Web Toolbar by Wibiya
མདུན་ངོས། རྩོམ་ཡིག དཔྱད་རྩོམ། འབྲི་རུ་ཞེས་པའི་མིང་ལ་དཔྱད་པ།
 
འབྲི་རུ་ཞེས་པའི་མིང་ལ་དཔྱད་པ། Monday, 07 July 2014 10:40 PDF Print E-mail

འབྲི་རུ་སྐལ་བཟང་རྒྱལ་མཚན།

འབྲི་རུ་ནི་བོད་ཀྱི་རྒྱལ་ས་ལྷ་སའི་ཤར་ཕྱོགས་མདོ་ཁམས་ཤོད་ཆེན་བཅོ་བརྒྱད་ཀྱི་ནང་ཚན་ནགས་ཤོད་སྦས་ཡུལ་སྨན་ལྗོངས་ཞེས་ད་ལྟ་འབྲི་རུ་རྫོང་ཆགས་གནས་འདིར་འབྲི་རུའི་ས་ཡི་ལྟེ་བར་ངོས་འཛིན། ཡུལ་སྤྱིའི་ས་བབས་ནི། ཤར་དང་ཤར་ལྷོའི་ཕྱོགས་དམའ་བ་དང༌། ནུབ་དང་ནུབ་བྱང་ཕྱོགས་ཅུང་མཐོ་བ་ཡོད་པ་དང༌། གོ་ལའི་ཤར་གྱི་གཞུང་ཐིག་༩༡.༤༧།༩༤.༢༧དང༌། བྱང་གི་འཕྲད་ཐིག ༣༡.༡༢།༣༢.༢༠ བར་ན་གནས་ཡོད། རྒྱ་མཚོའི་ངོས་ནས་མཐོ་ཚད་ཆ་སྙོམས་སྨི་ ༤༠༠༠ ཡོད། ལོ་རེའི་ཆར་ཆུའི་འབབ་ཚད་ཧོའོ་སྨི་ ༥༨༠ ནས་ ༦༥༠ བར་ཟིན་གྱི་ཡོད། ས་བབས་ཀྱི་ཁྱད་ཆོས་ནི་དབྱར་ཁར་ཚ་བ་ཆུང༌། ཉི་མ་འཆར་ཡུན་རིང༌། ཉི་འོད་འོག་ཏུ་རླངས་ཆུའི་གྲུབ་ཆ་ཉུང༌། ཆར་དང་ཁ་བ་ཅུང་མང༌། མཁའ་དབུགས་དྭངས་ཤིང་ཁོར་ཡུག་གཙང་བ། རྩི་ཤིང་དང་རྩ་ཆེའི་རི་སྐྱེས་སྔོ་སྨན་རིགས་ཀྱི་འབྱུང་ཁུངས་ཡིན་པ་ནི་ནགས་ཤོད་སྦས་ཡུལ་སྨན་ལྗོངས་ཞེས་མིང་དོན་མཚུངས་པ་ད་ལྟའི་དུས་སུ་སྨན་རིགས་ལག་སོན་ཡོད་པ་རྣམ་གྲངས་ ༣༠༠ ལྷག་ཡོད་པ་འབྲི་རུའི་ལོ་རྒྱུས་སུ་གསལ། གཞན་ཡང་གཏེར་དངོས་སོཊ་རང་བྱུང་གི་ཐོན་ཁུངས་ཕུན་སུམ་ཚོགས་པ་ནགས་ཤོད་འབྲི་ལྗོངས་ཕྱུག་མོ་ཞེས་རྒྱུ་མཚན་དུ་བྱས་ནས་བཏགས་པའི་རྗེས་གྲུབ་ཀྱི་ཐ་སྙད་ཞིག་ཡིན། འབྲི་རུའི་མིང་བྱུང་ཚུལ། དམངས་ཁྲོད་ཀྱི་གཏམ་རྒྱུད་བཤད་སྲོལ་ལ། སྒོ་ཕྱུགས་འབྲི་ཡི་རྭ་ཅོ་ཞིག་ནས་སྒོ་ང་གསུམ་སྐྱེས་པ་དང༌། སྒོ་ང་ཆུང་བ་དེ་ཁ་བཞད་སྔ་བ་བྱུང་བས་ཆུང་རྒྱུད་ཤོག་ཁ་ཞེས་དང༌། དེའི་རྗེས་སྒོ་ང་བར་པ་དེ་ཉི་མའི་དྲོད་ཀྱིས་ཁ་བཞད་པས་ཉི་མ་ཤོག་ཁ་ཞེས་ཟེར། སྒོ་ང་གཅིག་ཁ་བཞད་ཁག་པར་བྱུང་བ་བརྟེན་འབྲི་རྭ་ལུང་ཐག་བརྒྱབ་སྟེ་བསིལ་དྲོད་སྙོམས་སར་བཀལ་བས་མཐར་སྒོ་ང་དེ་ཁ་བཞད་པས་ལུང་རྒྱུད་ཤོག་ཁ་བཅས་འབྲི་རུ་ཚོ་ཤོག་གི་མིང་དེ་ལྟར་ཐོབ་ཚུལ་བཤད་སྲོལ་ཡོད་པ་ནི་རླངས་ཀྱི་པོ་ཏི་བསེ་རུ་ལས། འབྱུང་བ་སྣ་ལྔའི་སྙིང་པོ་ལས། །སྒོ་ང་ཆེན་པོ་གཅིག་ཡོང་བ། །ཕྱིའི་སྒོང་ཤུན་ལས་ལྷ་བྲག་དཀར་པོ་ཆགས། །ནང་གི་སྒོང་ཆུ་ལས་དུང་མཚོ་དཀར་མོར་འཁྱིལ། །བར་གྱི་སྒོ་ངའི་དར་ཆ་ལས། །རིགས་དྲུག་སེམས་ཅན་ཀུན་ཏུ་གྲོལ། །སྒོ་ངའི་འཕྲུལ་གྱིས་བཅོ་བརྒྱད་ཆགས། །སྒོ་ང་བཅོ་བརྒྱད་འབྲིང་བ་དེ། །དུང་སྒོང་གཅིག་ཏུ་ཡར་ནས་བྱུང་། །དེ་ནི་སྨོན་པའི་མི་བོ་ལུམ་ལུམ་ཡིན། ཞེས་སྲིད་པ་ཀློང་གི་སྒོ་ང་སྟེ་སྒོ་ང་ཆེན་པོ་གཅིག་ལས་སྣང་སྲིད་ཐམས་ཅད་གྲོལ་བར་བཤད་པ་བཞིན་སྒོང་སྐྱེས་ཀྱི་ལྟ་ཚུལ་དང་མཐུན་པར་བཤད་པ་ལས་འབྲི་རུ་ཤོག་བཞི་ནི་འབྲི་ཡི་རུས་དགུ་ལས་ཤོག་གསུམ་དང་། ཤོག་བཞི་བྱུང་བ་ཤིན་ཏུ་གསལ་བར་མཐོང་ཐུབ། སྤྱིར་རྭ་ཅོ་ལས་སྒོ་ང་སྐྱེ་མི་སྲིད་པ་དང༌། སྒོ་ང་ལས་མིར་སྐྱེ་བ་མི་སྲིད་པ་ག་ལ་ཡིན་ཏེ། མཛོད་ལས། དེར་ནི་སྒོ་ང་ལས་སྐྱེ་སོགས། །སེམས་ཅན་སྐྱེ་གནས་བཞི་དག་ཏུ། །མི་དང་དུད་འགྲོ་རྣམ་པ་བཞི། །དམྱལ་བ་པ་དང་ལྷ་རྣམས་དང༌། །སྲིད་པ་བར་མ་རྫུས་ཏེ་སྐྱེ། །ཡི་དྭགས་མངལ་ནས་སྐྱེ་བའང་ཡིན། ཞེས་གསུངས་པ་དང༌། མི་ལ་སྒོང་སྐྱེས་ཡོད་པའི་དཔེར་གྲུ་ཆག་པའི་ཚོང་པ་ཁྲུང་ཁྲུང་མོ་དང་འགྲོགས་པས་སྒོ་ང་གཉིས་བྱུང་བ་ལས་གནས་བརྟན་གྲཊ་པ་དང་ཉེ་བའི་གྲགས་སུ་གྱུར་པ་འདུལ་བ་ལུང་ལས་གསུངས་སོ། ། དོན་དངོས་སུ་མདོ་ཁམས་ནགས་ཤོད་འབྲི་ལྗོངས་ཡུལ་གྱི་སའི་ཆ་སྔོན་བཙན་པོའི་སྐབས་སུ་ནགས་ཤོད་སྟོང་བུ་ཆུང་ཞེས་པའི་དམག་གི་ལྟེ་བ་ནགས་ར་ལྤགས་ཐང་ཞེས་པ་དེར་རྫོང་ཆགས་པ་ནས་བཟུང་གནས་དེར་འབྲི་རུའི་སའི་ལྟེ་བ་ངོས་འཛིན་གྱི་ཡོད།