Web Toolbar by Wibiya
མདུན་ངོས། རྩོམ་ཡིག ལྷུག་རྩོམ། བླ་མ་དྲན་པའི་གདུང་འབོད།
 
བླ་མ་དྲན་པའི་གདུང་འབོད། Thursday, 16 February 2017 19:18 PDF Print E-mail

ནགས་ཧ་ཧ་སྐལ་བཟང་། 

བློ༵་གྲོས་ཕ་མཐར་སོང་བའི་ངེས་དོན་གྱི་སེམས་དཔའ།།

བཟ༵ང་པོའི་མཛད་འཕྲིན་མཐའ་དབུས་ཡུལ་གྲུ་ཀུན་ཁྱབ་པ།།

 

རྒྱ༵ལ་བསྟན་འཛིན་ཅིང་སྤེལ་ལ་འཇི༵གས་པ་དང་བྲ༵ལ་བའི།།

དབ༵ང་ཕྱུ༵ག་རྗེ་བཙུན་བླ་མ་སྙིང་དབུས་ནས་དྲན་སོང་།།

 

ཡང་དག་ལུང་གི་བསྟན་པའི་ཁུར་ཆེན་དེ་བཞེས་ཏེ།།

འཆད་རྩོད་རྩོམ་པས་གདུལ་བྱ་ཁྲི་སྟོང་གི་ཚོགས་རྣམས། །

ངེས་དོན་ཐར་པའི་གོང་འཕང་བདེ་བླག་ཏུ་འཁྲིད་མཁན། །

སླུ་མེད་རྗེ་བཙུན་བླ་མ་སྙིང་དབུས་ནས་དྲན་སོང་།།

 

རྣམ་དག་རྟོགས་པའི་བསྟན་པ་མི་ནུབ་པའི་རྒྱལ་མཚན།།

ལྟ་སྒོམ་སྤྱོད་གསུམ་མ་བྲལ་གཟུང་འབྲེལ་གྱི་ལུགས་བཟང་།།

རྒྱལ་དང་རྒྱལ་སྲས་རྣམས་ཀྱི་དགོངས་དོན་བཞིན་སྐྱོང་མཁན།།

ཡབ་རྗེ་རྒྱལ་བ་གཉིས་པ་སྙིང་དབུས་ནས་དྲན་སོང་།།

 

མཁས་ལ་གནས་ལྔ་རིག་པའི་དབང་ཕྱུག་ཞེས་གྲགས་པ།།

བཙུན་ལ་ཚུལ་ཁྲིམས་གཙང་མའི་དྲི་བཟང་གིས་ཁྱབ་པ།།

བཟང་པོའི་འཕྲིན་ལས་སྒྲུབ་ལ་ཟླ་མེད་ཀྱི་སེམས་དཔའ།།

གསུམ་ལྡན་རྗེ་བཙུན་བླ་མ་སྙིང་དབུས་ནས་དྲན་སོང་།།

 

རྒྱལ་བསྟན་མི་ནུབ་ཕྱོགས་མཐར་སྤེལ་བ་ལ་མི་ངལ།།

བདག་སོགས་འདུལ་བྱའི་ཚོགས་ལ་ཆོས་འཁོར་དེ་སྐོར་བཞིན།།

༧རྒྱལ་བའི་བཀའ་དགོངས་སྒྲུབ་ལ་ཟླ་མེད་ཀྱི་བླ་མ།།

གློ་བུར་ཞིང་ཁམས་གཞན་དུ་བཤེགས་པ་དེ་ཀྱེ་ཧུད།།

 

ཁྱེད་སྐུ་འཛུམ་པའི་ཞལ་རས་ཡིད་ལ་དེ་འཆར་སྐབས།།

དྲན་པའི་གདུང་བས་ངོ་གདོང་མཆི་མ་ཡིས་རླན་བཞིན།།

ངུ་ངག་དབྱངས་དང་འགྲོགས་ཏེ་འོ་དོད་དེ་བགྱིད་ན།།

རྟག་ཏུ་རྗེས་འཛིན་མཛོད་ཅིག་རྗེ་བཙུན་གྱི་བླ་མ།།

 

འདི་ཕྱིའི་ལམ་སྟོན་གསལ་བའི་སྒྲོན་མེ་ཁྱེད་མེད་པས།།

བདག་སོགས་བུ་སློབ་ཚོགས་རྣམས་ལོ་ཟླ་འདིའི་རིང་ལ།།

མགོན་མེད་ཕྱོགས་ཀྱིས་བསླད་པའི་འགྲོན་པོ་ཡི་ངང་ཚུལ།།

གཟིགས་ཤིང་ཡང་སྤྲུལ་གཞོན་ནུ་མྱུར་བ་ཉིད་ཕེབས་མཛོད།།

 

རིགས་ཀུན་འཁོར་ལོའི་མགོན་པོ་བདག་ཅག་རྣམས་ལ་བཀའ་དྲིན་དང་ཐུགས་རྗེ་བླ་ན་མ་འཆིས་པ་མཚན་བརྗོད་པར་དཀའ་བ་གནས་ལྔ་རིག་པའི་དབང་ཕྱུག་༧སྐྱབས་རྗེ་ཆོས་ལྡན་རིན་པོ་ཆེ་རྗེ་བཙུན་བློ་བཟང་རྒྱལ་བསྟན་འཇིགས་བྲལ་དབང་ཕྱུག་དཔལ་བཟང་པོ་མཆོག་རེ་ཞིག་གཟུགས་སྐུའི་བཀོད་པ་ཆོས་དབྱིངས་སུ་ཐིམ་ཚུལ་བསྟན་ནས་བགྲང་བྱ་ཧྲིལ་པོ་གཅིག་འཁོར་བའི་རྗེས་དྲན་དུ་མགོན་པོ་གང་གི་སློབ་བུའི་གྲལ་མཐའ་རུ་གནས་པ་ནགས་ཧ་ཧ་སྐལ་བཟང་ངམ།  སྐལ་བཟང་རྒྱ་མཚོས།   སྤྱི་ལོ་༢༠༡༦ བོད་ཟླ་༧ ཚེས་༢༧ ཉིན།

རྩོམ་ཡིག་འདི་ཐེངས་ 1276 བཀླགས་འདུག