ཉོབ་ཅིང་དུབ།།

ལྕགས་སྲེག་ཐང་དུ་ལྷུང་འདྲ་དེས།།

ལུས་ཀྱི་ཕྱི་ནང་གང་དུའང་འབར།།

མལ་དུ་ཉལ་བའི་སྙེས་འབོལ་དུ།།

ཚ་བས་བརྔུབས་པའི་རྔུལ་ཆུ་འཁྱིལ།།

རི་ལས་ལྗིད་པའི་ལུས་པོ་འདི།།

ཡར་དུ་བསླངས་ཀྱང་ཚ་བས་བཟི།།

དྭངས་ཤིང་གསལ་བའི་རྣམ་ཤེས་འདི།།

ཚ་བའི་ཀློང་དུ་མུན་ལྟར་འཐིབ།།

དེ་རིང་གནམ་ལ་སྤྲིན་པ་འཁོར།།

རླུང་བུ་དེ་ཡང་གྲང་ཞིང་བསིལ།།

ཚ་བའི་དྲོད་ཀྱིས་གཙེས་གཙེས་ཀྱིས།།

དལ་ཅིག་སེམས་འདི་ལྷོད་དུ་གྱུར།།

གློ་བུར་ཅི་ཞིག་བྱས་སམ་ཅི།།

ལུས་ཕྲ་འཁྱུགས་པའི་སྣེ་མོ་ནས།།

དབྱར་གྱི་རྔ་སྒྲ་འུར་གྱིས་ལྡིར།།

སྤྲིན་གྱི་མེ་ཏོག་ས་རུ་འཐོར།།

འཛིན་མ་ལན་ཅིག་ཁྲུས་ལ་རོལ།།

རྐང་འཐུང་འདི་རྣམས་གཉིད་ལས་བསླངས།།

ད་རུང་སྒེའུ་ཁུང་བར་གསེང་ནས།།

ཆར་གྱི་ཟིལ་བ་གདོང་ལ་འཐོར།།

དེ་ནས་རིམ་གྱི་སྒྱུ་སྐར་ལམ།།

སྤྲིན་གྱི་དར་སྒོ་བྱེ་བ་ན།།

སྣང་བྱེད་བུ་མོས་འཛུམ་ཙམ་གྱིས།།

ས་ཡི་ངོས་ནས་སྨུག་པ་འཁྱིལ།།

༢༠༡༧

 

རྩོམ་ཡིག་འདི་ཐེངས་ 311 བཀླགས་འདུག

 

སྐྱོ་བའི་དངན་པ།

ནགས་ཀྱི་ཤིང་ལོ་ནས།
ཁ་སྔོན་ཡིད་འོང་འདབ་མ་དམར་ཞིག་སྨུག །
མཐོང་ཙམ་ཉིད་ལ་སེམས་འདི་སྦྲང་མ་གྱུར།།
ཚོར་བའི་གཤོག་ཟུང་བརྐྱངས་པའི་སྣེ་མོ་ནས།།
ཟིར་ཟིར་དབྱངས་ཀྱིས་ཁྱོད་ལ་སྙན་ངག་གྱེར།།

དེ་རིང་མཐོང་དུས་འདབ་མ་རྙིད་པ་འདིས།།
ཡིད་ཀྱི་བུང་བ་སྐྱོ་བའི་དངན་པ་ཤོར།།
ཚོར་བའི་གཤོག་ཟུང་ས་རུ་ལྷུང་དང་ལྷན།།
ཟིར་ཟིར་སྐད་ཀྱི་སྙན་ངག་རླུང་གིས་ཁྱེར།།

ལུས་ཀྱི་སྡོང་པོ་ཚ་བས་འབར་རམ་ཅི།།
སེམས་ཀྱི་རྩ་བ་རླན་དང་བྲལ་སོང་ངམ།།
སྲོག་གི་སྐུད་པ་ཕྲ་མོ་ཆད་དམ་ཅི།།
གློ་བུར་ཁྱེད་ཀྱི་མཛེས་སྡུག་སུ་ཡིས་བཅོམ།།

མཛེས་པའི་དུས་དེར་ཁྱོད་ཀྱི་འདབ་མར་ཆགས།།
བརྩེ་བའི་ཟོལ་གྱིས་ཆུ་ཡིས་ཡང་ཡང་གཏོར།།
སྐེམ་པའི་དུས་འདིར་ཁྱོད་ལས་བདག་གི་ཡིད།།
སུན་པའི་སྣང་བ་སྐྱེ་འདི་ཅི་ཞིག་ཡིན།།

མི་རྟག་འགྱུར་བའི་གཤིས་ཀྱི་གནས་ལུགས་དེས།།
ཡོད་ཚད་རྫུན་གྱིས་བཅོས་པའི་འཇིག་རྟེན་ན།།
ཡོད་ཙམ་ཞིག་ལ་མེད་པའི་སྐྱེ་འཇིགས་འདི།།
རྟེན་འབྱུང་སྒྱུ་མའི་མིང་གི་བཏགས་འདི་བདེན།།

༢༠༡༧–༢–༢༣

རྩོམ་ཡིག་འདི་ཐེངས་ 319 བཀླགས་འདུག

«StartPrev12345678910NextEnd»
Page 1 of 38